عربية سيئة + توكيل ضايع = فلوس بتترمى فى الارض

[Yarisawy]

لا حول ولا قوة الا بالله ... يا أخى لا تكن متهاون معهم ... المشاكل ذى ما هيا

لازم بجد تقلبلهم الدنيا , انت شارى عربية على الزيرو يعنى

[MohabSaeed]

الاخوة الافاضل
السلام عليكم

اول امبارح غسلت العربية علشان يبقى باين فيها كل حاجة اتضحلى ان التقشير موش فى الاماكن اللى انا مصورها بس ده موجود فى كذا مكان تانى و على الرغم من صغر الحجم الا انه بينتشر

روحت التوكيل امبارح الساعة تقريبا 8 صباحا و استلموا منى العربية وكنت مكلم السيد الفاضل المهندس - مدير الصيانة هناك و مشكور قالى هانعمل اللازم و نسلمك العربية فى نفس اليوم
اولا الحدفة اللى كانت فى العربية يمين بقت شمال قولتلهم عليها
ثانيا المالتى فنكشكن ماتغيرش و عايز اغيره لانه بايظ من ساعة الاستلام
ثالثا العربية رجعت تعمل اصوات غريبة جوه الصالون و ان كانت موش عالية زيى الاول
دخلت العربية و فكوا التابلوه و اتغير الثرموستات و الكويل بتاع التكييف ودخلت مع مهندس فى الصيانة ولد ذوق جدا و وريته مكان التقشير وبلغ المهندس -مدير الصيانة
المالتى فنكش كان السيد مدير الصيانة حاجز واحد لنفسه قالى هاديهولك و بلغ الورشة بالكلام ده
بالنسبة للدهان بتاع العربية قالى كمل الصيانة بتاعة الـ 5000 و بعد كده هاتظهر كل مشاكل البوية و نرشلك العربية و لو انا حابب ارشها دلوقتى هاسيبها عندهم و ابقى اخدها تانى يوم - انتم متخيلين عربية هاتترش و لسه ماكملتش 2000 كلم علشان عيوب الدهان

المهم اخدت الكلام منه و سكت و على الساعة 7.45 مساء قالولى تعال استلم العربية و اليكم النتيجة :
- التكييف كما هو تمام بيعمل صوت عالى و مزعج لم يحدث به شيئ الا ان زمن الفصل و التشغيل بقى طبيعى
-المالتى فنكشن ماتغيرش لان المخزن فاضى
-العربية بتعمل اصوات
-الحدفة زيى ماهى
-التابلوه اتجرح و اتقشر من عند العدادات
-القاعدة بتاعة الفتيس الاوتوماتيك اتجرحت و هم بيفكوها
-الزراير بتاعة الانتظار و الصف اللى جنبها كله اترحلت لتحت شوية مابقيتش فى النص
-فى لون ازرق و لون تانى باهت اورجوانى تقريبا موجود جنب زرار التحكم بتاع المرايات و موش عايز يطلع
- سامع صوت الموتور اعلى من الاول وانا ماشى بالعربية و صوت هواء بسيط و ده طبعا دليل على ان تقفيل التابلوه مارجعش زيى الاول خالص
- اخيرا مفتاح الكونتاكت موش عايز يطلع من العربية نهائى و انا ركنتها و راكب تاكسى حاليا لانى موش هاقدر اسيبها و مفتاحها فيها

انا الحقيقه مش قادر اتخيل الوضع ....... بجد الله يكون فى عونك .........
ماتسيبش حقك يا استاذ احمد ........ ولازم تتكلم معاهم فى موضوع تبديل العربيه ..... انا عارف انه صعب ......... بس عربيت حضرتك واضح ان فيها مشاكل كتير .
قدر الله وما شاء فعل .

[ahmedsiyam]

السلام عليكم

انا كلمت السيد المهندس / حبيب و قالى هايتعمل تقرير فنى عن العربية و يتبعت مالزيا تحت اشراف السيد المهندس / احمد عبد الحميد
ويشوفوا رد الشركة الماليزية على الكلام ده ايه
و قالى ان لو ليك حق موش هايضيع انت عميل عز العرب و احنا موش هانفرط فى حقك
الكلام جميل جدا بس الاهم منه التنفيذ

[Islam_galal]

ربنا يكرمك و يعوض عليك
مش لاقي كلام و مش متخيل نفسي في نفس الموقف

[ahmedsiyam]

مشكور يا اخ اسلام على مداخلتك

و موش قادر اقولك انا محبط قد ايه لانى كنت فاكر العربية دى حاجة تانية خالص مع ان فى ناس استلمت و ماشتكيتش لسه منها بس موش كل اللى معاه العربية عضو معانا فى نايل موتورز و اغلب اللى بيشاركوا معانا فى القسم ماركبوش العربية من اساسه و اللى معاه و موش عاجباه كبر دماغه من المنتدى او من القسم ده تحديدا

