الموضوع: تقييم نص سوى للنيو لوجان

نيجي بقى للي باقي من التقييم ده واللي اتمنى ان شاء الله يكون مفيد ونافع .........

المكيف عامل ايه ؟ العزل عامل ايه ؟ والثبات على الطريق اخباره ايه هو كمان ؟ .......

هبدأ بالمكيف لانه كان بالنسبه لي مفاجأه ........المكيف من احسن الحاجات اللي موجوده في العربيه واللي بجد اضافه للعربيه مع انه عادي مافيش فيه جديد خالص.........لكن لانه مكيف اوروبي فا اقدر اقول بعلو صوتي المكيف ده مختلف .........تعرفه من اول ما تشغله وتجيب اول سرعه .....انا عندي في الميجان 1 دي ماجيبهاش غير وانا لوحدي في العربيه وبالليل.......الصبح بانسى تماما ان عندي سرعه 1 على طول باشغل على 2 و 3 طول ما في حد معايا في العربيه ..........اللوجان المكيف غريب بجد اول مره اشوف قوة دفع هواء محترمه كده ........1 بمقام 2 عندي على طول يمكن اقوى والله بدون مبالغه ........ التبريد حكمي عليه مش سليم لاني ماشغلتهوش فتره طويله + دايماً باحس ان العربيه الجديده فريونها بيكون ناقص شويه ..........لكن في المجمل المكيف محترم جداً جداً واللي يطلع الهوا ده يسقعه ويخليه تلاجه ان شاء الله ...........
!!!! والله وبقى فيكي تكيفات جامده يا رينو ومش هاتشمتي فينا الكوري والياباني......برضه عشان كلامي مايتفهمش غلط انا باعبر عن انبساطي بان الناس دي بتطور نفسها واني على حق لما كنت دايما باقول الاوروبي لو تكيفه ضعيف او اقل كفائه من الياباني والكوري فا ده مش اعاقه في الاوروبي او خلاص مش عارفين يصنعوا مكيف .........هي معادله واطرافها بتدي نتيجه في الاخر.........وببساطه اللوجان طرفي المعادله كان حلو جداً ...... الصالون حجمه معقول جداً اصغر من الميجان اكيد + بلووار هواء قوي = تبريد قوي في وقت قصير وكفاءه عاليه.........100 / 100 يا لووجاان.


نتكلم شويه عن الثبات .. .... الحقيقه العربيه عرضها عرضين والجنط ال 15 عليها كويس اوي وبالنظر كده اول ما تشوفها على طول يجيلك احساس ان العربيه دي ثابته على الطريق ومش بتاعت زحلقه ولا عوووم....بالعكس دا انا حاسس ان الدركسون تقيل كده عشان الجنوط ال 15 تقيله عليها مش عارف ده صح ولا غلط...........عموماً الثبات فيها ممتاز جداً بالذات مع تقل الدركسيون بيدي احساس بالاتزان والثبات في المنحنيات كمان حاجه بجد مساعه في الثبات ده هي العفشه........من العربيات القليله بجد اللي اخدت بيها منحنيات صعبه وحسيت ان العربيه كلها جزء واحد بيتحرك معاك............مش هاسمي عربيات في نفس الفئه بتاعتها عشان ما حدش يزعل مني لكن عربيات كتير اتعاملت معاها في المنحنيات الصعبه تحس ان العربيه جزئين اللي قدام خلاص حود واتعدل وورا لسه بيتجر مع انها ممكن تكون اقل طولا من اللوجان كمان......عاوز اقول حاجه بس انا كلامي ده كله على سرعه ما زادتش عن 100 لكن كنت بعوض قلة السرعه باني اخطف منحنيات وانا على سرعه عاليه نسبياً عشان اشوف الدنيا عامله ايه والحمد لله كنت راضي جداً عن الاداء والثبات وتحسب للعربيه ...خللوا بالكم كمان ان العربيه ارتفاعها عن الارض عالي وده يضيع ثبات اي عربيه فا لما تكون عربيه بالارتفاع ده عن الارض وقاعدة العجلات دي يبقى تستحق الثناء على ثباتها واتزانها وتقلها على الطريق...

