هل فعلاَ لو معاك 80 الف تروح تجيب سيريون

[أبو عبدالله]

ممكن نعرف اولوياتك في اختيارك للسيارة واستخدامك لها

يعني السيريون عمر افتراضي واداء اعلى من الأفيو
ولكن هيا هاتشباك وماتور 1300 سي سي والأفيو سيدان وماتور 1500 سي سي

ممكن تقولنا اولوياتك ؟

[الدكتوور]

أنا معرفش ليه الناس بتقول ان سعرها كتيير " و ناس تانية بتقول كتير قوي " :

العرببية جاية من اليابان زي ماهي و مش متقفلة في مصر ، و فيها جميع الكماليات "يعني مثلا الأفيو مافيهاش إيرباج و ده في مصر بس لأن أساسا برا مصر فيها " و الفرامل abs و حاجات تانية ، و مقارنة بالعربيات اللي في نفس السعر " بين 75 و 85 ألف " فأنا شايف انها زي مقال أبو عبدالله في موضوع تاني انها "صفقة " بمعني انه أنا باخد قيمة الفلوس اللي بدفعتها .. و بالنسبالي فأنا شايف انها تتخظى الفبرنا و الأفيو و الحاجات اللي في نفس السعر بمراحل من حيث النقطة دي .

[Ahmed Anwer]

العربية دي واخدة اكتر من حقها بكتير في المديح في المنتدي و ده يبعدنا عن الموضوعية للأسباب التالية :_

1-العربية ياباني اه ،، بس مش تويوتا و لا هوندا دي شركة متخصصة في السيارات الصغيرة الإقتصادية الرخيصة
2-العربية مش معمرة و الدليل السيريون القديم اللي متبهدل بطريقة متتناسبش مع عمرها و قارنها مع اللانوس القديمة و الأب الروحي للأفيو ، تعرف الفرق و ده كلام اللي معاهم سيريون و ده حال السيارات الصغيرة

3-العربية بيملكها خمسة بس في المنتدي و مع ذلك ابتدوا يتكلموا في مشاكل ( و ده مش عيب و لا حرام إن اي عربية يبقي فيها مشاكل بسيطة مقبولة )
4-عندنا واحدة في الشارع تعال اتفرج عليها دلوقتي بعد خبطتين شكلها مش عاطفي إطلاقا ، تلات ارباعها بلاستيك

فالخلاصة العربية فعلآ مبهرة في المعرض بصراحة تحس إنها Concept بشكل التابلوه الفضائي و الكنبة اللي بتتطبق و الشكل الخارجي المدمج


بس الواقع غير كده دي عربية صغيرة ضعيفة اخرها تنفع لو معاك فلوس زيادة و عايز تجيبها عربية تانية ،، او عربية للمدام تجيب بيها طلبات البيت و توصل الأولاد المدرسة و استخدام خفيف او لو لمجرد التميز لأنها فعلآ متميزة مش شكل اي عربية تانية

لكن لا تصلح إطلاقا سيارة عائلة أو سيارة شقي و بهدلة مش هتستحمل

عشان نحط الأمور في نطاقها الطبيعي ،، منبالغش ،، و الدليل مبيعاتها الضعيفة رغم الدعاية المكثفة

ده غير العيوب المتفق عليها عدم وجود شنطة ، عدم الإنتشار ، عدم توفر قطع الغيار و الصيانة غير تحت رحمة الوكيل ، إعادة البيع

يعني هيا لا ميني كوبر و لا سيات 131 في نفس الوقت

[tutankhamoun]

أنا شايف إن السيارة ممتازة جدا ليس لأنها ياباني و لكن لأنها سيارة حلوة وواسعة و أدائها جيد و هذا غير واضح من شكلها
و لكن السعر مبالغ فيه حبتين ؟؟؟؟؟؟ يعني مثلا لو في السبعينيات تبقى تمام إنما متنزلش أكثر من كدا .
و ربنا يبارك للي معاهم العربية

[أبو عبدالله]

العربية دي واخدة اكتر من حقها بكتير في المديح في المنتدي و ده يبعدنا عن الموضوعية للأسباب التالية :_

بالعكس يا استاذ احمد والدليل اقولك عليه في نقاط محددة لا يختلف عليها اثنان ::

السيارة :
1- ليس لها سوق سابق يدعمها بالدرجة الكبيرة .
2- الوكيل القديم لها ( رجب ) موت ماركة دايهاتسو في مصر جدا وده له ناتج عكسي على الجديد .
3- العربيه القديمة منها كانت 1000 سي سي ولم تكن تنافس الــ 1300 سي سي يعني سوقها كان محدود في فئة معينة .
4- الناس لم تعرف من دايهاتسو الا التيريوس القديمة ومع معرفة عيبها المعروق ومع ذلك بتباع لحد الأن فوق الــ 50 الف جنيه ومعروفة العيب ومطلوبة كمان .
5- السيارة الجديدة تواجدت في السوق المصري من فترة بسيطة الا وهيا سنة ونصف السنة وهذا لا يعطي اي أحد انه يقدر يقيم انتشارها الأن في السوق المصري حيث أنه المده لا تكفي للتقييم

