حصريا تغطية وصول الكورولا 2013 بالصور [كماليات - اسعار - فئات]

[Mostafa Khalil]

شكرا علي تغطية العربية

انا فعلا روحت و شوفت و جالي صدمة من العربية و خصوصا الصالون المهم انا كنت عاوز اخد رايكم في حاجة عشان انا راسي ساحت خلاص :D كورولا 2013 إلي ب 155 و اعصر علي نفسي لمونة ولاا كروز 2013 اعلي فئة؟؟ انا اهم حاجة تهمني سعر اعادة البيع عشان كان معايا A5 ولبست جامد و كان معايا C4 ولبست اجمد بس كاعربيات الاثنين زي الفل المهم انا قررت اخاد فترة استراحة من اللبس و اجيب عربية تمشيني 3 سنين و اعتقد حوالي 120000 كيلو و لما اجي ابيعها الاقي فلوسي :D :D

اعمل إيه ؟ ارجوكوم المساعدة


أخوكم مصطفي خليل

[MohammedAladel]

بس تنزل من a5 وستروين c4 وتركب كورولا ؟؟

[MohammedAladel]

بالنسبة لأعادة البيع كورولا تكسب بس متضمنش أحوال السوق الغريب بتاعنا أيه خصوصا إن العربية سوقها التنافسى حاليا مبقاش زى الأول

[Mostafa Khalil]

بس تنزل من a5 وستروين c4 وتركب كورولا ؟؟

غصب عني للأسف انا عملتلها test drive و شكلي كده ححتاج ليمون اكتر :) واالله انا فعلا محتاس و شوفت السيفك لقيتها 199 !!! هيا الناس ديه دمغها فيها إيه!

[abogharib]

طب حضرتك لية متكلمتش مع قريبك قبل مايشترى العربية واقنعتة بالكلام دة وأنها عربية واخدة إعدام

حضرتك قريبو معاه 2010 و هو بيقول كلمه اعدام على 2012

[abogharib]

السلام عليكم انا حابب اكتب نبذة عن مواصفات الفلوانس الفئة اللى ب 142 الف جنية

المرايات :
ضم
كهرباء
تسخين
اشارات

سينسور مطر
سنسور ضوء

بلوتوث
ملتى فنكشن
مثبت سرعة
محدد سرعة
كاست سي دى

تكييف ديجيتال
دوال زون
تكييف خلفى

زجاج كهربا يعمل بضغطة واحدة للنزول او الطلوع فى الامام و الخلف
وحدات رفع

فرامل abs ebd bas

درج التالبوة يعمل كثلاجة مع عمل التكيف لمرور هواء التكييف البارد بة

يوجد ستائر جانبية خلفية تدخل فى الباب (مطبوخة)
يوجد ستارة خلفية كبيرة مطبوخة فى جسم السيارة

مفتاح تشغيل السيارة رينو كارد شديد الشياكة الذى لن تخرجة من جيبك تقربيا سواء فى الدخول او تدوير السيارة

زرار ستارت و ستوب انجين لتدوير السيارة اللى كتير بننزل و نسيب العربية دايرة عشان يتكون ملهاش صوت خالص

عجلة قيادة مكسوة بالجلد تيليسكوبية تتحرك فى 4 اتجاهات و يزيد ثقلها كلما زادت السرعة لزيادة التحكم

السيارة فى الملفات حدث ولا حرج

حجم الشنطة 530 لتر الشنطة اللى اكبر منها هية شنطة الاوكتافيا 560 لتر والكنبة بتتفتح تلت و تلتين

3 مخدع خلفى

مسند فى المنتصف

مسند راس السائق و الراكب الامامى متحرك للأمام بحيث يملا الفراغ خلف الفقرات العنقية (لازم تشوفو عشان تعرف شكلة ازاى

كرسي السائق بة يد جانبية ترفع جزء داخلى فى كرسي السائق لتدعييم الفقرات القطنية عند القيادة لمسافات طويلة

اختراع لطيف عند توصيل تليفونك بالبلو توث و حد يطلبك يرد عليك بلوتوث السيارة و يقولك ان اللى انتة طلبة حاليا بيسوق ويحولك علية :) اكنة سكرتيرة :)

فوجات امامى و خلفى

جنوط 16

4 سمعات

وحاجات تانية انا مش فاكرها

تحياتى

[hero]

هى 2013 جنوب افريقى برضه؟؟؟؟؟؟؟؟؟؟؟
العربيه فى المجمل ممتازه لكن سعرها غالى جدا
فى الخليج رقم 2 سعرها يعادل 100 الف جنيه و رقم 1 سعرها 110 جنيه

الكورولا الخليجي المانيوال فقط ياباني....والاوتوماتيك تايواني....

المصرية دي جاية منين....؟؟؟؟

كدة تويوتا هاتخسر اسم كورولا ....بالسعر العبيط دة..

[Hema pop]

الكورولا الخليجي المانيوال فقط ياباني....والاوتوماتيك تايواني....

