الموضوع: رابطه محبي ومالكي الريجاتا

حل مشكلة تأخير الدوارة صباحاَ .. وحتى بعد ترك السيارة ليومان :

اساس المشكلة : المتهم الاول فى مشكلة تأخير الدوارة الكربراتير والمتهم الثاني البوجيهات والمتهم الثالث طرمبة البنزين
لو جربت حل المشكلة الاولي هتتعب لانى صلحت 2 كرابراتير وف الاخر العيب بيرجع تانى بعد اسبوع ومصاريف ع الفاضى غير انهم جابو اجل الكربراتير وعلشان اريح نفوخى جبت كربراتير جديد وبعد شهور لقيتة بيأخر ف الدوارة باردو
البوجيهات لو مرطبة لازم هتأخر دوارة .. لو متأكد ان البوجيهات سليمة او جديدة زيرو يبقى بلف طرمبة البنزين بيرجع البنزين .. ودي باردو غيرتها مرتين تلاتة عشان احل مشكلة البلف واتضح ان الطرمبة اصلا بتنزل كدة .. غباء يعنى
وبالتالى بعد محاولة حل اصل المشكلة مع المتهمين المذكورين .. قرر القاضى تأجيل الجلسة لاجل غير مسمي !
ولذلك قررت اعدل لحل المشكلة .. وتم حلها بفضل الله منذ عام وهدور معاك من اول لمسة حتى ف عز الشتا والتلج صباحاَ

الحل الاول : طرمبة بنزين كهربا 1.3 بار ميتسوبيشى .. هتجيبها من اي محل قطع غيار يابانى سعرها ف حدود 200 ج
الحل دة رغم انة عملي جداَ .. الا انى لا انصح بة .. هذكر السبب

طريقة التركيب : هتوصل ترامل للكليبسات بتاعتها بدلاَ من قطعها .. وهتوصل الفردة الكهربا مع الداخل بتاع الكونتاك فى الموبينة .. والفردة الارضى هتوصلها ف اي حتة ف صاج العربية .. وبالتالى لما تفتح كونتاك هيوصل كهربا للموبينة وللطرمبة معاَ

عيوبها
فى العربيات الحديثة فى كمبيوتر بيتحكم فى الطرمبة دي .. انما عندنا اللى هيحصل انك اول متفتح كونتاك وقبل ما دور هتشتغل الطرمبة عمال على بطال مش هتقف .. وبالتالى لو نسيت وسبتها مفتوحة للاكتر من 10 ثوانى هتشرق لك العربية وهيكون فية ضغط راجع علي الطرمبة وبالتالى منصحش بيها لان اغلبنا بينسى القصة دي

الحل التانى والعملي اكثر :
تركيب 2 فلتر بنزين بدلاَ من واحد ... هتشتري فلتر بنزين وتركبة قبل الكربراتير مباشرة بحيث يكون مستوي كالمسترة
وليس قائم .. علشان يتخزن فية البنزين .. والعربية هدور معاك بأذن الله حتى لو سبتها يومين تلاتة

الحلول دى انا مجربها ف عربيتى اخرهم موضوع 2 فلتر دة كتجربة ونحجت معايا واي حد حابب يشوفها عندي يشرفنى طبعاَ .

المشاركة الأصلية كتبت بواسطة walsayed

السلام عليكم
انا اشتريت العربية كانت عالية قوى لما بكون معاية حمل كتير كانت بتبقة حلوة ولما بكون راكب لوحدى كانت فى المطبات بترزع جامد
فلسة رايح من يومين لعفشجى قالى العلو الجامد غلط على العربية وعلى الشاسية
فلقيط عندى 3 ورقات قالى الريجاتا بتنزل بورقتين بس
بس كدة حتحك معاك فخلى ال3 ورقات بس تنهملى شوية ووطهالى شوية فمنسعاتها العربية تمام
فخلى عربيتك 3 ورقات وبينهم الكوتش بس متخلهمش متنين قوى عشان متعلاش جامد