ومع ذلك تواجدها الموجود لها الان مع ذكر النقاط السابقة يعتبر نتيجة جيده جدا لها لأن الوكيل ذات نفسه لم يكن مقدر لنفسه حجم المبيعات بهذا الحجم واقل دليل الشاريد التي نفذ عددها وكانت مطلوبة كمان .
السيريون مبيعاتها عالية جدا
وممكن بتليفون صغير للتوكيل تقدر تعرف كام عربيه بيعت لها .
الماتيريا التي اختلف الكثير على شكلها وتنبأ الكثير بانها لن يكون لها مبيعات بيعت بقدر جيد بالنسبة لعربيه يختلف عليها اثنان في الشكل الخارجي ...
التيريوس طبعا مش محتاجه كلام ............ القاهرة غرقانه في التيريوس
الشاريد نفذت والناس كانت بتدور عليها ....

عموما الوكيل الجديد شغال من سنة ونصف
اني اقدر اقيم سياراته الان ده شئ ليس في محله ومع ذلك لا تنكر تواجد السيارة في الشارع المصري
انا على الأقل عندي الأن في المنصورة مالايقل بحال من الاحوال اكتر من 25 سيريون
ولكن انظر انها سيارة هاتشباك ليست سيدان اي واحد بيفكر يشتري عربيه مش بيفكر في هاتشباك
يعني هذا العدد بالنسبة للناس اللي بتفكر انها تشتري هاتشباك
لأ وكمان بيشتروا على كلام البعض عربيه غاليه لسعرها
يعني الناس دي اللي اشترت عربيه ليس لها سوق سابق وعربيه اهتشباك ودفعوا فلوس كتير كمان
يبقى والله العربيه كويسه جدا انها عملت المبيعات دي من اساسه .....
يبقى في النهاية العربيه مش واخدها حقها اصلا .....
اما موضوع السعر اللي بعض الناس ماسكه فيه ده فانا هقولك على حاجه بسيطة جدا
افتح المواقع الأوربية وانظر ثمن السيارة كام وانت هتتصدم من الأسعار السياره في انجلترا سعرها 10 الاف جنيه استرليني والفرق الوحيد في الوسائد الهوائية الزيادة بس غير ذلك فالعربيه نازلة هنا في مصر زيها زي اوروبا بالظبط مش زي العربيات اللي بتنزل في كل حته بمواصفات معينه وخامات مختلفة علشان السعر
وانظر في المواقع السعودية والأماراتية سعر السيارة لو حسبته هتلاقي العربيه هنا ارخص الفين تلاته عن هناك والعربيه هيا هيا برضه
تقييم العربيه في كل المواقع لم يقل عن اربعة نجوم من خمسة
فانا مش عارف ايه المقياس اللي نقيس به وكل المقاييس الخارجيه المعتمده والتي لم تبنى على اراء شخصية بتقول عكس كده .

1-العربية ياباني اه ،، بس مش تويوتا و لا هوندا دي شركة متخصصة في السيارات الصغيرة الإقتصادية الرخيصة

كلمة ياباني لها سعر لوحدها
وحضرتك اكيد عارف انك لو رحت تبيع عربيه مكتوب عليها ياباني وواحده تانيه نفس السعر مكتوب عليها اي حاجه تانيه اكيد كلمة ياباني هتلاقي الناس بتدفع لها فلوس فرق ......

2-العربية مش معمرة و الدليل السيريون القديم اللي متبهدل بطريقة متتناسبش مع عمرها و قارنها مع اللانوس القديمة و الأب الروحي للأفيو ، تعرف الفرق و ده كلام اللي معاهم سيريون و ده حال السيارات الصغيرة

كلام اختلف معاه تماما

انت حضرتك لو شوفت سيريون قديمة شكلها وحش فده ممكن يكون بسبب اللي راكبها
فانا ممكن اخليك تشوف لانوس اللي حضرتك بتستشهدد بها دي شكلها اكنها طالعه من سباق عربيات تخبيط ............ فده مش مقياس يبقى عربيه او اتنين
المقياس حضرتك انك تشوف غالب عربيات دايهاتسو شكلها عامل ازاي
شوف التيريوس القديم عامل ازاي
شوف الشاريد القديم موديل التسعينات عامل ازاي

حضرتك انا هقولك على مثال بسيط
لي قريب كان معاه سيريون قديمه موديل 2000 وطلع عينها والله بجد
وكان رايح جاي على طريق شرم العربيه تكاد تكون اسبوعيا اذا مكنشي كل ثلالثة ايام بتنزل القاهرة وترجع صد رد كمان والعربيه ماشاء الله ومتحمله لأنه بيتاجر هناك ومفيهاش اي مشكلة
ومع ذلك بعها من فتره قريبه وراح اشترى الجديده الــ 1500 سي سي كمان
وخلي بالك انه كمان شغال في العربيات وبيفهم كويس قوي فيها

