الموضوع: لكل المهتمين بفرامل الانسر البومة الأوتوماتيك

السلام عليكم أولا ... الواحد غايب عن المنتدى أكتر من 3 شهور ومش مصدق انه رجع تانى

المهم ندخل فى الموضوع ..

طبعا فى كتير - وانا أولهم - اللى مش راضيين بفرامل الانسر الأوتوماتيك ..

فا انا حبيت احكيلكم اللى انا فكرت فيه عشان أحل مشكله الفرامل دى

أولا : جاه على بالى انى أشترى فرامل brembo عشان شوفت فى monster garage وهما بيركبوها وكانت العمليه سهلة .... بس رحعت عن الفكرة عشان خفت من المصريون العباقرة يخربولى العربية .

ثانيا : فكرت انى اجيب ديسكات وتيل brembo ودى كانت عمليه سهلة وممكن اعملها بنفسى .

ثالثا ( اللى انا عملته ) : كنت جايب من السعودية ديسكات لانسر ( والمهندس طارق قال انها هيا اللى بتتباع فى مصر ) + تيل فرامل ب 250 ( والمهندس طارق قال عليه فى أحد المواضيع : بطلنا نجيبه نظرا لأن عملاء كتير كانوا بيشتكوا منه مر الشكوى وبيصفر وسىء )

المهم اللى حصل فى العربية كالتالى :

1- رجلشة الفرامل

2- تغيير الديسكات الأمامية

3- تغيير التيل الأمامى

4- سحب هواء من الفرامل

بينى وبينكم كنت حاسس ان كل دا ملوش لازمة ومش حيكون له أى تأثير على الفرامل

بس النتيجة كانت تحفة ...

الفرامل بقت تربط بقوه رهيبة , لدرجة انى كنت الاقى العربيات واقفة فى الأشاره واروح حارق جامد عشان أشوف العربية حتقف زى منا عايز ولا لأ ..

تكلفه الموضوع ده :

الديسكات 1100 ( فى مصر أرخص ) + تيل 250 ( فى مصر 385 ) + الميكانيكى 30

بالنسبة لسوء جودة التيل اللى المهندس طارق قال عليه ... فا الحمد لله انا مشيت عليه 1000 كم وزى الفل .. ولو حصل منه أى صوت أو مشاكل حقولكم عشان لو ان شاء الله طلع كويس حيبقى توفير جامد أوى فى سعر شراء التيل سواء كان sumitomo اللى بيخلص بسرعة وبيصفر أو AK المعمر واللى بيخرب الطنابير )

نصيحة صغيرة :

اللى رجله طويلة وبيقرب الكرسى ... يا ريت يرجعه ورا شويه عشان يخلى مجال لرجله انها تضغط على الفرامل بقوة

اللى بيدوس على طرف بدال الفرامل اليمين - زى منا كنت بعمل - ... يفضل انه يضغط فى منتصف البدال ... حتحس بقوة فرمله أكتر بكتير من الدوس على طرف البدال ..


يا رب الموضوع يفيدكم

المشاركة الأصلية كتبت بواسطة lovelorn

متوفرة فى التوكيل



عندى كان لونه أسود


على فكرة ak اللى التوكيل بيجيبه خسارة فيه الفلوس ... انا الطنابير عندى بقى فيها عالى وواطى كتير أوى + ان وزن الطنابير نقص 700 جرام عن الوزن الأصلى بتاعها اللى هو 10 كجم ..

انا ماشى بيه 26000 كم وبالرغم من كده لسه ناقص فيه أكتر من نصه بس دا على حساب الطنابير اللى أكلها ..

