سقوط علامة بروتون الجزء الرابع (سلسلة مواقف كوميدية)

[sayed911]

والله يا استاذ خالد انا لفيت حوالين العربية فوق الـ 400 مرة حتى تأكدت ورسمت فوق الـ 300 سيناريو للموضوع لحد ما قربت اعمله فلم :d :d
هوة بصراحة طريقة الخبطة جت ازاي مش عارف ولكن هوة الوحيد اللي راكن ورايا بقوله 4 ايام ولا انا ولا هوا اتحركنا !! بس برضوا جايز اكون مخطأ يا استاذ خالد واكون ظلمته وجايز مأكونش مخطأ انا اعتراضي مش على فكرة القصة نفسها انا اعتراضي كان على اسلوبه الحواري واسلوب اخبط دماغك في الحيط ..

[saadelden]

ماهي مشكلتنا في مصر محدش بيعترف بخطأه
يا اما مش عاجبه الكلام و خلاص


طبعا الفلسفه طبع من طباعنا و يمكن لو الواحد فضي يألفله كتاب ف الفلسفه المصريه :d


مره اخويا راكن جنب بنك فيصل و جنب البنك فيه قسم شرطه
هو واقف صف تاني و مستني الشارع يفضى عشان يطلع بالعربيه
عدت عربيه و التانيه و التالته و جت الرابعه لبست ف جنب العربيه من قدام و كملت لحد اخر العربيه و كل دا ماوصلش الموقف
شويه لقى العربيه وقفت و نزلته واحده عايزه تتخانق !!! انت خبط عربيتي !
هو ما اتكلمش . الناس الي ف الشارع كلهم هم الي اتكلمو و الي يتخانق معاها و الي يقولها جتكم القرف مليتو البلد :d
و الشرطه بيقولوله حصل خير و سيبها تمشي
كل دا و هو ما فتحش بقه !!

نستفيد من الموقف دا ايه ؟
ان مفيش في مصر حد عارف قانون المرور و مفيش حد بيطبقه
الي اتعلمته في السعوديه ان لو العربيه اتخبطت او خبطت حد لازم اتصل بالشرطه يجو يشوفو الحادثه و يرسمها و يديني جواب للمرور
و في المرور بيقيم خطأ مين .. لو مخبوط من ورا او من الجنبين ورا يبقى تكليف التصليح ع الي خبطني 100%
و لو اتخبطت من النص او بجنب يعني بتتقسم 50% عليا و 50% عليه
و لو انا الي خبطه من قدام طبعا بدفع انا 100%
و فيه طبعا حالات بتتفاوت حسب روايه الحادثه من الجنبين

لكن مفيش تصالح لانك لازم يكون معاك جواب تصليح من المرور يا اما العربيه مش هتتصلح

بعد كدا الفحص الفني بيكشف عليها 3 فنيين و كل واحد بيعمل تقرير بالاضرار
و بياخدو متوسط المبلغ المتقيم في التقارير و بيدفعه الي عليه الغلط بالنسبه الي حددها المرور

هنا في مصر خبطت واحد بتنزل تتخانق معاه يا اما بتراضيه بقرشين
مفيش بقى مرور ولا يحزنون

مش عارف ايه الي خلاني احكي القصه دي
بس اهو عشان مبقاش حارمكو من حاجه :p

[sayed911]

لا وكمان السعودية دلوقتي مع نظام ساهر الجديد مش عايز اقولك على اللي بيحصل فيهم هناك بقى :d :d :d
باقات والله :d :d
الشباب قرب يطلع من هدومه من كثرة المخالفات :d
انا ليا واحد صحبي هناك بيقولي معدي الـ6000 ريال مخالفات :d :d
الحمد لله احنا الدائري بس هوا اللي بيتنططوا عليه :d

[amr.mostafa]

انت هتقولي على اللي في السعودية ..!!!

انا عايش هناك ...

كسرو كام عربية لساهر ويرمو بوية على الكاميرات وبلاوي ...!!

وناس معدية المخالفات 10 الاف ولو ما دفعتش خلال شهر تبقى الضعف

[sayed911]

مهو نظام بصراحة شديد الصرامة وانا متوقعلوا الفشل بشكل غريب لأنه الشعب السعودي مهما كان ممتاز واحسن مننا في احترام قواعد المرور فإن كثرة الضغط تولد الإنفجار دي دولة عربية :d يعني ممشينها بحبحاني :d :d بس مش ها تكون ثورة مثلا ولكن ها تلاقي تعثرات كتير وناس ارقامها غريبة بقى :d

[saadelden]

اقل حاجه هناك مفيش حد بيعرف يمشي علي 120
كله طالما الطريق مفتوح قدامه بيديها

هو بصراحه عندهم حق في نظام ساهر لان فيه بلاوي كانت بتحصل بسبب السرعه و الاستهتار
تخيل اشاره واقفه و تلاقي 7 عربيات لابسين ف بعض !!!!! بسبب واحد كسر الاشاره و هرب

ولا كتير اما بنلاقي حوادث بشعه .. عربيات متفرتكه و ناس بتموت و ناس بتتبهدل
كل دا بردو بسبب الاستهتار

انا ركبت مع واحد هناك معاه نيسان صني و ماشي جوا المدينه علي 160 !!
تقوله غلط تقوله حرام .. يقولك الاعمار بيد الله !!

