حرام ولا حلال اللى بيحصل ده يا جماعه !!!!!

[MMamdouh]

يمكن تأثير الصيام جامد معايا شوية بس مش فاهم الردود الغريبة دى !!!!......بغض النظر مين الغلطان لو لقيت حاجة زى دى طبعا هقف و هساعدة و ان شاء الله ألبس فى 100 قضية, دة بنى أدم مرمى فى الشارع لوحدة !....

اللى ايدة فى الميه مش زى اللى ايدة فى النار... نخيل لو وقفت و كان الراجل دة ميت بالفعل... و شربت انت الموضوع

عمرك دخلت قسم كا متهم و اتعملك محضر؟
عمرك ركبت العربوكة؟ (عربية الترحيلات)
همرك مشيت مع الحبسجية و الحرامية؟
عمرك وقفت امام وكيل النيابة و اتسالت كا متهم؟
عمرك قعدت فى التخشيبة؟

لو الاجابة بلا فا احب اقولك انها تجربة مش لذيذة خالص
و لو الاجابة بنعم يبقى انت عارف كويس التجربة و مفيش اى داعى لتكرارها

MMamdouh

[MMamdouh]

طبعاً حاجة تضايق ان يكون فيه حد محتاج مساعدة و منقدرش نساعده بسبب الخوف من الدخول في مشاكل مع الحكومة أو تعويضات لحاجة ليس لنا ذنب فيها ,
لكن انا لو مكانه هحاول أساعد بأي طريقة ,
يعني الواحد يقف على جنب بعد الحادثة و يحط مثلث قبل الراجل ده و يحاول ينبه العربيات الجاية و الناس هتتجمع و نحاول نتصل بالشرطة و الاسعاف ,

ربنا يسترها معانا و منتعرضش لموقف زي ده .

تحط مثلث فين يا اكرم؟؟ فى وسط الاوتوستراد؟؟ عشان و انت بتحطة تيجى عرية تشيلك انت كمان لا قدر الله؟؟

اللى بيعدى دة اخد مخاطرة تمنها حياتة... هو حر فى نفسة... متجيش انت بقى تخاطر بحياتك عشان واحد مش فارقة معاه حياتة

MMamdouh

[MMamdouh]

انا معاك
مش للدرجة دى يا جماعة دة انسان فية روح ومحتاج مساعدة مش ورقة مرمية فى الشارع يعنى انا اتوقع لو لا قدر الله خبطتنى عربية فى اى موقف كان هفضل مرمية فى الشارع وكل الناس خايفة تقربلى دى مش حياة ولا هقول غابة يمكن فى الغابة يحنوا على بعض اكتر مننا
انا معاكو ضد الحكومة بس مش ضد بعض حتى لو كنا غلطانين نعلم بعض الاحترام والالتزام ونجبر الحكومة على كدة مش نتعلم ازاى فى المصيبة نجرى ونقول ما هو لية رب كريم احسن تيجى رجلى فى القضية
مع احترامى للجميع وللأراء السابقة بس بردو لازم تغلبنا الانسانية مش هقول الشهامة
انا اسفة لو ضايقت حد بس لازم نكون يد واحدة ما هو دة اللى مخلى الحكومة تفرقنا وتتحكم فينا

ربنا يرحمنا برحمته فى زمن تاهت فيه الرحمه

للاسف الانسانية تمنها غالى دلوقتى

و خللى بالك من حاجة مهمة اوى... لو اللى خبطة عاش سهل اوى يقول ان انت اللى خبطة عشان ياخد منك قرشين فا متفكرش ان الشهامة و الانسانية دى لسه عملة متداولة... دى عملة اندثرت من زمااااان

النهارة اللى راكب عربية دة بيعتبر عدو لكل واحد ماشى على رجلية... ارجع كدة لفيلم تيتو حتلاقى احمد السقا قال لخالد صالح جملة هى بالفعل واقعنا الان... احمد السقا قال: "انا كنت فاكر الناس اللى معاها فلوس دى كلها ناس بنت كلب و بتدوس على رقبة الخلق"

