الموضوع: رحله البحث عن المتاعب ( رينو المقطم)توبه!

كلامى موجه لأبو عبد الله

أقول لك حاجة..بس ما تزعلش منى..
أنا مش فاهم من ردك غير الجزء المتلخص فى نقاط...
على كل أنا مش بأحب المجادلات و المناقشات و لا الخلافات و الاختلافات حتى لإن كل واحد بينام على الجنب إللى يريحه...
بس حابب أتكلم فى النقاط ال 3 إللى ذكرتها..
النقطة رقم 1 و رقم 2 ...الكل متفق عليهم...يعنى مافيش خلاف عليهم...لو كنت أوردتهم بوضوح كده من الأول لما حدث سوء فهم أو لبس....إلا إذا إنك حاسس إن الناس مش هاضماك و مش بتحب ردودك و بالتالى أى كلمة تقولها حتى لو نقطة اتفاق هيتحول لحوار و خلاف...و أنا ما أفتكرش أبدا إن ده واقع الحال هنا..
النقطة رقم 3 بتاعت لو كان شاركى...فرضا جدلا إنه حصل لشاركى...كل الزيادة إن شاركى من كتر ما اتعامل معاهم ...هيكون عارف أحسن تصرف و رد فعل فى الوقت ده...لكن مش وارد يعنى إن يبقى فيه مهندس استقبال جديد ما يعرفش شاركى و بالتالى لو EIM معاملتهم سيئة و مهندس الاستقبال الجديد هيطبق السياسة المتبعة و خلاص....لكن ده لم يحصل مع شاركى و لا غير شاركى ( فى العادة ) إلا بعض المرات مع بعض الأفراد ....مما يعنى إن هما فعلا كويسين فى العادة إلا نادرا ( العنصر البشرى سابق الاتفاق عليه فى رقم 1 و 2 )....

حاجة تانية....أنا عن نفسى لو رايح صيانة ال 60 ألف...هأبقى عارف إن وارد جدا يتقال لى سيب العربية و أبقى عامل حسابى إنى هأروح بتاكسى....أحمد مجدى كان رايح و سائل من قبلها و العقيد خالد نصحه يسيبها تقريبا....و حتى لو مش هاتبات ..متوقع إنه يوم طويل عريض هناك..دى أكبر صيانة...
هو بس ما كنش عامل حسابه على كمية العملاء فى وقت زى ده من السنة و بعدين فعلا لو كنت رحت الساعة 8 كنت هتلاقى نفسك داخل من بدرى..لكن 8:30 هتلاقى طابور...إنت بس إللى متعود على وضع الفضيان فى العبور...

فى النهاية..حكاية معروف و لا مش معروف....مش هاتفيد أوى كده زى ما انت متخيل...هى بس خبرة التعامل مع الموقف...لكن كانوا هيعملوا إيه زيادة فى ظروف حسب الوصف كانت صعبة و فى صيانة 60 ألف....تعرف..أنا لو مكان أحمد عبد المقصود و لا شاركى و لاقيت الوضع كده..بصراحة من نفسى..أقول لهم خليها لبكرة و لا بعده...تتعمل كويس أحسن ما نستعجل...أو آخدها زى ما هى و آجى يوم تانى و يبقوا عملوا معايا واجب...أريحهم و يريحونى...طبعا ده مش هاينفع مع أحمد مجدى علشان السفر

و بعدين يا باشا احنا قطعنا نفاصيل العربية من زمان هى و التوكيل بحثا و تمحيصا و استعراضا لكافة وجهات النظر...

انا هاقول الظروف اللى كانت هناك بعد اذن كاتب الموضوع عشان احنا كنا هناك فى نفس الوقت

1- الضغط هناك ابتدى بعد 10 الصبح و مره واحده طوابير كتيره

2- فيه احساس بنقص فى عدد العمال لما تتفرج على الورشه

3- كان فيه عربيات بتخش من غير دور زى ماقال بس اللى سمعته جوه خلانى احس ان الحكايه ديه مش مهمه او مش كوسه زى ماهى باينه يعنى فيه مثلا ناس جايه تعاين حاجه و هما عارفين انهم جاييين و مثلا انا كنت بكشف على حاجه و انا ماقتنعتش بالكلام قالولى بص و جرب و لو حسيت انك مش مستريح تعالى فى اى وقت من غير حجز ولا وقفف فى الطابور و اسأل على xxxx و ده ريس جوه الورشه

4- فيه خلل جامد فى موضوع الquality control العربيه ماتجربتش تقريبا فى المشاكل اللى انا عايزعها و كان همهم يخلصوا المشاكل الكبيره و فيه خلل رهيب فى حركه العمل من تسليم الورق حتى تسليم السياره عن طريق شخص لا يعلم مكان السياره اصلا تحس ان فيه هرجله و عدم انضباط

5- الاستقبال كانوا بايخيين شويه و تحس انهم مش فاضينلك و بيترجموا مشاكلك مش بالظبط زى مانت عايز بس مش سيئين اوى بس لازم تزن عليهم و تشرح ميت مره و يستحسن تكلم الصنايعى مباشر عشان توصله المشكله بالظبط

6- ماهنش عليهم ينضفوا ازاز العربيه و هما واخدين منى 1800 جنيه تيل و صيانه فيهم مصنعيه مش اققل من 1000 جنيع و ضرايب

7- انا شفت واحد هناك بيفاصل مع واحده و بيعدل ليها الفاتوره و طبعا ده شئ بايخ و يفسد المصداقيه