وهنروح بعيد له
مؤسسة الــ JDPOWRE مقيمه الدايهاتسو بعد التويوتا في الأعتمادية
يبقى كلام مش منطقي اني اكذب كلام مؤسسة علشان تقييم شخصيي او راي شخصي وكمان المؤسسات التانيه اللي مقيمين السيريون وحاصله على اعلى التقييمات ده اعمل فيه ايه كمان

3-العربية بيملكها خمسة بس في المنتدي و مع ذلك ابتدوا يتكلموا في مشاكل ( و ده مش عيب و لا حرام إن اي عربية يبقي فيها مشاكل بسيطة مقبولة )

والله لو حسبت الخمسة من نسبة مالكي السيارات في المنتدى وعدد الأعضاء بالنسبة لعدد المجتمع بتاعنا ومالكي السيارات وبالذات كمان الهاتشباك منها ومع النقاد التي وضحتها لك في السابق هتعرف قيمة العربيه اللي حضرتك بتتكلم عليها دلوقتي

اما بخصوص انها فيها مشاكل فده لا اعلم اي مشاكل بالظبط
فالاخ هيثم لما اشتكى اشتكى من تيل الفرامل وتقريبا وزي ما انا وضحت ان المشكلة في الميه اللي بيتغسل بها العربيه لأن فعلا الميه لما بتيجي على التيل اين كان سخن او بارد فبيعمل حاجه اسمها يبلط وده ممكن تسال فيها اي صنايعي وهياكدلك الكلام ده
وكمان انا لم اوجه هذه المشكلة فده مش مقياس
ولما اتكلمت مع التوكيل وقولتله على مشكلة اخونا هيثم قالي ميخفشي لأن الطنابير في الضمان
يعني لو التيل وحش هيرحعلهم الموضوع لأن امامك 100 الف كيلو الطنابير تفحت فيها وهيا في الضمان
في احسن من كده

4-عندنا واحدة في الشارع تعال اتفرج عليها دلوقتي بعد خبطتين شكلها مش عاطفي إطلاقا ، تلات ارباعها بلاستيك

متهيألي زي ما انا سبق وقولت ان عربيه او اتنين مش مقياس لأن في استخدام غير ادمي من بعض الناس لعربيتهم
وانا ممكن اجبلك صور لكذا عربيه سيريون موديل 2000 والعربيه اكتر من رائعة ومفيهاش الهوا

وممكن اجيب لحضرتك صور لعربيات مرسيدس احدث موديل وطالع عينها
يبقى ده مش مقياس ابدا

ده غير العيوب المتفق عليها عدم وجود شنطة

انا عمري ما شوفت موقع واحد كاتب على العربيه دي بالذات ان من عيوبها انها شنطتها صغيره
يا جماعهدي عربيه هاتشباك
واللي بيشتري هاتشباك بيبقى عارف انه محدود في مساحة الشنطة
ممكن حضرتك تقول الكلام ده لما تأتي بعربيه هاتشباك مثلها شنطتها اكبر منها
ساعتها تقدر تقولي ان في عربيه هاتشباك شنطتها اكبر من السيريون
وكمان هتلي شنطة عربيه هاتسباك زي العربيه السيدان
فده مش عيب ابدا لأن احنا بنتكلم على عربيه هاتسباك وليست سيدان
فده لا يقال عليها عيب لأن ده من ضمن مواصفات الهاتشباك كله
فده لا يعيب عربيه عن غيرها من الهاتشباك

عدم الإنتشار ، عدم توفر قطع الغيار و الصيانة غير تحت رحمة الوكيل ، إعادة البيع

عدم الانتشار اتكلمنا عليه مسبقا انه مش مقياس لو قسنا هيبقى في صالحها لصغر الفتره اللي ظهرت فيها العربيه والناس مش عارفه عنها حاجه وانها نازله بسعر مماثل لعربيات كتير سيدان مشهورة ولها سوق كبير جدا وياباني ايضا مثل اللانسر

عدم توافر قطع الغيار وتحت رحمة الوكيل
فقطع الغيار كلها موجوده في الوكيل
وسعرها منافس جدا لأنها ارخص قطع غيار ياباني في السوق وارخص من بعض الكوري كمان
ولو اشتريت من الوكيل هتلاقي الناس بتشتري قطع الغيار الياباني للسيارات الاخرى من الخارج بنفس السعر اللي انت بتشتري به من الوكيل او اقل كمان لأن اسعار قطع الغيار رخيصه بالنسبة لسعر السيارة

يعني مثلا المراية الكهرباء اللي سعرها كاملة بــ 450 جنيه
انت حضرتك هتلي مرايه ياباني لأي عربيه أخري ياباني بنفس السعر ده خارج توكيلها كمان

يعني هيا لا ميني كوبر و لا سيات 131 في نفس الوقت

أكيد طبعا لأنها سيريون ياباني 1300 سي سي ومقيمة من افضل خمس عربيات هاتشباك من مؤسسة WHATCAR وعلى فكره في موقع دايهاتسو الانجليزي مستشهدين بتقييم موقع WHATCAR لأنها من اكبر واشهر مجلات التقييم عندهم في انجلترا

واللي بيشتريها عارف انها مش ميني كوبري واكيد مش سيات لأنها سيريون

وشكرا لك

[أبو عبدالله]