دة بالفعل اللى بيفكر فيه كل واحد من الناس دى و كون ان واحد معاه عربية (معاه فلوس) وقع فى قرعتة مش حيسيبة الا لما يطلع منه مصلحة... الموضوع تجارى بحت

يكفى اقولكم ان اخوزوجة الراجل اللى خبطة (اللى هو اساسا غير ذى صفة فى القضية) بيسخن مرات الراجل و بيقولها لازم تاخدوا فلوس... دول شكلهم ناس نضيفة و اراجل راكب عربية بالشىء الفلانى... دا على اساس ان اللى مات دة كلب وراح مش اخو مراتة و كدة

MMamdouh

[MMamdouh]

طبعا انا صعبان على المصاب و لكن ليه يغامر بحياته ؟؟ ما فيش حاجة تسوى
ده برغم ان الواحد الحمد لله بصحته و لكن ساعات لو على رجلى و عايز اعدى شارع كبير باخد تاكسى للناحية التانية و بلاش مجازفة ، هو العمر بعزقة
طولت عليكم معلهش
و تحياتى

السبب هو الفهلوة و الجهل

تعالى كدة الساعة 2 الضهر و عدى فى الاوتوستراد ناحية المقابر... حتلاقى كوبرى عبور مشاه اكبر من الكوبرى اللى عبرت بيه القوات المسلحة قناه السويس يوم 6 اكتوبر... و على الرغم من كدة البهايم بتعدى من تحت الكوبرى

الاظرف من كدة انهم بيعملوا كدة برضة فى عز الليل و نور العربيات اللى ماشية فى الاتجاة المقابل فى وشك و انت مش شايف اى حاجة... و تلاقى واحد (#$@@#@$) راح معدى بمنتهى البرود و يمكن كمان ضهرة ليك... وانت و حظك... يا شلتة يا دخلت فى الرصيف يا حصلت معجزة و تفاديتة

الغريب ان اللى بيعدوا من تحت دول ناس صحتهم تهد جبل... يعنى مينفعش نقول اصل السلم متعب ليهم و كدة... يعنى ان الموضوع بالنسبه لهم فهلوة و فتحت صدر و كدة... طيب احنا ايه ذنبنا نتحمل نتيجة الفتونة و الفهلوة دى... دا كدة و احنا بنتكلم على واحد انت خبطة بالفعل... ما بالك بواحد انت اصلا مخبطوش؟؟؟؟؟؟؟؟؟؟؟

MMamdouh

[MMamdouh]

هو الحل الوحيد و معرفش اذا كان ممكن تنفيذه و لا لأ اذا كانت اكتر من عربيه وقفت يروحوا كلهم مع بعض يوصلوا المصاب لأقرب مستشفى متهيألى هيبقى ده الحل الوحيد و معرفش اذا كان تنفيذه هيبقى سهل و لا صعب لأن برضه فيه ناس هتخاف و اللى هيكون وراه مشاوير الواحد فعلا بيضايق لما يلاقى انسان ممكن يساعده و ما بساعدوش علشان مش عاوز مشاكل

محدش حيقف يساعدك ولا يجيى معاك... مين فاضى يروح اقسام و يتاخد اقوالة و ممكن يطلب للشهادة فى المحكمة؟؟

MMamdouh

[MMamdouh]

