خطيبتى خانتنى...موقف صعب أتمنى المساعدة

[lomn]

السلام عليكم إخوانى الكرام

أنا عضو زميل ليكم من فترة بس دخلت بإسم جديد وذلك لخصوصية الموضوع وأقدم إعتذارى للإدارة.

انا فى مشكلة كبيرة وبصراحة فوق طاقتى...أنا شاب عندى 30 سنة من القاهرة مهندس عائلتى عائلة لها تقاليد وتحترم كبيرها أبى كان كبير العائلة فمات رحمة الله عليه وتولى القيادة عمى الكبير ...أحببت إبنه عمى هذا وتقدمت لخطبتها منذ 3 سنوات لإنها كانت فى الكلية (كان لايمكن أن يسمح بهذا لولا أنى إبن عمها)...المهم بعد الثلاث سنوات من الخطوبة طبعا أصبحت لايمكن لى أن أفكر فى الفراق ففى عقلى وكيانى انها زوجتى الموضوع كله موضوع وقت وكان فاضل 3 أشهر لعقد القران.........المشكلة بدأت حين إشتريت لها خط تليفون فاتورة كنترول علشان نكلم بعض ونججز موضوع الكروت وكده وحصل إنى فوجئت إن 650 دقيقة اللى فخطها خلصوا فى أقل من 3 أسابيع....طبعا ده من غير مكلماتى علشان انا مكلماتى مجانية ..فسألتها قالتلى صحباتى وكده انا قلت اكيد فرحانة بالفاتورة ورغى البنات وكده....المهم بحسن نية والله العظيم طلبت تسجيل تفصيلى للفواتير الخاصة بية ...وجت إمبارح وطبعا كانت الصاعقة.
فى رقم بتكلمه أكتر منى بتبعتله رسايل باليل بعد الساعة 12...بتكلمة فى أوقات غريبة الساعة 7 الصبح والساعة 12 باليل يعتبر معاها طول اليوم وهى رايحة الشغل لحد متنام....وانا فى النص j. رحت مكلم الرقم وطبعا المفاجأة المتوقعه إنه طلع ولد. وكأنك ألقيت على رأسى حجرا والله أقسم بالله انا ماعارف اوصفلكم مشاعرى.أكيد حاسين بيه.
المهم رحتلها البيت وخدتها ونزلت قعدت معاها فى العربية وشايفها وهى فرحانه (أو عامله نفسها فرحانة)إنى جتلها علشان أشوفها وانى واحشها ورحت ورتلها الفاتورة...طبعا موقف لايمكن هاعرف أوصفه وهى بتبصلى وبتبص للورقه...والمهم قالتلى ده واحد زميالها فى الشغل وهو بيحبها وهى لفترة بسيطه إستريحتله بس عمرها ماشافت غيرى ولا تتخيل حد غيرى جوزها والكلام الفاضى ده....المهم هزقتها ورميت الورق فى وشها وقلتلها كدابة وقعدت اهاجمها علشان اعرف العلاقة وصلت لحد إيه منا الشكوك وصلتنى لحد ليس له نهاية...حلفتلى وطبعا الموبايل فاضى مفهوش أى حاجة...ونزلتها من العربية زق ومشيت وأحمد الله إن يوم المطرة ده عدى على خير والله ياجماعة ماكنت شايف انا كنت ماشى بقدرة ربنا بدور على الحتة الزحمة وامشى فيها علشان خايف أجرى...
ومش عارف أعمل إيه...أروح أقول لعمى؟؟؟؟؟؟؟ هايقتلها ومش بعيد يحصلوا حاجة وهو كبير وانا بحبه بصراحة قوى هو ومراة عمى وهما بيحبونى جدا..وعلاقتى بإخواتها الولاد قوية...طبعا إستحالة أقول لأمى علشان إنتوا عارفين الامهات ممكن تعمل إيه هاترفع سماعة التليفون تخربلى الدنيا....بجد مش عارف أعمل إيه ومحدش يقولى شوف إنت غلط فى إيه بوظت العلاقة او سمحت لحد تانى يلعب بيها وهى صغيرة....علشان انا إديتها كل حاجة ممكن يعملها مهندس عنده شغل وطول النهار واليل شقيان فى مشاكل شغله وكان عندى مكتب صغير فاتحه بعد الضهر كان مكمل عليه بس قفلته بعد الثورة. المشكلة إنها رومانسية جدا وانا فعلا الوقت اللى بدهولها لايكفيها وطبعا الوقت ده اللى هو مكالمتين فى اليوم منهم مكالمة طويلة وحبة مكالمات صغيرة طول اليوم.
بجد لو حد عنده حل علمى أقدر أنفذه ياريت متسبونيش لإنى بجد مش لاقى حد أعرفه ممكن أقوله على الموضوع ده دى بنت عمى وخطيبتى.
(طبعا انا بكتب الكلام ده علشان انا ورا الكيبورد لكن فى الحقيقة انا عمرى ماهقدر أقول الكلام ده لحد غيركم)

