الموضوع: تقييم نص سوى للنيو لوجان

جزاكم الله خيراً على تشجيعكم وكلامكم الجميل وربنا يقدرني واقدر اقدم حاجه تليق بناس محترمه زيكم يا جماعه ان شاء الله.

المهم نبدأ بقى في الجد الموتور والمشي بالعربيه والمطبات والكلام الكبيير...كده شربنا الشوربه واستعدينا كلنا للتقييم.

زي ما قلت في البدايه استجابة العربيه لدواسة البنزين كانت فوق الرائعه واستجابة الموتور كمان للتسارع محترمه جداً لدرجة اني خفت وشلت رجلي لان فعلاً من غير ما تحس هتلاقي نفسك حرقت ودخلت في 5 ار بي ام.........ده في رأيي يرجع لحاجتين ..... ممكن يكون انبهاري ده سببه اني متعود على الميجان لان التسارع عندنا مش واير وبالتالي دواسة البنزين عندي حاجه كده غريبه انت تدوس بنزين وهي تترجم بقى ........ لكن الواير استجابته فعلاً اسرع طول ما الموتور سالك والدنيا لسه في بدايتها ........الحاجه التانيه وزن العربيه اخف كتير من الميجان وبالتالي الشعور فيها زي الكليو الدنيا بتجري حواليك بسرعه وانت لازق في الكورسي.........هو صحيح 8 valve لكن برضه 1600 وقوي بجد .......بعد ما فرحت بالموتور احتاجت اقف بقى بالعربيه عشان خلاص الشارع خلص...........ثقافتي كا راجل ربنا كرمه برينو من حوالي 7 سنين ماركبتش غيرها عارف ان الفرامل ليها معنى تاني في الرينو......وبالتالي على طول نبهت الصديق اللي خلاص قريب جداً هايقطع علاقته بي .... وقلتله امسك نفسك يابني هانقف...........ودوست فرامل ومستني بقى الزق في الزجاج او الزق في السقف .......... اي منظر لكن لا حول ولا قوة الا بالله........اكني ما دستش حاجه خالص....انا قلت في ايه ؟ ؟ انا شكلي دست دبرياج ولا ايه اللي انا باعمله ده ؟ ؟ ؟ المهم استعدت ذكريات بطولة افريقيا وكاس الامم وقلت افرمل جامد بقى عشان نقف....... عملت كده بعزم ما في ....... ولا حول ولا قوة الا بالله تاني......هي وقفت بس عادي جداً .......حسيت ان الكمبيوتر هايطلعلي رساله يقوللي فيها ( يا مجانييييييييين ) المهم نفسي قفلت وجالي حموضه بس طبعاً مبتسم ابتسامه عريضه عشان الغلبان اللي اشترى العربيه ماياخدش انطباع وحش عن العربيه ويقفل منها واكون انا السبب ....... المهم كملت مشي عادي وانا عمال اقوله اي كلام في اي بطيخ..........اصل التيل ما طبعش لسه........اصل التيل فيه نسبة نحاس اقل عشان ما يصفرش.......اي كلام انا نفسي مش فاهمه .......... وكملت مشي ...انا جوايا كنت حاسس ان في حاجه غلط وكنت متأكد انها هاتخذلني وتفرمل زي بقيت عائلتها......وبالفعل الحمد لله تأكد لي الاحساس السليم بقوة فراملها بعد حوالي 20 كيلو كنت متعمد اتلكك وافرمل فيهم لاي سبب لغاية ما الحمد لله استجابة الفرامل برضه مش هاقول زي الميجان والكليو ... لكن ممتازه على العربيه بتلم العربيه بسرعه ومن غير ولا غبار ولا صوت زي الفيزب ما بتطلع كده صوت فرمله ضخم جداً تحس ان في قطر داخل عليك وتبص تلاقي واحد راكب بتاع غريب مكتوب عليه كشري المنتحرون لتوصيل الطلبات للخنادق
........المهم ان الفرامل في الاول كانت مخذله جداً لكن الاستجابه اصبحت ممتازه بعد كده لكن برضه ما زالت محتاجه وقت اعتقد عشان تتحسن عن كده ....

