خطيبتى خانتنى...موقف صعب أتمنى المساعدة

[MohssenRashed]

مبئيا انا هتكلم عن نفسي لو فى نفس الموقف:
اولا هنهى خطوبتى بيها ومش لازم يكون فيه مبرر او انى اقول لاهلى او لاهلها وخصوصا انك زى ما بتقول انها بنت عمك فاعتقد كدة هتقلب الترابيزة على الكل.
انا هنهى الخطوبة لعدة اسباب:
1- مش عشان انت وقتك غير سامح انك تعوضها الرومانسية فتشوف غيرك يديها الناقصها
2- الموقف دة ممكن جدا يتكرر بعد زواجك منها....اعتقد فى الحالة دى الموقف هيبقى اصعب
3- مع احترامى الكامل ليها بس ماينفعش تبقى مرتبطة بواحد وبتدلع مع واحد تانى .....ولا حضرتك ليك راى تانى

فى النهاية دة راى انا لو فى نفس الموقف هنهى الخطوبة فى هدوء وبدون اى مبررات حتى لو الكل مغلطنى لكن مش هقول على السبب عشان برضه دى فى النهاية قريبتى

+111111111111111111

انا مع الرأي 100% غير ان ده هيبقى عقبه في حياتك لو كملت. لو لاقيت تليفونها مشغول هتبدأ تشك.

صلي استخاره لما تهدا و ربنا يهديك للصح ان شاء الله

[masterzmind]

شوف يا هندسة وانا مهندس زيك عارف ازاى المهندسين طالع عنهم انا هتكلم لو انا مكانك شوف يا باشا ممكن الواحد يسامح فى كذبه على اى حاجة بس خيانة معتقدش انت دلوقتى على البر فكر ادام اة الى هيحصل هل هتنسى ولا مخك هيعود يجيب ويودى وكان بيكلموا فى اة وهل اتقبلوا وراحوا مكان هادى يشربوا فى حاجة ودمغاك هتروح وتيجى رأى فكككككك من الموضع دة وانشاء الله تشوف بنت احن منهاااااا

[r0xer]

المشكلة انك مش هتعرف تآمن لها تاني. يعني حتى لو قلبك صفي لها من سابع المستحيلات انك تآمن لها.

ولازم تعرف عمك لو بتحبه فعلاً...عشان ميجيش عليك ويقول انك كنت بتلعب وانا شخصيا اتعرضت لموقف مشابه و طلعت انا شرير العائلة ولذلك بكلمك بمرارة اللي جرب تجربة مشابهة (لكن مكنتش خاينة ).

انشف و استجمع قواك و قول لابوها عاللي حصل و قوله ياعمي انا مقدرش اامن لها بعد اللي حصل و اللي تؤمر بيه هعمله.

[AmatoALLAH]

الخيانة دي اصعب شئ في الدنيا و خصوصا لو هتيجي من حد انت معتبره كل حياتك و اديته كل حياتك فعلا

طبعا مهما يكون انت مقصر فدا مش عذر ابدا ابدا انها حتي مجرد تفكر في واحد غيرك مش تكلمه

صحيح احنا بشر و ممكن نخطأ و ربنا بيقبل التوبه , يبقي احنا مش هنقبلها , لكن انت وحدك اللي هتقدر تقرر انك تكمل معها و لا لا

اسأل نفسك السؤال دا , لو انت كملت معها و اتجوزتها هل وانت في شغلك هتكون مطمن لها و مش هيجي الموضوع دا علي ذهنك و انها ممكن تكرره و تفضل طول عمرك عايش في شك من ناحيتها

لو ايوه يبقي انفصل عنها فورا و بدون ما تقول حاجه عن السبب الحقيقي لاهلها علشان مايحصلش مشاكل

اما لو هتنسي تماما و الغلطه دي مش هتبقي سبب في عكننة حياتك معها يبقي استخير الله في انك تكمل

