الموضوع: البوجيهات فى كلمات

المشاركة الأصلية كتبت بواسطة ahmedtefagad

thx alot ya basha 3ala mawde3k ely mal7ash 7al :)

مبلاش موضوع الفرانكو عرب ده .....وخللى البساط أحمدى
ههههههههههههههه

المشاركة الأصلية كتبت بواسطة tabeb

جزاك الله خيرا يا بشمهندس كان ليا بعض الاستفسارات
١‏_ايه معني البوجيهات ٣ شمعة مثلا وتفرق ايه عن العادية؟وازاي اعرف عدد شمعات البوجيهات الانسب للموتور بتاعي؟
٢‏_ازاي اسلاك البوجيهات بتأثر علي السحب؟وازاي اعرف انه فيه عيب في البوجيه نفسه او في الاسلاك؟
٣‏_موتوري ١٦٠٠ كامة واحدة عايز احسن نوع للبوجيهات والاسلاك يحسنوا السحب وتمنهم بالتقريب
جزاك الله خيرا وكل سنة وانت طيب

أنا شفت البوست ده ....ومش متجاهله ولا حاجه
بس سيبهولى لغدا .....علشان أروق معاه فى الرد

مهندس سمبر
جهد كبير واستفادة اكبر
مشكور جدا على هذا التحليل الرائع
عندى سؤال ازاى الكهربائى بيتأكد ان كابلات البوجيهات سليمة وان منظومة الاحتراق ليس نها خلل من الكابلات والبوجيهات
هل فى صوت معين يصدر عن الموتور افهم منه انه يوجد خلل ؟

وشكرا لجهدك المتواصل فى المنتدى ....

المشاركة الأصلية كتبت بواسطة tabeb

أغدا القاك؟ياخوف فؤادي من غد

أنا مش حقولك
فات الميعاد .....ولا دارت الأيام .....ولاغيره
علشان لا أعطيك فرصه ....لثورة الشك

المهم

١‏_ايه معني البوجيهات ٣ شمعة مثلا وتفرق ايه عن العادية؟وازاي اعرف عدد شمعات البوجيهات الانسب للموتور بتاعي؟

معنى بوجيه 3 شمعات ....يعنى بوجيه عادى جدا بنفس الشكل اللى فى الموضوع ....ولكن
بدل قطب سالب واحد (الطرف المثنى على الجسم المعدنى من تحت ) بيبقوا تلاته متوزعين على 120 درجه على محيط الجزء المعدنى من تحت
طيب بتفيد فى أيه القصه دى
معروف أن الشراره بتيجىء أزاى على نهاية البوجيه
كهرباء بضغط عالى جدا ماشيه فى القطب الموجب بتكسر مقاومة العزل (بين ثغرة البوجيه )
لما الكهرباء دى بتعدى فى هواء الثغره وتخترق هذه الثغره ....
بترتطم بالقطب السالب( الطرف المتنى ) ومن هنا بتحصل الشراره

حفكرك برضه لما بيكون عندنا سلك كهرباء من بتوع أنارة الشوارع ويروح واقع على الأرض بيعمل أيه .....بيروح مطلع شرر كهربى ....
هو ده اللى بنكلم عليه ......ومش حقولك هو صحيح الهواء غلاب ههههههههههههه
تعالى معايا بأه علشان نفسر الكلام سويا
1- فى البوجيه الشمعه الواحده
بيكون عندك مصدر أطلاق واحد للشرر الكهربى
2- فى البوجيه أبو تلاته شمعه
بيكون عندك 3 مصدر أطلاق للشرر الكهربى (لأن فيه 3 قطب سالب ...3 رجول يعنى )
طيب أيه مميزات وعيوب كل نوع
فى الحقيقه اللى حقولهولك ده أجتهاد من عندى ...وليس ناتج من معلومه مكتوبه ( الحق كده ....مش الحب كده )
1- أبو شمعه واحده
- مركز أطلاق الشراره واحد فقط
يعنى بؤرة أشعال مخلوط الهواء والبنزين واحده فقط
يعنى حريق أكثر نعومه
- البوجيه يا يشتغل يا ميشتغلش .....أبيض يا أسود ....لأن فيه مركز واحد لأطلاق الشراره
- بيمتاز بسهولة ضبط الجاب ورخص الثمن كمان
- لو بوجيه قاطع ومخسع شويه بتعرف بسهوله
من تتليته المكنه والرجه والرعشه وخلافه
2- أبو 3 شمعه
-مركز أطلاق الشراره ( عدد 3 مركز )
طيب مركز عطل ....الباقى شغال ...أذا دى ميزه
- وجود 3 مراكز شراره من وجهة نظرى غير مستحب فنيا
لحدوث تضارب وبرجله فى مراكز أطلاق الشراره
وبالتالى بتجد بعض المحركات ....من الصعب جدا أستعمال بوجيه 3 شمعه فيها
- طبعا أغلى فى الثمن ....
فى الحقيقه ده التصور اللى قدرت أوصله حاليا
عن الفرق بين البوجيه الواحد شمعه وأبو تلاته شمعه