أنا شايف إن السيارة ممتازة جدا ليس لأنها ياباني و لكن لأنها سيارة حلوة وواسعة و أدائها جيد و هذا غير واضح من شكلها
و لكن السعر مبالغ فيه حبتين ؟؟؟؟؟؟ يعني مثلا لو في السبعينيات تبقى تمام إنما متنزلش أكثر من كدا .
و ربنا يبارك للي معاهم العربية

كلامك مظبوط ولكن لا تنسى ان العربيه بدأه من 76 الف
وان اللي بــ 86 الف دي فيها كماليات عاليه
من جنوط للوحدها بــ 3 الفا جنيه
ونظام ABS , EBD
ونظام EBS
واوتوماتيك
وسي دي مدمج في التابلوه
واسبويلر اصلي لها
ايه العربيه اللي نفس الكماليات ياباني بالسعر ده في السوق كله وماتور 1300 سي سي بيستهلك على الطريق 350 ك في الصفيحه وبيولد قدرة 87 حصان صافي لأن الماتور لوحده بيولد 92 حصان

[OsKaR]

على مهلك شويه يل ابو عبدالله
اايوه يا عم و مين يشهد للعروسه

[أبو عبدالله]

على مهلك شويه يل ابو عبدالله
اايوه يا عم و مين يشهد للعروسه

انا على مهلي والله مفيش حاجه
كل ما في الامر اني برد على حاجات انا شايفها معكوسه خالص
فبفندها علشان نبقى بنتكلم بموضوعيه وبدلائل مش كلام وخلاص
ما انا ممكن ارد واقول كلام مش عارف ايه وبتاع ايه وايه وايه .................. وخلاص ويبقى كلام وخلاص

اما لما افند الكلام بند بند وبالدليل يبقى اللي يرد على كلامي يرد بدليل مش كلام
اصل المشكلة انت عارف ايه يا اوسكار
انك تضلل الناس
يعني لما اقول على عربيه وحشه وهيا كويسه جدا ومش تحييز والله لأن انا بحب عربيات تانيه كتير وممكن ادافع عنها
وعمري ما هلاقي عربيه في عيوب مقرفه وانا هدافع عليها وده ليس من طبعي بالمره
ده انا لو عملتها معايه والله ثم والله لأكون فاضحها على النت كله
وهنروح بعيد ليه انا لما الوكيل ركبي الأنذار بتاعي ومكنتش عارف فيه حاجات
اشتكيت على النت انه مش في امكانيات ومعرفوش في الوكيل يفهموني بامكانياته
وده شئ طبيعي اني لو لاقيت اذيه من العربيه او من الوكيل عالطول ساكون او من يصؤح بالاخطاء وعلنا لأن ده مش هيفدني في شئ
ولو العربيه وحشه والله لكنت بيعتها واشتريت حاجه تانيه احسن لأ فرق الفلوس مش مشكلة بالنسبة لي اد ما تكون العربيه مقرفة لي

وشكرا لك يا اوسكار

[Ahmed Anwer]

النقطة بالنقطة في أيه بس يا أخ أبو عبد الله

العربية مش منتشرة دي مش محتاجة سؤال قارنها بإنتشار الياريس و اللانسر في نفس السعر ياباني

و قارنها بإنتشار الجين 2 و الجيتز و البونتو هاتشباك

مش محتاجة سؤال العربية مابتتبعش كلامك نفسه أكبر دليل في المنصورة أكبر مدن الدلتا 25 عربية بس !!!!
أيا كان سبب انها مش منتشرة ،، مش مهم ،، المهم إنها مش منتشرة و لا واجبنا اننا نساعد الوكيل ؟؟

التعليق علي تحمل السيريون القديمة مش أنا اللي قلته ده اخوة كتير في المنتدي ذكروه و قاللوا إنهم لما بصوا لشكلها بعد كام سنة ماستريحوش

و انا اتعلمت الحكاية دي من المنتدي إني احكم علي الجودة بتاريخ الموديل رغم إنها مش شرط تبقي نقطة موضوعية بنسبة 100% لأن الشركات بتطور و تحسن

حكاية إنها ياباني فالإيكو كانت ياباني و تويوتا كمان بس مش كل الياباني في سلة واحدة كده عمياني
وهبعتلك علي الخاص لينك لمنتدي سعودي عشان تقرأ بيكلموا فيه إزاي علي ماركة ديهاتسو بمنتهي الإحتقار ،، لدرجة إنهم شايفين إنها ما تستحقكش يكلموا عليها ، عشان ممنوع نحط لينكات لمنتديات سيارات عربية
و الريفيوهات علي النت قليلة جدا ليها ،،Jdpower مش جايبلها سيرة و مش واخدة اي مراكز متقدمة في المبيعات في اي بلد و المفاجئة إنها هتتغير سنة 2008 طبقا للينك ده

http://en.wikipedia.org/wiki/Toyota_Passo

اقرا فيه الجزء ده
Future
Daihatsu will redesign the Sirion for 2008. The Sirion brand name will start in Japan, replacing the Boon, and the Toyota Passo is to be replaced by a new model.