بس انا هقولك علي حاجه خطيبتك الشيطان و يمكن الفراغ هو اللي خلاها تعمل كده بالرغم ان دا مش عذر اصلا بس هي لو بنت من اياهم كانت اخدت بالها انها فعلا تخبي عليك و ماكنتش هتتكلم من الخط اللي انت جايبوا لها و انت الادري باخلاق و تربية بنت عمك

[SHNORY]

يا تغفر وتكمل ومتجيبش سيره الموضوع ده عمرك وتقتنع من جواك انها كانت غلطه منها ومش حتتكرر
يا تكبر دماغك وكل واحد يروح لحاله والموضوع يتقفل مدي الحياه

[SYD]

الله يعينك

اول حاجة فعلا تسيبها يومين تلاتة بدون مكالمات تماما

حاول تقابلها او تكلمها وتتفقوا علي الأنفصال بأي شكل من الأشكال بدون زعل لعمك زي انكوا مش متفاهمين او او مش هتقدروا تكملوا بس مشكلتك انك بقالك 3 سنين داخل خارج عليهم ونازل طالع عليهم بس حتي لو،،
وممكن تجيبهالو علي بلاطة
بنتك مش بتحبني يا حاج واسألها لو عايز، وانا مش هتجوز واحدة غصب عنها وهي مش بتحبني

يمكن عمك يقاطعك شوية او يزعل منك شوية
بس بصراحة الموضوع دة مافيهوش مجامالات

مش عيب فيك انك معرفتش تحببها فيك
انت راجل مهندس ومحترم وعملي ومش بتاع رومانسيات وغراميات وكلام معسول

الموضوع هيبقي فيه جهد كبير عليك وصعب في البداية بس هتنسي وكل شئ هيبقي تمام

والله المستعان
،
،

[medododo]

كلمة ورد غطاها
أفسخ الخطوبة
وعشان خاطر عمك إخترع أي سبب

[Bishoy.Girgis]

أنا ليا رأيي :

اولا عايز اقول لك ان مدام العلاقة وصلت لكده يبقي انت لا يمكن هتثق فيها بعد الزواج

بص العلاقة بين الزوجين مش علاقية و بس بين شخصين فقط .. لأ طبعا .. دي علاقي بين اسرتين كريمتين .. تخيل كمان انها بنت عمك يعني مش واحدة غريبة يبقي كده انت ممكن تدمر اسرة كبيرة بسبب عدم الحكمة في التعامل مع الموضوع

طيب ازاي نعامل الموضوع بحكمة :
لازم تقعد معاها و تتكلم معاها بكل هدوء في كيفية انهاء العلاقة ديه بدون ما اي حد من الاهل ينزعج لأن كده انت العلاقة مش نافعة بكل المقاييس لكن الاهل مالهومش زنب يخسروا بعض بسببكم يبقي لازم تفكروا بهدوء مع بعض في كيفية انهاء العلاقة ديه بدون مشاكل

عايزك تتأكد من حاجه ان ربنا شايل ليك فعلا العروسة اللي تستحقك و تستحق تراب رجليك و هتكون امينة عليك و علي سمعتك و علي محبتك ليها

الحب علي فكرة مش اخر المطاف ابدا لأن ممكن يحصل بعده مناوشات كتير اما يستمر او يبطل و علي فكرة اللي قال ان الحب بيجيي بعد الزواج ده عنده حق

صدقني انت ممكن تطلع نفسك من اللي انت فيه بكل سهولة و بطرق كتييييرة جدا جدا و انا عارف انه جرح صعب لكن لو بقيي في جرح في العائلة ديه اللي فعلا هتبقي مشكلة

فأرجو منك استخدام الحكمة و لازم تقعد معاها لحل مشكلة الاهل فقط لا غير و تيقن ان ربنا مش هيسيبك و هيرتب ليك الافضل دائما

[dolly13]

