مميزات وعيوب الماروتى بالتفصيل

[Abdm]

يا ريت يا شباب المنتدى الكرام متنسوش تكملة كل المعلومات عن الماروتى

ويا ريت يا جماعة لو فى أى حد عندة هذة السيارة أو أى معلومات لا يبخل علينا فنحن نريد أن يكون هذا الموضوع شامل لكل شىء فى السيارة وعن جميع أجزائها الميكانيكية مع ذكر المميزات والعيوب حتى يكون مفيد لنا جميعا . وشكرا

يا ريت يا شباب المنتدى الكرام متنسوش تكملة كل المعلومات عن الماروتى ليكون موضوع شامل كل شىء عن السيارة . وجزاكم الله خيرا

[noni67]

شوف يا سيدى
بما انى مهندس سيارات لما جت مراتى تركب جنوط للماروتى بتاعتها
حسبت حسبة الكاوتش والجنوط وركبت لها جنوط سبور مقاس 13 مش 12 زى اللى فيها
وكاوتش كان مقاسة 165 55 / 13
ده اللى يخلى عداد السرعه يقرأ عادى لا بالناقص ولا بالزيادة زى كاوتشها بالضبط ومخلى العربية راسية على الارض والفرامل احلى وسرعتها ممتازة ده على حد كلام مراتى مع العلم ان مراتى بتسوق من 15 سنة وغيرت يحى فى 10 عربيات
اما بالنسبة للصاج فانا شايف ان البودى بتاعها قوى الحمد لله مش ضعيف
اصلا مراتىب عد ما جابت العربية بشهرين دخل فيها 128 فى الرفرف الامامى شمال مش عايز اقولك ان حتى الفلاشر الصوغنون اللى فى الرفرف ما انكسرش ولا الرفرف انخدش بس هى حكت لى ان رفرف وفانوس يمين فى ال 128 باظوا وانكسر الفانوس وضفر الاكصدام كمان
اتكل على الله دى عربية حلو اوى بفلوسها

[Abdm]

130 انا اندهشت طبعا وسالتها امال اقصى حاجة جبتيها كام قالت لى العداد
كام العداد دة قالت لى 150
فقررت اجربها فرحت من اسبوع اعملها الصيانة بتاعه ال 52 الف فى ابو رواش
تصدق قفلت عدادها ال 150 كيلو فى الساعه بسهولة جدا كانى راكب عربية محركها مثلا 2000 سى سى
ولحد الان ما غيرتش فيها حاجه خالص غير تغيير الزيت والفلاتر والابلاتين والكندنسر والبوجيهات يعنى الصيانة الدورية العادية
الابلاتين فى التوكيل ب 20 جنية والكندنسر ب 15 جنية البوجيه الواحد ب 10 فلتر الزيت ب 42 جنية
يعنى انا شايف ان قطع غيارها حلوه اوى اوى ومعمرة كمان عن الفيات كله
فهمنى

ألف شكر ليك يا noni67 على اهتمامك والرد بالمعلومات الهايلة دية .

وأنا مش عارف أشكركم ازاى على تواصولكم معايا ولكن أنا لى كم سؤال

أولا : أنا شفت قبل كدة ان أخر العداد هو 140 فهل هذا صحيح ام 150

ُثانيا : حضرتك ذكرت تغير بعض الاشياء الميكانيكية وهذا لا خلاف علية لانة من الصيانة الدورية ولكن ماذا عن باقى الاجزاء الميكانيكية المهمة مثل ألات الجر والعفشة والشاسية والفتيس هل يوجد أى مشاكل فى هذة الاجزاء الميكانيكية وهل يوجد فى هذة الاجزاء ما هو سريع التلف أو يتلف بستمرار وهل يوجد أعطال متكررة لهذة السيارة فى أى جزء من أجزاءها .

ثالثا :أرجو من جميع الاخوة الكرام المشاركة معنا فى هذا الموضوع وأن لا يبخلو علينا بالمعلومات لارشاد كل من يريد شراء هذة السيارة وجزاكم الله خيرا .

[Ghamrawy]

بص يا سيدى انا كمان مراتى عندها واحدة موديل 98 يمكن من اكتر الحاجات اللى اللى تضايق هى المرش بتاعها سريع البوظان و الفتيس ساعات بيعض غير كده مافيش اى مشاكل بس هى دايما بتقولى ان الناس بتكسر عليها و كانها مش موجودة علشان العربية صغيرة و انا ساعات كمان باسوقها و لاحظت ده كمان

[noni67]

واللهى انا ما اقدرش اجاوبك عن موضوع تلف الاجزاء الميكانيكية لأنها عامله 25 الف زى ما قلتلك واكتر من ابلاتين وكندنسر وبوجيهات وزيت وفلاتر ما غيرناش
يعنى الموضوع ده ما اعرفش عنه حاجه
لكن جارنا اللى اكن فى بنها كان معاه واحدة بيضاء كانت موديل 95 وكان شاريها مستعملة وعملها حجات كتير كنظافة وكان ديما يقولى ان قطع غيراها ارخص من ال 128 لانه كان معاه 128 قبل ما يشترى الماروتى
لكنا انا شخصيا ما جربتش ولا اشتريت ليها حاجه خالص غير اللى قلت لك عليه
حكاية المارش انا مش عارف سيرع البوظان يعنى ايه اللى بيبوظ فيه ما يمكن الشربون وده طبيعى فى اى مرش
اما الفتيس اللى بيعض ده محتاج ضبط عصاية فتيس وده سهل جدا او يكون بدال الدبرياج خلوصة مش مضبوط
حكاية الناس اللى بتكسر انا مش عايز اقولك باكون سايق الاسبنزا وانت طبعا عارف انها فيل ومع ذلك تلاقى الناس بتكسر عليا ده طبيعى فى الشارع المصرى الان لان ما فيش اخلاق بتاتا
وكل واحد متخيل ان الطريق ده اللى ورثة عن الست الوالدة او انه ماشى فى صحراء ما فيهاش حد غيره وربنا يهديهم يا رب