[محمد عز]

اخى العزيز

مش عارف اقولك ايه

بس البنت اللى تكلم واحد غريب (زميلها فى الكلية ، فى الشغل اى كانت نوع الزمالة) بعد 12 بليل ولوقت طويل جدا 650 دقيقة

والكلام ده وهى مخطوبة لواحد تانى

الحقيقة حاجة لا استطيع تقبلها ومافيش بنت ناس تحترم نفسها ودينها واهلها وخطيبها .....تعمل كده

مافيش حاجة اسمها البنت رومانسية

لا يوجد لها اى اعذار وبالاخص وهى مخطوبة

رائى سيبها وشوف طريقك وانتوا لسه على البر

تعالى على نفس ومشاعرك واكسب نفسك لانك ممكن تعيش فى جحيم من الشكوك بعد الزواج

[A.Saad]

الخيانة صعبة
ممكن تخليها هيى اللى تطلب الانفصال وتصر عليه
وقولها انا كدة هاسكت عن اللى حصل
بس ياريت تطلب الرقم وتسجل صوت الاخ اللى بيكلم علشان الاية ما تتقلبش عليك بعد كدة

[w-m-a]

عفا الله عن ما سلف
ابدء حوار جديد بعقل وشوف هى عاوزة مين
واكيد انها مغلطتش بناء على تقاليد العائله وتربيتها ربما يكون اعجاب او انشغال فقط
اجلس معها وفكر جيدا
وربنا يوفقك لما يرضاه

[GreekAlexander]

على اى وضع الموضوع مش هايكمل وكفاية
---دى البداية بس ---
مابنى على الخداع فهو باطل

[شريف]

ادعو اللة ان يجيرك في مصيبتك و يخلف لك خيرا منها
واضح انك شخص جاد و محترم و بتراعي ربنا في تصرفاتك
و من كلامك واضح انكم عائلة متماسكة و مترابطة
انا هسألك كذا سؤال بس الاول حابب منك توعدني ان الموضوع دة ميخرجش بينك و بين خطيبتك
1- هل عندك استعداد في قرارة نفسك ان تكمل هذة الخطبة؟
ممكن ترتب اجابتك من هذة النقط
(الثقة - الاحترام - الاخلاق - أنشاء بيت قائم علي محبة و مودة - هل تجد فيها مقومات الزوجة الصالحة)
2-مدي علاقتك و احترامك لعمك كقدوة و ككبير عائلتكم و هل عندك استعداد تكمل علشان ترابط العائله
اجب علي هذة الاسئلة بعيد عن جو الشحن اللي انتي فيه بعد صلاة الفجر او قيام الليل

بسم الله الرحمن الرحيم
والكاظمين الغيظ والعافين عن الناس والله يحب المحسنين صدق الله العظيم
حاول تشوف نفسك انت فين من الاية دي

و لينا حديث بعد متكون رتبت افكارك شوية

[omarmosalem]

