الموضوع: معا لألغاء الميكروباصات

المشاركة الأصلية كتبت بواسطة meemo the beast

تصدق انك طيب قوي!!
يا حبيبي أمين الشرطة بيتعامل مباشرة مع السواقين عشان البريستيج بتاع الظابط ما يسمحلوش انه ياخد فلوس علنا كدة قدام الناس لكن الحقيقة ان كلهم بيقسموا الغلة أخر النهار
يا عزيزي مشكلتنا لا تكمن في المكروباص بقدر ما تكمن في أزمة الأخلاق التي طالت كل فئات الشعب من سائقين لشرطة لموظفين و طلبة و سيدات
لأو حضرتك دققت الملاحظة ستجد ان 90% من شعب مصر يقود بلا أخلاق و ليس السائقين فقط لأنها أصبحت غابة ليس للأخلاق مكان فيها و جرب كدة أن تقرط في اظهار أخلاقك سترى أن الناس ينظرون اليك على شخص غريب الأطوار قادم من كوكب اخر
كما ان الشرطة لا تقوم بواجبها كما يجب ففي الخليج مثلا تراقب الشرطة قائدي السيارات على اختلاف أنواعهم أثناء السير و هذا شئ لا يوجد في قاموس شرطتنا نهائيا و لم نراه أصلا
لذا فمع انهيار الأخلاق أصبح الشارع غابة يفعل فيها كل واحد ما بدا له و سلملي عالشرطة المصرية
و اذا كان البعض يطالبون بمنع المكروباصات فأني من هذا المنطلق اطالب بمنع كافة أنواع النقل و كافة أنواع الأتوبيس و كافة أنواع الملاكي و المتوسيكلات و الجرارات لأن مشكلتنا هي .....الأخلاق التي لا توجد بشكل كاقي الآن

فعلا المشكلة مشكلة أخلاق...سواق بلطجي و تباع أيدك منه و الأرض و شرطة مشتركة في المهزلة
هأقولك موقف بسيط بس من كام سنة كنت راكب مكروباص مكرم عبيد ايام ما كان بيوصل مكرم عبيد المهم ممنوع طبعا يطلع كوبري أكتوبر و كلهم بيطلعوا كوبري اكتوبر و الناس عارفه انه ممنوع و مطنشة (يعني لو سواق احترم القانون و ما طلعش الناس هتضربه و هتشتمه و هتنزل تاخد مكروباص تاني الكل غلطان يعني)
المهم أمين الشرطة التخين اللي بقف في أخر المطلع ده كل يوم أراقب السواقين بيعموا معاه ايه!!
اصلي كنت بأركب كل يوم الصبح و انا رايح الشغل قبل ما أجيب عربية
المهم مرة علبتين كشري و مرة كرتين شحن و مرة علبة مارلبورو أحمر و هكذذذذذذذذذذذا كل سواق و كل يوم
اصطباحة
مرة سواق من اياهم ما دفعش و الأمين ما يعرفوش المهم وقفه على جنب قال ايه ممنوع!!!و الناس في نفس واحد يا أسطة اديله اي حاجة عايزين نمشي واداله و طول الطريق الناس بتلوم السواق انه ما مشاش حاله من الأول ليه و خلص !!!!!! الكل يأس يعني.......

أحلى حاجة لما مرة سواق وهوه طالع من التحرير عالكوبري دفع للأمين عشرة جنيه (ضعف الأتاوة يعني) فالأمين ضحك و أتبسط أفتكره بيعمل معاه واجب فالسواق على طول قاله دي ليا و للعربية اللي ورايا !!!!!!!!طبعا الناس ما بطلتش تريقة و ضحك مع السواق طول الطريق!!!!!!!! كأن قلة الأدب و الفساد بئى طبيعي جدا

ومرة سواق جابله علبتين كشري من أبو طارق بتاع شمبليون و أداهمله و طول الطريق يسب و يلعن فيه!!!
راجل بشنبات و بياكل من عرقي و عرق عيالي يعني بدل ما أأكل عيالي هوه عمال يأكل أكلهم مش مكسوف على نفسه و على شنبه!!!طاب يأخد فلوس و يجيب اللي عايزه مش بيأكل من عرق راجل تاني!!!!!!!!

