الموضوع: رابطه محبي ومالكي الريجاتا

مرحبآ بأغلى أعضاء في أغلى منتدى

يا جماعة أنا كنت عايز أسألكم أنا عندي الدبرياش ناشف قوي بس كان شغال تمام
لكن من كام يوم كده لقيت حاجة غريبة...
الدبرياش بقى لازم قبل ما اقف تمامآ بالسيارة أكون دايس عليه جااااامد لآخر سنه فيه عشان السيارة ما تقفش مني يا كده يا إما أمورها قبل ما تقف وذلك بالإضافة أيضا إلى أن علامة البطارية اللي في الطبلوه دايمآ منوره أو بتنور وتطفي طول ما العربية دايرة فهل هناك علاقة بين اللي حصل في الدبراش ده وعلامة البطارية ولو ما فيش علاقة أومال إيه اللي حصل في الدبرياش ده ؟

حاجة تانيه وهي إن السيارة عندي تحتاج إلى طقم شنبر وجوز كبالن ومقصات...فممكن أعرف دول سعرهم كام بالإضافة لمصنعية تركيبهم تقريبآ وإيه افضل حاجة أجيبها ؟

وآسف على الإطالة
وشكرآ,,,

بعد اذن الاستاذ nicegypt

المشاركة الأصلية كتبت بواسطة nicegypt

اللى حصل يا سادة ان الكربراتير القديم رحت صلحتة اكتر من مرة سواء عند ميكانيكى او عند متخصص كربراتير واتظبط وزي الفل واصبح فية عيب انة بياكل بنزين بشكل مبالغ فية الصفيحة بتعمل 100 ك بالعافية بنزين تــسعين ! .. لتر البنزين الواحد بيعمل 5 ك بدون حرق . فطبعا مبالغ فية ودة الاستهلاك بعد الاصلاح .. المهم قلت اجيب جديد كعادتى معها ومع كل قطع غيارها جديدة زيرو حتى الورق او السوست ومساعدين وخلافة .. شجعنى الميكانيكى فعلا على الجديد .. نزلت وملقتش الكربراتير الجديد والبائع قالى بكرة ..
فى اليوم التالى ذهبت لمحل قطع الغيار محمد يوسف اللى ف الدقي وكعادة اي بائع الكلام الحلو فى اقناعى ان الكربراتير الصينى زى الفل وخدة على ضمانتة .. طيب والايطالى ؟ قالى مفيش ومش هنزلة تانى لان سعرة 1500 ج ومحدش بياخدة .. المهم اخدت الكربراتير جديد بـ 700 ج سألتة على فاتورة قالى مفيش ! وانا من امتى بعطيك فاتورة ؟ لان مفيش ورق فواتير .. طبعا زية زى اي بائع قطع غيار .. طيب فية ضمان ؟ لاء مفيش طالما ركب ف العربية قبل ميركب خلي الميكانيكى يبص علية ويفحصة كويس لو لقى اي حاجة بتاعتى وهرجعهولك انما يركب لاء .
طبعا كنت اتأخرت على الميكانيكى اللى بيقفل بدري جداَ بعد اذان العشاء ! . ركبنا الكربراتير ومحدش كان عارف الاسلاك دى بتاعة اية وحصل كالعادة اطار كوميدي ومن عادتى الهزار والتريقة على اللى مش فاهم قرأت المكتوب وعرفنا وركبنا وخلصنا .. بعد كدة ظهرت لنا مشكلة جديدة وهى ان العمة متركبش على الكربراتير الجديد ! لانة 4 مسمار والتانى 3 بس .. اخدت العربية وطرت على السمكري خليتة ظبط العمة وعمل لها ثقب رابع لمسمار جديد .. بعد كدة رجعت لة تانى علشان نركب .. ولاحظت ان اول مركبنا الكربراتير السلانسية بيعلق .. ولما خرجت بعد تركيبة مباشرة وذهبت للسمكري صادفت زحمة اضطرتنى للوقوف لقيت السلانسية بطل ! .. رجعت قلت للميكانيكى قالى عادى لسة الكربراتير بياخد ع العربية ! ال يعنى بيتعرفو على بعض .. ناقص اجيبلهم شمسية و2 عصير
بعد مخلصنا ركنتها وتانى يوم رحت مشوار طويل ما يقرب من 300 ك ولحظى السيئ ان البلد يومها كانت زحمة رهيبة سواء دائري او طريق سريع ولجان ورادرات والدنيا واقفة .. واذ اجد وانا طالع من اشارة صوت ماتور عالى ركنت على الفور فكيت العمة لقيت باب السرعة معلق رجعتة وكملت مشواري شوية ويحصل نفس النظام شغلانة بقى بعد كدة السلانسية قطع مع نفسة .. وشوية فية سلانسية وشوية لاء .. طيب كدة بدءنا ندخل ف مشاكل جامدة وانا راجع العربية بقت بـتـنـتش كأن مفهاش بنزين بس شغالة عادى .. تعبتنى ف المشوار دة لحد مروحت
تانى يوم رجت ادوار العربية الاقى غياب ف الدوارة رهيب !! الكربراتير القديم مكنش كدة !
احضر لة واطب طب علية يدور ويبطل .. وبعد معاناه دارت مع فووووووو .. يعنى الماتور عالى على اخرة والاكسلتير
مش معلق بس كأنك دايس بنزين ع الاخر .. شلت العمة تانى قلت جايز سلك الشفاط معلق او الاكسلتير
كلة سليم وزى الفل .. مشيت بيها بالطريقة الغبية دى كل مرفع رجلي ثنة صغيرة بس من على الدبرياج
الكاوتش يصرخ ف الارض وتجري بسرعة صاروخية .. تجميع سرعة رهيب ومبالغ فية .. وصلت للميكانيكى فك بك السلانسية وتم توصيلة بالكهربا دايركت لقيناه بيعلق فعلا شوية شغال وعشرة لاء .. اخدت القطعة دى وطرت على محمد يوسف ... قلت لة اللى حصل .. قالى العربية فين ؟ قلت لة اجيبها لك دى فى " بين السرايات " يعنى خمس دقايق اكون عندك اجيبها ؟ قالى ماشى هاتها نبص عليها وهنشوف اللى نقدر نعملة انما نرجعكربراتير لالالالالالالالاء ..
قلت لة اجيبها وربنا يسهل .. طرت اخدتها ورجعت لهم .. الاقى المحل مــغــلق !!!
اتصل محدش يرد !!! لية كدة بقى ؟؟؟ الحركة دى بهدلتنى جامد جدا جدا فوق ما يتخيل بشر
دخلت فى دوامة سخونة ماتور وزق وبطارية نامت وطلبت توصيلة للبطارية من صديق
عمل لى توصيلة خطأ حط الناقص مكان الزائد وطبعا شرز والمارش طار .. وهلم جرا ... !