فكرة كويسة جدا لما الواحد يشوف حادثة زى دى ممكن يجمع اكبر عدد من الناس وينقلو المصاب او الذى توفاة الله ويروحو بية على المستشفى ويكونوا كلهم يد واحدة وممكن ساعتها الشرطة مش هتعرف تاخد حد منهم لأنهم كتير وهيشهدوا مع بعض انهم بس نقلوة لكن مفيش حد منهم خبطة بالعربية
وبالشكل دة يكونوا عملوا عمل كبير هيحسوا بية بعد كدة وهيشجعوا كل الناس انها تعمل زيهم ويجبروا الحكومة انها تغير القانون الغير انسانى دة
يد الجماعة دى اهم حاجة وخصوصا لو فى عمل الخير انا عارفة ان السلبية خلاص أصبحت فى دم أغلب الناس لكن السلبية مع رغيف العيش مع الغلاء مع اى حاجة من اللى احنا عارفينها لكن مش روح انسان هنحاسب عليها يوم القيامة زى ( العبارة - الدويقة- القطار - الخ الخ ) لو كل الناس يد واحدة مش هتتكرر الكوارث لو قلنا لا مرة واحدة ووقفنا مع بعض فيها هنغير كتير وأولهم نفسنا
أنا يا جماعة لا مُصلحة اجتماعية ولا أنتمى لأى حاجة ممكن خيالكوا يهيأهالكوا
أنا إنسان نفسى أعيش فى بلدنا بأمان انزل الشارع فى أمان احس انى اللى ماشى جنبى دة أخويا أو أبويا وقت الشدة هيساعد مش هيقول أنا مالى تيجى من غيرى أحسن نساعد بعض على الخير ، (والأخلاق ننميها) واللى معندوش أخلاق نقف ضدة لحد ما يتعدل أكيد الكل نفسة يعيش فى المدينة الفاضلة
يارب ما اكون ضايقتكم

تاكد ان اول واحد حيقف حتتلم عليه الناس و تقول ان هو اللى خبط القتيل و ساعتها محدش حيقف فى صفك... الا اذا ربنا كرمك بواحد ابن حلال ( و دول قليلين اوى فى الزمن دة)

MMamdouh

[M.Mokhtar]

الرد فيه شئ من القسوة يا بشمهندس م ممدوح ، أنا مقدر ظروف البلد الظالمة وإن الشرطة محتاجة دايماً متهم تغلق بيه المحضر من غير ضمير ، إنما بحط نفسى مكان الإنسان اللى إتخبط ، وراه عيال ؟ ليه زوجة ؟ أم وأب ؟ يمكن لسة عايش ومحتاج مساعدة تنقذه ؟ يمكن تأخر المساعدة يخليه يعيش طول عمره بإعاقة أو أسوأ من كدة

من كام سنة والدتى خبطتها عربية ربع نقل أمام البيت من سواق مدمن ، ربنا ما يكتبها على حد أبداً ، المصاب فى اللحظة دى بيبقا محتاج أى مساعدة ومش مهم أبداً هو اللى غلطان ولا اللى خبطه اللى غلطان أو هتتسوى إزاى ، أعتقد لو وقفت لله بس ومديتله إيدك عشان ربنا ، ربنا مش هيظلمك فى حاجة مالكش ذنب فيها وإنت بتعمل خير عشانه

معاك حق فى كلامك بس ايه رأيك واحد معرفه شاف برده واحد مخبوط فى الشارع واللى خبطه جرى
اخده على المستشفى وعلموا المحضر المصاب قال ان هو ده اللى خبطنى :)
يا ابنى الشعب بقى كاره نفسه اساسا وما بيصدق يلاقى حد يطلع منه باى مصلحه

محدش حيقف يساعدك ولا يجيى معاك... مين فاضى يروح اقسام و يتاخد اقوالة و ممكن يطلب للشهادة فى المحكمة؟؟

MMamdouh

فعلا هى دى مشكلتنا
كلنا خايفين
كلنا مشغولين
كلنا مش عايزين ندخل فى مشاكل حتى لو هننصر الحق
ربنا يهدينا ويقوينا ويرحمنا

[Noha.M]

ان شاء الله خير يا نهى

ملابسات الحادث واضحة و صريحة و اخوكى مش غلطان... بس كدة كدة حيتحكم علية بغرامة و يمكن حبس مع ايقاف التنفيذ عشان يبقى فيه فرصة لاهل المتوفى يصرفوا قيمة التامين (التامين الاجبارى اللى الواحد بيدفعة فى المرور مع الترخيص هو اللى بيدفع التعويض لاهل المتوفى فى الحالات اللى زى كدة)


MMamdouh

يا رب يا ممدوح والله
ما هو اللى مضايقه اوى كمان انه من غير ما يكون ليه ذنب في حاجة و واحد ينط قدامه يلبسه قضيه و كمان يبقي مكتوب انه اتحكم عليه بحبس و ايقاف تنفيذ بجد حاجة تضايق جدااااااااا و خايف دة ياثر عليه مستقبلاً

ربنا يستر..

