::: موضوع مخصص عن معارض السيارات الغير محترمة :::

[za3bolla]

طب ليه ما نعملش دليل لمعارض امينة (وان كنت اشك في وجودها!!)؟؟

[casperinoo]

ده ايه القرف ده....بجد حاجه تحرق الدم ...ربنا معاك
ومعايا بقي علشان انا مشترك معاهم في خدمة
insurance plus
ولسه مجربتش معاهم حاجه

[youssef_sallam]

نفس الموضوع ده كان حيحصل معايا بس كان بمعنى تانى و المعرض إسمة ستوب للسيارات و موجود مصطفى النحاس بس إكتشفت إن البنك مظبط معاهم حقولكم إزاى :
1- كانت الزياده إن بنك ناصر بياخد عمولة 3% على إجمالى تمن العربية قولتلهم ده مش منطقى المفروض لو فى عمولة يبقى على المبلغ المتبقى مش على إجمالى تمن العربية و هنا كانت بداية الشكوك
2 - قالى انا حاعملك عرض أسعار ازيد من تمن العربية ب 2000 جنية ( 3%) قولتلة لو فى عمولة البنك يحسبها عليا هناك انت مالكش دعوة .
3 - الكارثة الكبرى إنهم كانوا مصممين على بنك ناصر فرع مدينة نصر قولتلهم لية قالولى اصل الفرع ده حبايبنا هناك و بيخلصوا بسرعة مع انا ساكن و شغال جمب فرع و سط البلد .
4 - قولت أعمل فتك و اروح البنك من وراهم فرع مدينة نصر فوجئت إن موظف البنك هوه نفسة اللى كان شغال فى المعرض و برضة قالى على العمولة ( محبوكة على الأخر )
المهم روحت فرع وسط البلد و سألتهم قالولى مافيش حاجة إسمها عمولة ولا اي حاجة .
انا بقى إكتشفت سبب الزياده دية المفروض تابنك بيطلع شيك بتمن العربية للمعرض بعد ما يخصم الضرائب فالمعرض بيزود عليك الضرائب علشان هو فى العادى بيهرب منها و هوة ده سبب السرقة . :-?

[casperinoo]

نفس الموضوع ده كان حيحصل معايا بس كان بمعنى تانى و المعرض إسمة ستوب للسيارات و موجود مصطفى النحاس بس إكتشفت إن البنك مظبط معاهم حقولكم إزاى :
1- كانت الزياده إن بنك ناصر بياخد عمولة 3% على إجمالى تمن العربية قولتلهم ده مش منطقى المفروض لو فى عمولة يبقى على المبلغ المتبقى مش على إجمالى تمن العربية و هنا كانت بداية الشكوك
2 - قالى انا حاعملك عرض أسعار ازيد من تمن العربية ب 2000 جنية ( 3%) قولتلة لو فى عمولة البنك يحسبها عليا هناك انت مالكش دعوة .
3 - الكارثة الكبرى إنهم كانوا مصممين على بنك ناصر فرع مدينة نصر قولتلهم لية قالولى اصل الفرع ده حبايبنا هناك و بيخلصوا بسرعة مع انا ساكن و شغال جمب فرع و سط البلد .
4 - قولت أعمل فتك و اروح البنك من وراهم فرع مدينة نصر فوجئت إن موظف البنك هوه نفسة اللى كان شغال فى المعرض و برضة قالى على العمولة ( محبوكة على الأخر )
المهم روحت فرع وسط البلد و سألتهم قالولى مافيش حاجة إسمها عمولة ولا اي حاجة .
انا بقى إكتشفت سبب الزياده دية المفروض تابنك بيطلع شيك بتمن العربية للمعرض بعد ما يخصم الضرائب فالمعرض بيزود عليك الضرائب علشان هو فى العادى بيهرب منها و هوة ده سبب السرقة .

ههههههههه شئ لذيذ.... :? :? :?

[ayman_elkholy]

بلد نصب فى نصب فى نصب فى ...............................الخ
كله بينصب على كله

[الريس]

طيب ما تبلغ عنهم يا يوسف

[youssef_sallam]

انا مستنى أخلص إجراءاتى مع الفرع التانى للبنك بتاع وسط البلد و استلم عربيتى علشان الشكوى حتكون فى البنك و المعرض و اوعدكم حضبطهم علشان مش لازم اكون سلبى و من راءى منكم منكرا فليغيرة
اصل فى واحد زميلى فى المكتب للأسف عملوا نفس الحوار و أخدوا منة 1500 زياده

[dragonsmith]

السلام عليكم،

أنا على ما اتذكر كنت مرة قرأت في أحد ملاحق السيارات ان معرض الطارق خبرته فوق ال 20 سنة و البداية كانت بمعرض ستوب. اللي فهمته ساعتها ان المعرضين مملوكين لنفس الشخص او العائلة.
لو حد قرأ أو يعرف الكلام ده يا ريت يؤكده.