اتصلت بيوسف وشرحت لة الموقف قالى تعالى على فرع الملك فيصل هنشوف المشكلة .. اصبح المشكلة الموجودة تنحصر فى التالى :
1 - اكسلتير معلق على الاخر والباب نفسة مش معلق .. يعنى كأنك ضاغط بنزين ع الاخر
العربية بطير منك + سخونة ماتور وصلت لـ 110 درجة لانى لما بقف فى اشارة الماتور بيكون عالى فبيسخن جداَ يعنى تخيل انك واقف فى اشارة ورجلك على البنزين ع الاخر طبعا الماتور بيسخن
2 - مفيش سلانسية .. تقف شوية تلاقى الماتور بطل بمزاجة يأما السلانسية شغال بمزاجة وطبعا زق !
3 - البطارية خلصت من كتر تشغيل المارش طبعا لان مفيش سلانسية
4 - سخونة فى الماتور ناتجة عن باب السرعة المعلق
5 - ضعف فى الفرامل مع سرعة رهيبة ناتج عن عدم انتظام هواء الماتور اللى بيضغط على السرفو
6 - المارش اتحرق فيما بعد بسبب توصيلة فى الطريق وانا رايح لهم

يعنى لا معاك مارش ولا بطارية ولا سلانسية ولا فرامل واكسلتير معلق وسرعة عالية وسخونة ماتور شديدة ملقتش قدامى غير اركنها على كدة وافك القطعة واروح لهم .. الاول دورت على ميكانكية واتعزز عليا اكتر من واحد .. سيبتهم وركبت على الفرع التانى .. اول حاجة طلبوها هات 100 ج .. نعم لية ؟
حق البك دة .. طبعا لاء اتكلمت معاهم بكل احترام وفهمتهم الموقف واتصلت بيوسف وقلت لة قولهم
انا مش هدفع حاجة انا جايب حاجة جديدة عطلانة وكمان ادفع .. بعد شد وجذب الراجل تفضل مشكوراَ
بالاتصال بيهم وبلغهم يدهوها لى .. بعد ما اخدتها لقيت القطعة مختلفة تماما عن بتاعتى .. يا جماعة مش دى محدش صدق بس اعطيها لميكانيكى فاهم وهو يتصرف على اساس انى كفتجي .. اخدتها ومشيت رجعت للعربية وفكيت القديمة واتأكد ان مش هية .. اتصلت بية قالى دور على محل فلان خد منة القطعة دى ركبها وبكرة تعالى قلت لة دة قريب منى قالى ايوة 100 متر ولا 200 متر ! تخيلو بقا مشيت من شارع العشرين فيصل لحد بعد محطة حسن محمد فية محطة بعدها على طول بعد البنك مش فاكر اسمها لما رجلي ورمت وف النهاية مش عندة طبعا ماشى بسأل الناس اللى يقول معرفش واللى يقولي قدام شوية يعنى بعيد ؟ يقولك مش فاكر بس هو هنا على نفس الصف .. زقيت العربية للمرة المليون ودورتها وبقيت بتجري من نفسها بسرعة عالية وطبعا غرز لان لو وقفت مش هدور غير الماتور اللى بيسخن واللى عايز اندفاع هوا شديد علشان يبرد ويكمل معايا وينزل عن الـ 90 .. رجعتها البيت بفضل الله وصادفت شباب هيفة واحد راكب فـيرنا فكرنى بشد .. بيقولي براحة على نفسك يا كابتن .. وبيطلب يشد فهمتة انها عطلانة وانى مش بشد ولا حياة لمن تنادى .. المهم .. تانى يوم الصبح فكيت الكربراتير ودمى محروق وجريت ع محمد يوسف قلت لة على البهدلة اللى شوفتها وانة قفل ودة مش كويس قالى انة كان فاكر انى هاجى بكرة !! وبيقولي انى مأكدتش انى هاجى انهاردة .. يا سلام .. ما علينا كنت نسيت البك رجعت جبتة وركبتة ونضفتة