[Terrible_DaRsH]

لو حاولت تساعدة سهل اوى تلبس انت القضية خصوصا لو الراجل مات

صح ..

و نسيت تقول ظروف الحادث اللى حصلى فى يناير 2008 و لحد النهاردة انا بروح المحكمة
MMamdouh

واحد بيتكلم عن تجربه اهه ..

فين اتباعنا لسنه الرسول نسينا تقريج الكربه ومساعده المحتاج واغاثه الملهوف

فعن أبي موسى - رضي الله عنه - قال: قال رسول الله - صلى الله عليه وسلم -: "على كل مسلم صدقة.قالوا: يا نبي الله! فمن لم يجد؟ قال: يعمل بيده ويتصدق.قالوا: فإن لم يجد؟ قال: يعين ذا الحاجة الملهوف...

عندك حق فعلا .. لكن انت شايف الظروف !! وكمان الراجل اهه لسه بيروح المحكمه بسبب المشكله دى ..العيب فى الحكومه مش فينا احنا ..

[MMamdouh]

يا رب يا ممدوح والله
ما هو اللى مضايقه اوى كمان انه من غير ما يكون ليه ذنب في حاجة و واحد ينط قدامه يلبسه قضيه و كمان يبقي مكتوب انه اتحكم عليه بحبس و ايقاف تنفيذ بجد حاجة تضايق جدااااااااا و خايف دة ياثر عليه مستقبلاً

ربنا يستر..

ان شاء الله خير يا نهى...

الطريق الدائرى مفيش فيه فصال ولا جدل... مش عايز اقولك ان لما نزلت من عربيتى ساعة الحادث لقيت الامناء اللى واقفين امن على باب ارض المعارض جريوا عليا و لما لقونى مخضوض و كدة سالنى واحد منهم

"انت معاك رخص؟"
قولتلة ايوة
قاللى بالحرف "يبقى متقلقش... مفيهاش اى حاجة... مفيش تعدية فى الطريق دة اساسا" قولتلة "يا عم مقلقش ايه دا الراجل مات"
قاللى "كل يوم بيحصل حوادث هنا و بتعدى... المهم تثبت فى المحضر ان فيه نفق عبور مشاه فى الحتة دى"

و بالفعل فى المحضر و الضابط بياخد اقوالى سالنى اذا كان فيه اى اماكن عبور مشاه فى المنطقة قولتلة "على الطريق لا لكن فيه نفق عبور ورا مكان الحادث ب 40 متر"

MMamdouh

[Mido80]

الرد فيه شئ من القسوة يا بشمهندس م ممدوح ، أنا مقدر ظروف البلد الظالمة وإن الشرطة محتاجة دايماً متهم تغلق بيه المحضر من غير ضمير ، إنما بحط نفسى مكان الإنسان اللى إتخبط ، وراه عيال ؟ ليه زوجة ؟ أم وأب ؟ يمكن لسة عايش ومحتاج مساعدة تنقذه ؟ يمكن تأخر المساعدة يخليه يعيش طول عمره بإعاقة أو أسوأ من كدة

من كام سنة والدتى خبطتها عربية ربع نقل أمام البيت من سواق مدمن ، ربنا ما يكتبها على حد أبداً ، المصاب فى اللحظة دى بيبقا محتاج أى مساعدة ومش مهم أبداً هو اللى غلطان ولا اللى خبطه اللى غلطان أو هتتسوى إزاى ، أعتقد لو وقفت لله بس ومديتله إيدك عشان ربنا ، ربنا مش هيظلمك فى حاجة مالكش ذنب فيها وإنت بتعمل خير عشانه

انا معاك في نفس الرأي يا سامح...

