هذه خبرتي مع سيارتي ستروين Ax !!

[thunderwheel]

يبدوا أن هناك مشكلة غريبة بالسيارة الخاصه بسيادتكم ، أنت تتكلم عن وجود فتحة فايز جنب غطاء الريدياتير وهذا شئ غريب جدا لأنه لايوجد أى فتحات فايز (سواء بخرطوم أو بغير) فى أى نظام تبريد لأى سياره فى الدنيا ، مما يثير تساؤل قوى عن طبيعة هذه الفتحه (وهى السبب الرئيسي للمشكله الموجوده عندك) ما هى وظيفتها ولماذا هى موجوده فى سيارتك وليست موجوده فى باقى السيارات؟
1- أغلب الظن أن هذه الفتحه قد تكوم مكان لتركيب سينسور (مقياس أو حساس) يقيس أرتفاع الماء داخل قربة المياه بالريدياتير ويعطيك بيان على التابلوه بكمية المياه (كثيرة أو قليلة) ولكن يبدوا أن هذا الحساس غير موجود (مفكوك وضاع) فتحولت هذه الفتحة إلى مشكلة كبيرة جدا فى سيارتك (يهرب من خلالها سائل التبريد وتسبب لك فشل كامل فى دورة التبريد)

2- فى حقيقة الأمر لا أدرى بصوره مؤكده عن سبب وجود هذه الفتحة (لم أراها فى أى سياره من قبل) ولكن وجودها فى حد ذاته مفتوح للهواء الطلق مشكلة كبيرة جدا

3- الحل الوحيد أمامك هو سد هذه الفتحة بأى وسيله ممكنه ، وهنا ممكمن أقترح أنك تستخدم مسمار مسدس قصير يدخل بالكاد داخل هذه الفتحه بحيث يبقى رأسه المسدس خارجا ثم تقوم بلحامه بإستخدام أنابيب لحام إبوكسى الخاصه بمواسير المياه الساخنة (تقريبا ب 20 جنيه) ، أو ممكن تسدها بإستخدام طبه بلاستيك بتحاب من بتوع أدوات السباكه بس برده هتلحمها بإستخدام مادة التانجت أو أسأل محل السباكه ممكن يكون عنده حاجة تسد الحته دى بلصق بس بشرط أنه يكون مقام للحرارة حتى 130 درحه على الأقل

أنا بصراحه مقدرش أقترح أكتر من كده علشان أنا مش عارف الفتحه دى شكلها عامل إزاى..والله أعلم
====================================

شغلتى مهندس ميكانيكا وسيارتى الرائعة هى ستروين Ax لونها زيتى ميتاليك موديل 96 وسعتها 1360 سي سي وكمان فيها تكييف وسنتر وكاسيت وزجاج كهرباء و لزوم الجمال فيها فتحة سقف وسبويلر أصلى وربنا يستر طريقى

[aaahhmmed]

علشان برده تكون واخد بالك من الكلام الفتحه دى فى الزور نفسه يعنى غطا الرداتير بيبقى فيه سوسته و أخر السوسته دى حاجه فيها كاوتشه بحيث تقفل الردياتير هوا بقا الخورم المدور اللى بقول عاليه مابين الغطا و الكوتشه يعنى فى نوص الزور يعنى كده كده الحته دى مافيهاش مياه لما المطور بيسخن الميه تغلى السوسته دى بتترفع الميه تطلع من الخورم ده عالشان انا حاسيس انو خرطوم فايز بس ياريت برد تقولى لو فهمت حاجه تانيه

[aaahhmmed]

و كمان كنت عايز اعرف سعر فلتلر التكييف بكام و ملى الفريون بكام

[thunderwheel]