بس انا موش هاكبر من المنتدى و لا القسم ده و زيى ما الناس اقنعتنى بالعربية و هم عندهم حق بس اللى جرب بس موش اللى سمع عنها
انا كمان هافضل فى المنتدى و احكى تجربتى بمنتهى الامانة للناس اللى بتفكر تشترى علشان يبقوا على نور

[mino]

يا استاذ احمد انا مقدر جداً اللي انت فيه و قلبي معاك و الله وانا مش عارف كنت هعمل ايه لو مكانك

بس صدقني عن تجربة العربية معايا و رايح جاي بيها من اسكندرية لبرج العرب يعني 120 كم 4 ايام في الاسبوع انا عامل دلوقتي 7000 كم تقريبا و هي كويسةو انا سوقتي عنيفة كمان يعني والله ساعات بجيب 170 و 180 و مش بتقول لأ بس هو صوت الموتور بيعلي بعد ال 120
انت بس يمكن حظك وحش شوية
و بجد الله يكون في عونك حاجة تدايق فعلا ان الواحد يتحط في موقف كده في حاجة هايفة
مبالك لو عربية ب 90000 جنية

[ahmedsiyam]

الاخ mino

انا موش حظى وحش شوية انا كده حظى وحش كتير و انا موش باذم فى العربية انما العبد لله محترف و فاهم كويس و كنت بانزل مع اصحابى اشتريلهم عربيات
وعارف ان العربية اللى معايا دى لو صبرت عليها لحد الـ 5000 هاتبقى زيى العربية المستعملة اللى عاملة 100000 كلم
و ده معناه ان بروتون زيى مابتطلع عربيات حلوة بتطلع برضه عربيات زبالة وحشة جدا
لو عندهم عيب متعارف عليه اهلا وسهلا يتغير و خلاص انما مافيش عربية يطلع كل حاجة فيها وحشة
واحد جارى كان اشترى هيونداى فيرنا و العربية جابت موتور فى اول 1000 كلم بسبب ان الزيت بينقص و هو موش واخد باله و مع ذلك التوكيل شال الموتور و حطله واحد غيره
بس العربية كلها زيى الفل مافيهاش مشكلة
الاخ توت كان بيقول ان اليارس كانت نازلة بعيب اسطوانة الدبرياج
بس ده موديل 2007 و عدد قليل و اتصلحت كلها على حساب الوكيل انما موش عربية بتنتج بنفس العيوب من سنة 2005 لحد موديل 2008 و فيها نفس العيوب ماتمش تفاديها
القصد ان اى عربية فيها عيوب ممكن تنزل بيها انما موش كلها خربانة حتى الدهان بيقشر اقول ايه بس - حسبى الله و نعم الوكيل

[mahamedaraby]

ده على كده تطلع تقفيل المصرى فى النيسان تحفه

معلش هضيف على كلامك ان لما حصلت المشكله دى فى عربيه نيسان غيروا لصاحب العربيه الكبوت والشنطه اللى كان فيهم مشكله فى الدهان والعريبه دخلت خط التصنيع مش التوكيل

هقولك ايه ربنا معاك يارب والمشكله تخلص على خير

ومحدش عارف الخير فين ان شاء الله المشكله تتحل باقل الخساير ربنا معاك

[kh_talaat]

أستاذ ahmedsiyam متسكتش على حقك ولو شايف إن مفيش حل غير تغيير العربية يبقى لازم تصمم على موقفك دة للنهاية وتنظم أسلوب حل المشكة بداية من متابعة الحل مع التوكيل وإرسال E mail للشركة الأم بكل تفاصيل المشكلة ولو الشكلة محلتش المشكلة بشكل يرضيك يبقى عليك وعلى جهاز حماية المستهلك وإتخاذ كافة الإجراءات القانونية ضد التوكيل والشركة وفضحهم أمام الراي العام

وإن شاء الله تتحل المشكلة على خير وبشكل مرضي بالنسبة ليك ، ومتنساش الدعاء إلى الله قبل كل شيئ ... وربنا معاك

[CryptonX]

