::: موضوع مخصص عن معارض السيارات الغير محترمة :::

[asd7778]

نصيحة عامة فى الشراء:
اولا لا تتعامل مع اى معرض والسلام والاحسن التوكيل مباشرا حتى لو حتدفع 1000 ج اكتر بس توفير 1000 او 2000 لا يساوى شئ فى حالة وقوع مشكلة فى العربيه

ثانيا والاهم فى حالة القسط افصل تماما ما بين المعرض والبنك يعنى حضرتك تروح البنك الى انت تختاره حسب حالتك وتشوف العرض ال يناسب يعنى موظف حكومى بنك ناصر بى تردد البنك الى مرتب بتحول ليه هو احسن بنك ليك عشان حيديك احسن عرض لا تجعل المعرض يتدخل تماما فى موضوع البنك او الـتأمين عشان ده سوق سمسره فى الاساس

[Dr.SherifMansy]

أخوانى الأعزاء فى المنتدى...

بصراحة أول مرة آخد بالى من الموضوع ده و هو فعلا مهم جدا لتبادل الخبرات.

و برغم تأخرى اسمحوا لى اضيف تجربتى و اللى بفضل ربنا عدت على خير ..

بدأت الحدوتة بالبحث عن لانسر خليجى 1600 فول اوبشن علشان يكون فيها 2 ايرباج و abs & ebd ن و ده كان شرطى عند السؤال عن العربية فى أى معرض ..

أول محطة :

بعد ما عينى زغللت من كتر اعلانات المصرية للسيارات ، خطفت رجلى لفرع المعادى اللى على الكورنيش ، بعد مكالمات تليفونية خلتنى احس ان ميتسوبيشى موتورز عاملة خط انتاج لحسابهم ، و تأكيدهم ان الخليجى و المصرى بكل اشكاله عندهم ، حتى لو من المريخ عندهم برضه ، و لما رحت كانت الصدمة بعد الكلام المعسول و التسبيل و خلافه ، ان ماعندهمش اى عربية من اللى اسعارها مكتوبة فى الأعلانات (الأسعار اللى حطمت كل الأرقام القياسية فى الرخص عن باقى السوق) ... ليه ؟؟؟ لسه متباعة يا أفندم .... و بدأت احس بالأشتغالة لما عرفت انهم ما بيشتغلوش فى اللانسر الخليجى ، و انى لو عايزها هايبعت لسه بجيبها من الرواس و يحاسبنى عليها حسب سعرها (+ مكسبهم طبعا ... شوف الجمال و الحلاوة) ... و كملت صورة الخداع لما بدأت أسأل عن انواع تانية كنت حاططها بدائل بسبب تدنى سعرها عندهم عن السوق ... و كان نفس الرد "لسه متباعة يا أفندم" ... تقولشى عصابة بتغير منى قاعدين يشتروا كل عربية اختارها ؟؟؟
و بقية المسرحية الهزلية كانت لما سألت عن الهدايا اللى اعلنوا عنها ، و اللى هى كانت وقتها تليفزيون كبير كام بوصة و مش فاكر ثلاجة كمان ، و غيره و غيره ، و ساعتها حس الموظف انى بازنقه و مش ناوى اشترى فقال لى فى نفاد صبر ان دى على "العجل الكبير" اللى سعره فوق 400.000 جنيه (يا سلام ، ادفع المبلغ ده و آخد هدية ب3 أو 4 آلاف جنيه)..
و ختام المسرحية لما طلبت منه يفصل عربيتى السابقة (لانسر بطة 92) و بعد ما فلاها ، قال لى و كأنه بيكرمنى على الآخر ، دى تسوى من الآخر 22.000 بس ، طبعا سبتهم فى الحال (العربية اتفصلت تجارى 37.000 و اختى اخدتها بالسعر ده ، و كان ممكن تجيب أكتر لو لحد تانى) ... شوف الأمانة بتاعتهم يا أخى لحد فييييين ؟؟؟؟؟

[Dr.SherifMansy]

تانى محطة :