يعني لا منتشرة حاضرا و لا هتنتشر مستقبلآ لأنها هتتغير أساسا ،، يبقي مش حرام ننصح بيها ؟؟

بخصوص السعر اللي ب 76 الف مفهاش اي حاجة و لا حتي rpm و لا حتي اللي ب 80 كمان اللي فيها كل الحاجات دي حاليا اللي ب 90 الف لأن حسب ما فهمت من التوكيل إن اللي ب 86 الف مش هتنزل تاني 2008 ،، الغلو مش شرط يبقي من التوكيل ،، المبالغة في السعر ممكن تكون من الشركة المنتجة نفسها ،


حاجة تانية العربيات الصغيرة ( دي وجهة نظر شخصية و سمعتها من ناس في مجال السيارات) بتتبهدل أسرع بكتير من العربيات الكبيرة ، ممكن تكون وجهة نظر بلدي ، بس ليها مصداقية ، العربية كابوتها كله ميجيش 70 سم ،، و نصه فيبر يعني تريحية ظريفة و يبقي وشها في ظهرها (دي وجهة نظر بلدي زي ما ذكرت )

عموما هيا الفكرة مش إننا نثبت إن العربية وحشة هيا ليها زبونها اللي بيحب التميز و الإختلاف أو واحدة ست عايزة عربية صغيرة كده علي قدها الرد كان اساسا علي الأخ االي بيسألها عليها و علي الأفيو و انا وجهة نظري الشخصية أنا العربية واخدة أكتر من حقها بكتير في الكلام بدرجة هتخلي اللي بيسأل يحس إنها بوجاتي و الأفيو 128 فحبيت اركز جامد علي عيوبها المؤكدة و عيوبها المتوقعة (العمر) خاصة إن زبون السعر ده غالبا بتبقي اول عربية زيرو ليه ،، و إحتمال كبير يكون بيقسطها ، يعني مش زبون مترف ،، و الفلوس مش فارقة معاه ،،، أنا شخصيا مكنتش بخش منتديات غير لما فكرت اشتري عربية و لما شفت مواضيعك في كونتكت و نايل موتورز ،،، جالي صورة وردية عن العربية ،، لحد ما ناس بيفهموا في العربيات فهموني يعني عايز تويوتا و بتموت في الياباني ما عندك الياريس اه بنفس السعر تقريبا

ربنا يباركلك في العربية ،، عربية متميزة لإنسان متميز ، أنا شخصيا من أشد المعجبين بيها

[أبو عبدالله]

العربية مش منتشرة دي مش محتاجة سؤال قارنها بإنتشار الياريس و اللانسر في نفس السعر ياباني

و قارنها بإنتشار الجين 2

برضه بتقارنها بالسيدان
يا أخي دي عربيه هاتشباك

ومين الجيتز دي
انا متهيالي مشفتش عندنا في المنصورة عربيتين على بعض منها
والبونتو كذلك يا يوجد عندنا منها المسالة مش القاهرة بس يا اخ احمد انما المسألة مسألة العربيه مبيعاتها ككل

مش محتاجة سؤال العربية مابتتبعش كلامك نفسه أكبر دليل في المنصورة أكبر مدن الدلتا 25 عربية بس !!!!

يا اخ احمد انا محددتش كلامي وكلامي ان ده اللي اعرفهم وبضوفهم باستمرار داخل مدينة المنصورة

متحددهاش وبعدين احنا بنتكلم على عربيه هاتشباك غاليه كمان ومالهاش سوق ومش عاجبك العدد ده واللي انا لم احدده لأني مش عسكري مرور هبقى قاعد طول النهار في الشارع وعادد العربيات بالظبط

و لا واجبنا اننا نساعد الوكيل ؟؟

لأ واجبي انا شخصيا اذا عرفت حاجه اقولها
واذا جربت حاجه اقولها
ولما تبقى كويسه واعتمادية ومجربها وراكبها طبعا لازم انصح بها والا اكون بستهبل
ويا اخي انا انصح بكل ما هو جيد ومجرب مش انصح بدون ما اجرب وبدون علم
ومتهيألي في عربيات كتير معرفشي عنها حاجه ومبتكلمشي عليها لأني معرفهاش خالص
اما لما اكون عارفها واسكت على كلام مش صحيح يبقى ده الغلط بعينه
واحنا نفسنا الناس كلها تركب العربيه اللي تناسبها وترتاح فيها مش تتبهدل وتقعد تصلح فيها وهيا لسه دافعه في ألوفات

حكاية إنها ياباني فالإيكو كانت ياباني و تويوتا كمان بس مش كل الياباني في سلة واحدة كده عمياني

الأيكو عربيه واحده في وسط هذه السلة
تمسك بقه في الحاله الفريده ونسيب السلة كلها ده مقياس غريب بصراحه

وهبعتلك علي الخاص لينك لمنتدي سعودي عشان تقرأ بيكلموا فيه إزاي علي ماركة ديهاتسو بمنتهي الإحتقار ،، لدرجة إنهم شايفين إنها ما تستحقكش يكلموا عليها ، عشان ممنوع نحط لينكات لمنتديات سيارات عربية