[noni67]

اه على فكرة نسيت اقولك ان عددها 150 مش 140 دقق وانت هتلاقى فى شرطة كمان بعد ال 140

[Abdm]

يا جماعة أنا إن شاء الله هشترى تقسيط بس هدفع مقدم كبير علشان الفائدة تكون قليلة بس أنا محتار جدا من فترة ما بين اللادا 2107 الروسى والماروتى ومحتاج يا جماعة نصيحة أشترى أنة واحدة فيهم هو فى فرق مش كبير مابينهم حوالى 10000 جنية مش مهم ومش هيفرق فى التقسيط كتير طبعا أنا عارف ان كل واحدة فيهم ليها مميزات وعيوب ولكن أيهم أفضل من جميع الزوايا وخاصة من النواحى الميكانيكية لانها أهم حاجة وأيهما أقل فى الاعطال والمشاكل لانى أنا هشترى سيارة زيرو علشان معنديش وقت أضيعة عند الميكانيكى غير الصيانة الدورية فقط ومش عايز مشاكل كتير أو متكررة
وهما دول أحسن سيارتين بالنسبالى ولكن لكل منهما كما نعرف جميعا مميزات وعيوب أنا عيازكم انتم اللى تختارو وحدة منهم تجمع معظم المميزات وأقل العيوب .
ملحوظة : أنا ما بفكرش أنى أغيرها قبل 10 سنيين لو ربنا طول فى عمرى لانى أنا مبحبش التغير وهو دة من الاسباب الرئيسية فى هذة الحيرة .
يا جماعة أنا شاكر ليكم جدا على نصيحكم وارشادتكم وأنا حقيقى تشرفت بمعرفتم وحاسس انى كلنا هنا اخوات ومتعاونين وبنخاف على بعض واللى محتاج نصيحة ما بنتأخرش عنة . وجزاكم الله خيرا

[thegoodhacker]

طبعا اللادا افضل بس حط في حساباتك انها عربية تقيلة في سواقتها و حجمها اكبر

[ahmed1981]

أولا الموضوع فيه معلومات قيمة جداً

بس أنا محتار جدا من فترة ما بين اللادا 2107 الروسى والماروتى

في هذه الحالة اللادا 2107 الروسي تكسب

اللادا 2107 شنطتها أكبر من الماروتي بمراحل
اللادا 2107 صالونها أكبر بكثير من الماروتي
الإثنين ثباتهم ليس جيد في السرعات العالية
اللادا 2107 أكثر متانة من الماروتي

وبالنسبة لتقل الدركسيون يتم الآن تركيب باور لها عند حمدي لادا
وكذلك فإن اللادا ممكن تشتريها مكيفة أو تركبلها تكييف بدون تأثير كبير على الموتور
وممكن تضيف لها كماليات زي الزجاج الكهرباء والسنتر والإنذار وجنوط عريضة
وبمراعاة صيانة عفشتها كل ستة أشهر
ومتابعة الكرونة لملاحظة زيت الكرونة ولو رشح زيت يتم إصلاحه فوراً
بذلك ستصبح اللادا 2107 سيارة ممتازة

[Ghamrawy]

لا المشكلة مش فى الشربون المشكلة فى المبينة بتاعة المارش بتتاكل يعنى العربية ماشية 72000 كيلو و المارش باظ و دخت عليه و فى الاخر جبت و احد استعمال ب 320 جم اما عن عصاية الفتيس دى فهيا غريبة و مش بتدى ثقة لما الواحد ييجى ينقل

[Abdm]

يا جماعة بالنسبة لقطع غيار الماروتى هل هى متوفرة فى السوق ولا مش متوفرة زى الاخ gemino ما قال وأنا سمعت قبل كدة عن موضوع الفتيس اللى بيعض فهل هذة مشكلة كبيرة وموجودة كعيب فى الماروتى متكرر ولا أية وشكرا

[Abdm]

أولا : يا ريت يا شباب المنتدى الكرام حد يجاوب على السؤال السابق عن الفتيس اللى بيعض فى النقل و عدم توافر بعض قطع الغيار مثل المارش لانة سؤال مهم جدا وسوف يتوقف علية قرار شراء هذة السيارة من عدمة لان انتوا عارفين ان أهم حاجة هى توافر قطع الغيار وعدم وجود مشاكل متكررة بستمرار للاقبال على شراء أى سيارة .
ثانيا : فى أحد الاخوة الاعضاء بيقول أيضا ان الكبالن بتبوظ على طول هل هذا صحيح وشكرا

[thegoodhacker]

بالنسبة لموضوع الفتيس ....انا جربته و حسيت انه تقيل غير العربيات التانية ( تحس كانه بيحك في المسار بتاعه بس من غير ما يطلع صوت)........و علي فكرة انا كنت ضاغط دبرياج عادي خالص و كانت العربية واقفة كمان!!

[Abdm]

انتو فين يا جماعة مفيش حد عايز يرد على السؤال لية يا ريت يا شباب متنسوناش ونكون ديما فى بالكم علشان بكدة نكون عرفنا كل حاجة عن الماروتى وعرفنا أية مشاكلها وأية مميزاتها. و جزاكم الله خيرا

[noni67]

روح التوكيل وهما يضبطوهالك بسهوله
قول لى انت ساكن فين وانا اقولك اقرب وكيل ليك مين