لية السلبية دي يا جماعة. تخيل نفسك في هذا الموقف او اي حد يقرب لك..هل ترضون؟ انا معاكم ان الشرطة في مصر مالهاش غير اللي ادامها وعاوزة واحد يلبس القضية وخلاص...بس البني ادم اللي مرمي ككم مهمل دة ما فيش حد يسأل عنة؟؟ دة لو عربية دهست قطة او كلب في بلد اجنبي زي فرنسا او امريكا بتقوم الدنيا وما بتقعدش. هاتبقوا انتم والحكومة!!

[Noha.M]

ان شاء الله خير يا نهى...

الطريق الدائرى مفيش فيه فصال ولا جدل... مش عايز اقولك ان لما نزلت من عربيتى ساعة الحادث لقيت الامناء اللى واقفين امن على باب ارض المعارض جريوا عليا و لما لقونى مخضوض و كدة سالنى واحد منهم

"انت معاك رخص؟"
قولتلة ايوة
قاللى بالحرف "يبقى متقلقش... مفيهاش اى حاجة... مفيش تعدية فى الطريق دة اساسا" قولتلة "يا عم مقلقش ايه دا الراجل مات"
قاللى "كل يوم بيحصل حوادث هنا و بتعدى... المهم تثبت فى المحضر ان فيه نفق عبور مشاه فى الحتة دى"

و بالفعل فى المحضر و الضابط بياخد اقوالى سالنى اذا كان فيه اى اماكن عبور مشاه فى المنطقة قولتلة "على الطريق لا لكن فيه نفق عبور ورا مكان الحادث ب 40 متر"

MMamdouh

ما هو دة اللى سمعته من كذا حد ان حتى الدائري معلهوش دية بس والله مستعدين ندفع اى حاجة و قلنا كدة لمحامى اننا نعمل صلح و نروح للناس بس قالنا ليه ان شاء الله و بعدين هيطمعو اكتر و يحسو اننا فى موقف ضعف و ممكن يستغلونا اكتر..

ربنا يعديها على خير يا رب و المشكلة دى تخلص على خير عشان بجد كابوووووس ,والله العظيم و ميحسش بأد ايه هي صعبة و كارثة غير اللى مر بيها و عاش تفاصيلها
ربنا ما يكتبها على حد ابدا

انا والله لما بفتكر بس صوت اخويا و هو بيكلمنى يقولي خبط واحد و الانهيار اللى كان فيه والله بلاقي نفسي دمعت.

فعلا اللى ايده فى المية ,, الموضوع دة لو كان اتفتح قبل مشكلة اخويا كنت فعلا هرد زى كل الناس و اقول فين الشهامة و ازاى نسيب الناس كدة و حط نفسك مكان اللى اتخبط بس بجد لما عشنا فى الازمة دى بجد ربنا بس ما يوريها لحد اقولك بجد اعمل خير بأى طريييقة انت عاوزها الا انك ترمى نفسك فى التهلكة متقفش بعربيتك و تكلم الاسعاف قدام الناس كلها و يقولو دة اللى خبط مبقاش فى حد عنده ضمير .روح اتكلم من اى تيليبفون عمومى بعيد و كلم الاسعاف و كل حاجة اكتر من كدة يبقي انت مستغنى عن نفسك

يا رب يتمها على خير..

[elassar2010]

اول حاجة كل الناس الى بتقول فين الانسانية هى لا زم متكنش موجودة لانك ممكن تدخل شاهد فى المحضر الباشا الضابط مايلقيش حد غيرك يلبسك المحضر
انا فاكر كويس ان فى الكلية (الحقوق)الدكاترة فى اول سنة حظرونا انك تساعد حد على الطريق لانة ممكن يكون نصاب ويلبسك الموضوع وبعدين يسومك علشان يطلعك
او غلبان فعلا ولما يلقيك راجل محترم الهبل يركبة ويسومك برضة يخرجك او تكيشلة
انا طبعا متفق مع كل الى هيجرى بس الافضل انة يتصل من اى كبينة فى الشارع بالشرطة والاسعاف ويجرى
ودة الى دكاترة الحقوق قالهولنا يعنى عارفين القانون وعارفين اية مدى اى تصرف وممكن يوصل لاية يعنى مش تفكرنا هو الى غلط ولكن نظام تقفيل المحضر هو الى غلط

[R A N A]

بجد الموضوع ده مأساة وبتتكرر كل يوم انا فعلا بقت اخاف وانا سايقة العربية واتوقع في اي لحظة ان لاقدر الله يحصل كده ربنا يسترها علينا جميعاً.

