مشكله فتيس لانسر كريستاله 98 اتوماتيك حد يساعدني

**ConDoR** · 08-09-2009 01:20 AM

بسم الله الرحمن الرحيم

انا اخوكم في المنتدى واسمي كريم متابع المنتدى من زمان جدا بس اول مره اكتب عن مشكله اتمنى الاقي طوق النجاه بعيدا عن افتاءات الميكانيكيه خصوصا لما تكون حاجه حساسه زي الفتيس الاتوماتيك

المشكله بدات عندي لما غيرت الكربراتير بواحد استيراد من بره لان الكربراتير القديم كان بيقطع قررت اني اجيب واحد استيراد واريح نفسي من الفك والتركيب والتصليح ودفع الفلوس وفي الاخر مفيش نتيجه

ركبت الكربراتير والحمدلله شغال تمام ومفيهوش مشاكل واكتر من ميكانيكي شكر فيه بس بعد فتره كنت مسافر وكنت محتاج الكيك داون بس للاسف مكانش شغال حاولت فيه بس مفيش استجابه خالص بعد ما رجعت رحت للميكانيكي وقالي فيه حساس في الكربراتير بتاع الكيك داون قالي دا بايظ رحت سألت عليه وكان سعره حوالي 170 جنيه هو عباره عن فيشه كدا سودا في جمب الكربراتير ناحيه الاسبراتير

الميكانيكي قالي انا ممكن اعمله ليك ونوفر فلوس قلت امين فك الفيشه نضفها وروق عليها وغسلها بالبنزين وجاز ومش عارف بصراحه عمل ايه تاني ركبناها طلعن على الطريق مفيش استجابه رجعت البيت وانا محبط وقلت الحمدلله

تاني يوم نازل دورت العربيه نقلت على ال d كانت المفاجاه ان الغيار مش بينقل الاربي ام بيعلى لحد 7 بس مش بتجيب التاني رجعت البيت وانا مش حاسس بالدنيا ركنت العربيه ونزلت بليل اجرب تاني مشيت بالراحه كدا الفتيس نقل قلت الحمدلله تاني يوم نفس المشكله ادوس والاربي ام يعلى والعربيه مش بتنقل للتاني رحت لميكانيكي تاني قالي احنا نفصل الفيشه وفعلا شلناها وبنجرب الفتيس بيهرتل شويه ينقل وشويه لا بس لازم اشيل رجلي بس لما احرق احس انه بيعمل كيك داون ويجمع لحد 4 ويطلع مره واحده بس في الاخر بتنقل مش زي الاول مش بتنقل خالص

قالي تعالى بكره نغسل الفيشه بالبنزين وترجع تنظم النقلات تاني بس امشي براحه ومتحرقش على الغيارات

معلش انا متاسف طولت عليكم بس خايف الفتيس يكون باظ او حيبوظ ومش عارف اعمل ايه

**Ahmed Hassan** · 08-09-2009 04:59 AM

مظنش الفتيس حصل فيه حاجه... بس في الغالب الميكانيكي العبقري بوظلك الفيشه او الحساس ده. هوه الحساسات بتتغسل بجاز و بنزين؟!! روح التوكيل احسن

تم التعديل بناءً على طلب صاحب المشاركه
مشرف الياباني ١

**emad1973** · 08-09-2009 07:17 AM

الحساسات يا باشا
كده بعملة الميكانيكي جابت اخرها
ان شاء الله تغير الحساسات وهتظبط تمام
انا كان عندي نفس العيب ولفيت علي الظلمة لحد ما ورمت
وفي الاخر رحت التوكيل
وغيرت الحساسات

روح التوكيل احسن
هناك هيحط العربية علي الكمبيوتر
هيلاقي انه مش قاري الفتيس اصلا علي الجهاز
وده نتيجة خراب الحساسات
هتتغير وترجع العربية تمام
ارجوك متهدرش فلوسك علي الفاضي اطلع علي التوكيل او اي مركز صيانة معتمد

