رابطة ملاك الكيا برايد - كلاكيت تانى مرة!

[A.Elsawaf]

ممكن حضرتك تقولي فين البنزينه دي و شغلهم حلو ولا لا
انا هانضف الردياتير و هاحط فيه مياه خضرا عشانو استوي من المياه العاديه
و لو حضرتك تقولي نوع المياه الامريكي دي اسمها يعني
و بالنسبه للزوايا انا عندي مشكله ف الفرده اليمين جنب السواق عايزة تخش من فوق 1 سم وحوارات كدا يا تري هما بيعملوها ولا بيقولولي هيا عايزة ايه من غير ما يظبطوها
عشان في بريدجستون قالي عايزة كدا بس تروح لحد يعملهالك احنا ما بنزبطشي هنا
و رجه العربيه بعد ال100 دي سببها ايه و مع الفرامل بلاقي العربيه و الدركسيون بيتهزوا جامد مش عارف ليه
شكرا جزيلا

بنزينات كتير بيبقى فيها ظبط زوايا وتنضف الريدياتير هناك بالمرة ... واعتقد الهزى دى ان العجل محتاج يترصص ... وبرضه معظم بتوع الزوايا إذا مكانش كلهم عندهم ترصيص وبالبالنسبة للمياة الخضرا أستاذ توفيق كان ادانى جركن من اللى هو بيستعمله فيه شوية صغيرين كده علشان ابقى اجيب زيه بعد كده ... وكان بيشكر فيه اوى ... انا ممكن ابقى اجيب اسمه وصناعته واصورلكو الجركن كمان بس هو فى شنطة العربية ... لما انزل بكرة بقى إن شاء الله :)

[A.Elsawaf]

نزلت بظروفها كده من شوية فصورت الجركن بتاع المياة الخضرا اللى أستاذ Tawfic قاللى عليها .. هى اسمها IADA وصناعته أسبانى

[A.Elsawaf]

الف شكر علي العنوان دا انا هاسجلوا عندي هوا كمان
شكرا

لا شكر على واجب ده حاجة صغيرة من اللى استفادته منكم كلكم :)

[A.Elsawaf]

امبارح نزلت شارع دمشق ... من عند الجندى جبت طقم سيرفيس ... (طقم بوجيهات ... فلتر بنزين .. فلتر زيت .. فلتر هوا ... سير كاتينة .. سير دينامو ) هو قالى ان السيور هى هى بتاعة الكيا .. وانا محتار شوية حد يقول هى وشوية حد يقول مختلفة ... المهم انا خدتهم منه واتفقت معاه ان السيور لو ماركبتش هرجعها.
روحت لميكانيكى علشان اركبهم وعلشان دى اول عربية ليا مكنتش متخيل ان الوضع بالصعوبة دى ان انا اغير سير الكاتينة وسير الدينامو ... غيرت فلتر الهوا والبنزين والبوجيهات .. وقلتله هجيلك يوم تانى اركب السيور لما لقيتها موال منيل كده :) علشان كان عندى معاد بعد ساعة وكنت شايف انه محتاجله ييجى ساعة ونص علشان يخلص موال السيور ده.

وجبت كونسول ولما نزلت من شوية قلت اما اركبه .. طلع عينى قعدت فيه ييجى ساعة ومش عارف اركبه :) ومفيش اى حاجة معاه تقول تتركب ازاى وشاكك فى المسامير اصلا اللى جاية معاه دى انها مش مظبوطة محدش عنده حاجة كده ولا اى موضوع فى المنتدى قبل كده يفيدنى فى الموضوع ده ... ولو يأست اروح لمين يركبهولى؟ حد بتاع فرش؟

[أحمد الجندى]

ممكن حضرتك تقولي فين البنزينه دي و شغلهم حلو ولا لا
انا هانضف الردياتير و هاحط فيه مياه خضرا عشانو استوي من المياه العاديه
و لو حضرتك تقولي نوع المياه الامريكي دي اسمها يعني
و بالنسبه للزوايا انا عندي مشكله ف الفرده اليمين جنب السواق عايزة تخش من فوق 1 سم وحوارات كدا يا تري هما بيعملوها ولا بيقولولي هيا عايزة ايه من غير ما يظبطوها
عشان في بريدجستون قالي عايزة كدا بس تروح لحد يعملهالك احنا ما بنزبطشي هنا
و رجه العربيه بعد ال100 دي سببها ايه و مع الفرامل بلاقي العربيه و الدركسيون بيتهزوا جامد مش عارف ليه
شكرا جزيلا

اخبار الامتحانات ايه يا عم ايمن حاتخلص امتى ؟

أنا كنت فى بنزينة كالتكس اللى عند سوق القنال وهى بنزينة كويسة على حسب تجربتى بالنسبة لنوع الميا فبصراحة مش فاكر بس اللى بيغسل الردياتير قدامه ستاند فيه النوع الامريكى ده ولو مش عايزه فيه فى البنزينة نفسها مصرى وسعودى .

