الموضوع: شيخ الأزهر يجبر طالبة على خلع النقاب بعد نقاش حاد

المشاركة الأصلية كتبت بواسطة د.أحمد سمير

حاضر .. أنا هجاوب ..
أولاً لو قريت كلامي كويس مرة تانية باقول إن الرغبة في الطفل في الالتزام أمر محمود أليس كذلك .. ولكن المسألة مرتبطة بالتكليف أليس كذلك ؟؟
وحكاية الغرب دي أنا معرفش جبتها منين .. فأنا لا قلتها في كلامي ولا حتى أشرت لها !!!
ما علينا ...

وبخصوص النقاب .. فهو مكرمة لا هو واجب ولا هو سنة ، وبصفتي أتبع المذهب الحنفي فقد أوجبه الإمام أبي حنيفة عند خشية الفتنة وحسب ..

وحين يحرم على المرأة تغطية وجهها في الحج والعمرة فهذا يعني أن هذا الأمر ليس بواجب لأنه إن كان واجباً لوجب في جميع الأوقات دون استثناء الحج أو العمرة منه ..

أما اللحية فهي سنة ووردت في حديث سنن الفطرة العشرة .. وإذا أردت أن تقيم السنة فانصح الناس بتقليم أظفارهم وحلق عاناتهم ونتف إبطهم كما تنصحهم بإطلاق اللحي وإلا تكون مفرطاً في دين الله .. أليس كذلك
تقبل خالص احترامي

أولا كلمة امر محمود دي ليست في كلام حضرتك اقرأ كلامك تاني وإلا احتمال يكون اتكتب غلط ... مش مشكلة

ثانيا بالنسبة للنقاب انت قلت ايه " أوجبه الامام ابو حنيفه في زمن الفتنة وحسب " وهل زمننا هذا ليس زمن الفتنة ومن يحدد ان هذا زمن الفتنة ؟ انا أم انت أم العلماء الثقات ؟

ثالثا بالنسبة اللحية ألم يأتي حديث عن الرسول صلي الله عليه وسلم يأمر بحف الشوارب وإعفاء اللحي وجاء ايضا أمر في القرأن بطاعة الله والرسول ؟
وبعدين ايه اللي جاب سيرة تقليم الأظافر وحلق العانة ونتف الإبط هنا ؟ انا برد علي كلام حضرتك فقط وهو انك تلاقي ابنك ملتحي وهو عنده 13 سنة . مش فاهم اين الافراط في الدين هل التشبه بصفات وشكل وهدي وخلق النبي محمد صلي الله عليه وسلم افراط في الدين ؟؟؟؟؟؟؟؟؟

المشاركة الأصلية كتبت بواسطة human12

الراجل اسلوبه كان فظا و لكن هو صح و بعدين ماتقوليش تحسبا ان شيخ الازهر ييجى ده كلام منافى للعقل
الراجل ادرى ان النقاب عاده و يعنى هوه لما يطلع فتوى على مزاج الناس كله يمشى بيها حتى لو منافيه للمنطق و لما يقول النقاب يبقى كخه

و بعدين هو بينظم العمل فى المكان اللى هوه بيديره زى - يعنى لما يقول الطالبات بلاش نقاب يبقى المفروض مفيش
و موضوع وحشه و حلوه ممكن يكون فى سياق مداعبه
ماحدش كان منكم موجود عشان يقول الكلام اتقال فى اى سياق

