خطيبتى خانتنى...موقف صعب أتمنى المساعدة

[dodo2000]

للاسف الموضوع ده هيفضل فى دماغك مدى الحياة و لو كملتو بعد كده ممكن الشك يبقى فى دماغك على طول من اى موقف يحصل طيب و على ايه الناس بتتجوز علشان تستقر و تهدى ولا علشان تتعب نفسها

ومعلش غير كده هى اساسا ازاى تسمح لنفسها انها تكلم حد تانى و هى مخطوبة حتى لو كان مين و لو زميل فى الشغل يبقى العلاقة تنتهى عند باب الشغل مش تفضل بالصورة دى

ومحدش يقول صغيرة ولا حاجة و لو هى صغيرة و مش عارفة حاجة يبقى بلاش تتجوز اصلا و تستنى لما تكبر

حاول تنهى الموضوع بشياكة و تقول لعمك انك حاسس انها زى اختك و مش عارف ايه و اى حوار و لو لقيت الدنيا هتتقلب عليك و هتشيل الليلة لوحدك ممكن ساعتها تبقى تفهم حد من اخواتها الموضوع و تبقى عملت الى عليك

ولو انت فعلا متعلق بيها و بتحبها ابقى فكر دايما فى الى عملته علشان قلبك يجمد و يعرف ينسى

[m000dy]

اولا كان الله فى عونك فى الموقف الصعب ده وارجو ان تتمسك سريعا
انا هاتكلم معاك بحكم انى سيدة وممكن رايى يفيدك . موضوع انك تكمل معاها ده اعتقد انه مش صواب لاسببب بسيطة
اولا انت معاها من 3 سنين يعنى هى عرفته بعد الخطوبة مش قبلها
معنى ان هى اللى بتتصل به بالكثرة دى انها هى اللى متعلقة بيه مش العكس
كونها تستغل الخط اللى انت جبته واللى انت دفعت ثمنه فى مكالمة رجل اخرفهذا دليل على استباحة مالك ووقتك لاعطائه لغيرك
كونها بنت عمك ولم تهتم لما يمكن ان يحدث لو انكشفت هذه العلاقة معناه انها غير مكترثة ومتسرعة فى تفكيرها
صدقنى هى بالنسبة لك صفقة خاسرة ولا تستحق ان تتمسك بها واعلم ان الله سيعوضك عنها خيرا

ولكن ..............
ارجو ان تتوخى الحذر فى التعامل مع المشكلة لانها اولا واخيرا ابنة عمك ولا ترضى لها الاذية

حاول ان تلمح لعمك فقط بجزء من المشكلة
اتفق معها على انهاء الامر بدون شوشرة وتصرف معها برجولة وشهامة لا لشئ الا لتشعر هى فى المستقبل بالرجل الذى فقدته وتندم على تصرفها معك طول عمرها وربما يساعدها هذا على تعديل مسار حياتها فى المستقبل
تقبل مرورى

حضرتك متأكده انك سيدة والمخ اللى فكر فى الكلام ده مخ حريمى ؟؟؟
دنا الراجل مافكرتش زيك كده ولا اعرف اقول الكلمتين دول :)
والله فى ستات فى المنتدى ده هايخلونى اغير فكرتى عن المرأه الحديدية
يوووووووه قصدى المرأه المصرية :)
ايوة كده يا ثورة طلعيلنا ستاتنا العاقلين زهقنا من بتوع حموم المرأه
اوعوا كده بققققققققققى ادوهم فرصتهم :)

[MASERATI]

السلام عليكم و رحمة الله و بركاته

يا أخى الفاضل, أنت ربنا سبحانه و تعالى بيحبك و راضى عنك عشان كشفلك الموضوع ده دلوقتى مش بعد الجواز.

اخلص منها بس ماتخلصشى منها على أنكم مالكوش نصيب سوا و الكلام ده, لاااااااااااااااااااااأ, اخلص منها و أنت معرفها هى و أهلها, أنك سيبتها عشان كذا و كذا, عشان هى تفضل تندم طوووووووول عمرها على اللى عملته.

أنما رأيى انساها و عيش حياتك و اوعى تكتئب و لا تزعل, الدنيا مليانة بنات محترمات كتير أوى.

و بعدين مفيش حاجة اسمها راجل مرتبط بواحدة للدرجة اللى لوانفصل عنها, الدنيا تطربق, د يبقى راجل خرع أوى, الراجل اللى بجد, مش اللى مالهوش نقطة ضعف, لأ طبعا, لأن أى بنى آدم ليه نقط ضعف, لكن الراجل بجد, اللى نقط ضعفه غير معروفة و غير ظاهرة للناس.