معرض الطارق فى الدقى ، بعد ما رحت و وضحت طلبى بالتفصيل ، طلب منى افكر فى النيسان التيدا ، و لما شكرته و قلت له انى بافضل اللانسر البومة أولا ، و ثانيا مابحبش شكل التيدا ، و ثالثا و هو الأهم سعرها اعلى من مقدرتى ، و قعد يحاول معايا و لما فشل طلب منى عربون علشان يجيب العربية ، و دفعت العربون و وعدنى انها تكون موجودة تانى يوم لأنها هاتيجى من معرضهم التانى ، و بدون الخوض فى تفاصيل مملة بدأ نفس السيناريو بتاع "لسه ماجتش يافندم" ، "تيجى على الساعة 3 بعد الظهر" ، "طالما اتأخرت كده يبقى 9 بالليل" ، "معلهش بس أكيد بكره جاية" ، "أصل اللى انت عايزة خلص ، لكن الموزع عنده اختها و لكن باسبويلر و من غير ايرباجز" ، "جاية من اسكندرية بكرة تريلا عليها عربيتين بالمواصفات بتاعتك و حجزنا لك واحدة" ... الخ الخ
و لما نفد صبرى بعد 4 أيام مماطلة رحت و عينى بتطق شرار ، و تانى عرض على التيدا ، و لما رفضت عرض على انتظر ، و لما حس انى ممكن اعمل قلق و المعرض مليان ناس جاب لى فلوسى بهدوء و هو فى قمة الغيظ.
و بعدها قعدوا يتصلوا بى كذا يوم علشان اروح احجز لأن العربية جاية فى المراكب خلاص و لازم ادفع عربون تانى قبل سعرها ما يزيد

و طبعا قلت حقى برقبتى

[Dr.SherifMansy]

ثالث محطة :

معرض فى آخر أحمد عرابى ناصية ش السودان (بعد ابو ذكرى أحمد عرابى) ، بس مش فاكر اسمه ، حاول يعمل معايا لعبة ادفع عربون و احجز و لكن لما طلبت منه اشوفها الأول قعد يماطل و يسوف و يقول لى انها فى فرع تانى لهم فى المعادى ، و غيره كلام كتير ، و اخيرا ان مافيش المواصفات دى فى عربية خليجى !!! (أمال انا راكب ابه دلوقت ؟؟) و قعد يحاول بشتى الطرق انه ياخد العربون ، و لكن على مين ... كنت أخدت الدرس
و الحمد لله انى سبتهم لأنى عرفت بعدين ان العربية اللى عنده مافيهاش abs أصلا ، و كمان سمعت كلام انه مش بيرد العربون ، أو مش بيرده كاملا .. مش فاكر بالضبط ..

دول الثلاث مقالب اللى ربنا برحمته و كرمه و فضله نجانى منهم.

و ربنا يحفظنا جميعا.

[gebreel]

ده ايه السبهللة دي يا جماعة انا قريت 17 صفحة من الذهول المتواصل الضمير راح خلاص من عند الناس؟؟!! مبقاش فيه حاجة اسمها أأكل عيالي او اهلي حرام؟؟!! و مفيش احترام لتعب الناس في الفلوس خالص؟؟!! لا حول ولا قوة الا بالله و الحمد لله لأني كنت هقع مع بتوع Stop دوول في عربية قبل كدة و بردو نفس حوار الاصرار على البنك بس ابمرة دي علشان كان الاهلي كان الاصرار على فرع قصر انيل او وسط البلد حاجة كدة مش فاكر بالظبط و بردو نفس الحجة ان فيه حبايبهم و هيخلصوا الورق بسرعة

حاجة بردو على المصرية لما رحت علشان اقارن بين اللوجان و اللانوس على اساس اهم معرض كبير و عندو كل العربيات و قد كان العربيتين موجودين و كدة فتحت كبوت العربيتين و معاهم كبوت سيريون و كانت المفاجأات
1- كابوت اللوجان كان بيفتح من غير مافتحو من جوة (يعني مفتوح على طول حتى لو رزعتو من هنا لبكرة)
2- كان فيه اسلاك كهرباء غريبة كدة منعكشة في اغلب العربيات اللي بسيط على كبوتها و الموتور بتاعها و كدة و خصوصا السيريون كان صباح العك اللي في الضفيرة بتاعتها و باينة قوي
3- كنا رايحين يوم جمعة و بعد الصلاة و كان المعرض زحمة قوي و في وسط المعرض واحد من الناس المحترمين بتوع الsales بينده على عامل غلبان من اللي بينضفوا العربيات و بيقولو " خود يا ابن ال ............ة" في وسط عائلات و اطفال و ناس كبيرة في السن مما يدل على عدم احترام العميل بالمرة

