الموضوع: رابطه محبي ومالكي الريجاتا

المشاركة الأصلية كتبت بواسطة mahmoodallam

ما تقلقش يا أ.حسين (nicegypt)
أ.ياسر (regata) راجل محترم جدا وأكيد هيفضل وراك لحاد ما يوصلك الامانة ،

الامانة وصلت يا استاذ محمود وجزاك الله كل خير
بالنسبة للاستاذ ياسر فهو انسان محترم جدا جدا فوق الوصف .. ولم يسعفنى الوقت للاستضافتة وعمل الواجب معة
وانا مكنتش قلقان على فكرة !!! مش عارف اية سبب انك بتقول انى قلقان ! لا بالعكس طالما الموضوع مع حضرتك ومع استاذ ياسر مستحيل اقلق والله
الارقام عندى فعلا كلها ريجاتا ومكنتش مجمع دة رقم مين والموضوع مع مين . واشكر حضرتك جدا جدا واشكر استاذ ياسر جداَ .. جزاكم الله كل خير

استاذ ياسر : بالنسبة للستارة الخلفية اللى عند حضرتك ينفع تتعدل وتبقى زي عندى .. الماسورة اللى عندك بتاعة الستارة
فيها طبة من تحت بلاستيك الطبة دي بتتشال بتلاقى الماسورة مفرغة .. الماسورة دى بيركب فيها قربة قوة صغيرة
وسوستة بتركب على الماسورة من برة هتلاقى فية 2 ثقب صغير جدا .. للاسف انا كنت شايلها من عندى ف العربية
لان فعلا مليش نفس للعربية نهائى .. بالنسبة لحساس الركن هدور لحضرتك على فيديو على النت لنفس الجهاز اللى كان عندي
وابعتة لحضرتك برايفت .. علما انة مش مهم قوي لاننا بنركن زي الفل ف غز الضلمة كمان .. كل ما ف الامر شوية دلع ليها
ومتستهلش الدلع دة خلاص

انا اللى اعرفه انه موجود والله اعلم
واكيد لو مش موجود ممكن يكون بيتباع او يتصنع لانى شفت ناس فى سيارات ريتمو عاملينه لان الريتمو شاسيها ضعيف وعلشان مايفتحش بيعملوله الشداد

المشاركة الأصلية كتبت بواسطة mentaloss

محدش بيرد عليا ليه يا رجاله انتوا عملتوا عليا رباطيه ولا انا دخلت رابطه تانيه ولا ايه .. يا رجاله :)

احنا منقدرش منردش عليك لكن بالنسبه لى حكاية الغوايش والفتس للاسف معنديش خبرة
منتظر رد من المهندس حسين او الاستاذ ريجاتا

هرد على كلام حضرتك نقطة نقطة .. ولو انى مكنتش عايز اقرب من الرابطة تانى هههههههههه مقدرتش بقا

المشاركة الأصلية كتبت بواسطة elhamshare

السلام عليكم ورحمة الله وبركاته

اعزائى مالكى الريجاتا

تحية طيبة لكم جميعاً

انا الحمد لله بقيت من مالكى الريجاتا ولسه جايبها فى 3/6/2011

ريجاتا نوفا 89 الحالة العامة جيده براى اصحاب الخبرة

بس انا مش مبسوط من اداء السيارة وحاسس انها افضل من كده ولانى معنديش خبرة فى مجال السيارات مش عارف اعمل ايه ومحتار فى التعامل مع السيارة وبمشى بيها وانا خايف يحصل عطل او اى حاجة فيها ومعرفش اتصرف.

وكل اللى عملته ظبط الفرامل وغيرت البوجيهات وسلك البوجيهات والابلتين و الكوندنسر واداء السيارة اصبح افضل من قبل بس برده لسه الاداء مش جيد ....

والميكانيكى فتحلى فاتحه وقالى الماتور خفيف وعايز طقم شمبر وشوية حاجات كده قلى تكلفتها 1500 جنيه وطبعاً فى الوقت الراهن استحاله لانى لسه شاريها.

(ملحوظاتى على الاداء)
1- السيارة مخنوقه .... يعنى العربية عند الرابع سحبها كويس اول لما اجيب الخامس لازم ادوس على البدال للاخر عشان تبتدء تسحب وتاخد وقت عقبال لما تستجيب وتعدى السرعة 80.

