عربية سيئة + توكيل ضايع = فلوس بتترمى فى الارض

[ahmedsiyam]

الاخ حسين
تحياتى و مشكور على متابعتك و مشاعرك الجميلة
وانا متفق تماما مع اخونا مهاب فى كل ماقاله
انا بس زيى مافى ناس حكيت تجربتها الناجحة مع الجين 2 انا كمان حكيت تجربتى معاها
وانا راجل اشتريت العربية دى عن اقتناع تام و من الاسباب المهمة برضه تشجيع الاخوة فى المنتدى للعربية دى و التجارب الناجحة الكثيرة اللى الناس بتقولها
بس لازم هتلاقى عيوب و فلتات طبعا اهم حاجة ماتركزش مع العربية و تخاف ان يحصلها حاجة بالعكس تعايش مع العربية عادى جدا لان اى عيوب جوهرية بتبان بس انت ماتتلككش للعربية انما لو عيوب خايبة فى التقفيل ده موضوع لا تقلق منه لانه تحت السيطرة
الف مبروك وربنا ان شاء الله يكرمك فيها

[som3aa]

الاخ som3aa

انت تروح التوكيل و تقابل المهندس امر ده راجل محترم جدا وهايساعدك على قد مايقدر لانه راجل دوغرى و مابيعملش حساب لمخلوق و لا بيجامل حد

ان ماحصلش اللى انت عايز و ماعتقدش لانه بامر الله الموضوع سهل تطلع على المهندس احمد عبد الحميد وده راجل محترم و فاهم جدا وان شاء الله تتحل و تنبسط من العربية

شكرا ليك بس الموضوع كله ان العربية دى سيئة بمعنى ان العربية فى الضياع زى الكورولا الجديدة من ناحية الموتور.
الحاجات البسيطة تتصلح بس موضوع الموتور دا ملوش حل نهائيا!!
بصراحة العربية كلمة زبالة كلمة صغيرة اوى عليها.
بعدين فى ناس بتقول مهى الكورولا طلعت معيوبة, طيب الكورولا معيوبة فى الموتور زى الجين 2 انما على الاقل الجودة كويسة من جوه.
معلش عربية معداش عليها سنة و نص و طلع فيها عيوب بالهبل!!!!! يبقى ازاى عربية كويسة؟؟
ايه الميزة اللى تخلى واحد يضحى بالجودة و الموتور و يشترى عربية بالعيوب دى؟
من ناحية قوة الموتور مينفعش نقول 1600 و بس , 0 فى التسارع.
على فكرة احب اوضحلك اكتر واحد تلاقيه عنده العربية بقاله سنتين اتنين بسسسس فاكيد مش كل عيوب العربية بانت و نسبة ملاك العربية هنا قليل جدا فاكيد برده مش هتعرف عيوبها و نصيحة منى محدش ينصح اى شخص يشترى العربية دى (خصوصا لو اوتوماتيك) , لو مانيوال يوضحله انها فيها عيوب فى الخامات و التقفيل ذى كاوتش الابواب اللى بيطلع و الزراير و الانذار و كل حاجة يعنى اما لو اوتوماتيك محدش يشتريها نهائييييا اما المانيوال فاللى يشتريها لازم يعرف كل اللى فيها قبل ميتدبس.

أما بالنسبة لمشكلتك فنصيحة كلم جهاز حماية المستهلك و متسبش حقك.

[king_de_egypt]

يا استاذ احمد ابقى طمنى عملت ايه عشان بصراحه الموضوع حرق دمى جاااامد فا ياريت اى جديد يحصل تقلنا عليه ؟؟؟؟ وربنا معاك و ان شاء الله يغيروهالك

[noble911]

يارجالة الوكيل بينزل كل دفعة حوالي 400 عربية مفيش داعي لان الناس تقلق منها
و بالفعل الكل بيشتكي من الاتوماتيك انما المشكلة دي مش في المانيول
يعني وارد ان تطلع نسبة خطأ و ايضا في ناس كتير العربية ماشية معاهم كويس
و عوامل الخطأ كتيرة
من التصنيع او من النقل او من المستخدم نفسه
و ربنا يوفق اللي عنده مشاكل في حلها
و يمتع اللي معندوش مشاكل بالعربية

[Powert]

الموضوع ده في انه "ان"

[ahmedsiyam]

