الرئيس محمد نجيب - دعوه للحوار الجاد المثمر

[Imhotep]

بقولك يا بشمهندس. . . اعتقد الموضوع استوفى غرضه. . . و بدل ما يتحول لموضوع اخر من موضوعات قسم احوال الشارع المصرى. . . اتمنى تكون وصلت لغرضك منه. . . و حان الان وقت اطلاق سراحه. . . و هكون سعيد بالاشتراك فى مواضيع اخرى تعملها لو جتلك خواطر اخرى من النوع اللى خلاك تعمل الموضوع ده. . . و شكرا لكم جميعا

[MTAK]

بقولك يا بشمهندس. . . اعتقد الموضوع استوفى غرضه. . . و بدل ما يتحول لموضوع اخر من موضوعات قسم احوال الشارع المصرى. . . اتمنى تكون وصلت لغرضك منه. . . و حان الان وقت اطلاق سراحه. . . و هكون سعيد بالاشتراك فى مواضيع اخرى تعملها لو جتلك خواطر اخرى من النوع اللى خلاك تعمل الموضوع ده. . . و شكرا لكم جميعا

, و انا احترم رغبتك

و ان كان يعز على ذلك من كم الفائده التى حصلت عليها من وراء نقاشات هذا الموضوع

و لا انسى بالطبع ان اشكر الاستاذ وائل الذى امتعنى بتحليله لبعض المواقف فى الموضوع و كذلك المعلومات القيمه (مثل الـ 3 مليون بتوع برج القاهره)

و لو هناك اى عضو فاضل يريد ان يكمل النقاش فأنا تحت امره

او نفتح موضوع اخر و لتكن دعوه للحوار الجاد المثمر هى تميمه الموضوع

اشكر مرة اخرى كل من شارك بالموضوع

[w-m-a]

أ / محمد
انا من يتوجهه بالشكر اليك لفتح هذا الموضوع الشيق
والملئ بكم المعلومات والتحلايلات الرائعه
والذى كنت اتمنى ان يطول اكثر
ولكن انا ايضا اؤيد اخونا أ/ ماهر
الذى اتوجهه اليه بالشكر ايضا على حواره الممتع

وفعلا يكفى هذا القدر ونتحول الى موضوعك الجديد
شكرا

[yousef1978]

السلام عليكم

بصراحة موضوع متميز وكنا فعلا محتاجين إننا نتعرف على تاريخ محمد نجيب الحقيقي - انا قعدت أربع ساعات بعد العمل أقرأ فيه لما خلصته هههههههه


لكن ليه يا باشمهندس محمد ما لخصتلناش محتوى الكتاب




قبل ما الموضوع يتحول للشارع المصري ههههههه- اسمحولي أضيف شوية حاجات يمكن تكون مفيدة لحضراتكم

طبعا لازم أشكر أخونا ماهر ووائل ومحمد وكل اللي شاركوا مع حفظ الألقاب

أنا كنت أتمنى الموضوع يفضل خاص بالرئيس محمد نجيب - لكن مش عارف ليه غالبية المواضيع بتتحول في النهاية للهجوم على الإخوان بطرف خفي - الأستاذ ماهر شخص مهذب وذو علم وفير ودائما يذكرني بالأستاذ محمد حسنين هيكل في أن حواراته تكون مليئة بالمعلومات القيمة الرهيبة ويتخللها أمور غير صحيحة مجبر عليها بقوة التعاطف مع أو ضد فصيل أو فكرة معينة

حضرتك اعتبرتها أنها أمر عادي أن يكون لهيكل رأي في التاريخ - لكن المشكلة عندما يقوم بتمرير مغالطات غير صحيحة فهو لا يقدم هنا رأي وإنما معلومة خطأ