المهم.............اذا كان رب البيت بالدف ضاربا.....فأهل البيت سواقين و ركاب يعملوا اللي هما عايزينه........

سلملي على اسمه ايه ده.......اسمه ايه؟؟؟؟؟؟؟؟؟ ايوة قانون المرور الجديد و القديم برضه............


و يجعله عامر...............

المفروض تحطوا خيار تالت للاستطلاع!!!!!!!!!!!

خيارات استطلاعات الرأي
الميكروباصات
الغاء الميكروباصات
البقاء على الميكروباصات

3- مش هتفرق..... خربانه خربانة

( لأن أكيد لو لغيناه البديل هيكون أدهى و أدل ولو خليناه كل الظروف بتجبره انه يكون مؤذي سواء بلطجة السواقين أو الشرطة أو لا مبالاة الركاب الجميع بلا ضمير ولا أخلاق)

انا صوت لالغائه بس ايجاد بديل كويس و عاديل و سريع ليه

نشوف البيوت المفتوحة من وراه من سواقين و تباعين و ميكانيكية و سمكرية و بلطجية و الأهم بيوت أمناء الشرطة المحترمين اللي عايشين من ورا السواقين دول هتتعوض ازاي

ممكن يتلغي من مناطق معينة خلاص هتنفجر بسببه و تستغيث بس المهم البديل

يعني شوف الزمالك مثلا وهيه مفيهاش مكروبظظظ تحس انها مش في مصر !!!

و يارب البديل ما يكونش ((((ميني باص الهيئة ده)))))))) ده بجد اللي نار و دمار

لما بيكسر عليك ولا هيهددك بس لازم تتراجع ده هيجيبلك جنب العربية كله من غير هزار

مفيهوش فرامل و كبير و زحمة و زاحم الدنيا و لازم يقف بالورب علشان الميني باص اللي وراه ما يطلعش منه و يأخد الزباين من قدامه (يأخد رزقه يعني ده يرضيكم أستغفر الله العظيم يارب)))

و الأهم السواق هيخلي باله من اللي طالع ولا نازل و لا اللي عالباب ولا خناقة كل ساعة (((الناس اللي في الطرقة العربية فاضية جوة و لازم تقلب بخناقة مع المنادي اللي بيكون قليل الأدب دايما ))))

و زي البحر بيحب الزيادة مهما حمل يظل فيه مكان للمزيد من الزباين المتكربسين جواه.........................


مالأخر الحل مش في ألغاء المكروباص ولا بقائه الحل في بناء انسان جديد مثقف نضيف فاهم مش حافظ

الحل في الاصلاح.......في كل اب و أم يربوا ولادهم و يبتدوا بيهم.........

و اللي مش متربي.......في نظام و قانون يحمينا منه و يأخدلنا حقنا من حبابي عينيه.........

احلموا معايا و ابتدوا بنفسكم........

من الاخر , لن تُحل ازمة المرور فى مصر ولا الميكروباصات الا اذا تم عمل خطوط مترو انفاق جديدة ( محترمة ) تغطى اغلب مناطق القاهره و ضواحيها .

الخط الثالث اللى بيتم تنفيذه الان , ده هيحل نسبة مش صغيرة من مشاكل الازدحام فى مصر و هيقلل نسبة الزحام فى المواصلات بشكل عمومى .

بس يا رب ميكونش الناس هما كمان فى تزايد زى الارانب .

سواقين الميكروباص جعلونى مجرما
يا جماعه بسبب سواقين الميكروباص انا حاسس ان كل يوم دمى بيتحرق
انا وانا بتعامل معاهم بحس ان انا مش انا وقربت ابقى بلطجى

بس اعمل ايه مافيش قانون يحمينا

انا بقيت استمتع جدا لما اهدى قدام ميكروباص او انرفزه
هى دى بقت متعتى فى الحياه
انا باسيب اى حد يعدينى او يطلع من شارع جانبى او يلف قدامى وده من اداب المرور بس الا الميكروباص
لو انا ماشى قدامه باستمتع انى اغلس عليه