[gebreel]

و زي لما بنقول المعارض التييييييييييت اسمحولي اقول على معرض من اكثر المعارض احتراما في التعامل و هو "محمد زكي" فعلا فعلا و نعم الموزع و نعم المعرض و نعم المعاملة و اكثر حاجة عندهم رضاء العميل و كفاية ان عربيتك انت اول واحد بتسوقها بعد ما بتنزل من على التريلا يعني العربية بالكثييييييير قوي تكون عاملة 7 او 8 كيلو اللي هما في المينا و على ما طلعت على التريلا و نزلت منها على المعرض

[dolly13]

ايه يا جماعة اللى انا قريته ده
هو فيه كدة
يعنى انا احمد ربنا الف مرة
انا اشتريت فيرنتى من المصرية فرع مصر الجديدة بس الحمد لله محصلش اى حاجة من دى خالص
الموضوع كله اخد 3 ايام علشان البنك يعمل التحرى عنى وبس
لما رحت استلم تالت يوم كانو جايبين العربية من العبور وكانت بالبودرة بتاعتها وهما بيغسلوها لمحت خدش صغير والله فى الاكصدام الخلفى وبدون اى مجهود وبدون حتى ماقول انى مش هاستلمها لقيت مسؤل البيع اللى معايا هو اللى بيكلم الناس وبعتوا جابو عربية تانيه نفس اللون وبعد 3 ساعات بالظبط كنت انا وزوجى واخويا مفليين كل حاجة فيها واستلمتها بالورق بتاعها وتانى يوم جه معايا مندوب ورخصنا العربية فى نص ساعة والله
والاهم من كدة انى لما عربنت على العربية كان سعرها 68.5
لكن لما رحت اخلص فيها كانوا عاملين عرض واخدت العربية ناقص الفين جنيه
هو ده اللى حصل معايا بالحرف الواحد
وباحمد ربنا الف مرة انى كنت من سعداء الحظ تقريبا انا الوحيدة سعيدة الحظ معاهم على كدة
اتارى لما عملت موضع تجربتى مع المصرية فيه ناس كتير اتهمتنى انى باعمل دعاية وطبعا عندهم حق
وربنا يصبر كل الناس اللى اتنصب عليهم دول

[Tayer]

عايزين نعمل موضوع عن المعارض المحترمه

[tamern5]

با جماعة انا مصدوم من ال 18 صفحة اللى فاتوا . احنا فى غابة و مفيش اى ضمير خالص و حسبى اللة و نعم الوكيل فى الحرامية دول .

انا عايز اقول بردو عن مودرن موتورز الدقى طلعوا عينى لمدة شهر قال اية اللون النبيتى السوبر صالون مش موجود و لما زهقت رحت خت القدم بتاعى ال500 ج و خلصت منهم و رحت متصل باوتو اجيبت و هو موزع كبير و خلص الموضوع فى حوالى 3-4 ايام وكتوا كان تمام بدون مشاكل و الحمد للة


وربنا يلطف بينا فى الزمن دة

[KSA2011]

المفروض العنوان ايه المعارض المحترمه لانه بيتهيالى مفيش ولا معرض محترم

[N.a.j.d]

كله بيشتغل لمصلحته مش بشتغل لصالح الناس

[ada7]