ربنا ييسرلك الأحوال و تقابل اللى أحسن منها و الحياة تجارب و على أد ماتعيش هتشوف و تقابل.

[prisoner]

لا حول والا قوة الا بالله اللهم اجيرك فى مصيبتك انا بصراحة من الناس اللى مش بتحب تخوض فى الاجتماعى خالص بس الموضوع شدنى وقريته من الاول للاخر واراء الناس ومعظم المشاركات عايز اقول عليها موافق بس قولت اعبر باسلوبى وارجو تقبل مرورى

اولا فعلا انت لازم تنهى الموضوع ده ببساطة وبالراحة وعارف قد ايه الموضوع صعب بس صدقنى فى الاول بس لو اتنازلت مرة مش قادر اقولك شكلك هايبقى ايه قدام نفسك وطبعا مش شرط انه يحصل بعد الجواز هما فعلا البنات بيحبوا الكلام الحلو جدا والمعاكسات بالرغم من انهم بيبينوا انهم رافضين بس من جواهم بيفرحوا وده بيرجع لعدم ثقة فقط مش حاجة وحشة لا سامح الله بس حد بالعقلية دى هايتعب حضرتك قوى وكمان هوة انت بتشتغل ومشغول ليه مش علشان تبنى مستقبلك وتكون انسان كويس كده والا كده لازم هاتكون كده مع اى حد ده كمان بالعكس البعد بيبنى الحب اكتر وينميه بس مش البعد قوى وخللى بالك لو حطيت نفسك مكانها وقولت طيب لو انا اللى كنت عملت كده اكيد كنت هاطلب منها تسامح ايوة بالظبط لكن الموقف مختلف تماما طالما انت بتحترم شعورها وانت مش معاها يبقى المفروض يحصل العكس اختصارا للموضوع ليك انت احسن الانفصال وانتوا لسة على البر وفكر كويس فى ام اولادك مش حبيبتك بس وربنا يعمل اللى فيه الصالح وبرضوا فى اى حال من الاحوال لازم تدى نفسك فرصة تفكر بدون ضغوط وربنا معاك ان شاء الله

[ramyhekal]

الموقف ده صعب اخذ قرار فيه فورى
والله ما انا عارف اقولك حاجه جديده
قرارات الاخوه كلها متناقضه
الله المستعان

[MNabeih]

الله يكون في عونك,
انا رأيي الشخصي, الانفصال لا بديل عنه للاسباب دي:
1- ان انتو بقالكم 3 سنين مرتبطين و كمان مخطوبين يعني حاجة رسمي, لو لسة مرتبطين و حصل الكلام دة مبلوعه هانقول مش مستريحالك و خلاص, لكن بعد 3 سنين .......حرام.
2- ان انت ابن عمهه لو في اي حاجة هي متضايقه منك فيها المفترض طبيعي جدا انها تقولك علي الحاجة دي اذا كان مثلا تقصير منك(عشان هي رومانسية) او اي كانت المشكلة تقولك لو ما غيرتش نفسك تنفصلوا و خلصنا.
3- واضح كمان ان هي اللي بتكلمه و في ساعات متأخرة و في كل الاوقات و اكيد كمان هو بيكلمها اكتر و دة ما بيحصلش غير لما تبقي العلاقة قوية.
عشان هي بنت عمك (و انا متجوز بنت عمي و عارف)
الموضوع محتاج عقل و رزانه في تصرفك
رأيي, تدور علي اي حجة و تنفصلوا و ممكن تاخد وقت و تبدئوا تظهروا للناس ان في مشاكل بينكم و تنفصلوا.
بس انا رأيي اهم حااااااااجة تستر عليها و انت طبعا اكيد مرتبط بيها عشان اخلاقها و تربيتها وواثق منها و اللي حصل حصل و تكلمها علي اساس ان انت ابن عمها بسسسس و تشوف مدي عمق الموضوع مع العايل التاني.
اللهم اجرك في مصيبتك و يخلفك خيرا منها

[ABOASSEM]

انا مقدر ظروفك وربنا يكون معاك بس اهم حاجة تهدا وتفكر بحكمة لان اختيارك هيتبني عليه حاجات كتيره وانا من رأيي انك تشوف طرف تالت في العائلة وتدخله في الموضوع عشان يبقي اثبات لك وتنهي الموضوع بس عن طريق خطبيتك انها مش عايزك عشان رفضك ليها هيسبب القيل والقال ومعلش المفروض تستحمل عشان هيا بنت عمك وتضحي ....ونصيحة من الاخر لو في ذرة شك سيبها لان الموضوع دة هيعلم معاك طول حياتك ....وفي الاخر الطيبون للطيبات والخابثيون للخبيثات وانته ربنا بيحبك وربنا معاك وخليك علي اتصال بالله في صلاة استخارة او الدعاء ان ربنا يرشدك للاصلح

[Col. Eng. Khaled]

من باب و تلت كده

كل واحد يروح لحاله و حضرتك أدري بعمك و أسرته إنك تفض الموضوع بدبلوماسية بدون شوشرة قدر الإمكان

عمرك ما حتنسى اللي حصل إن كملت معاها ، الله أعلى و أعلم بالقلوب إن كملت بالزواج بمتغيرات أمور الحياة .