بالنسبة للزوايا فنصيحتى انك تسيبك من البنزينة واطلع على مركز بريدجستون اللى فى صلاح سالم الناس دى شغلها نضيف جدا واسعارهم كويسة أنا فاكر ان ظبط الزوايا عمل 25 جنيه والترصيص بخمسة جنيه للعجلة وكمان بيربط العفشة وبيظبطلك الزوايا بالكمبيوتر ومعاه الدركسيون كمان ، بس ليهم عيب واحد زى ما أنت قلت وهو لو الجنط فيه عوجة من الشفة مايرضاش يركب الجهاز وكمان مابيصلحوش يقلك روح صلحها وتعالالى تانى .
ومشاكلك كلها اللى قلت عليها إن شاء الله تتحل مع الزوايا والترصيص ، وأنا بإذن الله فيه واحد عفشجى فى شارع البحر الاعظم ممكن اروحله كمان اسبوعين سمعت انه شاطر حاجربه واقولك

[أحمد الجندى]

امبارح نزلت شارع دمشق ... من عند الجندى جبت طقم سيرفيس ... (طقم بوجيهات ... فلتر بنزين .. فلتر زيت .. فلتر هوا ... سير كاتينة .. سير دينامو ) هو قالى ان السيور هى هى بتاعة الكيا .. وانا محتار شوية حد يقول هى وشوية حد يقول مختلفة ... المهم انا خدتهم منه واتفقت معاه ان السيور لو ماركبتش هرجعها.
روحت لميكانيكى علشان اركبهم وعلشان دى اول عربية ليا مكنتش متخيل ان الوضع بالصعوبة دى ان انا اغير سير الكاتينة وسير الدينامو ... غيرت فلتر الهوا والبنزين والبوجيهات .. وقلتله هجيلك يوم تانى اركب السيور لما لقيتها موال منيل كده :) علشان كان عندى معاد بعد ساعة وكنت شايف انه محتاجله ييجى ساعة ونص علشان يخلص موال السيور ده.

وجبت كونسول ولما نزلت من شوية قلت اما اركبه .. طلع عينى قعدت فيه ييجى ساعة ومش عارف اركبه :) ومفيش اى حاجة معاه تقول تتركب ازاى وشاكك فى المسامير اصلا اللى جاية معاه دى انها مش مظبوطة محدش عنده حاجة كده ولا اى موضوع فى المنتدى قبل كده يفيدنى فى الموضوع ده ... ولو يأست اروح لمين يركبهولى؟ حد بتاع فرش؟

ماتقلقش يا باشا من قصة قطع الغيار انا سمعت من واحد صاحب سايبا ان قطع الغيار واحد الفرق فى حاجات قليلة زى الفانوس . وعايزين اسعار الحاجات اللى جبتها يا كبير

[أحمد الجندى]

ألا هو فين جون غطسان بقالة مدة مش سامعينله حس ولا خبر ؟

[may_moon911]

نزلت بظروفها كده من شوية فصورت الجركن بتاع المياة الخضرا اللى أستاذ tawfic قاللى عليها .. هى اسمها iada وصناعته أسبانى

الف شكر معلش بتعب حضرتك معايا بس انا كان ليا حوارات مع الرادياتير و كان مجنني ف عندي عقده و بحب احافظ عليه لو في حد عايز القصه مافيش مانع اقولهالو عشان لو بعد الشر وقع فيها
الف شكر

[may_moon911]

هو قالى ان السيور هى هى بتاعة الكيا .. وانا محتار شوية حد يقول هى وشوية حد يقول مختلفة ... المهم انا خدتهم منه واتفقت معاه ان السيور لو ماركبتش هرجعها.
روحت لميكانيكى علشان اركبهم وعلشان دى اول عربية ليا مكنتش متخيل ان الوضع بالصعوبة دى ان انا اغير سير الكاتينة وسير الدينامو .