قصة شرائى للوجان

فكرت أشترى اللوجان فول أوبشن فرحت أوتو سمير ريان وهناك شفت العربيه وقعدت مع الموظف وسألته بكام قالى 69000 (عايزنى أفاصل) بس انا ما فصلتش وقلت أنا عايز اشترى قسط وهدفع 50% والباقى على 3 سنين وندالى موظف البنك وهو بيكتب السعر قالى هنعمل خصم 500 جنيه وقعد يصور البطاقه وأمضى على استمارات والمهم يوم ونكلمك (وبعد 3 أيام ) كلمته فقالى أصل البنك موافقش (موظف البنك اللى جالى المكتب قعد ملطوع ساعه لحد ما خلصت الاجتماع ) (مقالوش ان هما جايين )
فقررت أشترى كاش فرحت المصريه فرع العبور (جمعية أحمد عرابى) قابلت موظف هناك قالى السعر 72000 (بعد ما قلب فى لستة الاسعار) وأحنا بنكلم دخل عميل اخر بيسأل على هوندا سيفك قام سيبنا وطالع معاه علشان يفرجوه عليها فقررت انى مشتريش من عنده وخصوصاً انوه قالى ان السعر هيزيد 1000 علشان كاش؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بس بعد ما سبنا وطلع مع العميل التانى بصيت على لستة الاسعار لقيت السعر 68000
طلعت على الطارق مدينة نصر (فى نفس اليوم اصل انا كنت مستعجل)
العربيه موجوده بس ايه رأيك فى الفيرنا يا عم انا مصلى استخاره وناوى والفلوس معايا هات العربيه ونخلص (عمل شوية تليفونات خلاص ) خلاص هكلم حضرتك اخر النهار
وفعلاً كلمنى وقالى العربيه هتبقى موجوده عندى بكره
ورحت تانى يوم ومعايا الفلوس 68000 الباشل قالى انى لازم احجز حتى لو دفعت 15000 بس علشان العربيه تيجى على اسمى ورغم انى كان معايا الفلوس بس مردتش (انا اصلاً ما لقتش العربيه عنده) ومشيت وكلمنى بالليل وقالى ان هوا هيجبهالى من معرض تانى بكره (بس ما اقلش لحد)
وتانى يوم كلمنى وقالى انه هيجبلى عربيه من عنده كان فى عميل حاجزها من فرع الدقى بدل ما يسلمهالوا هيدهالى بس احجز الصبح واستلم 6 مساء
قلتولو انتا مصمم انى احجز طيب ما انا ممكن احجز وتعمل معايا زى العميل التانى (ايه فيدة الحجز) وبعدين ايه قلة الاحترام ده يعنى ايه اشترى عربيه حاجزها عميل تانى انا مش شارى من عندك حتى لو ببلاش
وفى نفس اليوم طلعت على الميكانكيون العرب لقيت عندهم العربيه (السعر اقل الطارق)
ودفعت كاش واستلمت العربيه وانا واقف وتانى يوم خلص موضوع الافراج الجمركى
بس أكتشفت حاجه غريبه بعد ما دفعت ثمن العربيه واستلمتها
انهم كانو بيرخصوا العربيه ليهم (الميكانيكيون العرب ) يعنى كانو فحصين ودفعين التأمين الاجبارى وبايعهالى على انها زيرو انا خاف لتكون كانت مخبوطه ورشه (فى حته فى الباب اليمين مش عجبانى) او فيها اى عيب علشان كده كانو بيرخصوها لنفسهم وخصوصاً اننى مبفهمش فى العربيات والرش بتعهم لو هى مخبوطه هيبقى مظبوط لانه مركز خدمه معتمد وعايز اتأكد

[A.Saad]