أولا : فلتر التكييف أنا معرفش الحقيقه سعره كام
ثانيا: شحن التكييف بيكلف 100 جنيه وممكن أقل حسب شطارتك فى الفصال مع بتوع التكييف
ثالثا: موضوع الفتحه إللى كنت بتتكلم عليها أنا مكنتش أتخيل أنك تقصد الثقب الصغير إللى تحت غطاء الريدياتير وده يغير الكلام تماما
بص بأه يا سيدى الثقب الصغير ده ليه فايده عظيمه ألا وهو طرد الهواء الموجود بين مجموعة الغطاء وزور الريدياتير وذلك عند غلق الغطاء بمعنى:
عند غلق الغطاء نقوم بوضعه داخل الزور ثم نقوم بلفه لإحكام القفل فتنضغط سوستة الغطاء لتؤمن قوة ضغط بين الزور والغطاء فتعمل عملية عزل تامه للغطاء ضد خروج الماء منه وعليه نتيجة لهذه العمليه ينضغط الهواء داخل زور الريدياتير ولكن وجود هذا الثقب الصغير يسمح بإنطلاقه للهواء الخارجى حتى لا يعيق عملية إحكام غلق الغطاء ، وعلى هذا لايمكن وأكرر لا يمكن أن يخرج الماء من هذا الثقب الصغير
ولكن شكوتك تقول أن هناك ماء يخرج من هذا الثقب وده مالوش غير سبب من إتنين:
1- أن يكون الغطاء فيه عيب (السوسته ضعيفة أو مكسوره أو قلاووظ الغلق غير سليم ) مما يمنع تركيبه بصورة صحيحة فلا يعمل عملية إحكام غلق لزور الريدياتير
2-أن يكون الحرف الأعلى لزور الريدياتير به كسر أو إعوجاج مما لايسمح بعملية إحكام غلق للغطاء بصورة صحيحة

الحل إذن:
1- أن تقوم بشراء غطاء ريدياتير جديد (أو إستعمال خارج) المهم يكون سليم وتركبه (ده لو عيب غطاء)
2-لو كان العيب فى زور الريدياتير تبقى مشكلة سخيفه جدا وأعتقد حلها هيكون بشراء ريدياتير أخر (إستعمال خارج ب 200 جنيه أو أكتر شويه)

المهم تعرف العيب من إيه لأن هوه واحد من إلل أنا قلته دلوقتى ، بص لو الزور سليم وده سهل تعرفه هات غطاء ريدياتير جديد وجرب مش هيضر أهوه يبقى معاك لقدر الله وقع منك أو ضاع يبقى معاك وااحد إحتياطى، جرب كده وإبقى قوللى

شكرا

====================================

شغلتى مهندس ميكانيكا وسيارتى الرائعة هى ستروين Ax لونها زيتى ميتاليك موديل 96 وسعتها 1360 سي سي وكمان فيها تكييف وسنتر وكاسيت وزجاج كهرباء و لزوم الجمال فيها فتحة سقف وسبويلر أصلى وربنا يستر طريقى

[megoghanem]

شكرا thunderwheel على الرد الوافي والمثالي، واعتذر لك مرتين الاولى على تعبك والثانية على التأخير في الرد لكن اعذرني لانشغالي الشديد

حاجة تانية حصلت في عربيتي ومخوفاني جدا، كنت مسافر على طريق مصر اسكندرية الزراعي وبعيدن العربية سخنت بفظاعة، فركنت ودورت على ميكانيكي لما العملية دي اتكررت، ولما جه شالي حاجة كده عرفت بعدها انها ترموستات الحرارة لكنها اضافية بيقلولوا انها بتبقى في العربيات الاوربية ووظيفتها انها تخلي الموتور يحتفظ بالماء الساخن أطول فترة ممكنة علشان يواجه برودة الجو هناك، وبالتالي هنا يبقى ملهاش لزمة، وبتخلى المياه هنا دايما سخنة وده غلط، لحد هنا ما أعرفش الكلام ده صح واللا غلك ، لكن الرايدتير كان شغال تمام بعد ما شالها والمروحة كانت شغالة بشكل طبيعي وأتوماتيك برضه.