و عموما انا مش بحب الراجل ده بس لازم نفكر قبل مانهاجم

لا الراجل مكانش صح لانه جعل نفسه صاحب الراي الاوحد واهان البنت واجبرها على ما لا ترضاه وعملها كان لا يتعارض مع الدين وليس من حقه ذلك وارجوك تخيل اختك هي اللى في الموقف ده وقولي هايبقي رد فعلك ايه
وبعدين هو بيدير المكان ولكن في ضوء النظم واللوائح والقوانين والدستور يعني مش بمزاجه والقوانين واللوائح ليس فيها ما يمنع ارتداء النقاب في المدارس او الجامعات
وانه اهان البنت لما قالها امال لو كنتى حلوة كنتى عملتي ايه معتز الدمرداش سأل الصحفي اللى كان موجود يمكن بيضحك مع البنت الصحفي قاله لا كان بيتكلم بجد ومكانش بيضحك يا ريت تسمع المقابلة الاول وبعدين تقول رايك

المشاركة الأصلية كتبت بواسطة د.أحمد سمير

أنا شايف المسألة من وجهة نظر مختلفة تماما وخلونا واقعيين في كلامنا
شيخ أزهر عمره حوالي 80 سنة
دخل معهد فتيات إعدادي يعني عمر البنات اللي فيه أقل من عمر حفيداته
لقى بنت لابسة نقاب
(وعايز كل واحد فيكم يقيس هذا الكلام على بنته أو حفيدته .. أو مثلاً لو لقى ابنه اللي عمره 13 سنة بقى ملتحي ..الخ .. أو زي ما بنتك اللي عمرها ثلاث سنوات تقولك عايزة أتحجب )
الطبيعي لأي شخص مننا إنه يحمد هذه الرغبة .. وفي الوقت ذاته يوجه هذا الطفل إلى أن الوقت لم يحن بعد لهذا الأمر ..
فسألها إنتي ليه لابسة نقاب
فالطفلة بتناقش شيخ الأزهر في الدين ... متخيلين
فالشيخ اتعصب ورد عليها وقال أنا أفهم في الدين أكتر منك ومن اللي خلفوكي .. وهذا حق مع اختلافنا على الأسلوب .
وقالها شيلي النقاب ده .. يعني ما قالهاش لا سمح الله اقلعي الحجاب .. ولا رفدها علشان ردت عليه ولا أي حاجة
ولما شالت النقاب هزر معاها بكلمة من جد لحفيدته .. حتى لو كلمة تقيلة ..

مش عارف ليه بنكبر المواضيع على الفاضي
وكل واحد فينا مر بتجارب من هذا القبيل في طفولته ..
لكن صورنا البنت إنها شهيدة ، والشيخ إنه فاسق وبنشبهه بالفجرة والغجر ، وبنتهم الراجل في علمه ، وبنغتابه رغم إن حسابه على الله تعالى .
رغم إن أي حد فينا لو كان في موقعه كان تقريباً عمل كدة

لا يا سيدي الفاضل قياسك خاطيئ جدا
اولا البنت عمرها مش 3 سنوات مرها 13 سنة وده سن بيحصل فيه البلوغ يعني ممكن تكون بالغة ومكلفة
ومش عارف ايه علاقة ان عمره 80 سنة وان البنت صغيرة ؟
انا اسف في جملتي بس لا مؤاخذة اللى عنده 80 سنة ده لو اتجوز يخلف ولا لا؟ طبعا اه
وبعدين هل البنت دي من محارمه ولا لا ؟ طبعا لا يبقي مش منحقه يجبرها تقلع نقابها ويشوفها
وبعدين هل كان شيخ الازهر لوحده ؟ بردو لا بدليل ان كان فيه صحفيين وسمعوا الكلام ونقلوه
هل كان بيهزر ؟ رديت ونقلت كلام الصحفي واسمع حديثه مع عمرو الدمرداش بيقول لا كان بيتكلم بجد مش بيضحك مع البنت
ومحدش قال البنت شهيدة بس البنت اتعرضت لضغط نفسي اكبر من سنها واجبرت على ما لا تريده ومحدش قال ان الشيخ فاسق ولا اتهمناه في علمه لكن انا اتهمه بعدم العمل بعلمه ولو مش مصدقني او مش عاجبك كلامي حاول تقرا رسالته في الدكتوراة عن بنو اسرائيل وتصرفاته حاليا مع اليهود وبعدين نبقي نتناقش
ولا يا سيدي لو حد فينا مش في موقع هيعمل زيه
انا في الجامعة وبراقب على الامتحانات وفيه ناس هنا في المنتدي زيي وبيكون فيه بنات منقبات محدش بيجبرها تقلع النقاب ويقولها دي عادة ولكن بنطلب منها تقوم وتروح اخر الطرقة مع واحدة من المراقبات تتاكد من شخصيتها وترجع تاني ومالناش دعوة بنقابها

