::: موضوع مخصص عن معارض السيارات الغير محترمة :::

[HassanEissa]

يا جماعه الحمد لله
انا لما اشتريت عربيتي الانوس اشترتها ب ٧٥٠٠٠ جنيه و كانت وقتها ب ٧٠٠٠٠ و لما سألت عن فرق السعر قالي الرجال بتاع المعرض ( حسبنا الله و نعم الوكيل )
ان العربيه لو هتشتريها بالسعر ده ( ٧٠٠٠٠ ) هتستلمها بعد سنه
و بعد لما دفعت حجز ١٥٠٠٠ جنيه اعدني جنبه شهرين و كان مديني ايصال مكتوب عليه لو حبيت استرد فلوسي هيخصم ٥٠ ٪ من قيمه المبلغ يعني ٧٥٠٠ جنيه
و لما استلمت العربيه لقت العداد واقف مش شغال فاتصلت بيه و قولتلو اني هروح التوكيل يشوفو ايه المشكله دي
قالي اوعي تعالي و انا هعملهالك و طبعا طلع ان البيه نسي يشغال العداد الي هو موقفوه علشان يقعد يلف بالعربيه زي مهوه عاوز و الله اعلم اتعمل فيها ايه
حسبنا الله و نعم الوكيل
علي فكره دول مش المصريه و لو انهم كلهم عالم ولاد ............ ولا بلاش

[salsola]

كلهم نصابين احسن حاجة التعامل مع الوكيل

[meemo]

انا كنت في فرع المعادي لسه امبارح علشان اسال علي السايارة الرينو اللوجان المغربية بس انا هاحكي الحكاية من الاول
انا اصلا شغال في الكويت مدرس وكنت هخليت المدام تسال ان كان ينفع اقسط ولا لا وبعت كل الورق من هناك وقالو ا ينفع واهلا وسهلا واول منزلت اجازة رحت امبارح طب مش ممكن تدفع 50% اصل مينفعش معلش وكلم خايب كده
ثانيا معظم العربيات اللي في المعرض متجرحة من الجنب وشكلها من الداخل يقرف من كتر الناس اللي ركبت فيها وشفتها
ثالثا وده الاهم ان اللوجان المغربية طبعا موديل 2010 يعني مفيش منها دلوقتي بس موجودة عندهم والبهوات عايزن ياخدوا في تمنها 5000 جنيه علشان استلمها دلوقتي
رغم ان انا سالت في شركة عربيات موجودة عندهم ولو اشترات الموديل الاساسي مش هايخدوا اي زيادة فوق السعر الرسمي بس لو اشترت الهاف اوبشن عايز 4000 جنيه فوق السعر الرسمي وفي شركة الطارق عايز 3000 فوق السعر الرسمي يعني المصرية مش عايزة اقوله اه انتوا اكيد فهمتوا؟؟؟؟؟؟؟؟؟؟؟؟؟؟

[aymamgad]

