بتسقط نقلة وآلا بتدوس فرامل ؟؟

[ibrahimsaad]

يعنى ايه بتسقط نقله ؟ انا مش فاهمها

ياجماعه ماتفهمونا حكايه التسقيط دى ازاى

ماتسيبوناش كده زى الاطرش فى الزفه مش فاهمين حاجه

[essa]

ياجماعا لما بتسقط علشان تجرى
مثلا ماشى على التانى وجبت اخره اكيد هتدوس دبرياج علشان تجيب تالت !!! لالالا بقى دوس دبرياج وشيل وكمل بنزين من غير ماتغير وخليك على التانى
اما لو بتسقط علشان توقف العربيه فجأه ومثلا ماشى على التالت بس فى اخره دوس دبرياج وهات تانى وارفع رجلك وكمل بالفرامل هتلاقى العربيه بتتشفط لورا !!!
ياريت اكون عرفت افيدكم

انا سمعت انه افضل للمحرك و نتيجة الفرامل معاه بتكون افضل !

فعلا هو افضل للمحركات ال 1600 فقط لانك بتدى الغيار حقه وبيخلى صوت المكنه تهدى ,, وكمان بينجدك لما تلاقى حاجه فجأه قدامك :k20:

[M.Osman]

اما لو بتسقط علشان توقف العربيه فجأه ومثلا ماشى على التالت بس فى اخره دوس دبرياج وهات تانى وارفع رجلك وكمل بالفرامل هتلاقى العربيه بتتشفط لورا !!!
ياريت اكون عرفت افيدكم

يعنى لو داخل على مطب مثلا و المفروض اهدى و كنت عالخامس ..

ادوس دبرياج و جيب الرابع و اشيل رجلى من عالدبرياج بالراحة ( مع الفرامل طبعا ؟؟ )

صح كدا ؟

[king_de_egypt]

انا بستخدم الستقيط للجري مش للفرملة

وانا كمان :k46:

[essa]

يعنى لو داخل على مطب مثلا و المفروض اهدى و كنت عالخامس ..

ادوس دبرياج و جيب الرابع و اشيل رجلى من عالدبرياج بالراحة ( مع الفرامل طبعا ؟؟ )

صح كدا ؟

لالا للاسف جيم اوفر هههههه
بص لما تكون مثلا ماشى بسرعه عاليه سقط غيار وشيل رجلك بسرعه كانك بتجيب غيار بس مع فرامل ماتحولش تجيب الدبرياج مع الفرامل علشان هتلاقى العربيه بتجرى باختصار لو ماشى على الخامس مثلا ولقيت حاجه قصادك فجأه وخلى بالك من فجأه دى (علشان علشان كترتها فى فتره صغيره بتتلف المحرك ) وفجأه لقدر الله هتلبس فى حاجه دوس دبرياج وهات تالت او تانى حسب المسافه اللى العربيه هتقف فيها ومع الالتسقيط فرااااامل
هتلاقى العربيه بتتشد لورااا وبتقف بس مره واحده طبعااا

[abou_ruqi]

أنا اللي باسألكوا وأتريكوا مش عارفينه

بصوا
التسقيط down shifting ده زيه زي الفرامل بالظبط
لوعاوز تقف بسرعة وأنت بتجري بسرعة في الحالات التالية

1- مش عاوز العربية تعوم لو عربيتك خفيفة
2- العربية متتزحلقش لو الأرض مبلولة ومعندكش اي بي اس
3- ماتفقدتش عدد لفات الموتور في حالة لو حتشد بعد الفرملة على طول
4- لو مشاوريك طويلة و فراملها كتير ويهمك أن التيل ميسخنش (علشان الفرامل بتضعف لو سخن قوي)
5- لوالفرامل راحت منك

في الخمس حالات دول حلك الوحيد أنك تنزل بالجيربوكس واحد غيار أو اتنين على حسب مقدار الفرامل المطلوبة

وهناك مدرستين (ابحثوا في جوجل عن down shifting)
مدرسة ان التسقيط أفضل و نتيجته أحسن و غير خطر
والتانية اللي بتقول ان تيل الفرامل رخيص , خللي الناس تدوس براحتها

وعلى فكرة كل عربيات السباق السواقين ما بيلمسوش الفرامل خالص لأنهم لو لمسوها حيروحوا في داهية في الكلفات , كلهم بيعملوا بيهدوا في الملفات


جرب وأنت ماشي في حتة فاضية - لحد ماتتعود- تكون ماشي على 80 وهات تاني و أرفع رجليك من على الدبرياج وشوف

ملحوظة هامة لو جيت اسكندرية بعد المطر أوعى تدوس فرامل
أعمل الطريقة دي

[r0xer]

!!!!!!