ما تزعلش مني يا أخي ماهر الكريم - أنا عارف إننا دخلنا في نقاش غير هادئ في الإنتخابات الرئاسية سابقا ( وأعتقد إن محاولات حضرتك ساعتها لم تكن من قبيل تمنيك لمحمد مرسي بالتوفيق والنجاح سواء في الإنتخابات أو في منصبه والمواضيع كانت مليئة بالنقد السلبي الشديد لمرسي والإخوان في مقابل دفاع خفي عن شفيق ومحاولة تمييع كل الأمور المتهم أو التي يهاجم بسببها - طبعا ده رأيي ومن حقي أقوله ولك حرية الرد عليه ) لكن أتمنى إن حضرتك ما تعتبرش إن إختلافنا الشديد مدعاة للكراهية

وأنا متأكد إن الكثير من مواقف حضرتك تجاه الإخوان كفصيل أو فكر هي نابعة من مخاوف حقيقية وربما جهل ( واعذرني في اللفظ ) بدخليات الجماعة

بما إني معروف عني إنتمائي للإخوان منذ طفولتي ويمكن عارف كثير مما يدور داخلها أحب أوضح شوية حاجات

1- لو حد فاهم إن الإخوان يمثلوا الإسلام كدين نجاحهم يعني نجاح الدين وفشلهم يعني فشله - فهذ خطأ جثيم لا أعرف هل الإخوان شاركوا في الوصول إليه أم أن التتابع الطبيعي للأحداث هو الذي وصلنا لهذه الحالة
الإخوان جماعة تدعوا إلى الفكرة العامة للإسلام - علشان كده هتلاقي جواهم الملتحي والحليق والمنقبة واللي لابسه طرحة

أتذكر أني سمعت لذكريات يوسف القرضاوي على قناة قطرية - حكى أنه لما زار مصر الشيخ الحسن الندوي صاحب كتاب ( ماذا خسر العالم بانحطاط المسلمين - التقاه بعض المنتمين لجماعة شبه سلفية بالمعنى الحالي وانتقدوا له الإخوان وقالوا له إنهم لا يلتزمون بزي الرسول ( صلى الله عليه وسلم ) والذي منه العمامة ولها شكل معين والجلباب بطريقة معينة
فقال لهم إن الإخوان ليست جماعة فقهية وليست جماعة متخصصة في فرع من فروع الدين - إنها جماعة جامعة تعتقد بالإعتماد على الإسلام كحل لمشاكل الأمة

يعني الإخوان أقصى أو كل ما يهدفوا له هو فتح المجال للمبادئ الدينية كي تأخذ دورها في نهضة الأمة

وعلشان كده لو مرسي نجح في إعداد دولة دستورية قانونية فيها نظام ديمقراطي صحيح وتداول سلمي للسلطة وفصل بين السلطات ومؤسسات قوية وحكم جماعي وليس فردي - يبقى فعلا الإخوان نجحت في الوصول لأقصى ما تهدف إليه

بعد كده اللي يحكم هو الحرية والعدالة أو غيرهم مش مشكلة

بس المهم يكون حزب مستقل وحوله احزاب وحياة سياسية لا تعطيه القدرة على إلغاء النظام الديمقراطي والعودة مرة أخرى لحكم الفرد

الإخوان لهم جهود كبيرة وأخطاء كبيرة أيضا في تاريخهم وهذا هو طبيعة التاريخ البشري

لكن البعض مثلا يأخذ على الإخوان أنهم وقفوا مع نظام الحكم في كل الأنظمة السابقة من الملك وحتى مبارك في بعض الفترات الزمنية- البعض يراه بمنظار ضيق الأفق أن هذا تلون او مداهنة أو وووو

لكن - في رأيي المتواضع - أننا لو نظرنا بمنظار فاتح شوية ممكن نشوف إنهم ما كانش عندهم مانع أن يساعدوا كل هذه الأنظمة في النجاح في الوصول للديمقراطية

ولذلك وقفوا بجوار عبد الناصر لما وعدهم بحياة نيابية صحيحة وكلنا عارفين المظاهرات الشهيرة التي تعهد فيها عبد الناصر لعبد القادر عودة بعودة الحياة البرلمانية وأقسم على المصحف والمسدس - وبعد أن انفضت جمع عبد الناصر القيادات الإخوانية وأعدم عبد القادر عودة

