الموضوع: انا متدمر ياجماعه حد يساعدنى

المشاركة الأصلية كتبت بواسطة mrghost

شكرا ياجماعه على الردود اللى بتدينى امل دى وانا الحمد لله عندى شقه بس وجه اعتراض ابوها انى مش قريبهم وهم ناس فلاحين عاوزين حد يكونوا يعرفوه هو ده السبب وانا الحمد لله صليت صلاة استخاره بس مش عارف برضه اعمل ايه تانى

بص نصيحة من اخ كبير

سيبك من الموضوع

مادام هما دماغهم قبلية كده

هيقرفوك

و عمرك ما هتحس انك واحد من العيلة

و في اي مشكلة مع البنت بعد الجواز هيحطوا عليك و يفركشوا لك الجوازة و ياخدوا بنتهم بأي تلكيكة و حاسب انت عالمشاريب يا معلم (مؤخر و نفقة و بلاوي سودة و لو ليك عيال منها مش هتاخدهم و لا هتطولهم)

و الصراحة مادام ابوها دماغه مقفلة كده يبقى ما ينفعش يبقى جد أولادك

و في اي مشكلة وقت الخطوبة هيفشكلوا برضه

يا دار ما دخلك شر

و صدقني انا في يوم كنت صغير زيك و فاكر ان اول حب ده ما بيتعوضش و بتاع


عادي جدا ........ الدنيا ما بتقفش على واحد و لا واحدة

و اللي خلقها خلق غيرها و اللي خلقك خلق غيرك


معلش انا كلامي قاسي و صادم شوية

بس هو ده الحقيقة

لازم الناس اللي تخش بيتهم لو انت عايزهم و عايز بنتهم قيراط يبقوا هما عايزينك 24

غير كده انسى

ابويا اما راح يتقدم لأمي و كان جدي يعرفه من سنين طويلة بحكم زمالته الدراسية لخالي الله يرحمه لسنين طويلة

جدي الله يرحمه قال له لو انت ما كنتش جيت كنت انا جيت جبت لك بنتي لعندك

و اما كان بيحصل مشكلة او ابويا يزعل من امي ابوها اللي كان بيراضيه و ييجي في صفه



انما تتجوز واحدة اهلها مش عايزينك هتدوق المرار

و ما تقولليش احنا بنحب بعض و عمرنا ما هنتخانق و عمرنا ما هتحصل مشاكل ..... تبقى بتحلم ..... مفيش اتنين ما بيتخانقوش و ما بيزعلوش

ساعتها هتبقى فرصة ذهبية لحماك انه يطلع فيك القديم و الجديد (بما ان من وجهة نظره انت واخد بنته غصب عنه)


صدقني الحب حلو و الجواز عن حب حلو بس الحب مش كل حاجة في الجواز فيه حاجات كتير أوي اوي ......