هنا ف مصر عندنا السرعه مش مشكله لان مفيش حد بيعرف يجري
لكن الطرق زي الزفت و النقل و المكروباصات خاربين الدنيا و محدش بيقولهم حاجه
مفيش عربيه نقل ف السعوديه تستجري تطلع من الحاره اليمين ولا حتى يعدي 100 كيلو
هنا ابقى ماشي 90 و الاقي النقل بيزمرلي و بيعدي من جنبي !!! طب دا ماشي علي كام ؟؟
و ازاي اصلا عايزين الطرق البايظه دي تستحمل الي بيتعمل فيها دا !!

[amr.mostafa]

انسى الكلام ده في السعودية يا ابو السيد ولا ثورة ولا يحزنون عملو ثورة في النت ومش عارف ايه ولكن لا حياة فيمن تنادي

__________


قالا قولي ما تعرفش موقع عدل اشوف على الماتش

[Xander2010_Evo]

بص يابو السيد
بالنسبة لسيناريو فيلم الخبطة
خد بقي السيناريو بتاعي
عربيتك واقفة
وهوا واقف 90 درجة وراك
وهوا حب مثلآ يطلع راح كسر علي عربيتك
فالحتة إللي بعد الرفرف الوراني عند الباب الوراني ممكن تحك فيك مع إن التصور ده فيه نسبة خطأ شوية
لأني الإكصدام عنده ممدود ع الجناب
أو
بالمثل مع الجانب الأمامي بين الباب الأمامي والرفرف
بس فالحالتين منظر البوهية بيدل علي إنها عربية أفتح شوية الأحمر بتاعها
ولسه مدهونة قريب لأن الدوكو لازق خفيف ف إكصدام عربيتك d:
أي خدمة فيلم جديد أهوه

اقل حاجه هناك مفيش حد بيعرف يمشي علي 120
كله طالما الطريق مفتوح قدامه بيديها

هو بصراحه عندهم حق في نظام ساهر لان فيه بلاوي كانت بتحصل بسبب السرعه و الاستهتار
تخيل اشاره واقفه و تلاقي 7 عربيات لابسين ف بعض !!!!! بسبب واحد كسر الاشاره و هرب

ولا كتير اما بنلاقي حوادث بشعه .. عربيات متفرتكه و ناس بتموت و ناس بتتبهدل
كل دا بردو بسبب الاستهتار

انا ركبت مع واحد هناك معاه نيسان صني و ماشي جوا المدينه علي 160 !!
تقوله غلط تقوله حرام .. يقولك الاعمار بيد الله !!

هنا ف مصر عندنا السرعه مش مشكله لان مفيش حد بيعرف يجري
لكن الطرق زي الزفت و النقل و المكروباصات خاربين الدنيا و محدش بيقولهم حاجه
مفيش عربيه نقل ف السعوديه تستجري تطلع من الحاره اليمين ولا حتى يعدي 100 كيلو
هنا ابقى ماشي 90 و الاقي النقل بيزمرلي و بيعدي من جنبي !!! طب دا ماشي علي كام ؟؟
و ازاي اصلا عايزين الطرق البايظه دي تستحمل الي بيتعمل فيها دا !!

هههههههه بجد النظام ده لو إتطبق عندنا هيتسرق أصلآ
وفعلآ كلامك مظبوط إن سبب معظم الحوادث ف مصر سببها الطرق نفسها
وده مايمنعش إنه بردو يرجع جزء لغلطة السواقين

[Xander2010_Evo]

وعلي فكرة
أنا عندي باليته ألوان أصلآ ع الإكصدامات والرفارف
تحس لوحة فنية ماشية فالشارع

[sayed911]

والله يا مصطفى انا خايف في يوم اصحى الاقي الإدارة العامة للمرور بتقول نهنئ الشعب المصري على انخفاض معدلات السرعة حتى وصلت معدلات سرعة السيارات في داخل القاهرة الى 12كم\ساعة !!
زي لندن اللي بقت فيها نك تمتلك سيارة لعنة على قائدها من بطئ سير المركبات هناك !!!
الفكرة في تردي منظومة بأكملها من اسفلت لردم لي لي لي انا لما سمعت تكلفة بناء طريق مصر اسكندرية الصحراوي كان ليا رد فعلي مصري اصيل اصيل اصيل !!!
مع حوالي 4 مليار وشوية فكة !!
في حين انه طريق مصر السخنة بنفس الجودة وتكلف بالمعادلات القياسية الربع او اقل يعني اقصد لو قسمت الـ 4 مليار دول على الـ 200 كيلو ها تطلع برقم للكيلو وهناك برضوا قسمهم ها تطلع برقم للكيلو تكتشف انه في 3 اضعاف سبب تقسيم الطريق على 3 هوامير المقاولات حسن علام والمقاولون واللي بالتعبية هاصوا فيها !!!!