وجبت كونسول ولما نزلت من شوية قلت اما اركبه .. طلع عينى قعدت فيه ييجى ساعة ومش عارف اركبه

لا ما تقلقش حضرتك السيور هيا هيا و دا كلام اكيد انشاء الله من واحد شغال ف معرض سايبا و انا لما رحت اشوفها زمان قالي كدا
علي العموم السير بيبقي مكتوب عليه المقاس ف لو شالو و ما طلعش التاني زيو لاي سبب يركب تاني و حضرتك تغير الجديد بالمقاس اللي هاتقراه و ان شاء الله خير

اه تركيب السيور بياخد وقت حبتين و خصوصا لو المسامير بربطه المصنع انا غيرت السيرين ف ساعه الا ربع

معلش سوال ضغير هوا ايه الكونسول دا ::d !!!!!!!!!!

[may_moon911]

اخبار الامتحانات ايه يا عم ايمن حاتخلص امتى ؟

أنا كنت فى بنزينة كالتكس اللى عند سوق القنال وهى بنزينة كويسة على حسب تجربتى بالنسبة لنوع الميا فبصراحة مش فاكر بس اللى بيغسل الردياتير قدامه ستاند فيه النوع الامريكى ده ولو مش عايزه فيه فى البنزينة نفسها مصرى وسعودى .

بالنسبة للزوايا فنصيحتى انك تسيبك من البنزينة واطلع على مركز بريدجستون اللى فى صلاح سالم الناس دى شغلها نضيف جدا واسعارهم كويسة أنا فاكر ان ظبط الزوايا عمل 25 جنيه والترصيص بخمسة جنيه للعجلة وكمان بيربط العفشة وبيظبطلك الزوايا بالكمبيوتر ومعاه الدركسيون كمان ، بس ليهم عيب واحد زى ما أنت قلت وهو لو الجنط فيه عوجة من الشفة مايرضاش يركب الجهاز وكمان مابيصلحوش يقلك روح صلحها وتعالالى تانى .
ومشاكلك كلها اللى قلت عليها إن شاء الله تتحل مع الزوايا والترصيص ، وأنا بإذن الله فيه واحد عفشجى فى شارع البحر الاعظم ممكن اروحله كمان اسبوعين سمعت انه شاطر حاجربه واقولك

الامتحانات كويسه الحمد لله و بتسلم علي الجميـــــــــع

ماشي انا ان شاء الله هاخلص يوم الاربع اللي جاي اخر امتحان و هانزل مصر الخميس و اعدي عليهم ينضفوا الردياتير لحسن الصدي شكلوا يرعب

ما عندنا فرع بريدجستون هنا ف العاشر و بالكومبيوتر بردوا و رحتلوا من اسبوعين و قالي العجله اليمين عايزة تدخل لجوه نص سم روح اعملها و تعالا و انا مش عارف حتي اعملها عند مين هههههه قولتلوا ماشي استناني و هابقي اجيلك
هما اه بيربطوا عفسه و كومبيوتر و تمام بس لو يصلحوا عندهم عشان الواحد يطلع مرضي

في ناس كتير قالولي علي حكايه الترصيص دي ف خلاص ان شاء الله يوم الخميس بردوا هاروح اعمل كل الحاجات دي و هابقي اجيبلكوا التقرير النهائي للي حصل باذن الله

[may_moon911]

ماتقلقش يا باشا من قصة قطع الغيار انا سمعت من واحد صاحب سايبا ان قطع الغيار واحد الفرق فى حاجات قليلة زى الفانوس . وعايزين اسعار الحاجات اللى جبتها يا كبير

كل او 99% من قطع الغيار هيا هيا ما عدا الشكل ف الهيكل الخارجي من اكصدام و فوانيس و جزء الانجكشن غير كدا هيا هيا بالظبط ان شاء الله

[maramiros]