ابعدوا عن النصابين - ناشيونال موتورز

ناشيونال موتورز

اشتريت لانسر شارك الكاملة من ناشيونال موتورز اسيوط اول الشهر و طبعا يادوب مشيت بيها حاجة بسيطة لغاية ورقها ما خلص ... وفجاة قفلت العربية بالريموت عادى خالص و نزلت اشترى حاجة ... رجعت لقيت العربية مش راضية تفتح خالص !!!
قعدت ادوس بالريموت اكتر من مرة فى كل حتة مافيش فايدة !!!
قلت خلاص افتح بالمفتاح ... وكانت الصدمة ان المفتاح مش راضى يفتح !!!!
كلمت التوكيل و كان الرد : هات سمكرى يفكلك الشبكة اللى قدام و يكشف على البطارية اكيد ضعيفة (مع انى كنت ماشى بالعربية!!)
انا كنت هاتجنن لسة شارى العربية و افك الشبكة ؟
لا و كمان سالت ايه دخل البطارية بالباب اللى مش بيفتح بمفتاحه ؟؟؟؟
وكان الرد : ؟؟؟؟ لا احد يعرف !!!
المهم انا كنت ع الطريق و ما فيش حد ... تطوع واحد كهربائى طيب ييجى معايا و لما شاف العربية جديدة صعب عليه و قال لى : لو فكيتلك الشبكة الدنيا قدام هتبوظ !!
وسالنى : مفيش مفتاح تانى ؟ وافتكرت انى سالت نفس السؤال وقالولى لا هوا واحد بس !!
المهم قدر عن طريق الرفرف يفتح الكبوت و يوصل للبطارية و لقيها سليمة خالص !!
طبعا حصلت بهدلة علشان يوصل للبطارية دا غير الحاجات اللى قعد يجربها و كنت واقف جنبه حاسس انى هاعيط من المهزلة اللى عايشها مع عربية المفروض انى جايبها جديدة و دافع فيها تحويشة عمرى ودلوقتى بقها مفتوح و بيتلعب فيها !!!
خدت تاكس ودخت على بتاع ساعات علشان اغير حجر الريموت (يمكن ؟) وقالولى الحجر سليم خالص .. مع كدة حطيت واحد جديد !
المهم جربنا كل حاجة و مفيش فايدة ... اتصلت بمهندس الشركة و كان رده انى اجيبله العربية القاهرة (طبعا كوميديا لو عرفتوا ان العربية واقفة فى طريق اسيوط - سوهاج و مش بتتحرك !!! دا غير انها اتوماتيك ما بتتزقش)
دا غير الوقت اللى ضاع و البهدلة اللى خدتها و انا دلوقتى سايب العربية على الطريق و مشيت اشوف شغلى
لو برمجة المفتاح طارت المفتاح هيفتح الكالون بتاع الباب عادي
انا قلت نفس الكلام بالحرف لبتاع التوكيل .. وكانت الردود :
-العربية دى جاية بمفتاح واحد !!!
-موضوع ان المفتاح ما بيفتحش دى غريبة و عمرها ما حصلت !!
اللي انا باقوله

فيه حاجة ملعوب فيها مش تمام
انا سألت مدير الصيانة على الموضوع ده قال لي
فيه مفتاح طوارئ حديد داخل الريموت (يتم سحبه من مكانه فيظهر مفتاح كامل عادي جدا حديد) بحيث ان المفروض يتم الفتح به في حالة ما اذا الريموت لم يعمل فأنا مستغرب جدا ان المفتاح الحديد لم يفتح الباب حيث ان فتح الباب في الحالة دي ليس له اي علاقة بالدوائر الكهربية

, شنطه العربيه مش راضية تفتح بالريموت و مافيش مكان لمفتاح !!

انا اعصابى اتحرقت .... كل يوم يقولولى هانبعت لك حد ... و العربية واقفة على الطريق
حضر احد الفنيين بعد ان قام احد العاملين بالتوكيل بالاتصال به .. و الرجل فنى تويوتا اصلا ... لما شاف العربية قال لى :
يا باشا ايه البهدلة دى !!!
طبعا صعب عليه منظرها و طبعا هوا عارف انها عربية جديدة
المهم باستخدام عتلة حديد عرف يفتح الباب ولقى كالون الباب بايظ خالص و قال بالحرف :
انا عمرى ما شفت حاجة زى كدة فى عربية جديدة فى حياتى !!!
وسالنى - كالعادة - على المفتاح التانى !! و كالعادة برضه استغرب خالص لما سمع موضوع انى استلمت واحد
و لقى الريموت بايظ خالص و قاللى تشغلها بالمفتاح و انا هاظبطلك الكالون
وطبعا انا دلوقتى كل حاجة باعملها بالمفتاح


اتصلت بالتوكيل "ناشيونال موتورز" وكان كلامهم معناه "بالذوق" = اخبط راسك فى الحيط !!
ولكن علشان يثبتوا انهم لسه بنى ادمين دلونى على ورشة فى القاهرة اعمل مفتاحو اصلح الحاجات اللى باظت على حسابى !!!!!!!!!!!!!!!!!!

الحكاية خلصت بالاتصال التالى من احد العاملين بالتوكيل :
"ياريت يا دكتور ما تتعبش نفسك لان انت اللى هتتاذى !!!"
"يعنى ايه ؟ ... انا هاعمل محضر و اكلم بتوع حماية المستهلك"
ضحكة قصيرة (زى بتاعة بتوع المافيا فى الافلام الاجنبى)
"يعنى عماد بيه بيقول ما تتعبش نفسك لان انت اللى هتتاذى"
والبقية فى حياتكم فى الامانة والصدق والاحترام و الالتزام و ...و..
واهلا بالغش و النصب و الاحتيال و البلطجة و ...و...
وابعدوا عن ناشيونال موتورز النصابين ...
وكل سنة و انتم طيبين !