المصرية دي جاية منين....؟؟؟؟

كدة تويوتا هاتخسر اسم كورولا ....بالسعر العبيط دة..

تصحيح لمعلومتك فقط
الكورولا الخليجي فئه 1.6 مانيوال او اتوتوماتيك كلاهما ياباني وانا سيارتي خليجي اوتوماتيك ياباني موديل 2012!
فئه 1.8 الخليجي ودي مش بتنزل هنا بردو دي اللي تايواني في اول ما نزلت ب 2008 لكن دلوقتي بقت كلها ياباني

[sdelbassuny]

عاشت السوبارو ..........................ولا تعليق مع أنى لا أمتلكها ويكفى أنها فى في الشغل بتاعى موديل 2010 أمبرايزا عملة
300,000 كم وانت أكيد عارف يعنى أيه شركه يعنى كذا رجل وأهمال وسرقه فى وعقود الصيانه

ومازالت وقفه ماسكه نفسها وكل يوم وانا داخل الشركه بدلها تعضيم سلام

بدون أى مشاكل جسيمه سوى أعطال فى التكيف فقط ولم تخرج عن نطاق السربنتينه مره الداخليه ومره الخارجيه

[S O P H O S]

سوبارو رائعة طبعا
بس دي كورولا ..

[MOstafa Hashem]

اسمحولى اقول وجهة نظرى مع احترامى لحضراتكم

انا شايف ان اغلبكم هايتفق معايا ان سعر الكورولا مبالغ فيه جدا جدا جدا على امكانيات العربيه .. وشايف ان كل اللى عملتو شركة تويوتا انها رفعت سعر العربيه وقللت الفئات بتاعتها الى 3 فئات بس .. وازاى انا ادفع مبلغ زى ده فى عربيه يابااانى مفيهاش اوبشن وبنفس شكلها ومواصفاتها من 2008

وشايف بردو ان مايتفعش نقارن عربيه زى دى بأى عربيه أوروبى زى الاوكتافيا مثلا ومحدش يقنعنى ان الكورولا اكتر اعتماديه من الاوكتافيا .. الاوكتافيا انتا بتدفع فيها 175 الف فى أول فئه وبتاخد أساسيات مش موجوده اصلا كأوبشن فى العربيات دى .. وكلامى للأستاذ اللى بيسأل عن أوبشن الأوكتافيا .. حضرتك انا هاقولك أساسيات الأوكتافيا فى أول فئه بس :-
1.زجاج كهربا فيه ضغطه أوتوماتيك وسنتر وباور وفتيس ستيترونيك
2.فرامل ABS . EBD , ASR
3.ايرباجات للسواق والركب الأمامى
4.فوجات امامى وخلفى
5.ريموت كنترول فيه زرار بيفتح الشنطه
6.كاسيت CD .AUXوراديو مع 4 سماعات كبار و 4 تويترات
7.مرايات طى كهربا وظبط كهربا ومراية الصالون تعتيم
8.مثيت سرعه
9.طاره مالتى فانكشن
10.كمبيوتر اعطال فى ال Dash Board وبيظبط كل حاجه فى العربيه
11.بلوتوث مع وجود مايك مخفى عشان تتكلم وانتا سايق
12.تكييف تااتش امامى وخلفى .. مع وجود ستائر هوائيه .. يعنى ممكن السائق يشغل تكيف بارد والراكب الأمامى يشغل تكييف ساخن
13.تلاجه فى التابلوه
14.زرار بيقيس ضغط الكاوتش .. وحاجات تانيه انا مش فاكرها

وبتفرق عن الهاى لاين فى الجنط والسبسور بارك وفتحة السقف .. هاتلى بقى حاجه موجوده فى الهاى لاين بتاعة الكورولا ومش موجوده فى البيز لاين فى الأوكتافيا .. ده غير انك بتركب عربيه اكتر ثبات وتحمل وارتياحيه وصلابه ونعومه فى المشى وكل المميزات اللى موجوده فى العربيات اليابانى

والأستاذ اللى بيتكلم عن التكييف بتاع الاوكتافيا ده .. حضرتك لو ركبت العربيه هاتحكم عليها .. مفيش صوت عالى فى التكييف ولا حاجه ولو ركبت العربيتين هاتعرف ان تكييف الفانتازيا احسن بكتير أوى .. وصوته مش بيعلى غير لما تكون معلى المروحه على 7 درجات ومحدش بيعمل كده .. انا عن نفسى باكون مشغله على 4 فى عز الحر وبكون متلج

العربيات الأوروبى معروفه طبعا فى أعادة البيع ان تمنها بينزل وده علشان ملهاش سوق فى بلدك بس فى مقابل كده انتا بتركب عربيه ممكن تبهدل فيها 10 سنين وهتستحمل اكتر من اليابانى .. وهاتلى أوكتافيا 2009 وكورولا 2009 ماشين 100,000 كيلو وقارنهم ببعض هتلاقى ان فى فرق كبير جدا فى التحمل والأعتماديه لصالح الألمانى ..