للعلم، أنا اشتريت اونو من الطارق في مارس الماضي و لم اواجه أي مشكلة غير انهم مبيدوش فاتورة زي كل المعارض للأسف. كنت مشتريها كاش.

شكرا.

[Hazemabdallah]

الله يطمنكوا !! يعنى كده الواحد أحسن له مايقربش من التقسيط , أدام الحكاية كلها نصب فى نصب ...

و جزاكم الله خيرا كلكم على تحذير الناس , و كشف ألاعيب المعارض ...

[youssef_sallam]

فى نصب فى كل حتة و لكن لا خاب من إستشار و دى فايده المواقع الحلوة ده علشان نسأل بعض و نحكى لبعض و عموما ما تدفعش مليم مش مقتنع بية ... و إسأل مليون مرة عند مليون معرض دية فى الأخر فلوسك و انت اكيد تعبت فيها و ربنا معاك
و انا عندى شويت معلومات عن التقسيط فى العربيات ممكن اساعدك لو محتاج اي نصيحة

[ehabident]

شركة المصرية للسيارات "العريقة" . . . تجربتى الشخصية

معـــرض المصــــريــة للسيــــــارات

الشهر اللى فات (شهر 6) روحت المصرية (فرع المنصورة) علشان اسأل على نيسان ليفينا. قابلنى هناك مندوب اسمه محمد بابتسامة عريضة على وشه وقعد يكمنى بذوق ويلعب فى دماغى كأنه هيدينى العربية ببلاش. بكام يا عم قاللى بـ 112 ألف. قلتله طيب نظامكم ايه قاللى بتدفع أى حاجة زى 500 جنيه مثلاً كجدية تعاقد والعربية تكون عندك فى نفس اليوم أو تانى يوم بالكتير.

المهم يوم 20 يونيو روحت دفعت له 1000 جنيه على أساس انى هستلم العربية يوم 1 يوليو وقلت له تجيبلى العربية علشان آجى اتفرج عليها أنا ومراتى قاللى أول ما تيجى هكلمك فى التليفون. كام سعر العربية يا عم قاللى 115 الف قلت له انت مش قلت 112 قاللى ده كان عرض وخلص خلاص قلت له طيب ايه اللى هايخلينى اسيب التوكيل واجيبها من عندكم قعد يضحك ومردش !!!

بعدها بكام يوم قلت له فين العربية قال لى أنا مش عاوز أجيبها علشان ماتبقاش فى المعرض والناس تيجى تفتح فيها وتبهدلهالك (شوف ازاى !!!)


يوم 28 يونيو كلمته وقلت له العربية فين قاللى مش هقدر اجيبها لك إلا لو دفعت فلوسها الأول قلت له يا سلام طيب أنا حاجز ليه قال لى مش بايدى حاجة علشان العربية تطلع من المخازن لازم يكون فى إذن بيع قلت له يا عم ده باقى 3 أيام قعد يتوه فى الموضوع وماطلعتش منه بحاجه.


يوم 30 يونيو هو كلمنى وقاللى على معادنا بكره قلت له طبعا يا باشا قاللى طيب لو عرفت تجيبلى 10 أو 15 ألف هابعت أجيبلك العربية علشان تستلمها بكره ان شاء الله، قلت له هأرد عليك كلمته بعدها بساعتين قاللى السواقين طلعوا خلاص فبكره تدفع وأجيبهالك، قلت له ماشى


يوم واحد يوليو كان يون أربعاء وطبعا كل البنوك كانت أجازة علشان أول السنة المالية المهم اتصرفت فى 39 ألف وروحت دفعتهم (يبقى كده دافع مقدم 40 الف) وقلت له انا الخميس مسافر فيبقى الأحد ان شاء الله وهات العربية بقى، أظن مافيش أحسن من كده أنا لو روحت لأى معرض عربيات صغير فاتح تحت السلم واديته تلت ثمن العربية هايجيبهالى تانى يوم. ابتسم وقاللى ماتقلقش هاتستلمها الأحد. وأكدت عليه يوم الخميس قاللى يوم الأحد تيجى تلاقى عربيتك.
يوم السبت كلمته قاللى معلش يا باشا عندنا زحمة فى التسليم والسواقين بيطلعو يجيبو العربيات اللى هاتتسلم فى نفس اليوم بس.