الاخ mino

انا موش حظى وحش شوية انا كده حظى وحش كتير و انا موش باذم فى العربية انما العبد لله محترف و فاهم كويس و كنت بانزل مع اصحابى اشتريلهم عربيات
وعارف ان العربية اللى معايا دى لو صبرت عليها لحد الـ 5000 هاتبقى زيى العربية المستعملة اللى عاملة 100000 كلم
و ده معناه ان بروتون زيى مابتطلع عربيات حلوة بتطلع برضه عربيات زبالة وحشة جدا
لو عندهم عيب متعارف عليه اهلا وسهلا يتغير و خلاص انما مافيش عربية يطلع كل حاجة فيها وحشة
واحد جارى كان اشترى هيونداى فيرنا و العربية جابت موتور فى اول 1000 كلم بسبب ان الزيت بينقص و هو موش واخد باله و مع ذلك التوكيل شال الموتور و حطله واحد غيره
بس العربية كلها زيى الفل مافيهاش مشكلة
الاخ توت كان بيقول ان اليارس كانت نازلة بعيب اسطوانة الدبرياج
بس ده موديل 2007 و عدد قليل و اتصلحت كلها على حساب الوكيل انما موش عربية بتنتج بنفس العيوب من سنة 2005 لحد موديل 2008 و فيها نفس العيوب ماتمش تفاديها
القصد ان اى عربية فيها عيوب ممكن تنزل بيها انما موش كلها خربانة حتى الدهان بيقشر اقول ايه بس - حسبى الله و نعم الوكيل

اهم حاجة اعصابك , اهدأ .

و فكر منطقيا واحدة واحدة .

اولا : السيارة بها عيوب 1 و 2 و كذ .
ثانيا : علي الاقل " سمعيا و حسيا " كان التوكيل لحد دلوقتي متجاوب ( مشوفناش فعل لسة ) .
ثالثا : لازم تحدد انت عايز ايه مش هم الي يحدده ودي اهم نقطة :

- اريدها تتصلح بالكامل و ترجع زي الزيرو ان امكن
-تريد استبدال بسيارة زيرو خالص
-تريد استرجاع اموالك بالكامل و شراء ماركة اخرى

لازم تفكر كويس اوي حتختار ايه من دول . انا في راي الشخصي ال3 حقك .
و ان كنت مازلت مقتنع بالسيارة يبقى لازم تستبد حتى لو فقدت " الذوق و الهدوء " مع التوكيل - في جهاز حماية المستهلك حيرجعلك حقك ان شاء الله و في زميل هنا في المنتدى رجع سيارته بالكامل و استرد فلوسه .

و لما نشوف ماليزيا حتقول ايه في الموضوع . و انت قررت ايه ان شاء الله .

[Ghamrawy]

ان شاء الله الموضوع يتحل حل يرضيك و انا رأئي ان عز العرب مش جديد فى السوق زى توكيلات كتيير من بتاعة امبارح و أول امبارح و أكييد حايخاف على سمعته و أحسن حل فى حالة عدم حل المشكلة هو جهاز حماية المستهلك .
و طمننا دايما

[FERFESH]

معلش يا جماعه انا مش مقتنع خالص بالبيحصل ممكن يا استاذ احمد تصور العربيه تانى لانى مش فاهم جاجه من الى انت مصورها ياجماعه يا اصحاب الجين2 لوسمحتم كل واحد يدخل ويقول رايه ايه فى العربيه بتعته لان البيحصل سمع وحشه للعربيه وهى فعلا معايا بس والله زى الفل حرام البيحصل فى المنتدى وخصوصا الموضوع دة انا مش باكدب ا احمد بس فيه حاجه غلط

[ahmedsiyam]

FERFESH
الموضوع موش الدهان الخارجى بس اقراء الموضوع كويس و هتفهم انا قصدى ايه حتى لو فى مشكلة اتحلت التوكيل نفسه فى الصيانة بهدل العربية من جوه و موش عارفين يحلو المشكلة برضه على الرغم من التعاون الكامل لمدير الصيانة الا انه موش هايعمل كل حاجة بايده
ثانيا العربية اصلا لو مظبوطة ماكانتش احتاجت فك تابلوه
و الدهان اللى بيطلع ده رايى الصيانة فيه انه يترش تانى
كون ان العربية اللى معاك حلوة يبقى ماشاء الله و ربنا يحفظهالك انما موش معناه انى باتجنى عليها

الاخ CryptonX
انا عاوز عربية جديدة لانى مقتنع بيها بس ماكنتش متخيل انها لحد مو 2008 هايبقى فيها العيوب دى بس اختيار التصليح ده موش فى قاموسى خالص لانهم بهدلوا العربية و هى لسه عاملة 1500 كلم

[ahmedsiyam]

باقى الاخوة الكرام مشكورين طبعا على مداخلتكم و ردودكم و جهاز حماية المستهلك هو الخيار الاخير قدامى

[Eng.Sameh]

مش عارف يا استاذ احمد انت مقرأتش تعليقي ، ولا مش عاوز تكلم استاذ حبيب ، ولا كلمتو ومعملش حاجه ولا اي بالظبط ، حتى معلقتش على كلامي !!!!!!!!!!!!!!!!!!!!!!!