افضل ميكانيكى للبيتلز من واقع التجربه افيدونا

[ابوهاشم]

انا سمعت عنه كتير
وعلى فكره هو مشهور جدا ومن اقدم وافضل ميكانيكية البيتلز
ومحمد الاسمر اللى فى الزيتون من تلامزته واتعلم على ايديه
بس للاسف انا لم يصادفنى الحظ انى اتعامل معاه

[ramyheshmat]

فيه كمان ميكانيكى كويس جدا ً في الحى العاشر مدينة نصر اسمه مسعد وهو شاب وبجد فاهم في الفولكس وكنت رحت للحاج عزب في جسر السويس لكن الاسطى خميس تركه وفتح ورشة تانيه وده كان الوحيج اللى بيفهم عنده كويس لكن شحته مش اد كده

[samoha88]

السلام عليكم و رحمة الله و بركاته
بجد الموضوع ده قيم جداا
انا لسه شاري بيتل 1303 من 4 شهور و بالتالي لسه جديد في التعامل مع ميكنكيتها أو أي ميكنيكي أساسا :]
طبعا جربت كام واحد و للأسف معرفتش من بالظبط أمين و سعره معقول و شغله نظيف
الحاج محمد علي ده كان أول واحد أتعامل معاه بس واضح من كلامكم أنو أمين بس الظروف اني لسه كنت شاريها و مليش خبرة في التعامل هي اللي خلتني أكش منه
تاني واحد كان عبدالسميع اللي في جسر السويس هوا تمام و كل حاجة بس الراجل كبر أوي و صنايعيته بطاء أوي و بالتالي هيكروته
و أخيران في واحد بعد المزلقان يمين الناحية التانية من المحمدية لقطع الغيار أسمه مسعد وعنده أبنه ماجد وواحد تاني أسمه محمد ده بتاع بيتل و جولف و أوودي فاهمين جداا و تمام و 10/10 بس مش عارف اذا كانو كدا غاليين و لا لأ
انا تقريبا قريت كل الصفحات و ألف مبروك للشد عربيته و ربنا يعوض على اللي عملو حوادث خير يارب
انا فعلا مش عارف أثبت على مين و انتو بتقوللو انو مفيش حد بيفهم في كلو
انا نفسي في طلب متيجو نقسم مين شاطر في ايه ؟؟ بحيث يبقى سهل اننا نحل مشكلتنا
انا عندي مشكلة في الاتزان بتاع العربية و نفسي أرجعها لارتفاعها الأصلي لأن في عندي عجل أعلى من عجل من الأخر مش متزنة و بتعوم ده غير ان الكوتش اللي ورا مايل كدا و طالع لبرا يعني عاملين شكل 8
الحمد لله مفيش مشاكل واضحة تاني غير ان الدريكسيون تقيل شوية ما علينا المهم أعرف الميكانيكي و بعدين أحل المشاكل
يارب أكون أفدتكم بحاجة .
وكل سنة و أنتم طيبين

[ابوهاشم]

انت كده عاوز تروح لبتاع ظبط وزوايا مش ميكانيكى

[samoha88]

متشكر قوي لأهتمامك ياباشا :] وانا عارف انك مهتم جداا
بس السؤال فين؟؟

[ابوهاشم]

فى واحد كويس بتاع ظبط وزوايا جنب سنترال القلعه

[El.Hossieny]

فى واحد كويس بتاع ظبط وزوايا جنب سنترال القلعه

يا ريت يا هاشم باشا لو تشرحلي مكانة بالظبط (من صلاح سالم مثلا ) عشان انا كمان عايز اظبط زوايا

[ابوهاشم]

انت لو فى صلاح سالم ومتجه للسيده عائشه
ماتطلع الكوبرى وادخل يمين فى اتجاه القلعه
فى نص الشارع على الشمال هتلاقى السنترال
وبعديه بحوالى 30متر بتاع الظبط والزوايا

[ahmed2y]

استاذ
ramyheshmatممكن تقولى مكان مسعد الى فى الحى العاشر

[أحمد سالم]

فى واحد كويس بتاع ظبط وزوايا جنب سنترال القلعه

فعلا يا استاذ هاشم الراجل ده ممتاز فى ظبط الزوايا والترصيص عن تجربه شخصيه فى التعامل معه

[ابوهاشم]

فى كمان واحد ممتاز فى شارع احمد ذكى المعادى
قريب من فايده كامل بجوار البنزينه
اسمه (طلب الدخاخنى)

[shenawi]