نيجي للمطبات والطرق المكسره وما اكثرها في مصر...........العفشه زي ما فلت فبل كده ناعمه فعلاً مش بتدب ولا بتخبط وده كويس اوي لانها ماسكه العربيه بقبضه من حديد فاهو شعور جميل انا مفتقده الحقيقه انك لما تاخد مطب هوائي على طريق سريع تحس ان العربيه كيان واحد وكلها بتطلع فووووووووق وبتنزل تااني .......وصللي من اللوجان في اللقطه دي ان اللوجان نازله تقول انا عربيه ناشفه مش ناعمه .........الاحساس ده واصلني الحقيقه من اول ما ركبت زي ما قلت ارتفاع الصالون عن الارض بيحسسني اني عاوز افتح الشباك واطلع ايدي بره واسلم على الناس .......ازيك يا عم محمد اتفضاااااااال ...........طب اشرب شاااااااااااااااي.......مش عارف ليه الصوره دي في دماغي من اول ماركبت ... الاحساس دايما في الرينو كان اول ما تقعد تحس انك انعزلت عن الخارج وتميزت بانك جواها.........اللوجان فيها البعض من ده لكن فيها الكثير من الشاهين........الله يرحم الشاهين بقى كانت احسن واحده بتجيبلي حالة تعالى اشرب شااي دي.........الخلاصه ان العفشه جيده ومنتظر منها انها تنعم عن كده كتيير بعد ال 5000 الاولي في عمر العربيه ان شاء الله ......

نيجي بقى للي مزعلني بجد وتاعبني واعتقد انه مش هايفرق كتيير مهما كبر عمر العربيه .... الباور والدركسيون.....بدون مبالغه مش حاسس ان فيها باور اصلاً مش فاهم ايه التقل اللي هو فيه ده !!! الكهرباء خفيف انا عارف ويمكن اتعودت عليه لكن برضه لأ الباور فيها تقيل ومش عارف ليه كده لدرجة اني فعلاً حاسس ان مافيش باور.......كل ملاك اللوجان لازم يشتركوا معايا في الموضوع ده .......... هل الباور حد اشتكى انه تقيل والتوكيل عمل حاجه ؟ طب هل بينعم بعد كده ؟ ....عموماً هاقدر اقول ان ده رقم واحد فدرت امسكه عيب في العربيه .

كده فاضل لينا تقريباً العزل والاتزان على الطريق والتكيييييييييييييف ........... انا خلليت التلاته دول في الاخر لان دول اكتر تلات حاجات ممكن يخلوني اشتري عربيه او يخوفوني من عربيه وماقربش منها حتى لو فيها كل الامكانيات ............ وعموماً عشان مايكونش دمي تقيل هاغششكم لغاية ما اكتب الجزء التالت من التقييم ........هاتتفاجؤوا بجد من عزل العربيه وتكيفها واتزانها على الطريق ........

متابع باهتمام لإعجابي الشديد باللوجان كقيمة مقابل سعر :)
كل ردودك رائعة ماشاء الله عليك
تسلم إيدك يا رامي

شكراً على التقرير المستوي :)
تسلم أيدك يا رامي باشا

رامي باشا...انا مش هاعمل تقييم خلاص...
تقييمك فوق الممتاز...و فيه كل حاجة بالظبط كنت هاسردها...بل و حاجات زيادة كمان...

متفق معاك في كل نقطة ذكرتها....و أضيف علي جزئية الفتيس انه لما العربية بتدور و تسيبها سلانسيه...الفتيس بيبقى زي العربيات القديمة...بيترعش...و تلاقيه بيتحرك برضو و انت دايس بنزين

الموتور فيه بعض الخشونة أثناء التحرك...لكن بتختفي مع السرعات.

الفرامل...نفس إحساسي و تعليقي عليها


لا لا لا ...انت راجل زي الفل....

ربنا يباركلك :)

المشاركة الأصلية كتبت بواسطة nadernabil

رامي باشا...انا مش هاعمل تقييم خلاص...
تقييمك فوق الممتاز...و فيه كل حاجة بالظبط كنت هاسردها...بل و حاجات زيادة كمان...

نادر باشا
طبعاً التقرير ممتاز بس احنا برضه مستنيين تقريرك، معلش طمع في كرم حضرتك بقى :)