مشكله محتاج تفكروا معايا فيها

[gazzar91]

طيب أنا عندي سؤال كده -بعد إذن بشمهندس سمير طبعاً- هو الـ rpm بيبقى على كام عندك على السلانسيه؟؟؟؟

[jojowork1]

850 - 900 rpm

[gazzar91]

850 - 900 rpm

يعني مظبوط..........
أصلي كنت بفكر في Idle control valve

[samirayad]

وكان فعلا فيهم سلك وحش سايح شويه ما ناحيه البوبينه

طيب تابع اللى زيه الجديد

وشوفه بيسخن برضه من عند البوبينا ( فى نفس المكان ولا لا )

وبرضه طمنا على شكل البوجيهات الجديده

بعد ماتدور شويه فقط ....وشوف عليهم زيت مكنه ولا

يعنى سخن وأنت واقف وبطل وطلع البوجيهات وشوفها معرقه زيت ولا
لا

ومتمشيش بالعربيه قبل ماتكشف على البوجيهات بعد فترة التسخين
والرجرجه والنتشه أياها

_________________________

وياريت تكتبلى الأرقام اللى على البوجيهات الحاليه والقديمه ( علشان عاوز أعرف المدى الحرارى للبوجيهات )

وسؤال آخر .....أيه أخبار الثغره بتاعة البوجيهات

ظبطها قبل التركيب

ولا من العلب على المكنه ...............؟

[MMamdouh]

باش مهندس محمد كمانا الواحد كده اطمن ان الموضوع هايتحل هايتحل ان شاء الله
طيب هو مش 2.2 ده كده يعتبر معقول طيب هو المفروض كام وهي علي السلانسيه من غير تكيف
شكرا يا هندسه

زمن فتح الرشاشات الصح 1.8 مللى ثانية

MMamdouh

[wlelw2003]

متابع باهتمام

[jojowork1]

معلش يا جماعه انا كنت مسافر بالعربيه ديه ورجعت انهردا بس الموضوع كبر خالص دلوقتي
يا باش مهندس سمير انا فعلا شوفت السلك تابعته بعد تغير البوجيهات والاسلاك بس تمام مفهوش حاجه الحاجه التانيه بقي حصل موقف غريب خالص وانا مسافر بالعربيه العربيه بعد 80 بظبط بتعمل صوت غريب جدا زي ما اكون راكب تاكسي 1300 ولا قرده بتعمل صوت انا مش عارف اشرحه بس هو ممكن اقول عليه زي بكره وحشه او ونه صوتها وحش خالص بس انا شكيت ان ممكن يكون في حاجه في الشكمان والشيء الغريب ان العربيه لو 79 مفهاش صوت من اول 80 الصورت يظهر ومهما اسرع مش بيتيغر لا عالي ولا واطي بس لو نزلت تاني تحت 80 بملي الصوت يروح وكمان انا جربت اوصل 80 بكل الغيرات 3-4-5 كل كان عامل نفس المشكله مع التكيف ومن غير برده نفسي القصه بظبط الحاجه التانيه انا طلعت بالعربيه مطلع جامد شويه في جبل كنا بنعاين موقع وبعدين كل ما نيجي نتحرك بالعربيه حوالي خمس مرات العربيه مش بدرو من اول مره بدور بعد تالت او رابع محوله بس مره وحده بطلت ورجعت عادي خالص وبدور من اول تكه عادي انا فكيت بوجيه في الوقت ده بس العربيه كانت برده شويه مكانش فيه زيت ولا حاجه بس البوجيه برغم من انه راكب من يومين بس كان نفس اللي في الصوره الاطار في نهايه القلاوظ مسود زي مايكون علي حرق بس انا عاوز اسئل علي حاجتين هل تعريق الزيت ده بيبان بوضوح وعلي اي حته بظبط في البوجيه الحاجه التانيه هل افك البوجيه والعربيه سخنه عادي
معلش كمان يا باش مهندس محمد لو زمن فتح الرشاشت كبير طيب ايه السبب هل الرشاشات ولا حاجه تاني يارت يا جماعه الموضوع كبر خالص والعربيه ديه كل يوم علي الطريق وانا مش عارف ايه الصوت العجيب اللي حصل ده كمان ياريت الاحتملات الوارده والمساعده ضرور
شكرا للمتابعه

[samirayad]

طيب معلش ولو فيها تتقيل عليك

ياريت ترتب الشرح وتكبر الخط شويه

علشان أركز مع الكلام ومش مع صغر الخط

لأن العضمه كبرت برضه

[jojowork1]