والسادات وقف معه الإخوان لما وجدوا فيه ميلا للديمقراطية

وهكذا


لكن المشكلة حاليا أن الإخوان وبصراحة شديدة لم يعودوا يثقوا بدرجة كبيرة في أي فصيل آخر في أن يتركوه يقوم بهذه المهمة وهي تأسيس دولة ديمقراطية مبنية على حكم المؤسسات وليس الفرد

حتى الأحزاب الإسلامية لا يثقون فيها تماما - حسب وجهة نظري بردو - وحتى الكثير من رموز المعارضه وأيضا لم يثقوا في قيادات الجيش وظلوا يقفون على مسافة وسط بينهم وبين " باقي الثوار - مع ما تمثله هذه الكلمة من خلاف حقيقي حاليا " ولم يؤيدوا المجلس العسكري تأييدا كاملا كما أنهم لم يتركوه فريسه لقوى أخرى ترغب في توريطه وتلويث يده ليضطر للإستمرار في الحكم ويعيد نظام مبارك


الفكرة أن الخوف من الإخوان يبدأ لو حاولوا تزوير الإنتخابات بطريقة ما - أو رفضوا التسليم بنتائجها

هنا أؤكد لكم أن الإخوان كحكم سينتهوا وبأيدي المنتمين إليهم وليس المعارضين


لكن لو تمت الإنتخابات بطريقة صحيحة وفازوا فلا يحق لهم أن يتخلوا عن مسؤلياتهم - أعتقد ان العريان وضح الصورة هذه المرة بطريقة ليس فيها لبس وقال لو فزنا بأغلبية نسبية أو مطلقة فسوف نختار رئيس الوزراء بأنفسنا وسنكون حكومة إئتلافية مع بعض الأحزاب التي تتبني نفس أفكارنا بشرط أن يقفوا معنا في البرلمان ويساندوا مشروعنا ويتحملوا معنا المسؤلية

ولو فاز غيرنا فسنصقف له ونترك له شأن الحكومة ونظل نحن في المعارضه




طيب نرجع تاني لفكرة إن الإخوان هم الدين ونجاحهم أو فشلهم من الدين

أظن أن هذه فكرة خطأ - الإخوان تجربة تحمل حلا مبني على مبادئ الدين الإسلامي - وفشل التجربة لا تعني فشل النموذج - لأن التجربة بشرية أما النموذج فهو رباني

طيب ليه ندخل الدين في هذا الحرج ؟

المشكلة عندنا أن المسلمين كفصيل من البشر لهم خصوصية وهي إيمانهم بقدرة التشريع الإسلامي على توفير حياة أفضل وأصح - ويؤمنون بصحة هذا التشريع أكثر من غيرهم كما أن غيرهم ليس عندهم تشريع ديني خاص بالأمور الدنيوية غير مجرد مبادئ أخلاقية عامة


طيب فين المشروع الديني والشريعة الإسلامية التي طبقت ؟

مؤكد إننا كلنا عارفين نموذ سيدنا عمر بن عبد العزيز والذي حكم الخلافة الإسلامية يمكن سنتين وبدأها بوضع ديني وأخلاقي وحقوقي مأساوي - وقال لإبنه الذي استعجل التغيير " مهلا يا بني فإن الله كره الخمر في الأولى وحرمها في الثالثة

البعض هيقول طب فين الملامح ؟ أقوله وبكل ثقة أن أهم ملامح المشروع الإسلامي هو إصلاح مؤسسات الدولة ونشر التعددية وحكم المجموع ( بلاش الجماعة لحسن تفتكروا حكم الإخوان )