السلام عليكم يا رجالة البرايد -- أنا أمير من اسكندرية وبشتغل في القاهرة -- أنا قريت كل الموضوع وبسم الله ما شاء الله مجهوود رائع -- فينكم من زماان أنا كنت محتاج لحاجات كتيير أوي أسأل عليها -- بس الحمد لله سألت وعرفت صنايعية كويسيين -- أنا معايا كيا برايد سيدان 2003 أوتو -- عاملة دلوقتي حوالي 60 ألف كيلو عشان مش بمشى بيها كتير لظروف السفر -- العربية دي صبورة جدا وبتستحمل طناش الصيانة وقطع غيارها رخيصة جدا -- بس مشكلتها الوحيدة ان مافيش ناس كتير بتفهم فيها حقيقي -- كلو يقولك "هو في حد ما بيفهامش في البرايد !! " وهاتك يا فتي -- المهم أنا عاوز أفيد الناس -خاصة الأسكندرنية اللي زي- عشان القاهرة واسعة و أسهل كتيير انك تلاقي حد يحل مشكلتك
أولا: كان عندي مشكلة في التكيييف -- الكمبرسور البلية خشنة -- بتعمل صوت عالي وقطعت السير من كتر الخشونة -- جبت سير قصير وفصلت التكييف مؤقتا عشان قالولي ان الكمبرسور كله لازم يتغير! -- بعد سنة كاملة روحت لواحد اسمه أحمد العريبي قدام أرض معارض كوته عند مجمع الكليات النظرية في اسكندرية -- شاب محترم جدا وشغال مع عمه -- الراجل كان واضح انه أول مرة يشتغل في البرايد -- عشان كده أخد شوية وقت لكن عمره ما هيسلم العربية فيها عيب -- وفاهم نظرية التبريد كويس جدا -- والكمبرسور نفسه ماكنش المشكلة -- المشكلة في شوية أجزاء تانية راكبة عليه زي الملف والطارة كانت معوجه والبلية برده كانت عايزة تتغير -- وكانت كهربة العربية "الكتاوت" بتهرب -- جاب كهربائى بص عليها وصلحها عشان هو شغله تكييف بس -- المهم التكييف رجع تانى الحمد لله جامد -- وعملى كشف حساب بكل حاجة اشتراها وركبها -- وقالي انو حفظ العربية خلاص وبلاش حد يشتغل فيها غيره
ثانيا: شغل الميكانيكا في اتنين كويسيين -- واحد في الورديان علي شريط ترام البلد اسمه الأسطى رضا ودا غيرلى بلى العجل القدماني بعد ما كنت غلبت في القاهرة عند واحد ف مدينة نصر وكلفنى 750 جنيه تمن ركبتين كامليين استيراد من الحرفيين وبرده صوت البلي رجع تانى -- أما رضا غيرلي بس البليتيين ب 80 جنيه والمشكلة اتحلت !!!
وفي واحد تانى فى ميامي شارع أبوقير بعد ميدان جيهان أول شارع يمين على ناصيته اسكندريه للمفروشات -- ادخل الشارع ده لحد ما تلاقى صيدلية دالاس على شمالك اكسر شمال -- اسمه الأسطى فايز
التوكيل -كيا- رحته بس عشان غيار زيت الاوتوماتيك
اسف على الاطالة ويارب اكون أفدتكم

[A.Elsawaf]

ماتقلقش يا باشا من قصة قطع الغيار انا سمعت من واحد صاحب سايبا ان قطع الغيار واحد الفرق فى حاجات قليلة زى الفانوس . وعايزين اسعار الحاجات اللى جبتها يا كبير

لا ما تقلقش حضرتك السيور هيا هيا و دا كلام اكيد ان شاء الله من واحد شغال ف معرض سايبا و انا لما رحت اشوفها زمان قالي كدا
علي العموم السير بيبقي مكتوب عليه المقاس ف لو شالو و ما طلعش التاني زيو لاي سبب يركب تاني و حضرتك تغير الجديد بالمقاس اللي هاتقراه و ان شاء الله خير

اه تركيب السيور بياخد وقت حبتين و خصوصا لو المسامير بربطه المصنع انا غيرت السيرين ف ساعه الا ربع

معلش سوال ضغير هوا ايه الكونسول دا ::d !!!!!!!!!!

طمنتونى :) ... انا كنت عارف ان تقريبا كلها واحد بس كان الخلاف على موضوع السيور انها مش واحدة بس انما كده فى إجماع :) .. ولو مطلعش هو هعمل بنصيحتك يا أيمن واشوف الرقم اللى عليه واجيب زيه.

الكونسول ده اللى هو المسند اللى بين الكرسيين اللى قدام .. انا معنديش كونسول فإيدى اليمين بتتعبنى من الشعلقة قلت اجيب واحد بس مش عارف اركبه وحاسس انى شكلى وحش اوى وانا مش عارف اركب كونسول كده :d

[A.Elsawaf]

الف شكر معلش بتعب حضرتك معايا بس انا كان ليا حوارات مع الرادياتير و كان مجنني ف عندي عقده و بحب احافظ عليه لو في حد عايز القصه مافيش مانع اقولهالو عشان لو بعد الشر وقع فيها
الف شكر

طيب ما تقولنا كده ايه اللى حصل معاك علشان نستفيد وربنا ما يوقع حد فيها.

[johnghaly]

ألا هو فين جون غطسان بقالة مدة مش سامعينله حس ولا خبر ؟

معلش يا مناور باشا كنت مسافر تبع الشغل عشان فى ضغط شغل انا بجد بشكرك على السوال على وانا مطمن طول ما انت موجود يا كبير منكم نستفيد ياباشا