يا اخي الاخوة السعوديين لهم نظرة غيرنا في العربيات بمعنى لنهم اصلا لم يجربوا شئ من دايهاتسو لأنهم لم بتعودوا على العربيات صغيرة الحجم وبالتالي اي عربيه صغيره عندهم بيحتقروها
وبعدين ممكن تقولي انت هما ركبوا ايه في دايهاتسو علشان يقدروا يقيموا عربياتهم

الريفيوهات علي النت قليلة جدا ليها ،،Jdpower مش جايبلها سيرة و مش واخدة اي مراكز متقدمة في المبيعات في اي بلد و المفاجئة إنها هتتغير سنة 2008 طبقا للينك ده

http://en.wikipedia.org/wiki/Toyota_Passo

اقرا فيه الجزء ده
Future
Daihatsu will redesign the Sirion for 2008. The Sirion brand name will start in Japan, replacing the Boon, and the Toyota Passo is to be replaced by a new model.

يعني لا منتشرة حاضرا و لا هتنتشر مستقبلآ لأنها هتتغير أساسا ،، يبقي مش حرام ننصح بيها ؟؟

يا راجل افتح اي موقع اوروبي هتلاقي الريفيوهات لها في غالب المواقع من توب جير لوات كار لأوتواوتومبيل الألمانيه اكبر المواقع لها ريفيوهات وحاصلة على اعلى التقييمات

اما بخصوص مبيعاتها فالعربيه موديل 2006 يا استاذ احمد عاوزها تعمل مبيعات فجأة وبعدين برضه مش عارف ليه انت مصمم تقارنها بالسيدان
يا اخي دي هاتشباك
والهاتشباك مبيعاته مش مثل السيدان

اما بخصوص تغيير العربيه فاحب ان اقول لك ان العربيه موجوده في اليابان بأسم بوون دايهاتسو وباسو تويوتا
ونزلت في اجزاء من اوروبا باسم سوبارو جيستي السنة دي 2008
يبقى بينزلوها سنة علشان يغيروها السنة اللي جايه وبعدين انت ناسي ان موديل 2008 نزل كله خلاص

بخصوص السعر اللي ب 76 الف مفهاش اي حاجة و لا حتي rpm و لا حتي اللي ب 80 كمان اللي فيها كل الحاجات دي حاليا اللي ب 90 الف لأن حسب ما فهمت من التوكيل إن اللي ب 86 الف مش هتنزل تاني 2008 ،، الغلو مش شرط يبقي من التوكيل ،، المبالغة في السعر ممكن تكون من الشركة المنتجة نفسها ،

الأر بي ام نزل في كل الموديلات يا استاذ احمد خلاص
ده كان في الموديل 2007 و 2006 بس اما الجديده ففيها ار بي ام في كل الموديلات ....... مش بقولك جرب الأول ولو جربت هتعرف ان العربيه دي لها سوق

يا ساتاذ احمد كلامك قديم لن اللي بي 86 الف نزلت وموجوده خلاص وفيها كل الكماليات

العربية كابوتها كله ميجيش 70 سم ،، و نصه فيبر يعني تريحية ظريفة و يبقي وشها في ظهرها (دي وجهة نظر بلدي زي ما ذكرت )

بس يا احمد باشا الكبوت الصغير ده والترييحه اللي انت بتقول عليها ده كلام مالهوش لازمة لأن العربيه حاصلة على اربع نجوم في التصادم الاوروبي
فلما تبقى حاصلة على اربع نجوم واجي اقول ان تريحه صغيره هلاقي وشها في قفاها يبقى كلام مش عملي خالص وممكن تشوف الفيديو بتاع التصادم
وانا مش عارف لما العربيه اللي واخده اربعة نجوم هتبقى وشها في قفاها امال ايه العربيه اللي مش هيبقى وشها في قفاها
وايه العربيه اللي امان
وايه لازمة الاختبارات لما تدي اربعة نجوم والعربيه تبقى وشها في قفاها
كلام مالهوش معنى لأنه لي له دليل والدلائل اللي موجوده عكس كده
اصدق مين وانا شوفت بعيني التصادم

وايه نصه فيبر ده
انا اول مره اعرف ان العربيه نص كبوتها فيبر ازاي يعني
العربيه اكصدامها بلاستيك واي عربيه تانيه اكصدامها بلاستيك برضه
ايه الفيبر اللي في العربيه اصل انا مشوفتش في عربيتي اي احاجه من الفيبر بصراحه ولا عربية غيري

احنا هنتكلم واحنا عارفين العربيه وله يبقى كلام بيتحسب وخلاص

عموما في النهاية يا احمد باشا انا قولتلك من زمان انك لك لفه بالعربيه وبدون حد اقصى من الكيلو مترات
تعالى المقابلة وانا اخليك تجربها وتقولي على الكلام الوردي اللي فيها وعيوبها وتقولي رايك علشان يمكن انا اطلع غلط ويمكن اطلع صح واحنا عاوزين الصح ان شاء الله على لسان اي احد