انتو عايزين تحرقو عربياتكم ولا أيه مش فاهم؟

لو جايب 100 و سقطت وجبت التاني الأر بي ام هيعلى عن ال6000 لفة او حسب سعة موتورك و ساعتها باي باي موتور...!!

الحاجات دي للناس المحترفة اللي عارفة قدرات عربيتها وعارفة هي بتعمل أيه !!

وكمان في كل الاحوال التيل ارخض فعلاً...وتسقيط النقلة دا لو عايز العربية تتنطر بيك لقدام. وفي حل سخيف مبحبش اعمله إلا في حالات الموت يعني خلاص...وهو ضغط دبرياج ثم ضغط بنزين في نفس الوقت بقوة وبعدها هتلاقي العربية طارت من على الأرض في كسر من الثانية وزودت مثلا 20 كيلو متر سرعة!! " متجربوش الموضوع ومش مسؤول ومعرفش دا غلط ولالا بس غالبا هو غلط".

خلاصة الكلام....تسقيط النقلات مش كويس و الجري مش كويس اصلا وربنا يحفظنا ويحفظكم.

[eng/muhamad]

جرب وأنت ماشي في حتة فاضية - لحد ماتتعود- تكون ماشي على 80 وهات تاني و أرفع رجليك من على الدبرياج وشوف

ارفع رجلى من على الدبرياج واحده واحده زى ما اكون طالع على الاول لسه
و لا ارفعها فجاه
و استخدم معاها فرامل و لا لأ
؟

[abou_ruqi]

ارفع رجلى من على الدبرياج واحده واحده زى ما اكون طالع على الاول لسه
و لا ارفعها فجاه
و استخدم معاها فرامل و لا لأ
؟

فجأة حتلزق في الإزاز , أربط الحزام كويس علشان حتقف جامد

[abou_ruqi]

!!!!!!

انتو عايزين تحرقو عربياتكم ولا أيه مش فاهم؟

لو جايب 100 و سقطت وجبت التاني الأر بي ام هيعلى عن ال6000 لفة او حسب سعة موتورك و ساعتها باي باي موتور...!!

الحاجات دي للناس المحترفة اللي عارفة قدرات عربيتها وعارفة هي بتعمل أيه !!

اعمل بحث في جوجل وشوف الناس بتقول علي الطريقة دي ايه برة

[mrghost]

انا بستخدم الستقيط للجري مش للفرملة

وانا كمان زى حضرتك

[M.Osman]

ااااااااااااااااااااه انا كدا فهمت .....

دي كانت بتحصل معايا بالغلط لما كنت بتعلم السواقة ... اكون ماشي عالثالث و بدل ما اجيب الرابع اروح جايب التانى .... تلاقى العربية راحت كعلية صوتها و "مشفوطة" ...هههه

يعنى ممكن الواحد يفرمل كدا ... طب قشطة ...:)

[nasr-eldeen]

أنا كنت بعمل كده نادر جداً زمان الآن مش ممكن أعمل الحركة دي
والسبب ؟؟؟؟

[abou_ruqi]

أنا كنت بعمل كده نادر جداً زمان الآن مش ممكن أعمل الحركة دي
والسبب ؟؟؟؟

إن أنت راكب أوتوماتيك :k18:

[mo7a_mo7a]

أنا اللي باسألكوا وأتريكوا مش عارفينه

ملحوظة هامة لو جيت اسكندرية بعد المطر أوعى تدوس فرامل
أعمل الطريقة دي

تخيل انا في بداية الموضوع مكنتش مستوعب يعني ايه تسقيط (( المصطلح غريب )) لكن بعد ما قريت الشرح فهمت علي طول ...........
انا من اسكندرية وفعلا طول الشتا بنستخدم الطريقة دي 100 يوم في السنة يا معلم!!!!!!!!!!!!!!!!!!!!!!!!!!!!!!!!!!!!!!!
لدرجة انها بقت من بديهيات السواقة ... مبقتش حاجة غريبة......... شئ اساسي ملهوش اسم.
عادي خالص انك والدك وهو بيعلمك السواقة في المطر انه يقولك انزل غيار ودوس فرامل..
في اسكندرية ده الطبيعي واللي يدوس دبرياج وفرامل ...
يبقي الله يعوض عليه ... حيعوم طبعا وننزلو نجيبوه من البحر بقي

وطبعا العبد لله وزيه كتير ميعرفش ان ده تسقيط