[lomn]

ربنا يباركلكم كلكم بصراحة كفيتم ووفيتم...أنا قريت كل الأراء وأشكر لكل صديق لا يعرفنى حرص على نصيحتى ولكل صديق إتحمق ليه وأخر حاول تهدئتى...صدقونى أنا مش سلبى ومش ضعيف أنا بس على قد مابقدر بحاول أحترم مشاعر الأخرين...
لو سألتونى رأى بصراحة أريد الإنفصال ولكن الإنفصال بينى وبينها يعنى الإنفصال بينك وبين أختك فأنا أعرفها من طول عمرها وإشتدت العلاقة بعد الخطوبة....ولكن مش مشكلة أنا قادر على الإنفصال لكن أعمل إيه مع عمى وأمى...هما دول المشكلة الكبرى..لأن أمى مش هاتصدق إنى مش عايزها ومش هاتصدق إن فجأة حصلت مشاكل وبسببها هاننفصل بدون جلسات الكبار من الطرفين لمحاولة الحل الموضوع عندى مش موضوع دبله هاتترمى!!! لا ديه بنت عمى الكبير يعنى السبع عمام الباقين هايسألوا وهيحاولوا يحلوا أكيد مش فجأة محمد مشى طب سلام عليكم...!!!!!!

[amz2011]

لازم تقول لعمك و فورا

[KhaledGub]

قول لعمك لاااااااااااااااااااااازم
انا بجد لما قريت اللي حصلك تعبت نفسيا
الموضوع ده ميتسكتش عليه انت هتسبها وهتقول لعمك .. عشان عمك يربيها كويس ويعدلها

[MOUSTAFA_SAAD]

انهى الموضوع باى طريقه شيك وبدون شوشره
اوعى تكمل ابدا
حاتفضلب تشك فيها طول عمرك حتى لو مفيش حاجه جديده تدعوا لذلك

اللى تحب على خطيبها فى فتره الخطوبه سهل جدا تخون جوزها بعد لما تزهق منه وتتعود عليه

[abo_anas]

كان الله فى عونك
بصراحه انا من رايى انك تقول لعمك على الموضوع من اوله لاخره ، لانها ليست خطيبتك فقط انما هى بنت عمك اولا، واكيد عمك عنده من الخبره الكافيه للبحث فى الموضوع والبحث عن حل للمشكله، على الاقل يبقى انت عملت اللى عليك وضميرك مستريح وماسبتش عمك على عماه .

السؤال اللى لازم تعرف اجابته:
هل الموضوع فيه خيانه؟؟؟؟؟
طبعا فيه خيانه وخيانه كبيره كمان بحكم ال 3 سنين خطوبه والعفش اللى بيتعمل اللى المفروض الانسه المحترمه هتدخل عليه بعد بضع شهور.
انا رايى اللى يحصل كالاتى::::
1 تاخد قرارك بداخلك
2 تصارح عمك بالموضوع ويكون معاك المستندات(كشف حساب الفاتوره)
واكيد بعدها الموضوع هيكون فيه جديد
ربنا معاك

[أحمد كمال]

يا جماعة من ستر مؤمنا في الدنيا ......


بلاش فضايح و هي اكيد هتتعلم الدرس

[Rsarabia]

رأيى ان مجرد فتح الكلام فى الموضوع دا معناه انك بتحبها و من جواك عاوز تقفل الموضوع لكن انت فتحته عشان ممكن تجد ردود من الناس تديك الامل انك متسبهاش

اعمل الصح

سيبك من قلبك و سيبك منها خالص اللى تخون خطيبها قبل الفرح بتلت شهور امال بعد الجواز هتعمل ايه ؟ و لو فعلا مكنتش بتقابله بعد الجواز ممكن الموضوع يتطور لمقابلات و الذى منه و بالتالى ابعد عن الشر و غنيله و طبعا متقولش لعمك و سيبها على هواها و اتفرج بعد ما هتسيبها هترتبط بمين و اكيد هيكون بيه