[amr.mostafa]

فين الحلقة يا ابو السيد

[sayed911]

الفينيشنج تاتش بيتحط على اللي حصلي امبارح !!

[amr.mostafa]

الفينيشنج تاتش بيتحط على اللي حصلي امبارح !!

هو ايه اللي حصل تاني

[osama.m]

صحيح يا ابو السييد .. بتسمع coldplay

[sayed911]

بسم الله الرحمن الرحيم ..

اولا

الحلقة دي برضوا مصيبة حصلت من يومين !!!

انا حاسس انه انا معمولي عمل يا عالم !!

والله معمولي عمل !!!

انا بقالي كام يوم حاسس انه انا مش انا !!

مش في المود !!!

انا كان عندي امتحان ويل ميكانيك من يومين وبالتحديد كان يوم الأربعاء ..

المادة دي لمهندسين مدني معروفة لدى الكل انها كابوس متحرك !!

يا امى تحبسك يا امى تأكلك الشهد !!

حاجة كده لا يمكن التنبؤ بها ..

داخل الإمتحان !!

قولت انا ها احفظ القوانين كلها

واطبق

حتى وفي اسوء الظروف !!

اسوء اسوء الظروف !!

لو معرفتش احل ها اكتب القوانين على الأقل عليها اي درجات !!!

دخلت الإمتحان لقيت حوالي 20 اختياري !!

قولت مهلبية ولوز العنب اهي الإختياري دي بنقلب فيها عيشنا زي الفل !!

قبل ما ابدا الدكتور بيقول !!

يا شباب خدوا بالكم الله يكرمكم !!!

لما تجاوب على واحدة صح ها تاخد درجة !!

لما تجاوب على واحدة خطأ ها يتخصم منك درجيتن عشان متبقاش تجاوب الا وانتا متأكد !!!

وفي ورقة ها تتزوع عليكم دلوقتي حالا فيها القوانين !!

يا نهار ازرق القوانين ها تتوزع يادي النيلة امال انا اخد درجات على ايه !!

يالله على البركة !!

طبعا فقدت الأمل في الإختيار كله !!

20 درجة ضيعتهم من ايدي !!

متخيل انه قدامك سؤال !!

وليه 4 اختيارات !!

من كم الشك اللي عندك مش بتحط حاجة وقابل بالصفر !!!

وحمدي جنبي ماشي بمدأ

No Risk No Fun

ههههههههه انا عمال اقوله انتا ها تزغرط لما النتيجة بتاعت الإمتحان تتطلع !!

المهم في نص الإمتحان الدكتور نبه اللي يحل مسألة ( ان حلها من اساله !!)

فأنا فاهم المسألة اللي جية في الإمتحان !!

حلتها كلها !!

وطلع عندي الأرض جي عليها حوالي 80 KN

الكيلو نيوتن دي وحدة احمال !!

لسة ها اكتب النتيجة !!

سعيد قوي بقى

الاقي مكتوب بين قوين

قم بإضافة 30 كيلو باسكال على النتيجة التي قمت بحسابها وضعها بين القوسين !!

سوسو ها ترقص وانتا ها تمز يا ابو سوسو !!

انا عارف الكيلو باسكال ده وحدة ضغط واشتغلت بيه 48957 مرة ولكن مين جدع بقى يفتكر هوة بيساوي كام دلوقتي !!!

يا دكتور ايه دخله ده دلوقتي انا عايز اعرف ؟

هو : مليش فيه !!

انا : يا دكتور ده امتحان سويل مش امتحان تحويلات !!

هو : بقولك ايه عارفها حلها مش عارفها متلفتش انتباهي عن زملائك يا سيد

انا : هوة فيه حد عارف يحل حاجة عشان يغششها للتاني !!

هو : حل وانتا ساكت !!

المهم اقلب في دماغي الباسكال ده يساوي كام مفيش ابدا !!!

ادور في ظهر الألة الحاسبة برضوا مفيش !!

ولا الهوا !!

فالدكتور بيقول يا شباب

خدوا بالكم

انا مش ها ابص على خطوات !!