ربنا يكون في عونك موقف صعب جدا. نصيحتي أول حاجة تعملها انك تهدى عشان تعرف تفكر. سبها يومين ولا تلاتة ما تكلمهاش خالص. والنقطة الفيصل في الموضوع هل هي عايزاك انت ولا عايزة الشاب التاني (لأن دا موضوع مهم وهيأثر على مستقبلكو) والنقطة التانية هل حتى لو هي عايزاك انت هتبقى متقبلها بعد كدة وهتنسلها السقطة دي ولا هتفضل حاجة مأرقاك طول عمرك (لأن دا بردو هيبقى ليه أثر كبير على علاقتكو بعد كدة). المشكلة هنا انها بنت عمك وطبعا الموضوع دا بيعمل نوع من الحرص والاحتياط الزائد على السمعة وخلافه وخاصة ان علاقتك طيبة بعمك وأسرته. ولكن دا مستقبلك اللي لو تهاونت فيه دلوقتي ممكن تفضل تعيس و"شكاك" طول عمرك. ربنا يوفقك لما فيه الخير ويزيح عنك هذا الهم.

[GreekAlexander]

اخى العزيز

مش عارف اقولك ايه

بس البنت اللى تكلم واحد غريب (زميلها فى الكلية ، فى الشغل اى كانت نوع الزمالة) بعد 12 بليل ولوقت طويل جدا 650 دقيقة

والكلام ده وهى مخطوبة لواحد تانى

الحقيقة حاجة لا استطيع تقبلها ومافيش بنت ناس تحترم نفسها ودينها واهلها وخطيبها .....تعمل كده

مافيش حاجة اسمها البنت رومانسية

لا يوجد لها اى اعذار وبالاخص وهى مخطوبة

رائى سيبها وشوف طريقك وانتوا لسه على البر

تعالى على نفس ومشاعرك واكسب نفسك لانك ممكن تعيش فى جحيم من الشكوك بعد الزواج

اعتقد دا افضل كلام

[Hacker5]

للاسف دة حال معظم البنات دلوقتى
انا مريت بتفس الموقف بس الحمد لله قبل الخطوبة و اكتشفت انها ماستاهلش ولا تسوى 3 تعريفة
عايز رأى ؟
قول لعمك على حصل
تخيل لو عمك عرف انك عارف الموضوع دة و مقولتلوش ؟
هايقولك لا مؤخذة يعنى " انتا مش راجل " و هاتسمع كلام بايخ
انتا ابن عمها يعنى المفروض اول واحد يخاف عليها و اللى انتا بتعمله دة عشان مصلحتها مش عشان حضرتك غيران
نصيحة منى حاول تنفصل عنها لان الموضوع دة هايفضل بينك و بينها و انتوا متجوزين و هايبقى فيه حساسية فى التعامل و انتا هاتفضل طول عمرك مش مستريح من كتر الشك اللى هايبقى جواك يا ترى بتكلمه ولا لاء و أساله كتير و مافيش راحة بال
صدقنى هى عمرها ما هتنساه و لاحظ الاوقات اللى بتكلمه فيها يعنى هى عرفة انها بتعمل حاجة غلط

هو عمرو دياب قالها : بالعربى محدش يستاهل ههههههههههه
فكر و شوف هاتعمل ايه و انا معاك للاخر عشان اخوك خد خبرة محترمة من اخر تجربة فاشله دة غير تجارب اصدقائى و كله كان قدام عينى
انتا اة هاتتعب شوية و هاتبقى مجروح بس دة هايقويك اكتر و يعلمك مش اى واحد تحبها تعشم نفسك انك هاتتجوزها
لو حبيت واحدة متعشمش نفسك انك هاتتجوزها عشان لو محصلش نصيب متتعبش نفسيا

[M.Elgergawy]