المهم مفيش يومين وبعدين تكررت مشكلة المياه تاني، المرة دي بقت حاجة توف فعلا، وديتها للكهربائي يشيك عليها، قال العربية تمام ومفيهاش أي حاجة، رحت للميكانيكي بعدها قالي انها طرمبة المياه بتسرب وعايزة تتغير، هو فعلا كان في تسريب ميه من ناحيتها لكن كنت فاكره انه من خزان مياه الزجاج، المهم وانا رجع العربية برضه سخنت اوي بس العلامة معدتش 100 مع ان اللمبة الحمرا ولعت، جريت بيها بسرعة علشان الحق اوصل قبل ما تعكمل مشكلة ، وركنت في شارع جانبي قريب ، وبعدها لقيت العربية بتنزل مبه بشكل جامد جدا وغير مسبوق، وتقريبا والله أعلم انها نزلت زيت كمان وده اللى خوفني ، لاني افتكرت انها جابت وش سلندر واللا حاجة رغم انها دايرة تمام وبتمسى عاي جدا،

فدلوقتي هل اللي حصل ده خطر، وانا بركة باذن الله عايز اروح اشتري الحاجات دي لأن النهاردة الاحد محدش فاتح، وكنت عايز اعرف اجيبها منين وتتكلف حوالي اد ايه، وكنت برضه عايز اعرف سعر سير الكاتينة والدينمو اغيرهم بالمرة طالما هايشتغل.

شكرا جزيلا لك، تعابينك معانا دايما، لكن جزاك الله كل خير

[waledwaled]

أولا اللمبه الحمرا دي مرتبطه بترموستات الحراره إللي بيشغل مروحة الرادياتيير فإذا كانت مروحة الرادياتيير شغاله يبقى خلاص اللمبة مش حتنور بصرف النظر عن حالة الميه جوة الرادياتيير يعني ممكن جدا يبقى مفيش و لا نقطة ميه ف الرادياتيير و طول ما المروحه شغاله حتلاقي اللمبه مطفيه!!!
ثانيا في الغالب العربيه واخده هوا عشان كده الميه سقطت من كوعة الميه التحتانيه و السؤال هو إنت بتزود ميه إزاي؟
لازم لازم لازم تاخد بالك من وجود بلفين واحد ورا الرادياتيير على طول و ده بيتفتح ب بيب5 و التاني في آخر الكبوت على الشمالتقريبا تحت الهوايه و البلفين دول لازم تفتحهم الأول و بعدين تحط الميه لحد ما تلاقي الميه نزلت من البلفين و هنا تربطهم تاني و تغطي الرادياتيير عشان كده تبقى إنت طردت الهوا كله من دورة التبريد و مش كفايه أبدا إنك تفتح بلف واحد لازم البلفين مع بعض
ثالثا الترموستات الأوروبي ده أول مرة أسمع عنه؟؟؟؟؟
رابعا كان مفروض أول ما اشتريت العربيه تغير سير دينامو و تقسيمه و طقم تيل فرامل أمامي على الأقل
الحاجات دي (سير الدينامو + سير التقسيمه) مش غاليه حوالي هما الإتنين 125 جنيه و تركيبهم 20
و مبروك عليك العربيه بس لو سخنت منك إوعى تقول حأقرص عشان أركنهالإن إرتفاع الحرارة بيتقاس بمجهود الموتور مش بزمن التشغيل فاهم حاجه؟

[megoghanem]

شكرا أخ وليد على النصيحة، بس أنا فعلا قرصت عليها، ارجو ما تكونش تسببت في ضرر، ولو كانت فعلا جابت جوان فهل ده عيب أو مكلف؟

ثانيا البلف التاني ده مش لاقيه خالص، ولا أعرف بيتفك ازاي فياريت لو في صوره واللا حاجة وصورة للمفتاح المستخدم وجزاك الله كل خير، وبالنسبة لطلمبة المياه أجيبها منين وتتكلف كام؟

[thunderwheel]