اكبر خطأ انك تتنى ورق السست والدق والاحماء بالنار بيخليها تتكسر لا قدر الله لو كلت مطب
او تهبط اكتر ويبقى ملهاش اي قيمة مع الوقت والمطبات هتلاقيها نعمت زيادة عن اللزوم
كان سهل جداَ اعمل كدة ف السوستة عندي لكن فضلت اشتري السوستة بتاعتها الاصلية بدون احماء
بالنار ودق .. هتحس بكلامي مع الوقت انتظر عليها سنة هتلاقيها محملة ع المساعدين عندك وهتلاقي العربية بتنطط من ورا ف مطب او نقرة .. حاول تغيرها بعد سنة او اول متحس انها نعمت زيادة عن اللزوم

هقولك على حاجة كمان .. كان فية سوستة 3 ورقات عند صديق عايز ينعمها عشان الدبدبة عارف عملت اية ؟
حطيت اسطوانة غاز كبيرة مليانة انا و 3 افراد طلع عنينا عبال محطناها ف عربيتة وسبتة بيها لمدة اسبوع واحد فقط .. النتيجة العربية هبطتت زي مهو عايز بدون اي صنيعية وبدون دق .. نفس الفكرة بعد فترة من الوقت حديد السوستة بيلين مع الطريق . ان شاء الله خير

المشاركة الأصلية كتبت بواسطة alomda1974

أحسن الله إليك كما أحسنت إلى بهذه المعلومة /////// ولكن لى استفسار (( طمعا فى حسن خلقك وطيب أصلك ))
دلنى على مكان موثوق فيه لأشترى منه السوستة الأصلية الفبريكة + الفوانيس الأمامية والخلفية ..
علما بأننى من الزقازيق وهذه الأشياء مبالغ فى ثمنها - وإن وجدت جيدة أصلا
وجزاك الله خيرا

بالنسبة لمكان تشتري منة سوستة بصراحة اتعاملت مع ناس كتير وللاسف لا اثق ف حد فيهم
وعموما هشوف احد الاصدقاء معانا ف المنتدى عندة بعض قطع الريجاتا هشوف عندة السوستة ولا لاء

المشاركة الأصلية كتبت بواسطة alomda1974

بارك الله فيك أخى الكريم وزادك من فضله العميم وشكرا لاهتمامكم وردكم السريع
سؤال تانى وآسف للإطالة
بدأت شدالعربية فعلا (( للأسف )) وسوف تنتهى رخصة السيارة بعد أسبوع وكذلك الفحص ولن أتمكن من شد العربية وتقديمها للفحص فى هذا التاريخ ////////////
فما أنسب حل فى هذا الموقف ؟ هل ينفع أجدد الرخصة بدون السيارة ؟ وأؤجل الفحص حتى أنتهى من شد العربية ؟!!!!!!!!!!!!!!!!

طالما بدءت يبقى متقولش " للاسف " الحمد لله وان شاء الله خير متقلقش
بالنسبة لموضوع الرخصة حصل معايا بالظبط الرخصة انتهت اثناء شد العربية وكان فية فحص
ونقل ملكية واثباتها ع الرخصة .. متقلقش كل اللى هيحصل ان حضرتك تروح تطلع شهادة بيانات
مع شهادة المخالفات فقط لا غير .. يعنى الزيادة بس شهادة البيانات .. ولو زاد التأخير عن ل 3 شهور
بتدفع مبلغ بسيط غرامة حوالى 150 ج " موضوع الغرامة والتاخير مش متأكد منهم بدقة "
انا اتأخرت شهر ونص وطلعت شهادة بيانات فقط دي الزيادة مع الاوراق المطلوبة وخلصت ف يومين
ربنا يوفقك ان شاء الله ولا تنسانا من دعائك .. ومتنساش الصور بعد متخلص شدها بأذن الله