* كتير قوي انك تجيب الرابع على 80 .. هات التالت افضل لانك كدة بتقل العربية بنفسك وبأيدك انت اللى بتقلها كدة .

2- الدريكسون احياناً بيبقى تقل وفجأة بيبقى خفيف.

* الدريكسيون خفيف على اسكاترا .. لكن لما بتكون العربية واقفة ع الارض مش بتتحرك اكيد بتكون تقيلة .. لما تخلي
العجلة تلف شوية وانت بتركن او بتطلع من ركنة هتلاقية كويسة معاك .. يعنى خلي العجلة تمشى شوية عشان تخف

3- فى المطبات بجيب التانى واجى اطلع العربية بتترجرج.
* طبعا دة شيئ طبيعي .. ياراجل تانى !! اطلع ع الاول بعد المطب مش الغيار التانى .. لو رجرجت محتاج تظبط كهربا
وباردو هتبقى تقيلة معاك بس هتطلع بدون رجة .. سبب الرجة .. الكهربا واطية بتاعة الموتور والافضل اطلع ع الاول
مش هتلاقى رجرجة .

4- الفتيس فى الخامس و الخلف مبيجيش بسرعة لازم اتقل عليه عشان يلقط
ا*لخامس والمرشدير لو فيهم مشاكل يبقى محتاج تغير غوايش ليهم وممكن بلية .. وعلشان تغيير دول لازم الفتيس يتفك
وهيكلفوك جديد حوالى 400 ج تقريبا .. بدون مصنيعة طبعا .. وياريت تغير البرميل .. لو تقدر تعمل عمرة للتفيس
عند بتاع فتيسات افضل .. هيغير لك الغوايش البايظة + بلية + برميل .. لما تبدء بأذن الله تبقى تقولي واقول لحضرتك
ارخص وافضل مكان تجيب منة الحاجات دى .. العبد الفقير الى الله اصبح موسوعة قطع غيار للريجاتا .
لو عملت عمرة للموتور والفتيس انسى العربية بعد كدة .. علماَ انى عملت كدة عمرة للموتور وعملت عمرة للتفيس
والاتنين تمام الحمد لله .

5- فى المطبات الكثيرة بحس ان العربية بتتغربل ورجرجه من كل مكان
* دة شغل عفشة طبعا .. لازم تعدي على عفشجى يبص ع المقصات والجلب والعفشة عموما ويشوف محتاجة تربيط
ولا محتاجة تغيير اي حاجة .. علماَ انك لو عديت على اي صنايعي هيكلفك فلوووس .. يعنى هتعدي يكون معاك فلوس اوكى؟
معكش بلاش تروح لحد .

أسف للاطالة بس انا محتار لا اعرف ميكانيكى كويس يبص عليها ويقلى الحقيقة ولا كهربائى ولا عفشجى

ارجو الافادة ورأيكم ايه اللى اعمله عشان يتحسن الاداء واللى يعرف صنيعى كويس يقولى لو سمحتم انا ساكن فى الزاوية الحمراء

وشكراً لكم على سعة صدركم

* ياااة انت ف الزاوية .. على كدة يعتبر جيران .. انا شقتى ف حدايق القبة .. بس الميكانيكى بتاعى والعفشجى عند
جامعة القاهرة .. حوالى نص ساعة او ساعة الا ربع من الزواية لعندة .. ونصيحة منى مهمة جداَ متخليش حد مش فاهم
يلغب ف العربية .. انا لسة خسران 1200ج راحو ف الارض علشان خاطر حتة جاموسة لعنة الله علية معرفش يظبط العربية
وطبعا كرهنى ف الدنيا وف العربية .. وبقيت اصلح العربية من اول وجديد وابدء من جديد تانى بمبلغ جديد واعطل نفسى
اسبوع تانى !!! فدايماَ دور على صنايعي ممتاز يريحك مش ياخد اللى ف جيبك ويقولك اخري كدة حلوة كدة !!!
لو محتاج ميكانيكى او عفشجى بس عند جامعة القاهرة قولي . واهلا بيك ف الرابطة ..

واعتقد اننى قد لا اشارك ف الرابطة مرة اخري واعتذر على ذلك.. والله اعلي واعلم .. ع الاقل ف الوقت الحالي .