المشاركة الأصلية كتبت بواسطة أبومريم

هل لو سيد طنطاوي دخل المعهد ده ولقى بنت متبرجة و قالها انتي ايه اللي انتي لابساه ده البسي اللي يرضي ربنا وزعقلها ومنعها تيجي المعهد باللبس ده
ساعتها كان هيبقى رأي حضرتك ان دي حريتها الشخصية وان المتبرجة من حقها تتعلم دينها زي المحترمة ودا نسبيا صح طيب ليه بقى رايك هنا مختلف؟!!!!

يا ابو مريم مش هيعمل كدة علشان كدة مش هناقش معاك فرضية مستحيلة وان كان في نفس الوقت بردو لو هنتكلم من منطلق لاحرية الشحصية يبقي ما دام لبس البنت لا يخرج عن العرف والعادات والتقاليد يبقي مش من حقه يوجه لها اى توجيه بخصوص اللبس

المشاركة الأصلية كتبت بواسطة د.أحمد سمير

يا أخي الكريم ..
الرجل يزور معهد إعدادي
ولم يفعل هذا الأمر مع أي معلمة من معلمات المعهد
يعني لو معترض على النقاب كان حجبه أو حظره في الجامعة أو المدينة الجامعية أو على الموظفات أو على المعلمات .. وكل هذا لم يحدث
النقاب ده مش حاجة نادرة في الأزهر ده منتشر وبشدة
يبقى الطبيعي إن المفاجأة جاءت في نقاب طفلة في هذا السن
وليس في وجود النقاب بحد ذاته ..
أرجو أن تكون وجهة نظري وصلت
وربنا يجعلنا جميعاً من أهل حسن الظن
تقبل خالص مودتي

ي ادكتور احمد وجهة نظك وصلت لكنها ليست طفلة وانما في سن البلوغ وطبعا شيخ الازهر مسالش البنت هي بالغة ولا لا ومش من حقه يسالها
وعلشان الراجل يريحك اسمع تانى المقابلة بتاعة الصحفي مع معتز الدمرداش قال فيها ان شيخ الازهر قال انه هيصدر قرار بمنع دخول اي طالبة او مدرسة او موظفة للمعاهد الازهرية اذا كانت منقبة
ايه رايك دلوقت ؟؟؟؟؟؟؟؟؟؟؟؟؟؟؟؟؟

المشاركة الأصلية كتبت بواسطة د.أحمد سمير

حاضر .. أنا هجاوب ..
أولاً لو قريت كلامي كويس مرة تانية باقول إن الرغبة في الطفل في الالتزام أمر محمود أليس كذلك .. ولكن المسألة مرتبطة بالتكليف أليس كذلك ؟؟
وبخصوص النقاب .. فهو مكرمة لا هو واجب ولا هو سنة ، وبصفتي أتبع المذهب الحنفي فقد أوجبه الإمام أبي حنيفة عند خشية الفتنة وحسب ..

