السلام عليكم
كنت مع واحد صاحبى عند واحد فى الحرفيين بنظبط التكييف بتاعه
إتكلمت شوية مع الراجل بخصوص إمكانية تشغيل التكييف على السرعات العالية يعنى فوق 100 كم/س
و كان رده مفاجئة بالنسبة لى
قاللى ان مش من المفروض نبدأ تشغيل التكيف على السرعات العالية و ان الواحد لازم يشغل التكييف على سرعة قليلة فى حدود 40كم/س او يفضل من الوقوف تمامآ
يعنى الواحد قبل ما يتحرك لو ناوى يشغل التكييف يشغله و هو واقف الأول و بعدين يتحرك

و تفسيره للحكاية دى
عند تشغل الكمبروسور على سرعة موتور عالية بيحصل ان الكمبروسور سرعته بتزيد مرة واحدة و بيتم ضخ الفريون بسرعة عالية جوه الكومبروسور و ده ممكن يأدى إلى كسر البساتم بتاعته - اللى بعتبر حجمها صغير جدآ و ضعيفة-

قلتله طيب ما الكمبروسور بيفصل و يشتغل على السرعات العالية؟
قاللى انه بيفصل و يشتغل بس على سيستم العربية - و دى برضه انا مش فاهمها

و بعد كده قاللى ان المفروض فيه حاجات بتتعمل صيانة للتكييف بشكل عام زى تغيير الExpansion valve و ده المفروض بيتغير كل 3 سنوات بس طبعآ محدش بيغيره
--------------------------------------------------------------

انا قولت أكتب الكلام ده و يا ريت نناقشه بموضوعية لإن انا واحد من الناس اللى بشغل التكييف فى اى وقت يعنى مش بحط فى دماغى حتة السرعة دى و أعتقد ان كتير مننا بيعمل كده برضه

ده غير ان فيه إعتقاد قديم ... ان يفضل تشغيل التكييف على السرعات العالية يعنى فوق 80 عشان يكون الموتور سرعته ثابتة و بالتالى مايبقاش عليه تحميل عالى عكس لما يبقى فى وسط البلد
و الحاجة اللى انا مش مقتنع بيها هل معقولة المهندسين اللى عملوا العربيات الحديثة دى مش عاملين حسابتهم على حاجة زى دى؟

فى إنتظار الردود