الموضوع: رابطه محبي ومالكي الريجاتا

المشاركة الأصلية كتبت بواسطة coolteem

وحشتونا يا جماعه .. تغيبنا بعض الوقت لظروف خاصه .. انا عملت شوية شغل فى العربيه كالاتى :

1- تغيير البطاريه من 55 امبير الى 70 امبير جديده نسر فارتا بضمان سنه . 280+القديمه

2-تغيير بوبينه او ملف الاشعال - يابانى - 80

3-تغيير وش + شاكوش الاسبراتير . بعد ماطلع عينى 25

4-تغيير المارش بعد مطلع عينى برضه160 غيرته بمارش شاهين

5-تغيير طقم تيل فرامل امامى 35

6-تغيير طقم طنابير امامى بنوع اسمه فاليو 115

7- عمل عمره للكاربراتير 180

8- ضبط تاكيهات 30

9- اعادة ضبط تقسيمة سير الكاتينه - بعد الاخ اللى ركبه الله يسهله -

10- اغرب حاجه حصلت خلال الفتره اللى فاتت لما نزلت الموتور عشان نلم الشاسيه لانه فتح.- بعد السمكرى مخلص شغله الميكانيكى سقط الموتور كنت فى الشغل ورحت عليه لقيت الموتور عالى من ناحيه عالى لدرجة ان الكبوت مش عايز يقفل . المهم عملنا شغلانه وهيصنا الميكانيكى يقول سمكرى والسمكرى يقول ميكانيكى ومفيش نتيجه قعدنا شغالين ليله بطولها للفجر وبرضه مفيش فايده المهم الكبوت قفل نتيجه اننا قصينا من رجل العمه بتاعة الكاربتي لان انا زهقت ومفيش نتيجه اخدت العربيه وروحت بعد كده رحت لميكانيكى تانى برضه مفيش نتيجه . فضلت متعقد من العربيه رحت للعفشجى رحت لميكانيكى ثالث وبرضه مفيش فايده . المهم ربنا اذن ان المشكله دى تخلص بس ازاى ... كنت ماشى بالعربيه فى حلوان الحراره عليت جامد والمروحه مش مأثره الحراره عماله تعلى وصلت 110 ركنت فتحت الكبوت استنيت لما العربيه هديت شويه ازود ميه الميه تنزل تحت العربيه على طول بصيت تحت مش شايف حاجه غير طبيعيه المهم اتصلت على واحد قريبى فى حلوان وهو سواق قالى انه مش فى حلوان بس هبعتلك واحد الواحد ده بقى ربنا يكرمه اول مشاف الوضع قاللى دى طلمبة ميه تعالى ورايا وعرفنى بميكانيكى فى العزبه القبليه بنقوله على الحكايه قالى افتح الكبوت اول مبص على الموتور قالى مين اللى مركب الموتور ده قلتله واحد قالى الله يسهله . قلتله تعرف تعدله قالى اتفضل اقعد وجابلى كرسى وشاى اروح عنده يقوللى لو سمحت اقعد مكانك قعد شغال فى العربيه يجى ساعتين غير طلمبة الميه ( جبتها ب120 ايطالى ) وعدل الموتور وكان فى مسمار مكسور فى الطنبوره بتاعة الكرنك هى دى اللى غلبته قعد يحاول مع بقية المسمار لما طلعه وظبط العربيه تمام وخد 50 جنيه . رغم ان موضوع الموتور ده لوحده كنت مستعد ادفع 200 جنيه بس يتعدل . طبعا قبل ميقوللى ان القاعده مقلوبه وان الموضوع بسيط ومن وقتها اى حاجه العربيه اروحله على طول.. وارجو انى مكنش طولت عليكم . بس قولت اهى تجربه يمكن تنفع اى حد

اكتر حاجة بضايقنى الروح والمجى على الميكانيكية بكرة فيها نفسى
بتمنى ان اعرف اعمل اى شىء بايدى بحس باستمتاع على الاقل هقدر اسلك نفسى
لانى موسوس كان اللى هيعمل شىء مش هيرجعه لاصله
تجدنى بلم المسامير واحافظ عليها اكثر منه

فى الصورة السابقة وهى صورة الكاربراتير لعربية ريجاتا ونوعه fiat lancia ارجو من حضراتكم من لديه المعلومة ان يخبرنى بمكان مسمار الهوا ومسمار البنزين هحاول اضع صور اخرى من جانب الكاربراتير

دى صورة من الجانب الايمن وانت واقف امام السيارة

مين معة ريجاتا اس 85 العادية " مش النوفا " ؟
محتاج اسألة على شيئ معين بشكل ضروري ..اللى معة يقولي ابعت لة برايفت

السادة اعضاء الرابطة المحترمين انا عارف انى انضميت للرابطة من وقت قصير وميصحش انى ابتديها اعتذار بس وعدتكوا الجمعه اللى فاتت انى انزل موضوع العازل بالصور بس نظرا لظروف وفاة حمايا مقدرتش اعمل حاجه وبعتذر لكل الاعضاء عن تقصيرى بس ان شاء الله هكون متواجد معاكوا الايام الجاية وفى اقرب وقت هعمل الموضوع ان شاء الله ده ان مسبقنيش حد ونال شرف تجهيز الموضوع وبكرر اسفى مرة تانية

المشاركة الأصلية كتبت بواسطة nicegypt

مين معة ريجاتا اس 85 العادية " مش النوفا " ؟
محتاج اسألة على شيئ معين بشكل ضروري ..اللى معة يقولي ابعت لة برايفت

يارب تكون كويس وبخير يا بشمهندس حسين واسف على اختفائى الفترة اللى فاتت

بالمناسبة عربيتى s85 عادية مش نوفا وتحت امرك فى اى حاجه فى استطاعتى