انا من شهرين تقريباً كنت ماشية ووقفنا في اشارة وانا كنت في اقصي اليمين وعايزة اجي اقصى الشمال عشان في يوتيرن شمال هاخده المهم لما وقفنا في الاشارة اديت اشارة شمال وفضلت مشغلاها ولما الاشارة فتحت والعربيات اتحركت جيت براحة سنة سنة من اليمين لحد الشمال بس لاقيت اليوتيرن فاتني علي ماوصلت الشمال طبعا قلت مش مشكلة هادخل اليوتيرن اللي بعديه وكل ده وانا لسة مشغلة الاشارة شمال وماسكة شمال ومحضنة تقريبا جنب الرصيف ولاقيت يوتيرن واسع جدا يساع بتاع 4 عربيات مثلا ومهدية علي الاخر عشان اخد اليوتيرن علي الهادي زي ماتعلمنا كلنا وماخدوش علي سرعة وفجأة بحود بالعربية والاقي صوت طرااااااااااااااااخ في باب عربيتي ولاقيت اتنين بالموتوسيكل بتاعهم اتنطروا قدام عربيتي واحد اتنطر بعيد اوي في اخر اليويترن (بس الحمد لله قام سليم تماما ومجرالوش اي حاجة) والتاني وقع تحت الموتوسيكل وقعد يتوجع ، المهم طبعا وقفت العربية كرد فعل طبيعي حصلي وقتها ونزلت وماما كانت معايا ونزلت هيا كمان وبتحاول تساعد الولد في انه يقوم ولاقيت ناس جت تقٌوم الولد هما كمان ، انا اول مانزلت قولتله وانا مخضوضة انا اسفة بس انا مدية اشارة من بدري وماسكة شمال مردش عليا عشان الموتوسكيل كان واجلعه رجله والناس قومته ولاقيت صوت الكلاكسات علي وجلجل عشان عربيتي في نص الملف رحت ركبتها ونقلتها الناحية التانية ورجعت لاقيت الناس ركنوا الولد على جنب وقاعدين اللي يديلوا مياه يشربها واللي يدلكله رجليه من اثر الواقعة وكلهم فجأة بقوا دكاترة والغريب بقي ان المكان مكنش فيه ناس كتير قبل الحادثة بس فجأة لاقيت بتاع 15 او 10 بني ادم اتلموا في لحظة والناس سابت عربياتها ونزلت ومش عارفة الناس دي كلها جت منين.
انا كل ده مذهولة ومش فاهمة ايه اللي بيحصل وكنت خايفة موت لحسن الولد يكون جراله حاجة خطيرة ولا الموتوسيكل بتاعه ينفجر مثلا من اثر الواقعة ، بس فضلت واقفة ومستنية اشوف الموقف هاينتهي علي ايه قام واحد من الناس اللي بتضمد الولد قالي معلش هاتاخديه علي اقرب مستشفي لان دراعة محتاج خياطة قلتله معنديش مانع بس والله انا مش غلطانة انا مدية اشارة من بدري ومهدية وماسكة شمال اعمل ايه تاني؟ لاقيت شاب محترم اخدني علي جنب وقالي امشي العيال سليمة ومفيهمش اي حاجة روحي انتي ، قلتله اروح يعني مفيش حاجة قالي ايوة امشي انتي دلوقتي ولسة باخد ماما ورايحة ناحية العربية لاقيت الناس بتشيل الولد وبينقلوه في عربيتي طبعا معرفتش اتصرف ولاقيت واحد متبرع كده ركب معاه سألته انت شوفت الحادثة انا عايزة حد يشهد معايا قالي ايوة ايوة شوفتها اركبي اركبي متقلقيش، قبل ماركب شاب تاني محترم برده اوي اخدني علي جنب قالي بصي انا هاطلع وراكي بعربيتي علي المستشفي قلتله حضرتك هاتشهد معايا انت شفت الحادثة قالي بصراحة انا مشوفتش ومش هاقدر اشهد بس هاجي معاكي عشان ميحصلش شغل عليكي قلتله طيب وفعلا ركبنا انا وماما والولد المصاب والمتبرع التاني ،