طبعا انت لازم تقطع علاقتك بيها فوراعشان هيا لاتستحق حتى ظافرك
وبالنسبة الموضوع ييجي ازاي امام العائلة وخصوصا اخواتها الولاد
الصراحة مش عارف انت اكتر واحد عارف اولاد عمك عشان لما تيجي تنهي العلاقة اكيد هيحصل زعل منهم لو انت مقلتش السبب الحقيقي وربنا معاك
وبأكد عليك لازم تقطع علاقتك بيها فور وانها لا تستحقق نهائي
وانا اول مرة اشارك في موضوع اجتماعي ومزهووووووووووول من اللي بيحصل في بلدنا يعني هيا عايزة ايه تاااااني مخطوبة لمهندس وغيرها مش لاقي
حسبنا الله ونعم الوكيل في البنات اللي من النوع دا

[mohamed_selim]

لو مش بنت عمك كنت هقولك بيع و نفض و خلاص ...بس دى دمك و شرفك حتى لو مش مرتبط بيها .... اديها فرصه و عينك عليها متسيبهاش تروح حته و لا تكلم حد من غير ما تكون عارف ... لو تقدر تغير الشغل او ان شالله تقعدها فى البيت
حاجه كمان ... متشيلش الموضوع ده لوحدك ... شوف حد من ولاد عمك يكون عاقل و شاركه معاك عشان يكون عينك فى البيت و فى نفس الوقت يدعمك فى تصرفاتك الجديده اللى هتكون بالنسبه لعمك غريبه ...
لو الحال اتعدل يبقى ربنا اراد خير ... لو فى اى حركات كده او كده يبقى برضه خير و تقدر تسيب و انت ضميرك مستريح و برضه لما اخوها يكون عارف الخلفيات يبقى انت برضه ضميرك مستريح ...
ربنا معاك

[زينة الله]

شوف يا هندسة أنا هكلمك كأخت أكبر منك و يمكن أكتر خبرة شوية

أولا : ربنا يكون فى عونك و يصبرك اليومين دول ..
حاول تاخد اجازة يومين وتسافر مكان هادى الى حد ما وبعيد عن الناس اللى تعرفهم وتهدى نفسك عشان تفكر صح

ثانيا : ممكن الموضوع فعلا لا يتعدى تعارف من زميل متطفل شوية زيادة و بنت ساذجة وبريئة مبسوطة انه معجب بيها وخاصة انها لسه متخرجة وجديدة فى الشغل وحاسة ان لها كيان مستقل وكمان الشباب حاليا قيمهم كلها مهزوزة

ثالثا : دى بنت عمك وانت أدرى باخلاقها وطباعها و انت مسئول عنها مسئولية غير مباشرة حتى لو ما كنتش خاطبها لانها فى النهاية فى محل أختك حتى لو افترقتوا فطبعا لازم تلم جرحك وتداويه بطريقة صحيحة متزنة .. تقدر ابعاد المشكلة صح وتلم الموضوع صح

رابعا : حاليا اكتفى معاها انك تخاصمها و توصلها انك زعلان وانها غلطانة وتستغل الفترة دى عشان تهدى نفسك وتفهم المشكلة

خامسا : بعد ما تعرف حقيقة موقفها منك و من الموضوع دا اذا كان كلام فارغ وممكن يعدى أو انك مش هتقدر تكمل

سادسا : لو كان كلام فارغ ولا يزيد عن كونه سذاجة وتهور وجهل بالاصول .. سامحها و فهمها الصح فى التعامل مع الزملاء و وضع الحدود مع الاغراب وعجل بالزواج

سابعا : لو كنت مش هتقدر تكمل معاها .. اخرج من العلاقة بصورة لائقة وبرضو ساعدها تعمل الصح لانها زى ما قلتلك فى محل أختك وانت مسئول عنها الى جانب أخواتها وعمك

ربنا يوفقك و يكتب لك الخير و تجتاز المحنة دى حالا ان شاء الله

[ASKAFRAWY]

