نظام الأشعال فى محركات السيارات

**Abo.Omar** · 29-08-2009 07:32 AM

انت كبيييييييييييييييييير بجد
وفى انتظار البقيه

**samirayad** · 30-08-2009 12:30 AM

الله يخليك يا أستاذ : أحمد

**tabeb** · 30-08-2009 12:50 AM

المشاركة الأصلية كتبت بواسطة samirayad

ياباشا أطلب ولا يهمك ....وعلى فكره أنا عامل الموضوع ده علشان أنت طلبته منى فى موضوع البوجيهات ...دوس هنا
وأنا
لسه فاكر
ومش حقولك
فات الميعاد ............
هههههههههه

يافندم ربنا يكرمك
ودايما نستفيد من موضوعاتك المميزة كده ان شاء الله

**samirayad** · 30-08-2009 01:30 AM

الله يخليك
وكل عام وأنتم بخير

**samirayad** · 01-09-2009 12:14 AM

أستكمالا لموضوع الأشعال فى محركات السيارات
حنتكلم الأول عن دور المكثف فى دورة الأشعال التقليديه
- يتكون المكثف من مجموعة شرائح (رقائق )أو ألواح معدنيه بينها شرائح معزوله
أنظر الشكل آخر البوست الحالى

- معروف أن المكثفات عامة ( وواضحه من الأسم ) تقوم بتكثيف أو تخزين الطاقه الكهربيه للأستفاده منها فى لحظات نقصان الطاقه فى الدواير الكهربيه
حيث يقوم المكثف بأكتساب الطاقه الكهربيه وتكون طاقه داخله اليه فى أتجاه معين ( أتجاه دخول للمكثف )
وفى لحظه أخرى تفقد عندها الطاقه يقوم المكثف بدفع الطاقه المختزنه داخله فى الأتجاه المعاكس (خروج طاقه من المكثف )

فوائد المكثف فى دورة الأشعال العاديه

- يعمل على زيادة القدره الكهربيه الدافعه المستنتجه داخل الملف الثانوى للبوبينا والذاهبه الى الأسبراتير لتوزيعها على البوجيهات ( لزوم شراره قويه )
- فعند قطع دائرة الملف الأبتدائى بين البطاريه وملف البوبينا الأبتدائى ( بواسطة الأبلاتين ) يحدث تفريغ للطاقه الكهربيه المختزنه فى المكثف فى عكس أتجاه التيار الأصلى
وهذا يؤدى الى سرعة أنهيار وتلاشى المجال المغناطيسى الناتج من مرور التيار من البطاريه الى الملف الأبتدائى للبوبينا
يعنى للأسراع بتقطيع التيار بين البطاريه والبوبينا
- يقوم المكثف بحماية نقاط التلامس للأبلاتين من التلف واللدعان ( بيخللى الطرفان بتوع التلامس ميتلحموش ببعض )
وذلك بسبب التيار والحريق الناتج فى تلك المنطقه بسبب التيار الكهربى
مما يساعد على أنتظام عملية تقطيع التيار بواسطة الأبلاتين والحفاظ على أنتاج جيد للفولت العالى الخارج من الملف الثانوى للبوبينا
بيمتص التيار لحظة هجومه على الأبلاتين ....ويقوم بتفريغ التيار لحظة مفارقته للأبلاتين ......
من الآخر عاوزين نقول أن المكثف هو الحارس الأمين على عمل الأبلاتين

نتكلم شويه خفاف عن نظام الأشعال الألكترونى فى السيارات الحديثه
- نظرا للعيوب التى نواجهها فى أستعمال نظام الأشعال التقليدى
لجأ العلماء الى أستعمال نظام أشعال أكثر تحملا وكفاءة فى الأداء
ألا وهو نظام الأشعال الألكترونى
فى المحركات الحديثه سريعة الدوران تم الأستغناء عن النظام التقليدى فى توليد الشراره
ولقد حلت أشباه الموصلات ( الدايودات والترانزيستورات )..........
محل قاطع التلامس والمكثف بما يسمى المشط الألكترونى
حيث هنا يتم تقطيع تيار البطاريه للملف الأبتدائى للبوبينا بطريقه الكترونيه
نظام ON/ OFF ....وبالتالى تمكين البوبينا من تحويل تيار البطاريه المنخفض فى القيمه الى تيار عالى الجهد لكى نتمكن من الحصول على شراره قويه فى البوبينا لازمه لدورة الأشعال