أولا إللى بيحصل لعربيتك ده كتير أوى وفى مناطق خطره جدا (لازم تاخد بالك كويس أوى)
ثانيا: موضوع الترموستات إللى الميكانيكى فكها (الأوروبى) دى غالبا البوابة (الترموستات الميكانيكى) إللى بتعمل دوره مغلقه للمياه الساخنه داخل الموتور بغرض ضمان عملية تسخين سريع للموتور فى بداية قيام ودوران المحرك (راجع الرد 178# الخاص بشرح دورة التبريد) وديه حاجه بيعملها الميكانيكيه لما العربيه بتسخن (بيفكوا هذا الترموستات الميكانيكى) وده أكبر غلط لأنه لازم يطبب مدخل المسار المغلق لو كان ناوى يفك هذه الترموستات وإلا يبقى معملش حاجه أوى ويقلل كفائة دورة التبريد حوالى 50%
ثالثا: موضوع مياه وزيت بيخرجوا من العربيه ، طب بيخروجوا منين بالضبط ، أصل ممكن تكون العربيه إخبطت من تحت ودى مشكله ولكن لو كان الموضوع جوان وش سلندر هتجيب مياه فقط من فوق ، وبالنسبه لموضوع اللمبه الحمراء فى التابلوه دى مالهاش دعوه بالمروحه دى لمبة تحذير لأرتفاع درجة حرارة الموتور ودى بتأخذ الإشارة بتاعتها من فوق حساس الحرارة على بلوك الموتور إللى بيعبت برضه إشارة لأمبير الحراره فى التابلوه (يعنى ملهاش دعوه بترموستات المروحه - دى حاجه تانيه)
عموما ماتقلقش العربيه مالحقتش يحصلها حاجه إن شاء الله ، بس أنا لو مكانك لازم أبص على وش السلنر وأيضا لازم أرجع الترموستات إللى الميكانيكى فكه ولازم أراجع على كل وصلات المياه الخاصه بالعربيه والريدياتير وربنا معاك

بالنسبه لسعر طلمبة المياه تقدر تسأل عليه عند رضا عشماوى فى شارع دمشق أو القاهره التجاريه فى التوفيقية أو أمير وجوزيف (شوف عايزها جديده ولا إستيراد مستعمل)

بالنسبه لبلوف الهواء فيه إتنين :
1- قف أما السياره وأفتح الكبوت هتلاقى واحد منهم عامل زى غطاء بلف كاوتش العجل وموجود على الشمال الناحيه إللى ورا وجنب كامة واير الاكسليتير
2- التانى مسمار ألانكيه ناحيتك قدام عاى اليمين شويه جنب مقياس الزيت

أحب أقول حاجه مهمه نقصان الزيت والمياه فى السياره لهما أضرار جسيمه وده معناه أن عند أى تحذير أو أى علامه تدل على أى نقصان أو مشكله فيهم لابد من التوقف فورا بالسياره وتسبها تبرد تماما لوحدها فى الهواء الجوى (لاترش مياه ولا أى حاجه) وبعدين تبتدى تعالج المشكلة ولو فشلت أقطر السياره وماتشغلهاش
وشكرا

====================================

شغلتى مهندس ميكانيكا وسيارتى الرائعة هى ستروين Ax لونها زيتى ميتاليك موديل 96 وسعتها 1360 سي سي وكمان فيها تكييف وسنتر وكاسيت وزجاج كهرباء و لزوم الجمال فيها فتحة سقف وسبويلر أصلى وربنا يستر طريقى

[megoghanem]

السلام عليكم
شكرا يا باشا ع المعلومات الجميلة دي
أنا غيرت الطرمبة وجبت واحدة ايطالي بـ140 جنيه، وغيرت كمان سير الكاتينة رغن ان اللى فيها كان كويس جدا بس علشان الأمان وسعره طلع مفاجأة على عكس ما توقعت 60 جنيه بس يعني أقل من عربيات كتيرة، وكمان غيرت سير الدينمو 30 جنيه، وجبت فلتر هوا بس طلع مش مقاسه خاصة ان اللى فيها مطاطي لكن ده صلب، باقي فقط اغسل الرايداتير واظبط الكهربا، وربنا يسهل