أتمنى ان التوكيل ميتعاملش فى النوع ده تانى

أولا بالنسبه للSUMITOMO فهو بالفعل اللى كان راكب فى عربيتى و هى زيرو كان لونه أسود ولكن من أول موديلات 2008 بقه بينزل فيها الSUMITOMO الأخضر زيرو من بلدها و أنا شوفته أكتر من مره فى عربيه زيرو 2008و بقه موجود فى التوكيل كمان و تقدر تشتريه و مكانش الSUMITOMO موجود فى التوكيل أصلا و كان الAK وبس و أنا من أول مره غيرت فيها تيل لاحظت ان التوكيل بيدينى تيل غير اللى راكب فيها و قلتله أنا عاوز زى اللى راكب فيها قالولى ده بردو أصلى و لما لاقيت أداؤه حلو سكت و بعدين إكتشفت العيوب اللى بدأت تظهر بسبب هذا التيل و هى ان الدركسيون بدأ يغربل مع الفرامل و بعد شويه بقى يغربل على السرعات العاليه حتى من غير فرامل و كان السبب هو بوظان الطنابير و ده مكنتش متوقعه و اكتشفته بعد الترصيص و الزوايا و الذى منه لغايه مغيرت الطنابير و اتأكدت انها هى السبب بس للأسف مكانش قدامى غير إنى أركب الAK برده لأن الSUMITOMO مكانش موجود و قولت ان ممكن يكون كان حظى وحش مع الطنبوره الأولانيه و العيب مش هيحصل تانى مع الطنبوره الجديده و لاكن نفس العيب رجع تانى و الAK بوظ الطنبوره الجديده و نفس السيناريو اتكرر تانى و ساعتها إقتنعت تماما إن الAK رغم قوة أداؤه و عمره الطويل و لكن لا يجب استخدامه أبدا و خرطت الطنبوره و ركبت تيل غير أصلى من الحاجات اللى فى السوق و جربت حوالى 5 أنواع و كلهم معجبنيش أداؤهم و لاقيت منهم اللى بيصفر و بدأ يعمل خطوط ريجه جامده على الطنبوره و منهم اللى فرملته و حشه و بيضيع مع السخونيه و غيره و غيره و كذا مره أروح للتوكيل بالSUMITOMO الأسود الخلصان اللى فكيته من العربيه أول مره لأنى محتفظ بيه و أقولهم أنا عاوز زى ده و ده اللى كان نازل فى عربيتى و إزاى ما يبقاش موجود عندكم و ان هو ده الأصلى مش اللى عندكم لغاية ما لاقيت عندهم فى مره من المرات الSUMITOMO الأخضر قولت لازم أجربه و لو انى مكنتش مستريح قوى لأنه مش أسود زى اللى معايا و لكن لما جربته حسيت فعلا انه الأصلى بجد و إنه فعلا SUMITOMO و انتهت معاه كل المشاكل و لاحظت انه بيخلص أسرع و لكنى مستمر عليه لأنى مقتنع تماما انه مينفعش خلاص أركب حاجه تانيه و كمان أصلا الAK عمرى ما سيبته يخلص للأخر لأنه بيكون بهدل الطنبوره جامد و الغربله التمام فدايما كنت بغيره و فاضل فيه نصه على الأقل لأنى كنت بفكه عشان أشوف حل فى الطنبوره إذا كنت هخرطها و لا أغيرها و لا إيه و طبعا ما كنتش بركبه تانى بعد كده ناهيك عن تكلفه شراء الطنابير الأصليه و قرف الخرط (أنا خرطت حوالى 3مرات و إشتريت طنابير جديده حوالى 3 مرات كمان) يبقه أركب الSUMITOMO ولا لأ؟؟؟؟؟؟!!!!!! وكمان هى هى لأن الSUMITOMO بيفضل زابط العربيه لأخر فتفوته فيه و لما بغيره بيكون خلصان على أخره و استفدت بيه كله و كمان حافظت على الطنبوره و أداء العربيه و الAK كنت برميه مليان.........



أما بالنسبه للفرامل الBrembo فأنا معرفش حد معين بيشتغل فيها بس أكيد الناس اللى شغاله و متخصصه فى تعديل العربيات زى إسلام مشهور و غيره و أعتقد فى ناس فى الحرفيين كمان هيبقه سهل عليهم يعملولك ده بس إسأل كويس و لو كنت أعرف حد عمل الموضوع ده مكنتش هعز عليك المعلومه.........