8- هما هناك عارفين الضغط و لو حد راح و لقى ان الدنيا زحمه و جى فى معاده ممكن يحولوه العبور

هوافيكم فى بوست جديد لو الاداره ماوقفتنيش حول مشكلتى معاهم كامله

و شكرا

المشاركة الأصلية كتبت بواسطة chato_eg

أنا لمست موضوع الزحمة من بعد 10 ده ..مخصوص علشان كده هأبقى هناك يوم الإثنين من الساعة 8 بإذن الله

هما فعلا مهندسين الاستقبال هناك مش بلطافة بتوع العبور...لكن لاحظ إنهم 2 فى العبور و 2 فى المقطم...لكن فى كام عربية بتدخل فى اليوم الواحد فى المقطم و كام واحدة فى العبور...!!!...أعتقد من هنا جه الفرق..
يمكن برضه فرق عدد العربيات إللى داخلة ...بيخلى مهندس الاستقبال على خبرة أعلى فبمجرد ما انت تبدأ شرح المسكلة بيكون عرف خلاص إيه هى...إحنا بس بنبص لها من ناحيتنا و إنه لازم يسمع مننا و كده و هو تلاقيه بيسمع نفس الكلام 10 مرات كل يوم...خصوصا يعنى إن العربيات الرينو فى مصر مش متنوعة...هما كلهم ميجان ii على كمان شوية clio و تحابيش من ميجان i و الباقى فى المناسبات و الأعياد يشوفوه
فى المقطم تقريبا مش بينظفوا العربية خالص فعلا..مش بس الزجاج
حكاية الفصال قد لا تبدو زى ما إنت متصور...ممكن يكون جدال على أى حاجة زى موضوع أحمد مجدى مثلا لما حسبوا التيل و الطنابير بالغلط...أو كنوع من الترضية إدوها خصم 5 % مثلا...لكن أنا بصراحة ماشفتش فصال بالمعنى قبل كده
مش فاهم حكاية التحويل للعبور...تقصد إيه يا طارق باشا ؟؟؟

1- موضوع موظف الاستقبال معايا الراجل كاتب كلام انا ماقلتوش و مش المشكله اللى عندى عشان هو ماعرفش يترحم اللى بقوله عشان كان متسربع

2- نصيحه حاول تكتب فى ورقه قبل ماتروح كل الشكاوى اللى عندك من العربيه عشان متنساش حاجه

3- لو معادك 10 الصبح ورحت 10 و لقيت طابور طويل ممكن تروح للمهندس هناك او الراجل اللى بينظم الدخول وقوله انك شايف الدنيا زحمه و عايز تروح العبور هيكتبلك ورقه تروح بيها العبور اكنك حاجز هناك

4- الموضوع كان فصال مباشر ومافهوش ترضيه و ديه واحده داخلتلهم جوه فى الحسابات و قالتله كتيير و كده ماينفعش ونزلهم شويه و كلام من ده يعنى فصال زى بتاع العتبه كده و ده طبعا مش كويس

المشاركة الأصلية كتبت بواسطة lion99990

يا رجاله المنتدى امبارح يوم الخميس الساعه 11 الصبح لقيت تليفون جايللى لاقيته من رينو بصراحه اتفجات لان كل مره كنت بروح الصيانه الدوريه كان يكلمونى تانى يوم او يومين بالكتير اوى المره ديه اقعدوا 8 ايام و بعدين كلمونى المهم لما لاقتها بتقؤللى اخبار الصيانه معاك ايه كله تمام بصراحه مدرتش بنفسى غير لما قلت كل اللى فى نفسى ومن سوء المعامله لتاخير الوقت لكتابه اشياء زياده فى الفاتوره ثم اعاده تصحيحها و كمان على موضوو
ردود المهندس حسام ووائل لما بيقؤلولى ابقا روح العبور بدام هناك احسن بكل بروود و موضوع الاوتوماتيك و اللمبه و موضوع نقص قطع الغيار عندهم و ابقى كلمنا كمان اسبوع بصراحه قلتلها كل حاجه كل حاجه زى مايكون كنت مستنى حد يكلمنى و انفجرت فى الكلام طبعا هيا بكل ذوق تفهمت الموقف و امتصت غضبى و قلتلى حتقدم الشكوى ديه و بصراحه رايحتنى بالكلام لسا بقى الفعل و قالتلى حتخلى حد يكلمنى تانى من الاداره بس لغايه دلوقتى محدش كلمنى
بس بصراحه انا ارتحت اوى
ارتحت لما حد منهم كلمنى و اشتكيت مش مهم اللى يحصل بعد كده بس اهو فى حد سمعنى منهم و المفروض استنى مكالمه منهم فهل ياترى حيتصلوا تانى و لا لأ ؟ ربنا اعلم

ربنا ييسرلك امرك وتبقى مبسوط عالطول ان شاء الله

وفي انتظار المببررات للأخوة عن تأخر التوكيل في طلبه لمدة 8 ايام على غير عادتهم بعد يومين

لا وكمان بعد ما كتبت الموضوع هنا في المنتدى تصدق ممكن يكون قلبهم كان حاسس بالموضوع
لأن اكيد هما معرفوش حاجه عن الموضوع ده اللي هنا في المنتدى

على فكره برضه انا لا اقول ان الخدمة سيئة او جيده
انا كلامي كله للاخوة اللي كانو واخدين مسألة اني بقول فيه ناس بتتعامل غير البعض علشان لهم كلمة هنا
وسبحان الله التوكيل حس من غير ما يعرفش المشكلة اللي هنا
سبحانك يا رب