الموضوع: السيارات الصينيه سيارات فاشله

انا علي فكرة مش متحامل علي السيارات الصينية

بل بالعكس انا اتمني انهم ينجحوا و يثبتوا وجودهم

لزيادة المنافسة من ناحية و لأن فلوسنا احنا اولي بيها

بس أنا رأيي اللي دايما بقوله لأي حد بيسألني علي عربية صيني

أنتا بتخاطر !!!!!

بتخاطر من كل النواحي

1- الجودة و لو تفتكروا اوائل بوادر الصيني مع العربية جيلي اللي ساحت لوجدها من الشمس

2- التوكيل ،، معظم توكيلات الصيني غير مستقرة و لو تفتكروا قصة الفرسان و العربية ماريو

3- بتخاطر بسهولة الصيانة و اعادة البيع و توفر قطع الغيار

عشان كده دايما اقول علي الاقل خليكم في التوكيلات الاقوي زي ابو الفتوح و البافرية


و أحب احكيلم هنا حكاية يمكن هيا اللي دفعتني اني اكتب المشاركة دي

انا كنت بعمل صيانة لعربيتي عند ورشة مشهورة في مدينة نصر و صاحبها مهندس ميكانيكا

المهم لقيت واقف عندها عربية اسبرانزا a5

لقيت صاحب الورشة بيقولي معروض عليا اخد مركز صيانة معتمد ليها

قلت اشطه دي فرصة ،، عربية منتشرة كويس و الحسابه بتحسب

قالي بس دي عربيات صيني وسخة ( اسف في اللفظ بس هوا ده اللي قالوهالي )

قلتله ليه دي اثبتت نفسها

قالي و لا اثبتت نفسها و لا حاجة و بعدين قطع غيارها غالية جدا اغلي من اي عربية في مستواها و مش معمرة

قلتله ده عادي ابو الفتوح هيقف وراها زي ما فضل ورا اللانوس و نجحها

قالي جملة و هيا دي المهمة جدا

اللانوس كان ليها تاريخ و اصل بره مصر قبل ما تيجي مصر

لكن العربيات الصيني شاسية من هنا علي موتور من هنا علي عفشة من هنا

الصراحة حسيت كلامه مقنع جدا و علمي

احنا اي عربية بنكون عارفين تاريخها و اصلها الفني بره مصر و مبتكونشي نبت شيطاني او مجرد اجتهادات من الشركات

و الشركات بتصرف مليارات عشان تطور موديل

حتي لو تلاحظوا الصين يتطلع موديل جديد كل اسبوع

و ده مش طبيعي اطلاقا واخدين الموضوع باستسهال

و نفس الكلام ده سمعته من ناس في ابو الفتوح

ان الصينين ماشيين باسلوب التجربة و الخطأ ،، و بيجربوا المكونات اللي لامينها من اي حته بدون تصميم في العميل

و ده في كل موديلات اسبرانزا يقولوا للصينين عندنا مشكلة في الحته الفلانية ،، الصينين يقوللهم ده اللي عندنا دلوقتي

و علي فكرة علي حسب كلامهم للامانة الاسبرانزا a113 من اقل عربيات اسبرانزا اللي فيها مشاكل باستثناء العفشة

عشان كده لازم نكون واقعيين

اشطه ممكن تضرب معاهم حظ و كوكتيل الشاسية و الموتور و الفتيس و العفشة و المكونات تطلع عربية معقولة رغم ان ده مش طبيعي

بس لازم نستني خمس سنين مش هاقول عشرة لأن ده في وجهة نظري المدة الكافية لعمر سيارة متوسطة في مصر

او علي الأقل العربيات تدخل اوربا و امريكا و تثبت نفسها و يكون الحكم علي موديل واحد فقط لان الشركات الصينية مالهاش معايير

قبل كده مش اكتر من مخاطرة يتحملها فقط صاحبها و لا ينصح بها احد