المهم العربية كده تقريبا بقت تمام، وماكانش في تسريب زيت واللا حاجة، الحمد لله
الشيء الموجود دلوقتي غطاء الرايداتير علشان كان بيسرب وبيدخل هوا ليها، الميكانيكي عمله كيس بلاستيك بشكل مؤقت على ما أجيب واحد، وفي حاجة كمان قلقاني، وهو بيكشف عن المياه وهي سخنة، فتح البلف بتاع المياه اللى جوه، وعلشان الميه كانت سخنة، البلف طار ومالقيتوش، قالي مش مشكلة حط بلف بتاع أي عجلة هو واحد، بس بضراحة أنا مش مقتنع، هو صحيح بيقفل عادي جدا، بس أعتقد ان التاني كان مخصوص، فهل ده ممكن يعمل مشكلة، ومني أجيب واحد تاني أصلي ويعمل كام؟


شكرا جزيلا للجميع ولكل من ساهم في حل المشكلة، وآسف على ازعاجكوا جميعا، ومنكم دائما نستفيد

تحياتي

[aaahhmmed]

شكرا للأفاده

[aaahhmmed]

انا عربيتى 1360 فولت العربيه لأيتها مشيت حوالى 250كيلو بس كده أكلت بنزين كتير أوى كنت عايز أعرف مكان واحد عارف فى كربريتير السيتروين لو حد يعرف ياريت يقولى ضرورى

[aaahhmmed]

معلش كان عاندى مشكله تانيه عندى العربيه فولت تانكاها لغيت الأخر أخددت حوالى 45 لتر بالضبط لما العرببيه عملت 250 كيلو لأيت لمبه البنزين نورت كده أكيد فى حاجه فى الكربراتير كنت عايز اعرف واحد يعرف فى كربرياتير السيتروين و يكون عانده قطع غيار بحيث لو فى حاجه بايزه فى الكربراتير يغيرها بس مش لأيه ياريت حد يقولى على مكان واحد كويس

[thunderwheel]

1- بالنسبه لضبط الكاربيراتير يمكنك الرجوع للرد رقم 171 صفحة 18 من هذا التوبيك (والخاص بضبط استهلاك الوقود ستروين ax )
2- بالنسبة لموضوع بلف الهواء إللى ضاع والميكانيكى قال هات بلف كاوتش عربيه ، الكلام ده صحيح هو نفسه نفس بلف كاوتش العربيات والكلام ده موجود فى عربيات كتير ،بس خد بالك حاول تجيبه جديد علشان مايبقاش فيه شروخ ولا تقوب ، أنا عن نفسي شارى شويه وحطيطهم فى العربيه لأن البلف ده وقع منى كذا مره وضاع، عموما أنا بخصوص هذا الموضوع كنت عايز أقول حاجه: أنت لما بتركب البلف ده لأول مره قلاووظ الدكر إللى على العربيه بيقطع قلاووظ زياده فى بلاستيك البلف علشان خاطر يأمن عزل كامل ضد أى تسريب وده معناه أنك لو بتركب لاول مره هتقرص عليه سنه صغيره فى الأخر (سنه صغيره خالص) وفى المرات إللى بعد كده ماتقرص عليه خالص (لف البلف لحد مايثبت براحه) والموضوع ده دايما وأبدا ولزما والعربيه بارده تماما (تحت أى ظرف من الظروف) وشكرا
====================================

شغلتى مهندس ميكانيكا وسيارتى الرائعة هى ستروين Ax لونها زيتى ميتاليك موديل 96 وسعتها 1360 سي سي وكمان فيها تكييف وسنتر وكاسيت وزجاج كهرباء و لزوم الجمال فيها فتحة سقف وسبويلر أصلى وربنا يستر طريقى

[megoghanem]

شكرا يا باشا، طب بالنسبة لغطاء الرايداتير أصل أنا مالقيتش في التوفيقية، وعايزله حل ضرورى، وكمان مالقيتش فلتر هواء كويس

[aaahhmmed]

شكرا ليك ياباشا بس انا مشكلتى مش فى زبط صوت العربيه و لا الفلتر انا كنت عايز اعرف طيب الكربراتير من جوه ايه ظروف البيكات و كده يعنى