اولا كان الله فى عونك فى الموقف الصعب ده وارجو ان تتمسك سريعا
انا هاتكلم معاك بحكم انى سيدة وممكن رايى يفيدك . موضوع انك تكمل معاها ده اعتقد انه مش صواب لاسببب بسيطة
اولا انت معاها من 3 سنين يعنى هى عرفته بعد الخطوبة مش قبلها
معنى ان هى اللى بتتصل به بالكثرة دى انها هى اللى متعلقة بيه مش العكس
كونها تستغل الخط اللى انت جبته واللى انت دفعت ثمنه فى مكالمة رجل اخرفهذا دليل على استباحة مالك ووقتك لاعطائه لغيرك
كونها بنت عمك ولم تهتم لما يمكن ان يحدث لو انكشفت هذه العلاقة معناه انها غير مكترثة ومتسرعة فى تفكيرها
صدقنى هى بالنسبة لك صفقة خاسرة ولا تستحق ان تتمسك بها واعلم ان الله سيعوضك عنها خيرا

ولكن ..............
ارجو ان تتوخى الحذر فى التعامل مع المشكلة لانها اولا واخيرا ابنة عمك ولا ترضى لها الاذية

حاول ان تلمح لعمك فقط بجزء من المشكلة
اتفق معها على انهاء الامر بدون شوشرة وتصرف معها برجولة وشهامة لا لشئ الا لتشعر هى فى المستقبل بالرجل الذى فقدته وتندم على تصرفها معك طول عمرها وربما يساعدها هذا على تعديل مسار حياتها فى المستقبل
تقبل مرورى

[lomn]

ربنا يباركلكم إنكم ردتوا عليه وحسستونى إن فى حد جمبى بيفكرلى لإنى انا مخى إتشل وحاسس إنى تايه...هى عمالة تتصل بيه من الصبح رديت عليها فضلت تعيط وتحلفى إنها مفيش بنها وبنه حاجة وانها مجرد صديق بتستريحله مش أكتر (ياخبتى) وحلفتلى إنها مش هاتعمل كده تانى وإنها مش متخيلة إننا نسيب بعض وإنها تكون لحد تانى (المشكلة إنى لحد دلوقتى أنا كمان مش متخيل) وطلبت منى السماح وإنها مستعدة تعمل أى حاجة علشان أرجع ثقتى فيها وإنها هاتقدر مع الوقت تنسينى الموضوع ده وترجعلى ثقتى فيها...أنا هاجمتها وقلتتلها أنا مش هاعرف أعيش معاكى بواثق فيكى وحياتك كلها هاتبقى غم لإنى عمرى مهصدق لا فى الطلعة ولا فى النزلة ولا لو لوحدك فى البيت...وإنى هاقول لعمى وهو يتصرف....أول ماقلت كده إنهارت وحسيت إنها بتموت المسكلة إنها فى الشغل يعنى هو قاعد جمبها دلوقتى...لسه لحد دلوقتى مش عارف أنا اللى متأكد منه إنى لو قلت لعمى بعد الثلاث سنين خطوبة داخل خارج أكل وشرب وهزار وضحك أنا من ساعة مخطبتها وانا عمى دخلنى بيته كأنى إبنه من كتر ثقته فيه وقد هو عارف إنى محترم لما بيبقى عايز حاجة من بيقولى قوم هاتها زى ميه مثلا يعنى أكنى إبنه الولد الثالث ومامتها نفس القصة إدونى كل الصلاحيات الكاملة....بعد كل ده أقولهم أنا هامشى وكمان علشان بنتكم خانتنى...أنا متخيل إن ممكن عمى يروح فيها بجد أو مراته...هبقى هديت بيت كامل وأذيت ناس بحبهم علشان نفسى وراحتى مع إنى مليش ذنب والله.....وده مش مثالية دى حياه عشتها واتربيت عليها...هاتسألونى هاقلكم لو مش نفس الظروف ولو مش بنت عمى انا كنت رمتها ولافكرت فيها لحظة تانية ولو بكت 100 سنة لإنى مقتنع بإن مادام فيه حد قدر يقنعها النهاردة يبقى أكيد فى بكرة ويمكن ساعتها يكون فى أولاد ولاينفع الندم.