فكرت أشترى اللوجان فول أوبشن فرحت أوتو سمير ريان وهناك شفت العربيه وقعدت مع الموظف وسألته بكام قالى 69000 (عايزنى أفاصل) بس انا ما فصلتش وقلت أنا عايز اشترى قسط وهدفع 50% والباقى على 3 سنين وندالى موظف البنك وهو بيكتب السعر قالى هنعمل خصم 500 جنيه وقعد يصور البطاقه وأمضى على استمارات والمهم يوم ونكلمك (وبعد 3 أيام ) كلمته فقالى أصل البنك موافقش (موظف البنك اللى جالى المكتب قعد ملطوع ساعه لحد ما خلصت الاجتماع ) (مقالوش ان هما جايين )
فقررت أشترى كاش فرحت المصريه فرع العبور (جمعية أحمد عرابى) قابلت موظف هناك قالى السعر 72000 (بعد ما قلب فى لستة الاسعار) وأحنا بنكلم دخل عميل اخر بيسأل على هوندا سيفك قام سيبنا وطالع معاه علشان يفرجوه عليها فقررت انى مشتريش من عنده وخصوصاً انوه قالى ان السعر هيزيد 1000 علشان كاش؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بس بعد ما سبنا وطلع مع العميل التانى بصيت على لستة الاسعار لقيت السعر 68000
طلعت على الطارق مدينة نصر (فى نفس اليوم اصل انا كنت مستعجل)
العربيه موجوده بس ايه رأيك فى الفيرنا يا عم انا مصلى استخاره وناوى والفلوس معايا هات العربيه ونخلص (عمل شوية تليفونات خلاص ) خلاص هكلم حضرتك اخر النهار
وفعلاً كلمنى وقالى العربيه هتبقى موجوده عندى بكره
ورحت تانى يوم ومعايا الفلوس 68000 الباشل قالى انى لازم احجز حتى لو دفعت 15000 بس علشان العربيه تيجى على اسمى ورغم انى كان معايا الفلوس بس مردتش (انا اصلاً ما لقتش العربيه عنده) ومشيت وكلمنى بالليل وقالى ان هوا هيجبهالى من معرض تانى بكره (بس ما اقلش لحد)
وتانى يوم كلمنى وقالى انه هيجبلى عربيه من عنده كان فى عميل حاجزها من فرع الدقى بدل ما يسلمهالوا هيدهالى بس احجز الصبح واستلم 6 مساء
قلتولو انتا مصمم انى احجز طيب ما انا ممكن احجز وتعمل معايا زى العميل التانى (ايه فيدة الحجز) وبعدين ايه قلة الاحترام ده يعنى ايه اشترى عربيه حاجزها عميل تانى انا مش شارى من عندك حتى لو ببلاش
وفى نفس اليوم طلعت على الميكانكيون العرب لقيت عندهم العربيه (السعر اقل الطارق)
ودفعت كاش واستلمت العربيه وانا واقف وتانى يوم خلص موضوع الافراج الجمركى
بس أكتشفت حاجه غريبه بعد ما دفعت ثمن العربيه واستلمتها
انهم كانو بيرخصوا العربيه ليهم (الميكانيكيون العرب ) يعنى كانو فحصين ودفعين التأمين الاجبارى وبايعهالى على انها زيرو انا خاف لتكون كانت مخبوطه ورشه (فى حته فى الباب اليمين مش عجبانى) او فيها اى عيب علشان كده كانو بيرخصوها لنفسهم وخصوصاً اننى مبفهمش فى العربيات والرش بتعهم لو هى مخبوطه هيبقى مظبوط لانه مركز خدمه معتمد وعايز اتأكد

وديها لاى سمكرى بيفهم فى ساعتها عيعرف

[aelhossan]

جبتهالك تاني يوم علي طول من الحادثة
دة انا اتعمل عليا شغل من قريبي امال لو من معرض وواحد تاني كان هايتعمل معايا اية حسبي الله ونعم الوكيل علية بالعوض وعلية بالتلف في مالة المهم الموضوع لية بقية مع البنك لما جيت اكيش العربية هقلهالكم بعدين لأني طولت عليكم جدا

وحاطتللي صورة بات مان ونافخ صدره قوي
والله انت راجل طيب
بس ازاي تبقي في السوق وبتتعامل مع تجار وينضحك عليك(ومتقولش ماديتش خوانه)
ربنا يعوض عليك

[aelhossan]

الحمدلله قريت الموضوع من الجلده للجلده
الخلاصه:
تشتري من التوكيل احسن
لو من معرض تشوف العربيه قدامك قبل ما تدفع مليم
ادفع كاش
بلاش القسط (كمل تمن العربيه بأي طريقه ولو منفعش اصبر لحد ما تحوش تمنها)
الدنيا مش هتطير والواحد بقاله سنين ممعهوش عربيه ماجتش علي سنه ولا اتنين
كمان في نقطه مهمه
اوعي تثق في اي حد(زي ما بتروح تشتري باكو لبان بتاخد الباكو وتدفع الفلوس)
ويجعله عامر