سوري يا هندسه اصلي بحس اني بكبر الخط زياده كل مره فخفت ليكون بيضايق هاكبره المره ديه
ترتيب الاحداث
كان عندنا مشوار بالعربيه في حته صحره كده فطلعنا واحنا علي الطريق اول ما شدينا بالعربيه يدوبك عدينا سرعه 80 وسمعت صوت غريب جدا تقريبا صوت ونه عالي خالص لدرجه اني سمعته ملحوظ والعربيه مقفوله والتكيف شغال والكاسيت عالي حسيت اني راكب عربيه موديل 70 وبايظه بدايه الصوت يحسسك انك بتحرق علي الغيار مع ان كنت علي الرابع ترتيب التجارب اللي حصلت عشان اعرف فصلت التكيف الصوت موجود طفيت الكاسيت عشان اسمع الصوت كان جاي من بره العربيه بس مش قادر افسر من فين بظبط بس انا حاسس انه من تحت الموتور او الشكمان المهم ابتديت اجرب عشان اعرف ايه اللي جاب الصوت ده مره واحده
اول حاجه هديت العربيه الصوت راح خالص اقعد اسحب لغايه ما جبت 80 بس وانا على التالت لقيت الصوت ظهر علطول جبت الغيار الرابع الصوت موجود جبت الخامس الصوت موجود مهما اسرع بعد 80 الصوت مش بيزيد
تاني تجربه هديت تاني الصوت راح علطول جبت الغيار الرابع بدري وبمجرد ما عديت ال80 لقيت الصوت ظهر تاني جبت الخامس برده الصوت موجود
الشيء الغريب اللي اكتشفته ان العداد قبل ما يوصل 80 بملي مفيش صوت بمرجرد ما يوصل ال 80 الصوت يظهر وعالي خالص حاسس ان المتور بيصرخ
بعد كده وصلنا حتي فيها مطلع كبير طلعنا ونزلنا كام مره كده وبعدين ركنت العربيه وجيت ادور العربيه كانت بدرو من اول تكه ومره واحده كانت مش راضيه تدور خالص ادور كذا مره مفيش دارت من خامس مره وبعدين ركنا وجينا ندور عملت نفس الحكايه مش بدور غير من خامس او سادس مره وبعدين بعد ما ركنا شويه فتحت العربيه وشوفت البوجيهات فكيت بوجيه منهم لقيته طالع زي اللي في الصوره مسود في طرف القلاوظ مع ان البوجيهات ديه متغيره من يومين تلاته كده بس بصراحه ملاحظتش اي زيت او حاجه عليه وبعدين لقيت العربيه بدور من اول تكه ومعملتش الموضوع ده تاني
بنسبه لاسلاك البوبينه انا فعلا اطمت عليهم تاني عشان كنت عاوز اعرف ايه اللي سيح السلك بس لقيت كل حاجه تمام ومفيش حاجه بتسخن ولا حاجه
واحنا راجعين لقيت برده الصوت العالي ده موجود زي ما هو من ناحيه المتور
اللي عاوز اسئل عليا هل البوجيهات تتفك والعربيه سخنه عادي عشان اشوف موضوع الزيت دبه بعد التسخين وهل تعريق الزيت ده بيبان عادي بسهوله وفي اي حته بظبط
الحاجه التانيه باش مهندس محمد بيقول ان زمن فتح الرشاشات كبير طيب هل من الرشاشت نغيرها ولا في ليها سبب تاني
المشكله الجديده ايه الصوت ده وايه اللي ممكن يكون سبب فيه طيب اشمعنه بيظهر بعد 80 بظبط وقبل 80 بملي مفيش صوت علي اي غيار
شكرا يا باش مهندس معلش انا تاعبك واسف علي الخط الصغير وبصراح انت زوق جدا هو مين اللي متقل علي مين يا هندسه
ارجو اكون وصلت الاحداث مظبوطه

[samirayad]

سوري يا هندسه اصلي بحس اني بكبر الخط زياده كل مره فخفت ليكون بيضايق هاكبره المره ديه

كبر ياهندسه وخد راحتك

بس بالعقل برضه

وخليك وسط

وكده حلو أوى

علشان المخ يبقى مش مشغول بالتفكير فى حاجه تانيه غير معانى

الكلمات المطروحه من جانبك

وكل ماكان تفكير اللى بيفكروا معاك

مركز بس فى معانى كلامك

كل ما أستطاع المخ من التفكير صح

فى المقترحات من حلول لأى مشكله

وده لحضرتك أو أى زميل بالطبع ( بيكون بيطرح مشكله معينه )

شكرا يا باش مهندس معلش انا تاعبك واسف علي الخط الصغير وبصراح انت زوق جدا هو مين اللي متقل علي مين يا هندسه

الله يخليك

ياباشا أحنا كلنا هنا أخوات

وشاكر لزوقك

وجارى المتابعه

[samirayad]

س1 _ هى العربيه دى الشكمان مكتوم فيها والعادم ضعيف وقت الدواره ولا أيه .............؟

س 2 _ أيه نظام الشكمان فى العربيه دى ....وهل فيها علبة بيئه ولا منشاله .....؟

[jojowork1]

اعتقد ان الشكمان طبيعي خالص وعمره ما عمل مشكله قبل كده غير انه علاقات اتكسرت بس بيطلع عادم عادي خالص ولما بكبس عليه بايدي ضعط العادم طبيعي والشكمان بيكتم كوسي يعني مفهوش خروم
الشكمان مفهوش علبه بيئه واخر مره رحنا لواحد لحم الشكمان قال ان الشكمان ده مش بتاع العربيه الاصلي ان الشكمان ده متصنع ليها وكان بيفضل تغيره بس قال عادي يشتغل وقال ان الشكمان اللي هو يصنعه وهايركبه مكان ده تمنه 650 جنيه وطبعا مش بتاعها يبقي اكيد مفهوش علبه بيئه
شكرا متابع

[samirayad]

الصراحه

أنا شايف أن لازم تطمنا على البوبينا

بتجربة بوبينا تانيه الأول

ممكن يكون القلق اللى بيحصل ده كله بسببها هى

[jojowork1]

خلاص انا فعلا اول حاجه هاعملها دلوقتي اني هاسعي لتغير بوبينه في الاول وهاقولكم الاخبار شكرا

[solom_eslam_2008]

انا هقولك علي حاجة تعملها هتروح لميكانيكي هيفك غطاء التاكيهات ويطمن علي عمود الكامة ويطمن علي تقسيمة الكاتينة علي فكرة موضوع عمود الكامة ده مهم لان معروف في الدايو اني هيا بتاكل عمود كامة وتعمل المشكلة النتي بتقول عليها دي حاجة ويطمن علي طنبورة عمود الكرنك ممكن تكون مشروخة او مش ركبة كويس لو حضرتك من المنصورة ممكن نتقابل و ان شاء الله نحل المشكلة