يا جماعة الموضوع عندى فى تطورات بس انا موش عايز اتكلم فيه الا لما يخلص خالص علشان يتعرض عليكم بالكامل و ان شاء الله يخلص الاسبوع ده لانى جبت اخرى من المماطلة و التاخير

[Hassan Khalil]

بالتوفيق يا ابو صيام .. و ربنا ييسر لك الامور .. و يرزقك الخير

[ahmedsiyam]

مشكور يا ابو على

[Islam_galal]

ربنا يوفقك ، قلبي معاك

[harphosh]

الأخ الفاضل / أحمد صيام
أرجو أن تعتبر أن ما حدث لك ابتلاء وتحمد الله عليه وبإذن الله ربنا هايكرمك لو احتسبت ما أنت فيه من أرق ومشاكل لدى الله وحسبك الله ونعم الوكيل
أدعو من الله أن يتم حل الموضوع بما فيه الخير لك بإذن الله فى القريب العاجل ولا تحزن ولا تجزع فإن الله لن يضيع حقك أبدا

[ahmedsiyam]

مشكورين يا رجالة
وربنا يتقبل يا اخى ان شاء الله و جزاك الله كل خير على دعوتك الجميلة

[mohamedhashem2010]

الى من يهمه الأمر بخصوص جين-2

من خلال المتابعة لهذا الموضوع وجميع الموضوعات فى هذا المنتدى الجميل وجميع المنتديات بخصوص ال جين-2
ارى من وجهة نظرى ان كل من يشكر فى العربية ليست معة أساسا وانما سمع من واحد صحبة اوشافها او سمع عنها فى المنتدى أو .....أو...... الخ
وذلك لان العربية مش منتشرة أوى فى مصر يادوب بقالها سنة ونصف
والى عندة العربية اما العيب ظهرت بسرعة فيشتكى ويقول عيوبة واما لسة شريها جديدة ولسة ما ظهرتش فالطبيعى انه يشكر فيها وذلك للشكل وما الى ذلك
وخلينا نكون واقعين اكتر
المعادلة الى كل الناس عرفاها ان اى عربية جديدة لاتظهر فيها اى شىء قبل خمس سنوات على الاقل وتزيد المدة مع حسن الاستخدام
والا كنا نجيب مستعمل وخلاص ونوفر فى الفلوس
وانا بصراحة كنت عاوز اجيب مستعمل (فى حدود فلوسى وخلاص)ولكن غيرت رأى لما سمعت وشوفت عن ال جين 2 لدرجة اننى اتسحرت بيها ولكن بعدما تابعت الموضوع فكرت مش ألف مرة ..... لا مليون مرة اية يخلى عربية بالمواصفات الهايلة دى كلها وبالسعر دة أكيد فى حاجة وقد كان ...
متشكر جدا جدا وأرجو الرد على كلامى

[som3aa]

وأرجو الرد على كلامى

هو دا الكلام !!!!!!
مش مفروض عربية يظهر فيها و لا عيب قبل 3-5 سنين على الاقل و لو عيب يبقى عيب واحد بس و صغير يتغير فى الضمان عير كدا لأ.

ممكن عيب صناعة واحد بس , بس الكلام دا ميبقاش كلام عام , يعنى مش العربية تبقى معروقة بعيوب معينة .

[arahman1110]

يا جماعة الموضوع عندى فى تطورات بس انا موش عايز اتكلم فيه الا لما يخلص خالص علشان يتعرض عليكم بالكامل و ان شاء الله يخلص الاسبوع ده لانى جبت اخرى من المماطلة و التاخير

إيه يا استاذ أحمد مفيش جديد ولا ايه؟
يا ريت تقولنا على نتيجة الموضوع ده علشان احنا منتظرينه بفارغ الصبر
انا عاوز اشترى الGEN2 بس مستنى اشوف رد فعل التوكيل معاك.

[Amien]

انا عاوز اشترى الGEN2 بس مستنى اشوف رد فعل التوكيل معاك.

حضرتك بتهزر ولا مقريتش الموضوع ..... مش عارف آقولك ايه بس بعد كل ده انا شايف ان دى عربيه انا شخصيا حآوصى كل اصدقائى ومعارفى بالبعد عنها تماما والباب اللى يجيلك منه الريح ....هى ال 90 الف بقت لعبه ولا ايه ....


كان الله فى عون الاستاذ صيام وموفق فى التغيير بآذن الله .