طبعا مرتبطة بالتكليف لكن البنت فعلا في سن التكليف يا دكتور
اما بخصوص حكم النقاب فهو ليس مكرمة وانما اختلفت الاراء حول كونه فرض ام سنة

المشاركة الأصلية كتبت بواسطة ahmed0nouh

احيانا الرد على خبر هايف بيكون تعظيم من شأنه واللى حصل ده انا شايف انه مش محتاج رد
لو حد شايف ان فتواه خطأ ممكن يبعتله او يروح يزوره فى المشيخه بنفسه وانا على ثقه ان الراجل بصدر رحب هيقولك سبب فتواه , وان كنت انا شخصيا اختلف معاه فيها
الأئمه الاربعه كانوا دائما على خلاف ولكل منهم رأى يدعمه الادله هل معنى كدا انهم مبيفهموش ؟

لا ابدا انا مستحيل اتأثر بمجرد مقابلته , لكن انا كان لى وقت طويل فى المناقشه معاه وكان يحضر المناقشه شيوخ محنكين وبرغم ان كان ليه اراء اختلف معاه فيها كليا ومنها المواقف اللى حضرتك ذكرتها الا انى مازلت محترم لمكانته العمليه والدينيه وحسابه عند ربنا دى حاجه مليش دخل فيها
موقف البنت المنتقبه قد يكون تم تحويره بمنتهى البساطه انه مثلا بيقولها انها لا داعى تلبس النقاب فى وسط زميلاتها وهى جادلت معاه فرد عليها بعصبيه شويه ( هو عصبى جدا وصوته عالى ) وقالها فى سنك ده النقاب مجرد عاده اهلك بيعودوكى عليها وانا اعرف اكتر منك ومن اهلك , وهو فعلا فى السن الصغير ده النقاب مجرد علشان البنت تتعود عليه لكن مش ملزم
بس شيل كلمتين من الحوار وحط تحبيشه صحفيه وفرقع بقا الدنيا بالخبر الفظيع

بردو بختلف معاك يا استاذ احمد وهرد عليك نقطة نقطة:
- الخبر مش هايف الخبر ان شيخ الازهر اجبر طلابة على خلع النقاب وتعدي عليها لفظيا وافتي بان النقاب مجرد عادة ولو مش عارف اهية الخبر متهيالي هتعرف خطورته لما تعرف ان وسائل الاعلام الاجنبية اهتمت بالموقف واستعملته للهجوم على النقاب
- والله يا استاذ احمد انت اول واحد يقول انه اختلف مع شيخ الازهر وتقبل الاختلاف معاه بصدر رحب العكس هو اللى بيحصل دايما منه ولو تفتكر مرة ضرب صحفية بالجزمة لمجرد انها كانت كاتبة موضوع ضد ادارة الازهر وراحت تاخد رايه فيه والموقف اللي موجود دلوقت تعامله في قمة التعارض مع اخلاق العلماء
وايوة الائمة الاربعة كانوا بيختلفوا في الاحكام لكن كلهم كانوا بيحترموا بعض وبيحترموا طلبة العلم ولم اقرا ان احدهم سب طالب علم كما قعل سيد طنطاوي او كانت له مواقف مهادنة مع اعداء الامة مثله
والحوار الصحفي لو كان تم تحويره كان سيد طنطاوي رد عيه ووضح صحة لاموقف وعملها قبل كدة لما اتهاجم بسبب سلامه على بيريز وكلامه عن غزة ولما رد في التليفزيون كان رده وقح جدا وانا هنا اصف رده فلا تقل انى اسبه
وانت بتحترمه لمكانته الدينية والعلمية
وردي عليك ان مكانته العلمية كانت زمان لما كان باحث في الدين
ومكانته الدينية يستمدها من كونه شيخ الازهر والحمد لله في طريقه لتضييع ما تبقي من هيبة وقيمة الازهر

للسببين معا يا دكتور احمد لان السببين مرتبطين ببعض بحيث لا يمكن الفصل بينهما الخطأ من جانب سيد طنطاوي مركب ولا يمكن مناقشة ايا منهما دون مناقشة الاخر
اما لو كنا هنناقش انكاره للنقاب وهجومه العنيف عليه فقط فهناك الكثير والكثير من المآخذ على الرجل