المهم يوم السبت بالليل كنت مسافر ورجعت بيتى الساعة 6 صباح الأحد ومع ذلك صحيت بدرى ونزلت البنك واستحملت القرف والزحمة وروحت طالع عليه. ايه الأخبار يا عم قاللى السواقين فى مصر من بدرى، طيب العربية هتوصل امتى قاللى مدير الفرع هيسأل بالتليفون، والوقت يمر ومفيش جديد، ايه المشكله، اصله ماكنش معاه تليفونات السواقين، طيب وبعدين، استنى شوية، وبعدين، المدير بيكلم رئيس السواقين ولسه هيرد عليه. طيب يا عم انتو عندكم كام سواق؟ قاللى 4، قولتله مش ممكن تكونو معكمش موبايلاتهم، يا سيدى اعمل 4 مكالمات ورد علىّ، وبعد مرور فتره مش قصيره قالولى العربية هتوصل النهاردة وهنبلغك بالميعاد بالظبط الساعة 2 أو 3.


المهم كان ورايا كام مشوار ومردتش امشى بالفلوس قمت "زى أى واحد مبيفكرش" دافع المبلغ كله.


وتمر الساعة 2 وتمر الساعة 3 فكلمته الساعة 3 ونص قاللى شوف يا باشا احنا متأسفين اصل الموزع معندوش عربيات وهتوصل يوم الاثنين القادم (بعد 8 أيام) واللى انت عاوزه. قلت له هفكر وأرد عليك، كلمته بعدها بعشر دقايق قلتله يعنى يفوت الاربعاء والخميس والسبت وبعدين تقوللى مفيش عربية، يبقى انا حاجز ودافع ليه؟ وتسيبى اروح البنك وآجى من البنك وانت ناوى تدور لى العربية يوم الاستلام الصبح؟ جهزلى فلوسى، قاللى الموزع كلمنا والعربية هتوصل بعد بكره ومعلش واصبر معانا ومجتش فى يومين والكلام ده


طبعا انا روحت لمعرض كبير فى المنصورة وحكيت له الموضوع بصراحه فعمل تليفون وانا قاعد معاه وقاللى العربية موجوده عند الموزع واللون موجود ومفيش مشكله فقلت له هوصل للمصرية اجيب فلوسى واجيلك وبرده عديت على السبع قاللى هاتلى عربون وهاجيبهالك على طول.


طبعا روحت للشركة وقلتله هاتلى فلوسى وبعد محاولات فاشلة منه بالعدول عن قرارى راح لمدير الفرع وقاله فنادانى وقاللى هات الوصولات والبطاقة وبعدين راح قايللى انا مش هديك العربية بـ 115 أنا هعمل خصم، قلت له انا مش عاوز خصم ولا عاوز عربية أنا عاوز فلوسى وهقضيها مواصلات، قاللى مفيش فلوس دلوقتى (وعمال يقول هات البطاقة وهات الوصولات ويقعد يبص فيهم ليه مش عارف) وبعد شد ومحادثات قاللى عدى علينا الساعة 9 بالليل خد فلوسك.


المهم عديت عليهم بالليل وكانو بيركبوا لوح تجارية على عربية فقلت حلو قوى كده ميقدرش يقوللى مفيش فلوس، واخدت فلوسى بهدوء غريب ومعلش يا افندم وفرصه سعيده والسلام عليكم


والنبى دى تعاملات شركة كبيره تعاملاتها بالملايين؟ المهم انا دفعت عربون فى معرض تانى والمفروض انى هستلمها بكره وربنا يسهل.

[أبو إياد]

حسبى الله ونعم الوكيل شركات مايعلم بيها الا ربنا
ربنا ييسرلك امروك وتعدى على خير وان شاء الله تستلمها فى الميعاد ونباركلك عليها

[alisleman]

هى المصرية كدة من زمان
وعلى فكرة لما قالك السعر بقى 115 كان هيجبهالك من معرض ويكسب منك 3 الاف

[abou_ruqi]

سيبك أنت من الموضوع كله
إن شاء الله لما تستلم اعملنا تقرير شديد علشان إحنا عندنا نقص في تقارير الليفينا

أما موضوع المصرية فإحنا ياما قلنا بلاش الحرامية دول !

[Samah AbdAllah]

المصرية دى يكتير تم التحذير من التعامل معاها هنا فى المنتدى

بس معلش ربنا معاك