السلام عليكم ورحمة الله وبركاته،،
أخوكم معاه بيتلز من حوالى 3 سنين، أنا من المنيل وفيه كذا ميكانيكى بيتل فى المنيل، لكن أنا بتعامل مع سامي سعد، هو غالى شوية لكن شاطر جدا وأمين وكان شغال زمان فى التوكيل وطبعا تفاصل معاه، وتليفونه 0122269555، وعلى فكرة هو مش تنك زى ما الناس فاكره، أنا بتعامل معاه بقالى 3 سنين، وعنده صنايعى شاطر اسمه خالد هو اللى بيشتغل مع كام واحد تانيين، وتليفونه 0108325777 وجنبه بتاع قطع الغيار الجديدة الحاج عبدالمجيد وأسعاره كويسة.
أما بالنسبة لقطع الغيار الاستيراد ففيه واحد فى شارع متفرع من شارع فيصل اسمه مصطفى أسعاره غاليه شوية ومش بيفاصل لكن هو محترم وابن حلال وحاجته كويسة جدا وتليفونه 0103418134
وإن شاء الله حبقى أقولكم على السروجى عشان أنا سمعت إن فى واحد فى السيدة نفيسة كويس جدا والحاج سامى سعد عامل عربيته عنده فى منتهى الجمال (على فكرة عربية سامى سعد مش أى عربية)

[gomangy]

والله يا جماعه مشكورين جدا علي المعلومات الجامده

[caution]اللون الأحمر مخصص للمشاركات الإدارية فقط
القوانين العامه الواجب اتباعها لجميع الاخوه أعضاء المنتدى
مشرف الأوروبى 2 [/caution]

[sakr84]

بجد انا لسه جايب بيتلز من يومين بس لما قريت المشاركات بتاعتكم حسيت فعلا كانها معايا من سنين علشان الناس بتعاونها افدتنى جدا وبجد مجهود جبار من الاعضاء يستهلوا عليه الف شكر .
وليا استفسار صغير انا ساكن فى الهرم وعاوز ميكانيكى جامد يكون قريب منى فهل ممكن حد يفيدنى ؟؟؟
وكمان كنت سمعت عن واحد اسمه حسن او حسين شوخرم هو فاتح فى الطالبيه جمب شركه الأدويه حد سمع عنه ياريت حد يكون جرب الصيانه عنده او سمع عنه يقولنا نظامه ايه كويس ولا لا وغالى ولا رخيص ؟؟؟؟؟

[smsmxxxxxx]

يا اهلا بيك يا اخ صقر بين محبي البتلز
طبعا الاعضاء هنا من اكتر الناس المتعاونة والمحترمة اللى قابلتهم فى حياتى
ودى حقيقة مش مجاملة
فأطمن خالص اى حاجة هتحتاجها هتلاقي الكل بيساعدك ومعاك
وألف مبروك على البيتلز بتعتك وربنا يديك خيرها ويكفيك شرها

بالنسبة لشخرم انا اول مرة اسمع عنه بس باين من اسمه انه جامد اوى هدور عليه وهبقي اروحله
واقولك على نظامه وانتا برضه لو رحت الاول ابقي قللي

بس بوجه عام كل ميكانيكية البيتلز فى فيصل والهرم خونة
بسبب تعاملهم مع سواقين المايكروباص الفولكس بيطلعوا روحهم فبيخلصوه مننا

ما بيصدقوا واحد جديد معاه بيتلز بيظبطوه احلى تظبيط مش فى الفلوس وبس لاء ممكن يسبلك حاجة تتسببلك فى مشكلة علشان تجيله تانى وتالت وعاشر

فلازم تكون فاهم او معاك حد فاهم او على الاقل عرضت المشكلة هنا والناس قلتلك الحلول المحتملة والتكلفة

اما بالنسبة لكهربائي البيتلز
فأنا الحمد لله اتعرفت بواحد محترم جدا اسمه محمود
محترف جدا واخلاقه عالية ومحترم وحنين فى الفلوس

انا رحتله مرتين والحمد لله بيحل كل المشاكل

هو فى شارع خاتم المرسلين عند مطلع كوبري الطالبية الجديد
بتدخل من شارع الهرم عند شركة سيد للادوية يعنى الطالبية هرم

لو قلتله من طرف محمد سالم بتاع الفولكس الصفراء هيسيب اى شغل فى ايده وهيعملك عربيتك الاول
اسمه محمود وموبايله 0123768020

وفي ميكانيكي فى بين السرايات اسمه عم فاروق تخصص بيتلز
انا بصراحة خايف اروحله يقلبلي العربية توك توك لانه من طرف حماتي هي اللي قايلالي عليه
بس باين عليه جامد عديت عليه من يومين لقيت عربيتين فاكك مواتيرهم

-------
محمد سالم