انا حسابي ليكم ها يبقى على ناتج نهائي !!

ها احط نص الدرجة على الناتج النهائي والنص التاني على الوحدة اللي انتم مش بتعرفوها ابدا !!

انا: ايه ده يا دكتور حرام يعني لما احل 3 ورقات في مسألة وعشان غلطة جمع ولا طرح تطير مني مسألة بـ 5درجات !!

هو:انتا مهندس الخطأ بالنسبالك مسألة حياة او موت !!

انا: يا دكتور حضرتك بتمتحنا في فهم لتطبيق فكرة مسألة مش امتحان رياضة !!

هو : يا سيدي انا بقيمك كطالب عندي حل وانتا ساكت !!

دقيقتين صمت كده

وبعد كده

انا: طيب دكتور لو طلعت الناتج غلط وكتبت الوحدة صح اخد بص من خمسة ؟

هو: سيد هات ورقتك وكفاية عليك كدى انتا شكلك ها تعملي فيها احمد زويل كفاية عليك كده !!

انا: طيب طيب انا آسف بس اصل انا عارف الوحدة اخيرا لكن مش عارف الإجابة فحرام يعني !!

هو: اكتب وربنا يسهل !!

خلص الوقت وسلمت الورقة !!

مش عارف محبط ولا سعيد

!!!

اهو كتبت وخلاص !!!

وكاتب ايه بقى !!!

نظريات الحاج كارل ترزاجي الأب الروحي للسويل ميكانيكس كلها مسحتها بأستيكة وكان فيه فلم هندي في الورقة بتاعتي !!!

قولت يا واد ما بدهاش روح البيت وكفاية عليك كده !!

روحت البيت !!

وقاعد في ساعة تجلي في البلكونة ساعة المغربية !!

قاعد باصص في قرص الشمس الدائري !!

وفي كدار طائرات بيعدي عندي من قدام الشمس !!

زي بالضبط ها تفهموا انا اقصد ايه

الطائرات المتجه الى المطار بتلاقيهم دائما بيمشوا في خط سير معين !!

اللي ساكن ف يالحي السابع ها يفهم انا اقصد ايه كل 6 دقائق بالثانية طيارة بتعدي من فوقك !!

فنفس النظام عندي بيعدوا من قدام قرص الشمس !!

بس كل مدة اطول شوية !!

قولت يا واد متيجي نجرب الكام الجديدة !!

الكام الجديدة مش عايز احرقها بس ها اعمل تقرير كامل عنها بس لما اخلص بيها مش اقل من 400 صورة عشان اكون متأكد من كل كلمة ها اكتبها ..

المهم ..

رحت جبت الترايبود !!

وجبت الكام !!

وجبت اللينس !!

وانا ساكن في دور عالي الى حد ما ومش في مباني قدامي خالص !!

المهم جبت الكام

وجبت الترايبود

وجبت الريموت عشان امنع اهتزاز الصورة !!

وجبت الينس !!!

وجبت معايا المنظار ( العدسة المكبرة عشان اتأكد من تعامد الطائرة على الشمس بالضبط )

اكيد فهمتوا فكرة اللقطة اللي في دماغي !!!

انا عايز طيارة ووراها قرش الشمس بالضبط !!

المهم زبطت العدة !!

نصبت العدة في البكونة في انتظار اللحظة المناسبة !!

وواقف ماسك المنظار ووبص على قرص الشمس !!

لقيتها بتحرق العينين ( جبت الذيب من ذيله )

المهم استعملت حيلة قديمة كنا بتنعلمها في المدرسة !!

كيس الزبالة ( الله يكرمكم ) وبلبسوا في وش العدسة من قدام ..

المهم حطيت الكيس قدام المنظار ومش قدام الكام عشان الكام الفلتر جاهز وزابط الليلة !!

المهم واقف مستني اللحظة المناسبة !!

وفجأة سامع صوت زعيق جي من بعيد !!

الله !!

فيه ايه !!

مشغلتش بالي !!

الطيارة جية اهي !!

على بعد حوالي دقيقتين من الهدف !!!

وانا مجهز العدة !!!

خلاص اهو قولت اشيل عنيا من على النظار القي نظرة اخيرة انه كل شئ تمام !!

وبطرف عيني لامح ناس كتير واقفة في البلكونات !!!

دي عمارة يميني بحوالي 30 درجة !!

لقيتهم كلهم واقفين في البكونات وبيشاوروا وبيزعقوا !!!!

انا قولت بيبصوا على حاجة في الشارع ابص مفيش حاجة !!!!

قولت اركز بيقولوا ايه !!!

اركز معاهم

الاقي الراجل اللي في الدور الأخير بيقول ..

بكرة بقى اكملهالكم :D :D :D

كل واحد يتوقع الراجل ها يقولي ايه !!