ورحت لة تانى بالعلبة وكلة ولقيت ان الادب مش نافع .. اثناء الكلام دة كان فية راجل كبير واقف ومستمع بشدة وبيسألنى فكرتة من الناس اللى بتحب القصص والحواديت وبقيت مش مهتم بية ومش برد علية .. ببص على العلبة اللى معة لقيتها كربراتير .. سألتة دة لعربية اية ؟؟ قالى اخت بتاعتك !! ريجاتا مكيفة !! نعم !! نفس الكربراتير الصيني اللعين !!! الراجل حصل عندة تلفيات رهيبة العربية ضاعت من قدام على حسب كلامة معرفش يتحكم فى العربية
بسبب السرعة العالية لما علق باب السرعة والفرامل الضعيفة حصل تصادم امامى راح فية سربتنية وريداتير ومروحة وفوانيس كاملة ومحتاج زرجينة طبعا مش محتاجة كلام وقنطرة وهلم جرة ! والراجل كل دة منتظرنى اخلص اخدتة من ايدة وقلت لة الوضع كذا كذا طلعنا على حماية المستهلك عملنا تقرير واخدو الكربراتير الاتنين دخلو بيهم جوة وطلعو تانى مش عارف عملو فيهم اية تقريبا عندهم ريجاتا ركنينها تحت الكرسى .. المهم قالو هنشوف الموضوع وهنتصل بيكم ! وطلبو انهم يروحو يشوفو عربية الراجل .. وطلبو يشوفو عربيتى .. قلت لهم انى الحمد لله فضل
من عند ربنا وحدة السيارة مش محتاجة تقرير لان مفهاش حاجة .. الناس فى حماية المستهلك زي الفل يا جماعة وبيقومو بواجبهم وؤاكد على ذلك .. ورجــاء شديد يا جماعة اللى عندة اي حاجة عطلت منة اياَ كانت يبلغ حماية المستهلك مش هتخسر حاجة مش هيعطلوك وفعلا ناس شغالة صح .. المهم طلبت منة نطلع ع القسم نعمل محضر الراجل اعترض وقال كفاية حماية المستهلك اصريت على كدة ورحنا وعملنا محضر وقبل ميقفلة طلب اننا نمضى احنا الاتنين وعرفت انة كتبة بـ بلاغ واحد .. لا يا استاذى انا عايز بلاغين مختلفين .. اشمعنى يعنى ؟؟ لانى عايز يكون
فية بلاغين للاسباب طبعا يطول شرحها .. المهم عملت بعض الاتصالات وكلها قالت الافضل اروح اعمل فى مكان تانى اخدت الراجل ورحت وقلت لة متجبش سيرة مشكلتك وخليك شاهد بس وقول اللى حصل معاك بالظبط بس كأنك معايا
ودى مفهاش اي مشكلة .. خلصنا المحضر وبلغت حقوق المستهلك بأنى عملت بلاغين
رحت رجعت الكربراتير واخدت فلوسى والحمد لله وروحت البيت ركبت الكربراتير الاستيراد اللى كنت رامية ف الشنطة والكربراتير القديم كان عند الميكانيكى .. لقيت الميكانيكى جاي بيفتح الكابوت وشوية بيقول بسم الله الرحمن الرحيم الكربراتير فين !
قلت لة الكربراتير رجع واخدت فلوسى وركبت الاستيراد ودورت العربية ومشيت وركنت وهطلع انام !