من مميزات نظام الأشعال الألكترونى
1-الحصول على جهد عالى لازم لتوليد شراره قويه حتى عند أٌقصى عدد لفات للمحرك
2- عمر أطول ....حيث لايوجد نقاط تلامس ( أبلاتين ) عرضه للتلف والحريق واللحام .....اللى بنقول عليها لدعان الأبلاتين .....
3- لايحتاج صيانه ...لأنه يقوم على نظرية المفاتيح الألكترونيه داخل المشط الألكترونى
لا فيه صنفرة أبلاتين ولا غيره .
4- أعطال الأشعال الألكترونى تكون فى أضيق الحدود عن النظام التقليدى
حتى فى ظروف التشغيل الصعبه وخصوصا ظروف التشغيل فى الطقس البارد وعند أذدحام الطرق وخلافه

**Dr Zezo** · 02-09-2009 02:42 PM

تمام و الله يا باشمهندس

100%

بس استفسار بسيط حتي تكتمل الصورة في ذهني

هل يمكن توضيح مراحل عمل دائرة الاشعال - التي تحوي الابلاتين و الكوندينسر- منذ انطلاق التيار الكهربائي من البطارية الي لحظة وصولها الي البوجيهات في خطوات 1؛2 وهكذا...

**samirayad** · 02-09-2009 09:19 PM

شوف ياسيدى ....حنتكلم على الرسمه البسيطه دى
1- مع قفل الكونتاكت 2 التيار حيمشى من البطاريه
الى ملف الأشعال 3 ( البوبينا يعنى )
2- التيار بتاع البطاريه أبو جهد كهربى (12 فولت ) حيمشى فى الملف الأبتدائى التخين ( الخارجى للبوبينا ) أبو لون أسود تقيل
3- لاحظ كده أن نهاية الملف الأبتدائى للبوبينا متصله بالملف الثانوى ( الرفيع الداخلى الخفيف ...اللى ملفوف من داخل الملف الأبتدائى )
ومتصل فى نفس الوقت عند النقطه 6 وبيتفرع الى نقط ألأتصال (الأبلاتين 6 ) ومنطقة المكثف 5
4- مع فتح وقفل نقط أتصال الأبلاتين ( زى كونتاكت برضه ) بيتم تقطيع التيار ده وتشويه موجة سريان التيار مع الفولت ( زى ماقولنا )
وبالتالى بيتم عمل أنهيار للمجال المغناطيسى اللى حصل حول الملف الأبتدائى بسبب مرور تيار البطاريه ....
5- النظريه دى بأه اللى بتخللى عملية التحويل من جهد منخفض فى الملف الأبتدائى للبوبينا
مع حدوث تشوه للتيار والفولت
هى دى اللى بتخللى الملف الثانوى ( الرفيع ) يطلعلنا تيار كهربى عالى الجهد يطلع من نصف البوبينا
6- بأه عندنا تيار عالى الجهد دلوقتى طالع من نصف البوبينا ورايح للأسبراتير 4
7- بيبقى رايح لنصف الأسبراتير عند مركز الشاكوش ونازل على الشاكوش
8- بص على خط التيار اللى ماشى على شمال الشاكوش كده
9- هو ده طرف التلامس مع وش الأسبراتير ( ومن داخل الوش ) أجزاء نحاسيه متوزعه على محيطه من الداخل على حسب عدد أسطوانات المحرك
10- مع دوران الشاكوش ....بسبب أن عمود الأسبراتير بيدور بسبب ترسه السفلى اللى بيدور بسبب ترس خاص على عمود الكامه
11- بيتم توزيع التيار ( عالى الجهد ) على مخارج الوش بتاع الأسبراتير حسب تقسيمة المكنه ( ومن الوش الى البوجيهات مرورا بوسيلة النقل ...اللى هى كابلات البوجيهات )
طبعا فى الشكل الوش متقسم على 60 درجه ( لكل نقطة أتصال داخل الوش ) لأن دى دورة أشعال لمحرك 6 سلندر
فى المحركات الأربعه سلندر ( المنتشره معانا ) بيبقى الوش متقسم على على 90 درجه
على أساس حيبقى فى الوش أربع نقاط للأتصال مع طرف الشاكوش ومع دورانه ( حسب تقسيمة المكنه )
أرجو أن يكون الشرح المبسط ده ......أدى الهدف المطلوب