**أبو_حمزة** · 08-09-2009 10:36 AM

و أنا كمان بقول لك روح التوكيل و فرع قليوب بالذات
الفنى بتاع الفتيس هناك استاذ بمعنى الكلمة و ان شاء الله يرجع جديد
و صدقنى حتى لو دفعت كتير شوية ها تقف التكلفة ارخص من العك عشان الفتيس الاتوماتيك قليل جدا اللى فاهم فيه

**ConDoR** · 08-09-2009 02:47 PM

المشاركة الأصلية كتبت بواسطة ahmed hassan

مظنش الفتيس حصل فيه حاجه... بس في الغالب الميكانيكي العبقري بوظلك الفيشه او الحساس ده. هوه الحساسات بتتغسل بجاز و بنزين؟!! روح التوكيل احسن

هو مش عبقري يا فندم هو ........ بس بالنسبه للحساسات فانا اعرف انها بتتغسل في البنزينه بالجاز عادي لما تكون عاوز تغسل الموتور بس مش عارف هو هبب ايه بالظبط

تم التعديل بناءً على طلب صاحب المشاركه الاصليه
مشرف الياباني ١

**ConDoR** · 08-09-2009 02:50 PM

المشاركة الأصلية كتبت بواسطة emad1973

الحساسات يا باشا
كده بعملة الميكانيكي جابت اخرها
ان شاء الله تغير الحساسات وهتظبط تمام
انا كان عندي نفس العيب ولفيت علي الظلمة لحد ما ورمت
وفي الاخر رحت التوكيل
وغيرت الحساسات

روح التوكيل احسن
هناك هيحط العربية علي الكمبيوتر
هيلاقي انه مش قاري الفتيس اصلا علي الجهاز
وده نتيجة خراب الحساسات
هتتغير وترجع العربية تمام
ارجوك متهدرش فلوسك علي الفاضي اطلع علي التوكيل او اي مركز صيانة معتمد

طمنتني ربنا يطمن قلبك انا كنت خايف اوي على الفتيس بس ممكن اعرف تكلفه تغيير الحساسات كام بالظبط

**ConDoR** · 08-09-2009 02:52 PM

المشاركة الأصلية كتبت بواسطة sabbagh

و أنا كمان بقول لك روح التوكيل و فرع قليوب بالذات
الفنى بتاع الفتيس هناك استاذ بمعنى الكلمة و ان شاء الله يرجع جديد
و صدقنى حتى لو دفعت كتير شوية ها تقف التكلفة ارخص من العك عشان الفتيس الاتوماتيك قليل جدا اللى فاهم فيه

شكرا يا استاذي على النصيحه

**emad1973** · 08-09-2009 04:11 PM

المشاركة الأصلية كتبت بواسطة keemvip

شكرا يا استاذي على النصيحه

اخي العزيز انا كنت مغير الحساسات لهيونداي اتوماتيك موديل 1999 ب370 جنيها ده غير المصنيعة في مركز صيانة معتمد
يعني دخلت في 450 تقريبا اجمالا
وان شاء الله ميزدش عن كده
بس اهم حاجة السرعة
لان الار بي ام لما يعدي 7 ممكن يفوت الموتور
وتبقي مصيبة
ربنا يوفقك وقول لنا انت عملت ايه والتكلفة
ويلا
ربنا يعوضك خير

**ConDoR** · 08-09-2009 05:04 PM

انا نزلت الصبح علشان اتاكد من حكايه الحساس وفعلا ركبته الفتيس مش بينقل فصلته تاني النقلات رجعت طبيعيه الحمدلله اتاكدت ان مش مشكله فتيش وفعلا المشكله كلها في الحساس زي ما حضرتك انا سالت على الحساس استيراد عامل تقريبا 150 جنيه على التجربه طبعا وهو سهل تغييره افتكر مش محتاج توكيل ولا حاجه ربنا يستر واليومين اللي فاتو ميكونش ليهم اثر جانبي على اي حاجه وربنا يقدم اللي فيه الخير

**ConDoR** · 10-09-2009 02:34 AM

الحمدلله غيرت الحساس والعربيه اتظبطت والكيك داون اشتغل كمان بجد الاتو من غير كيك داون ملوش لازمه

شكرااااااااااااااا لكل اللي ساعد بكلمه اتمنى ان الموضوع يفيد حد عنده نفس المشكله