العزل بقى وما ادراك ما العزل.........كل مواتير العربيات بتدي عزم ......بتمشي العربيه وبتجريها على الطريق....كل المواتير بتعمل ده دون التفرقه بين موتور والاخر .....لكن مش كل المواتير بتعمل اللي هاقول عليه دلوقتي ............ ممكن تبقى سايق عربيه ويكون واصلك صوت مجموعه من الحدادين قاعدين جوه كل واحد بشاكوش وشغالين دق !!! ممكن كمان تبقى سايق عربيه وتبقى قاعد جواها مش مرتاح نفسياً من الصوت اللي طالع ومش عارف تعمل ايه لانت عارف تسكته ولا عارف تعود نفسك على الضوضاء الغير منتظمه اللي طالعه منه .....وفي مواتير وانت سايق العربيه تحس انك راكب عربيه من عربيات الللاسلكي بتاعتنا واحنا صغيرين ......تحس انه موتور لعبه كده وصوته مسرسع ويصعب عليك اول ما يوصل العربيه لسرعه 90 كم/ساعه بحالهم !!!

اللوجان بقى فيها ميزتين ......الميزه الاولى هي ان عزلها كويس جداً على قد الفئه دي يعني لو بنتكلم عن عزل فا عزل الكابينه فيها عن مثيلاتها في اللانوس والفيرنا وغيرهم هو عزل رااائع وعلى طول تحس ان كلمة عزل دي عيب نقولها على الفيرنا واللانوس......مع انهم برضه اكيد فيهم ما يميزهم ولهم زوقهم وسوقهم.....لكن برضه العربيه من الداخل مانتاش قاعد معزول عن الحياه الخارجيه ..........في صوت شارع وموتور وكاوتش على الارض وكل حاجه ......... بس صوت غريب ........ صوت تخيين كده وليه هيبه صوت الموتور صوت يطمنك ان فيه حاجه كويسه معاك مش بتعاني تحت رجلك وانت دايس بنزين وماشي بيها.....كمان في ميزه تقول ان العربيه دي فعلاً اقتصاديه.........الصالون من جوه مافيش فيه اي حاجه تعمل صوت لا ادراج كتير ولا اماكن تخزين ولا حاجه الدنيا داخل الكابينه ملمومه جداً وهادئه جداً وبالتالي مافيش حاجه تشخشخ ولا ترن ولا تزن مع المطبات وعيون القط والنقر......انا عاوز اوصل ان اللوجان عزلها ممتاز بس مش عاوز يتفهم من كلامي ان العزل فيها معناه انك تقعد ماتسمعش صوت الموتور وماتحسش هو شغال ولا لأ زي ما بنقول على الميجان وعربيات تانيه عزلها كويس....العزل في اللوجان ممتاز لكن مش كده هو زي ما شرحت ويا رب اكون قدرت اوصل انا عاوز اقول ايه..

انا كده خلص تقييمي الحمد لله ويارب بجد اكون افدت كل اللي نفسه يشتري العربيه دي وبجد والله العربيه دي محترمه نختلف عليها طبعاً ومنا من يعجب بشكلها ومنا من لا يتقبل شكلها......حلوه او وحشه مش انا اللي هاقول لان صعب جداً كلنا نجتمع على رأي واحد ...... احنا بنجرب العربيات وفيه اللي بيعجبنا وفيه اللي مش بيعجبنا...تقييمي للعربيه اتمنى انه يكون عادل واتمنى من وحووش اللوجان الاشتراك معايا في ما كتب ما زاد في كتاباتي ارجوكم صلحوه وما نقص ارجوكم اضيفوه ..... تقييم العربيات ده حاجه صعبه بجد وامانه نحاسب عليها يوم الحساب ......... وانا مش حمل حد يدعي عليا ويقول هو السبب دبسني في العربيه ........

اللوجان باختصار عربيه محترمه وانا تقييمي ليها الحقيقه مش قادر اديله درجه معينه لان لسه العربيه ما عاشرتهاش كفايه + ان فيها الحلو اللي ياخد 10/10 وفيها الوحش ......لكن يبقى في المجمل اننا بنقول هي سياره من اول الفئات سعراً المطروحه في السوق المصري.......بالسعر ده هي كويسه اوي........صحيح فينا اللي هايقول انها تقفيل مغربي ومفروض تكون ارخص من كده.........ماليش دعوه بالكلام ده انا لي في اللي قدامي دلوقتي من سيارات منافسه ونفس الفئه السعريه واغلى منها كمان وهي افضل او اوحش ده اللي بحاول اعمله دلوقتي ...وده اللي ان شاء الله هانوصله مع بعض .........حابب كمان اضيف حاجه في نهاية الموضوع ده ......العربيه دي انا منتظر ليها انتشار واسع جداً كونها مغربي او مشرقي ده مش فارق معايا في حاجه ........لان من ايام الكليو التركي اللي كانت معايا ثم الميجان الموضوع مش فارق حاجه عن كون العربيه دي متجمعه هنا ولا هناك .....

انا كده خلص موضوعي ومنتظر اي سؤال او استفسار عن العربيه وان شاء الله اكون قادر على الاجابه والرد والله ولي التوفيق.