أرجو سرعة الاستجابة : تانك البنزين اتخرم

**Ahmed_Ramadan** · 10-08-2009 06:25 PM

السلام عليكم
الحقونى يا جماعة ......كنت مسافر على طريق مصر اسكندرية امبارح بالعربية ( كورسا سيدان 2005 )
و جت حديدة فى التنك رشقت فيه و فضت كل التنك و اضطريت أرجع على كساحة

المهم دلوقتى أنا لازم أصلحه النهاردة ضرورى يا ريت لو حد يعرف حد موثوق به أصلح عنده التنك بس يكون فى الحرفيين أو قريب من جسر السويس

أرجو سرعة الاستجابة

**mahgary** · 10-08-2009 07:16 PM

ممكن اسد مكان الحديده بصابونه لحد ما تروح للحرفيين

**M.FOUAD** · 10-08-2009 07:24 PM

مش محتاجة غير انك تروح عند اي سمكري يلحمهالك

**mrwho1982** · 11-08-2009 12:10 AM

السلام عليكم اولا

بص حضرتك تروح الاول عند ميكانيكي بيفهم يفك التانك ويحدد الداخل والخارج ولازم يحددهم لان لو حصلت ا\لغبطة هاترفق جدا

بعد ماتفكو تروح لبتاع لحام يحط في التانك شوية مية لان ريحة البنزين ممكن تولع المهم انزل علي الحرفيين لو تعرف ح هناك وهايخلصهاللك
علي طول بس خاليك واقف علي دماغو علشان ماحدش يفتيللك في العربية

وماتخافش المشكلة بسيطة ( شكة دبوس )

**michohat** · 11-08-2009 01:37 AM

برضه بقالى كام يوم وانا شامم ريحه بنزين فى الشنطه والصالون عندى ولما رحت للميكانيكى لقى التانك مخروم من النص (معرفش اتخرم ازاى مفيش برومه فيه) ففكه وراح لحمه وجربه بعد اللحام وركبه تانى الموضوع خد منى الفترة من الظهر للعصر

**amarakl** · 11-08-2009 03:44 PM

التانك لازم يتفك وبعدين يتغسل أكثر من مره ويبات فى مياه وخل لتانى يوم وبعدين يتلحم بس ده مش حل دائم للأبد لأن مكان اللحام هيتسبب فى بدايه بارومه نتجه وجود معدنيين مختلفين وسائل ومياه
ممكن حضرتك تسأل على تانك أستيراد وتشوف ثمنه كام متنساش أن الموضوع ده سيفتى يعنى ممكن تكون راكن العربيه فى الحر والأسفلت سخن وتكون بعيد عنها أو مسافر وتبدء تسرب بنزين يتسبب لا قدر الله فى حدوث حريق
ربنا يسترها معاك ومعانا ومع جميع الناس

**Ahmed_Ramadan** · 12-08-2009 03:37 PM

شكرا لنصايحكوا الغالية اللي استفدت منها...........انا نازل النهاردة علشان أجيب تنك استيراد من الحرفيين

ادعولى أجيب واحد نضيف الجديد فى التوكيل 1800 جنيه .............محدش يعرف يعمل كام استيراد ؟؟؟