كفايه كده ......علشان الست قالت ( للصبر حدود )
بالمناسبه ....عن نفسى لا أفضل الا البوجيه الواحد شمعه
مثل ال ngk أو البوش والدنسو وخلافه ....من زوى الرجل الواحده

٢‏_ازاي اسلاك البوجيهات بتأثر علي السحب؟وازاي اعرف انه فيه عيب في البوجيه نفسه او في الاسلاك؟

أسلاك البوجيهات هى اللى بتوصل الجهد الكهربى من الأسبراتير للبوجيهات
طيب الجهد هرب منه شويه فى السكه ...أبه اللى حيحصل
الجهد اللى حيوصل للبوجيهات حيبقى ضعيف ومخلع ومش قادر يخترق ثغرة البوجيه
يعنى ضعف شراره ....يعنى سحب تعبان
وموضوع العيب من البوجيه أو من الأسلاك بيبان من أختبار قوة الشراره من عند البوجيهات ( أسلاك ) .....أو بأخراج البوجيهات والكشف عليها
وتحليل جميع الأسباب

٣‏_موتوري ١٦٠٠ كامة واحدة عايز احسن نوع للبوجيهات والاسلاك يحسنوا السحب وتمنهم بالتقريب

أنواع البوجيهات الشائعه وذات السمعه الطيبه معروفه ..وأنا قولت عليها من قبل
وبالنسبه للشمعه الواحده حتكون فى حدود من 30 الى 40 ج بكتيره
بالنسبه للأسلاك ....أسأل وأبقى قوللى ..................هههههههههههههههه ه

المشاركة الأصلية كتبت بواسطة aymn2003

مهندس سمبر
جهد كبير واستفادة اكبر
مشكور جدا على هذا التحليل الرائع
عندى سؤال ازاى الكهربائى بيتأكد ان كابلات البوجيهات سليمة وان منظومة الاحتراق ليس نها خلل من الكابلات والبوجيهات
هل فى صوت معين يصدر عن الموتور افهم منه انه يوجد خلل ؟

وشكرا لجهدك المتواصل فى المنتدى ....

الله يخليك يا أستاذ : أيمن
طيب شوف البوست السابق فيه المعلومات اللى أنت عاوزها ولا لا
ولو ليك سؤال ...أبقى أتفضل وقوله
وحفكر معاك بأذن الله

كفايه غنا بأه
علشان ( أبو الوفا أبو الوفا ) وخلينا فى الجد
ههههههههههههههه

يا سلام بقي لو تتحفنا بموضوعات شبيهة عن طقم الكهربا والموبينة والاسبراتير:ob_mak1[1]:

بأذن الله

عندي مشكلة مش عارف سببها
العربية بتدور بصعوبة الصبح ولو ركنتها 5 ايام مثلا تدور بعد حوالي ربع ساعة!
الكربراتير لسه منضفه باسبراي امريكي عند الميكانيكي
ولما تدور الصبح لازم ازود بنزين والا تطفي لو علي السلانسيه ويحصل فيها رعشة جامدة تختفي بكبس البنزين
كمان لو واقف في اشارة العربية بتترج مني بس مش بتطفي

تلت حاجات عاوزك تطمن عليهم مبدئيا
1- فلتر هواء تمام
2- بيك السلانسيه يكون سالك ونظيف
3- أكشف على البوجيهات كشكل عام
لو الأمور دى مجبتش نتيجه
خللى الميكانيكى يضبطلك خليط السلانسيه ( من خلال معايرة مسمارى الهواء والبنزين )