اعتذر ان كنت طولت عليكم حبيت اعرفكم بالتفاصيل وباللى حصل وان المشكلة واحدة معايا ومع الراجل
ايـاكم والكربراتير الصيني اللعين ! .. وربنا يستر طريقكم كلكم اللهم امين

عناوين وتليفونات محلات قطع غيار الماركة الشهيرة فى مصر فيات

الكيلانى
فى 21ش شامبليون - معروف
25799069
25758439
0123316961
ا
لمصرية التركية شوكت
فى 3شارع الوادى من جعفر الصادق الحى السابع مدينة نصر
22626841
22604519
فى 52أ شارع محمد فريد - عابدين
27942940
27956958
فى 13 ش التوفيقية - سنتر السرساوى
25759662

انترناشوينال اوتوبارتس كومبانى
متخصصين ووكلاء لقطع غيار السيارات الايطالية عامة
فى 11ش معهد ناصر - الساحل - شبرا
24315194
22046646

خلفاء على العسال مستورد قطع غيار فيات
فى 107ش رمسيس وسط البلد
25754128
0123496344

شلبى غالب42 ش د البطراوى من عباس العقاد مدينة نصر
24016087
24028792

فيات 2000
فى 12ش زكى التوفيقية
25787533

ميدو شبرا
فى 77ش رمسيس اول التوفيقية
25774453
25789203
ا
خوان الدقاق
فى 5ش زكى - التوفيقية
25755336

فيات 2000
107 ش رمسيس
وسط البلد, القاهرة
التليفون:25751539,25792302

فيات سنتر
59 ش على عبد اللطيف, عابدين, القاهرة
التليفون: 27958771

ميكانيكال فيات
14 ِش التوفيقية , وسط البلد, القاهرة
التليفون:25795972

شركة الفتح
سوق التوفيقية
التليفون:25757682

منقول للافاده + بعض تعديلات واضافات من عندى

ايه يا جماعة الرابطة اتحسدت ولا ايه ؟فين الاعضاء وفين النشاط اكيد الشتا عامل عمايله /مش عاوزين كسل وانا هبدأ بسؤال يخرجنا من البيات الشتوى دا/ عاوز احافظ على التبلوه من الشمس ومن التشققات و انا شوفت ناس كتير حاطين فارّو ولكن منظرو وحش فهل فى حاجة بديلة ومنتظر اراءكم