[lonedoctor]

اولا كان الله فى عونك فى الموقف الصعب ده وارجو ان تتمسك سريعا
انا هاتكلم معاك بحكم انى سيدة وممكن رايى يفيدك . موضوع انك تكمل معاها ده اعتقد انه مش صواب لاسببب بسيطة
اولا انت معاها من 3 سنين يعنى هى عرفته بعد الخطوبة مش قبلها
معنى ان هى اللى بتتصل به بالكثرة دى انها هى اللى متعلقة بيه مش العكس
كونها تستغل الخط اللى انت جبته واللى انت دفعت ثمنه فى مكالمة رجل اخرفهذا دليل على استباحة مالك ووقتك لاعطائه لغيرك
كونها بنت عمك ولم تهتم لما يمكن ان يحدث لو انكشفت هذه العلاقة معناه انها غير مكترثة ومتسرعة فى تفكيرها
صدقنى هى بالنسبة لك صفقة خاسرة ولا تستحق ان تتمسك بها واعلم ان الله سيعوضك عنها خيرا

ولكن ..............
ارجو ان تتوخى الحذر فى التعامل مع المشكلة لانها اولا واخيرا ابنة عمك ولا ترضى لها الاذية

حاول ان تلمح لعمك فقط بجزء من المشكلة
اتفق معها على انهاء الامر بدون شوشرة وتصرف معها برجولة وشهامة لا لشئ الا لتشعر هى فى المستقبل بالرجل الذى فقدته وتندم على تصرفها معك طول عمرها وربما يساعدها هذا على تعديل مسار حياتها فى المستقبل
تقبل مرورى

شكرا اختى الكريمة هذا ما كنت ساقوله تماما بالحرف الواحد

[أحمد كمال]

عفا الله عن ما سلف
ابدء حوار جديد بعقل وشوف هى عاوزة مين
واكيد انها مغلطتش بناء على تقاليد العائله وتربيتها ربما يكون اعجاب او انشغال فقط
اجلس معها وفكر جيدا
وربنا يوفقك لما يرضاه

حضرتك بتهرج ؟؟؟؟؟؟

[أحمد كمال]

ثانيا : ممكن الموضوع فعلا لا يتعدى تعارف من زميل متطفل شوية زيادة و بنت ساذجة وبريئة مبسوطة انه معجب بيها وخاصة انها لسه متخرجة وجديدة فى الشغل وحاسة ان لها كيان مستقل وكمان الشباب حاليا قيمهم كلها مهزوزة

و ده عذر انها هي كمان اللي تتصل بيه ......... ما شاء الله .......

[Mohamed Elwan]

الخيانة صعبة
ممكن تخليها هيى اللى تطلب الانفصال وتصر عليه
وقولها انا كدة هاسكت عن اللى حصل
بس ياريت تطلب الرقم وتسجل صوت الاخ اللى بيكلم علشان الاية ما تتقلبش عليك بعد كدة

احسن حل هو ده عشان متخسرش حد و فى نفس الوقت متخسرش حياتك لو كملت معاها

[w-m-a]

فى ايه يا جماعه الخير بالراحه شويه
وانت يا عم عنوانك مرعب
البنت صغيرة وساذجه ومتربيه كويس واول مرة تلاقى نفسها محل اعجاب
واعرف انها بنت عمك لما تسيبها بعد مده هيبقى شكلها ايه ؟
واللى هيجى بعدك هيظن فيكم انت وهى ايه ؟
صلى وفكر واتكلم معاها وقرر
ملحوظه للاخوة المشككين
لو خطبت واحده كانت مخطوبه رسمى انت عارف عملت ايه ؟ ولا حصل ايه ؟