مبئيا انا هتكلم عن نفسي لو فى نفس الموقف:
اولا هنهى خطوبتى بيها ومش لازم يكون فيه مبرر او انى اقول لاهلى او لاهلها وخصوصا انك زى ما بتقول انها بنت عمك فاعتقد كدة هتقلب الترابيزة على الكل.
انا هنهى الخطوبة لعدة اسباب:
1- مش عشان انت وقتك غير سامح انك تعوضها الرومانسية فتشوف غيرك يديها الناقصها
2- الموقف دة ممكن جدا يتكرر بعد زواجك منها....اعتقد فى الحالة دى الموقف هيبقى اصعب
3- مع احترامى الكامل ليها بس ماينفعش تبقى مرتبطة بواحد وبتدلع مع واحد تانى .....ولا حضرتك ليك راى تانى

فى النهاية دة راى انا لو فى نفس الموقف هنهى الخطوبة فى هدوء وبدون اى مبررات حتى لو الكل مغلطنى لكن مش هقول على السبب عشان برضه دى فى النهاية قريبتى

[mrwho1982]

للاسف دة حال معظم البنات دلوقتى
انا مريت بتفس الموقف بس الحمد لله قبل الخطوبة و اكتشفت انها ماستاهلش ولا تسوى 3 تعريفة
عايز رأى ؟
قول لعمك على حصل
تخيل لو عمك عرف انك عارف الموضوع دة و مقولتلوش ؟
هايقولك لا مؤخذة يعنى " انتا مش راجل " و هاتسمع كلام بايخ
انتا ابن عمها يعنى المفروض اول واحد يخاف عليها و اللى انتا بتعمله دة عشان مصلحتها مش عشان حضرتك غيران
نصيحة منى حاول تنفصل عنها لان الموضوع دة هايفضل بينك و بينها و انتوا متجوزين و هايبقى فيه حساسية فى التعامل و انتا هاتفضل طول عمرك مش مستريح من كتر الشك اللى هايبقى جواك يا ترى بتكلمه ولا لاء و أساله كتير و مافيش راحة بال
صدقنى هى عمرها ما هتنساه و لاحظ الاوقات اللى بتكلمه فيها يعنى هى عرفة انها بتعمل حاجة غلط

هو عمرو دياب قالها : بالعربى محدش يستاهل ههههههههههه
فكر و شوف هاتعمل ايه و انا معاك للاخر عشان اخوك خد خبرة محترمة من اخر تجربة فاشله دة غير تجارب اصدقائى و كله كان قدام عينى
انتا اة هاتتعب شوية و هاتبقى مجروح بس دة هايقويك اكتر و يعلمك مش اى واحد تحبها تعشم نفسك انك هاتتجوزها
لو حبيت واحدة متعشمش نفسك انك هاتتجوزها عشان لو محصلش نصيب متتعبش نفسيا

مش كل البنات اوي بلاش نعمم

بس انت كلامك صح

+11111111111111111111111111111111111111

[sanhory]

بص ياسيدي
قصتك دي مشابه نوعا ما لقصة مريت بيها و انا الحمد لله دلوقتي متجوز و معايا طفلين

حقولك خلاصة تجربتي , طالما حاجة زي كده حصلت مهما قدمتلك اعذار و مهما قالت مش حعمل كدا تاني حتفضل طول عمرك شاكك فيها و فاكر الموقف دا و ممكن توصل لدرجة انك عايز تراقبها و تبدي تسيب مصالحك و شغلك و تمشي وراها في الرايحة والجاية(انا وصلت لكده في يوم من الايام)
احسن حل من وجهة نظرى و من واقع انا جربته تسيبها في حالها و تخليك في حالك و هي حتحب و تتحب و انتا كمان حتحب و تتحب و حتجوز و حتحمد ربنا و حتفتكر اللي فات و حتضحك

المشكلة ان الواحد مننا قدام اي صدمة عاطفية بيبقى حاسس انها نهاية الكون و انه مش حيعيش بعد كدا لا انا بقولك اجمد و خد موقف و لعله خير , و لو جاوبتني عالسؤال ده بصراحة انت حر اعمل اللي انت شايفه صح

هل لو كملتوا بعد كده مش حتشك فيها و تبقى حاطط في بطنك بطيخة صيفي و انت في الشغل و هي في البيت مثلا؟؟؟؟؟

و ربنا انشاء الله يهديك لما هو خير ليك و ليها