وشكرا وكله من ذوقك وربنا يبارك فيك
والله المستعان

[Ahmed Anwer]

أنا دايما باستمتع بالحوار معاك ،

أيا كانت النتائج و شكرا للمعلومات ،

بخصوص حكاية الكبوت انا و ضحت إنها وجهة نظر بلدي مش بتاعتي برده و الإنتشار بيتلاحظ في الشوارع مالهوش إحصائيات

حكاية تغيير الموديل مش أنا اللي قلتها ،، ده لينك ليه مصداقية كبيرة ، رغم إني اتفق معاك معروف إن اليابانين بيغيروا الموديل كل خمس سنين

كده يبقي ملحقتش تنزل عشان تتغير ، بس لو حصل زي ما حصل مع الشاريد القديمة ؟؟

عموما أنا وضحت كل النقاط السلبية علي العربية اللي اتقالتي و اللي لاحظتها ،، و مهتمتش بانقاط الإيجابية عشان اتكلموا فيها كتير

عشان الممنوع مرغوب ، و ليه جاذبية يعني صعب حد يبقي مبهور باللانوس او الفيرنا او الأفيو أو يمكن حتي بالياريس و اللانسر دي عربيات عند البقالين زي مابيقولوا و كتب مفتوحة

لكن سهل جدا إنه ينبهر بالسيريون ، عشان عربية مميزة و مش منتشرة و هينسي في الإنبهار ده ، علامات استفهام كتير عليها ،، ممكن تخليها مش الإختيار المناسب ، أو علي الأقل ينسي إنها عربية عادية بسعر مش رخيص ،

اتمني تكون وجهة نظري وصلتلك أنا مش بقاوح و خلاص ،،، انا ليا هدف محدد

شكرا علي العرض الكريم ،، ربنا يجعل كلامك و كلامي في ميزان حسناتنا ،، و تكون نيتنا فايدة الناس ، و يغفر لنا اي سهو أو خطأ

و ما زالت عند رأيي إنها عربية متميزة حتي بألوانها اللي مش تقليدية و حجمها المدمج (الصغير الكبير) و عداد rpm بتاعك اللي مش تقليدي و زعلت لما غيروه

[أبو عبدالله]

أنا دايما باستمتع بالحوار معاك ،

أيا كانت النتائج و شكرا للمعلومات ،

واحنا كمان بنستمتع بحوارك وادبك

بخصوص حكاية الكبوت انا و ضحت إنها وجهة نظر بلدي مش بتاعتي برده و الإنتشار بيتلاحظ في الشوارع مالهوش إحصائيات

وانا وضحت الدليل الحاسم بحصولها على اربع نجوم في التصادم الأوروبي

حكاية تغيير الموديل مش أنا اللي قلتها ،، ده لينك ليه مصداقية كبيرة ، رغم إني اتفق معاك معروف إن اليابانين بيغيروا الموديل كل خمس سنين

كده يبقي ملحقتش تنزل عشان تتغير ، بس لو حصل زي ما حصل مع الشاريد القديمة ؟؟

كلام مظبوط
ولكن متهيألي على الأقل سوبارو مش هتنزل السنة دي عربيه باسمها علشان تاني سنه تتلغي وبعدين السيريون عربيه قديمه لها اسم ومعروفه غير الموديلات اللي بتنزل لوقتها
ولو كانت فشلت كانت فشلت في الموديل القديم ومكنوش نزلو منها الجديد
خصوصا انه بينزل دفع رباعي كمان في اروبا يعني عربيه ذات امكانيات ومميزات عن غيرها

عموما أنا وضحت كل النقاط السلبية علي العربية اللي اتقالتي و اللي لاحظتها ،، و مهتمتش بانقاط الإيجابية عشان اتكلموا فيها كتير

عشان الممنوع مرغوب ، و ليه جاذبية يعني صعب حد يبقي مبهور باللانوس او الفيرنا او الأفيو أو يمكن حتي بالياريس و اللانسر دي عربيات عند البقالين زي مابيقولوا و كتب مفتوحة

لكن سهل جدا إنه ينبهر بالسيريون ، عشان عربية مميزة و مش منتشرة و هينسي في الإنبهار ده ، علامات استفهام كتير عليها ،، ممكن تخليها مش الإختيار المناسب ، أو علي الأقل ينسي إنها عربية عادية بسعر مش رخيص ،

عموما هيا السيرويون مش اي حد بيفكر فيها لنها هاتشباك والهاتشباك ليس له سوق في مصر ولا تنظر للقاهرة فباقي المحافظات لا يعرفونه كثيرا اي لا يقتنعوا انه يشتري عربيه هاتشباك من اساسه

ولكن اللي يفكر في هاتشباك انصحه بها فهيا فريده في فئتها

اتمني تكون وجهة نظري وصلتلك أنا مش بقاوح و خلاص ،،، انا ليا هدف محدد

وصلت وايه المشكلة اوح زي ما انت عاوز
احنا هنا علشان نتعلم من بعضنا
ويمكن ده كله في النهية لمصلحة السائل لكي يقتنع او لا يقتنع عن معرفة ورؤية واضحة