____________________________________-
نرجو منك عدم تكرار الموضوع فى أقسام أخرى
حتى لا نضطر أسفين بوقف عضويتك لمخالفة قواعد المنتدى

مشــرف عام - 2

[أحمد كمال]

يعني ايه عماد بيه بيقول لك انت اللي هتتأذي

هيبعت لك بلطجية و لا ايه

و لا يتهمك انك سارق العربية مثلا و لا ايه؟


و لا هو ماسك عليك ورق ههههههههههههه ربنا يشفي

[Terrible_DaRsH]

ربنا يعينك و لو ليك حق ربنا هيردهولك .

دول لو تجار مخدرات مش هيعملوا كده

[Ahmed Nouh]

حضرتك صورت الكلام اللى حصل ده

او عندك اى حاجه تثبت فعلا الموضوع ده ؟ لو فى قولى وان شاء الله اعرف افضحهملك فضيحه بجلاجل

[solycar]

ممكن تكلمو تانى و تسجل المكالمة و تخليه يعيد الكلام اللى قالو

[maka]

حماية المستهلك

والراجل اللى كلمك ده بيلعب باعصابك ولا يقدر يعملك حاجة

[artyboy]

من الأخر شوف مين عماد بيه ده ولو أنى ما أعتقدش أنه يعرف يعمل حاجه بس إحنا الوضع عندنا غير عندكم عندكم فى عائلات كبيره وما بينسوش إللى بيزعلهم وكده فا أسأل الأول مين عماد بيه ده و أتكل على الله وروح حمايه المستهلك و طبعا أنت معاك ورق رسمى من أى ورشه معتمده من التوكيل أن العربية دى ظهر فيها العيب الفلانى ده وتم أصلاحه و طبعا حاول تسجل للولد ده تانى ويارب يكون كلامى صح بص أسأل الأول فى جهاز حماية المستهلك بالتليفون بس بدون ذكر أسماء (دلوقتى نفترض أن حصل كذا وكذا أأتصرف أزاى وإيه الورق إللى مطلوب منى علشان أخد حقى ) وربنا يسهل

[esloob]

انت ماشى فى كل المنتدى قسم قسم توريهيم

طيب طمنا وصلت لحد فين مع الناس دى؟

[ابوهاشم]

لا حول ولا قوة الا بالله
ربنا ينتقم من كل ظالم

[dr-mohamed]

انت ماشى فى كل المنتدى قسم قسم توريهيم

طيب طمنا وصلت لحد فين مع الناس دى؟

وانا كمان بشاركك الراي
انا معرفش الاخ العضو صاحب الشكوي وطبعا اكيد مفيش بيني وبينه عداوة او اي خلاف الحمد لله
لكن ببساطةة شديدة بدل ما كنت عملت كوبي من الموضوع وحطيته في كل مكان في المنتدي كنت حطيته في قسم الميتسوبيشي وبعت رسالة خاصة للعضو الباشمهندس مصراوي جدا وهو مسئول في توكيل المصرية وكيل ميتسوبيشي وكان هيبحث الشكوي بتاعتك وهيحلها زي ما عمل مع اعضاء كتير ولو كان ليك حق كان هايجيبهولك كويس زي ما عمل مع ناس كتير بردو هنا
وعندك انك تعمل محضر اثبات حالة وتقدم شكوي لجهاز حماية المستهلك
اما اللى حضرتك بتعمله فيدخل في اطار التشهير بالسيارة فقط ليس الا ومش هدخل طبعا في النية وابحث عن السبب لان ده مش من حقي

[dr-mohamed]

خاصة ان حضرتك كلمت الباشمهندس طارق واسمه هنا مصرواي جدا قبل كدة اكتر من مرة ورد عليك
وانت نفسك كنت بتشكر في بتوع ناشيونال موتورز وقلت بالحرف الواحد
الأخوة الأعزاء ... أستلمت الأسبوع اللى فات لانسر شارك الكاملة من ناشيونال موتورز أسيوط ب 136 ألف ... العربية جميلة جدا والناس محترمين جدا فى التعامل مثل الأستاذ مجدى و الأستاذ و ليد .. لكن يعيبهم البطء فى احضار العربية و الورق

[د.محمود صلاح]

سبحان الله , نصيب والله , ربنا يكون فى عونك