وعيب الأوروبى انك مينفعش تلعب فى الميكانيا بتاعتو بره التوكيل وكلنا عارفين يعنى ايه توكيل والفلوس اللى بياخدها التوكيل

خلاصة كلامى ان دى عربيه ليها اللى يركبها ودى عربيه ليها اللى يركبها .. انتا لو راجل بتسافر كتير مش ممكن تدفع 170 ألف جنيه فى عربيه فقيره فى حيث انك ممكن تدفه نفس المبلغ تقريبا فى عربيه تستحملك اكتر وبتكنولوجى عاليه دى غير انهاااا ألماااانى .. وانا مش بعيب فى الكورولا بس لو كان تمنها اقل ب 30 ألف مثلا كانت هتبقى مناسبه جدا جدا

الكورولا المفروض تقارن بالانسر او المازدا او العربيات دى .. لكن بالسعر ده العربيه طلعت من فئه لفئه تانيه مينفعش تقارن بيها ومش هتعمل مبيعات زى من 2006 ل 2010

[S O P H O S]

انا محترم وجهة نظر حضرتك جدا
وعموما الكورولا بالنسبة ليا جميلة شوف حضرتك السيراتو والالنترا حاليا بكام فالشهر الي احنا فيه ده
وهتعرف ليه كورولا مازلت جميلة وعن المقارنة انها تتقارن باللانسر والمازدا ده مش شئ سئ
بالعكس من وجهة نظري البسيطة انا احب اركب المازدا ومركبش عربيات تانية اوربية
هي اراء وطلبات فعربية تفرق عن عربية اخري
تحياتي ليك ..

[MOstafa Hashem]

مع احترامى لحضرتك للأسف العربيات الكورى فيها اوبشن اعلى من الكورولا مع ان مفيش وجه مقارنه اصلا بس الشركات الكورى دى شايفه ان السعر ده مقابل الأوبشن وده حقيقى عشان اغلب اللى بيشترى عربيه لأول مره فى حياته بيتخدع بالشكل ومش هتعرف تفنعو بالألمانى واليابانى وان العربيات دى محترمه

عندك عربيه زى السيراتو دى .. لو انا اول مره اركب عربيه وشوفتها شكل حلو وجنط 17 وكماليات من جوه وشد وجرى وشياكه هتخدع بيها .. والالنترا اللى منزله فانوس أخره فى نص الرفرف وعامله زى السوبر كار .. عشان كده الشركات دى عامله مبيعات وليها زبون وليها حق تعلى فى السعر مع انها متستاهلش السعر ده

المفروض بقى شركه كبيره زى تويوتا تاخد بالها من الكلام ده ومتنزليش عربيه 2013 بتكييف بكر وتابلوه من 4 سنين ويالسعر ده ... ماهو يا تنزل السعر يا تنتج عربيه جديره بالمنافسه وتستاهل السعر ده ومتديش فرضه انها تتقارن بعربيه كورى

تحياتى لحضرتك

[S O P H O S]

احنا متفقين ان الكوري مش هيخش فالمقارنة حتي لو فيه كلميات كتيرة
زي ما انا موافق ان الاوروبي متوفق علي الياباني
بس الياباني ركوبة وهدف لناس معينة بأختلاف الاوروبي
عربية زي السوبارو امبريزا عربية ممتازة فالصناعة اليابانية وشوف فمصر وضعها ايه !!
فحين السيفيك سعرها اعلي فئة وصل لكام والكورولا الي وقفة فالمنتصف بكمليات قليلة علي عربية ممتازة مع سعر غير واقعي
يبقي فالاخر تشعر انها سياسة سوق سيئة جدا مش عربيات ولكن توكيلات بتجيب كل ما غريب باسعار اغرب
والشعب المصري بيشتري احيانا سمعة وعلامات فقط وفي بيشتري بلاستك وفانوس شكله حلو
وفي بقي الخيار الوسط زي الياباني كده بتاخد كل شئ وتقفد الكمليات والتصميم
والي عاوز يركب عربية بالمعني الدقيق يبقي الاوروبي ويدفع ثمن ذلك من صيانات فالتوكيل وقطع غيار
علشان ميخسرش العربية وسط الناس الفتاين فالصيانة
مجرد راي ..

[MOstafa Hashem]

بالظبط كده .. سياسه تسويق سيئه وانا متفق معاك فى كده

واغلب الناس بيبصوا للعربيه على انها شكل وجنط وجرى وميعرفوش ان اخر حاجه بتفكر فيها الشركات الكورى دى هى الأمان والثبات ,, بينتجوا عربيات وررررق والعربيه تحس انها مكياج بس

وفى الأول وفى الأخر اليابانى يتناسب مع بعض الناس فى ركوبه والألمانى يتناسب مع ناس تانيه .. بس مع سعر اليابانى ده يبقى تقريبا خارج المنافسه