شكرا علي العرض الكريم ،، ربنا يجعل كلامك و كلامي في ميزان حسناتنا ،، و تكون نيتنا فايدة الناس ، و يغفر لنا اي سهو أو خطأ

امين يارب كلنا جميعا بإذن الله

و ما زالت عند رأيي إنها عربية متميزة حتي بألوانها اللي مش تقليدية و حجمها المدمج (الصغير الكبير) و عداد rpm بتاعك اللي مش تقليدي و زعلت لما غيروه

مش كده برضه اصل اول ما شوفته قولت كده برضه

وفي النهاية لك جزيل الشكر على هذه المداخلات الممتعة
وفي النهاية انت برضه لك لفه :D:D:D

[hitham_sh]

بس يا ابو عبد الله معلش انت بتقول ان الخدمه محترمه في التوكيل وده كلام مش صحيح وده عن تجربه شخصيه الموظفين في التوكيل بيحاول يكدبو ويحرفو الكلام على قد ما يقدرو يعني من الاخر بيحاولو ينصبو والدليل اني لما لقيت ان تيل افرامل متاكل من ناحية اليمين اكتر من الشمال وسالتو الموظف قالي ده علشان الطرق في مصر بتبقى مايلة ناحية اليمين علشان صرف المطر والي ميعرفوش بقه اني انا اصلا مهندس تخطيط وطرق وعارف ان مفيش شارع فيكي يامصر معمول فيه ميول صرف مطر
ولما سالتو على صوت الشخشخه قالي انو من علبة الدركسيون وان كل السريون كده وانت بتقول ان معندكش الصوت ده وسالت الناس الي اعرفهم عندهم العربيه معندهمش الصوت ده
بيحاولو يكدبو وخلاص وقالي على العموم هربطلك العفشه وفضلت اتفرج على العربيه من الاستراحه بتاعة التوكيل مجاش حد ناحية العربيه بمفك وبعد نص ساعه نداني وقالي اني خلاص ربطتلك العفشه
للاسف تعاملهم مش محترم ولازم تقل قدبك وتزعق علشان يعملولك الي انت عايزو
ويعني ايه برضو اغير تيل فرامل بعد 7000 كيلو لو توكيل محترم فعلا مكانش دفعني تمنو
ويعني ايه بعد ما يركبولي تيل الفرامل يظهرلي صوت صفاره مع الملفات
العريه حلوه انا منكرش ده بس للاسف التوكيل مش حلو

[أبو عبدالله]

يا هيثم انا معاك في بعض الحاجات وهيا الكلام اللي بيتحرف ساعات وده مش عيب توكيل ةاحد بس ده عيب المصريين كلهم
انه علشان ينقذ نفسه من موقف معيين يعملك فيها فهيم ويقولك على كلام يضحك لو انت فاهم
وللأسف مهندس الأستقبال لما بيختروه لازم يكون لبق وبيعرف يلف ويدور ويحوور الكلام وانت عارف الكلام ده

وبرضه احنا بنقيس التوكيلات بمثيله في مصر وكل توكيلات مصر بما ان اللي شغال فيها مصريين فكلها هتلاقي المعامله الملتويه دي لأنها مشكلة اشخاص

اما عن مشاكلك في العربيه فانا قولتلك من الأول انك لازم تشد
ولما بتشد بيجي نتيجه معاهم بالذات انك تفهمه انك فاهم في صيانة العربيه مش راكب وخلاص

ولكن اللي يفرق انهم بيستجيبوا برضه
وانا بصراحه لم اجرب هذا الكلام وكتير من اللي اعرفهم محصلشي معاهم حاجه زي كده
وعالعموم انا قولتلك انك لازم تقف وقفه مع موضوع الصوت ده
لأن ده اسمه استهبال
وبرضه خلي بالك انك امامك 90 الف كيلو لسه معاهم في الضمان
يعني معاهم معاهم
هيمشوك دلوقتي لسه امامك كام الف معاهم
وهقولك انت هتيجي المقابلة ولا لأ ؟

وبس لو رحت للتوكيل كلمني وانا اكلمهم هناك وافهم ايه المضوع بالظبط
بس صدقني هما مش بيوصلو للمرحله دي لأن كل حاجه بتتغير من اليابان من غير مشاكل
وكلم مهندس الضمان اسمه م شريف كلمه واطلب منه انك تغير اللي فيه مشكلة عندك

بس بيني وبينك عربيتك غريبة جدا
انا شوفت اكتر من عربيه للناس اعرفه ولا واحد قال مشكلة واحده على بعضها وله حد حس بحاجه غلط خالص

انت الوحيد اللي قالي على الكلام ده بصراحه
وعالعموم شوف كده وبرضه انا معاك لو لك حق هتخده ان شاء الله

[hitham_sh]

ياريت تبلغني بالمقابله دي امتى وانا هاجي او لو انت كنت في اي يوم في القاهره ياريت تقولي واقابلك انا عايزك تشوف العربيه انت وتحكم عليها انا خايف برضو اكون انا حساس زياده عن الزوم ياريت يا باشا لو تقدر تعمل معايا كده يبقى كتر خيرك