الاقي الولد المصاب بيتصل بالموبايل ويقول للي بيكلمه اه عملت حادثة بس بسيطة يعني وعمال يتوجع يرد المتبرع عليه ويقوله ايه مالك في حاجة بتوجعك ؟ دماغك يتوجعك ؟ خلاص نعملك اشعة علي دماغك؟ انا طول المدة دي ساكتة من هول الصدمة ومبنطقش هنا بقي ثورت ونطقت قلتله اشعة ايه اللي بتتكلم عنها انت بتفتي علي اساس ايه يعني لاأنا اقول ولا انت تقول دكتور الطوارئ هو اللي يقول مش احنا يقوم يرد بمنتهي البجاحة ويقولي اااااه نعمله اشعة على دماغه وعلي جسمه كله كمان قلتله اه وماله بتريقة كده رد الولد المصاب قالي انا مش عايز منك حاجة ياستي وديني المستشفي وسيبيني ومش عايز منك حاجة بطريقة جافة جدا ولا كإني انا اللي غلطانة مثلا.
المهم وصلنا المستشفي والشاب اللي كان ورايا بعربيته جالي وقالي مين فيهم تبعك قلتله ماما بس هي اللي معايا قلهم طيب يالا انزلوا ونزلت انا وخدني علي جنب وقالي امشي انتي دلوقتي ومتدخليش معاهم الاستقبال عشان ميبقاش فيها س و ج فأحسنلك تروحي دلوقتي واحنا هانفضل معاه نلهيه يعني لحد قبل مدخل المستشفي ونسيبه علي الباب وفعلا ركبت عربيتي وروحت بس كان يوم مستفز جدا واعصابي بازت وكنت خايفة البس قضية مع اني والله والله كنت متبعة التعليمات بالضبط ومغلطتش وهو اللي غلطت ودخل في باب عربيتي وطبقهولي هو والباب التاني وكسرلي المرايا بتاعتي كمان يعني يعتبر هو اللي خبطني واذاني بس الحمد لله انها جت علي قد كده الله اعلم لو كان البوليس تدخل كان الموقف هايبقي ازاي.
بس انا لاحظت والولد بيركب عربيتي ان اخوه اللي كان راكب المتوسيكل معاه عمال يتكلم مع الناس الملمومة وماسك الموبايل مش عارفة بقي بياخد ارقامهم ولا ايه وياتري هما خدوا رقم عربيتي ولا ايه مش عارفة بس الموقف ده مش قادرة انساه لحد دلوقتي
بس بجد ربنا يصبر كل الناس اللي اتعرضت لحوادث واتاخدت في الرجلين ولبسوا هما الحكاية لانه فعلا من اصعب المواقف اللي ممكن البني ادم يقابلها في حياته

[MMamdouh]

انا معاك في نفس الرأي يا سامح...

لية السلبية دي يا جماعة. تخيل نفسك في هذا الموقف او اي حد يقرب لك..هل ترضون؟ انا معاكم ان الشرطة في مصر مالهاش غير اللي ادامها وعاوزة واحد يلبس القضية وخلاص...بس البني ادم اللي مرمي ككم مهمل دة ما فيش حد يسأل عنة؟؟ دة لو عربية دهست قطة او كلب في بلد اجنبي زي فرنسا او امريكا بتقوم الدنيا وما بتقعدش. هاتبقوا انتم والحكومة!!

ابقى روح اخبط واحد و موتة و عيش التجربة من اولها لاخرها و انا باكد لك ان ردك حيتغير 180 درجة... اللى شاف غير اللى سمع

MMamdouh