وآخر شئ في التشريع الإسلامي هو الحدود ومنع الخمور وووو

طب وده اتعلمتوه فين ؟

من الرسول صلوات الله وسلامه عليه - لما بدأ حكمه الإسلامي في المدينة لم يبدأه بالحدود ولكن ببناء مؤسسات الدولة وأولها كان مؤسسة الحكم في حينها والتي كانت داخل مسجده - وبدأ بإعداد دستور ينظم العلاقة بين طوائف وأفراد المجتمع بما فيهم اليهودي والمشرك وبدأ في إعداد الجيش ونشر الفضيلة والعلوم الإخلاقية بين الناس

وبدأت تنزل عليه آيات القرأن المدنية - والتي كانت تتميز عن الآيات المكية في كون المكية تتكلم عن العقائد ومجابهة غير المسلمين من مشركي الأصنام - أم المدنية فكانت تحتوي على مواجهة عقائد وشكوك وإشاعات اليهود وغيرهم بالإضافة إلى التشريع




بس الإخوان كاذبون وبيستخدموا الميكافيلية والألاعيبة السياسية وهذا يتنافى مع الدين ؟

الإخوان بشر يا جماعة - وممكن واحد فيهم يتزنق فيخطئ خطأ كبيرا بأن يكذب - لكن ليس تغيير المواقف بالكذب - وليس الكذب الممنهج كالكذب الفردي


فيه آية قرآنية كريمة مهمة جدا

بسم الله الرحمن الرحيم
" ( وإما تخافن من قوم خيانة فانبذ إليهم على سواء إن الله لا يحب الخائنين ) "

وهذه الآيات لها جانبين - جانب أن الله لا يحب الخائنين وأنه يجب الوفاء بالعهود والمواثيق - وجانب آخر أن القائد المسلم لا عليه أن يستمر في معاهدة يرى العدو ينقدها بطريقة ما ويستخف به وبمصلحة الناس بعتمدا عليها وحينها يجوز للقائد أن يعلن عدم إلتزامه بهذه المعاهدة وينقضها

فأنا شخصيا بأفسر الكثير من مواقف الإخوان باء على هذه القاعدة وامثالها

طيب ليه بتحسن الظن بيهم - أكيد علشان متعصب لهم ؟

ممكن - وممكن علشان أعرفهم عن قرب - وممكن وده الأهم عمليا إنه لا يوجد تفسير واقعي آخر يدينهم

نضرب أمثلة واتحملوني شويتين

الإخوان قالوا مش هنرشح حد للرئاسة - هل التصريح ده خدوا عليه مقابل - مؤكد لا - طيب هل استفادوا من كده ؟ بالعكس ده هيشجع القوى المنهاضة لهم إنهم يجهزوا مرشح رئاسي من النوع الثقيل وهم مرتاحين

لكن لو نتخيل إن الإخوان اتفقوا مع العسكر على عدم تقديم مرشح للرئاسة ويكتفوا بأغلبية مريحة في مجلس الشعب يضمنوا بها مركز قوة إصلاحي في الغالب وليس سلطوي وفي المقابل الجيش لا يقدم أحد لإعادة نظام مبارك ويترك الأمر لباقى قوى الشعب - بعدين الجيش فضل لغاية النهاية ومديهم زنبه - كده البرلمان طار والرئاسة شكلها هتطير وما فيش حد يقدر يقف لنظام مبارك غيرهم
حاولوا يطلبوا من بعض الشخصيات العامة المحترمة التقدم ويدعموه - إما رفض أن يترك لهم رئاسة الوزراء أو رفض أن يتحمل المسؤلية

فاكن التصرف الطبيعي إنهم ينسوا أي إتفاق ويقدموا بدل المرشح اتنين - مش كده وبس ده الجماعة الأم هي اللي تقدمه كأنهم بيقولوا حتى لو حليتوا الحزب فإحنا غير معتميدن عليه كثيرا ولم نأمن بعد أن العسكر يسمح بحياة نيابية كاملة حقيقية



مرسي لما وعد بعض يموز المعارضة أنه لن يصدر الدستور إلا بعد التوافق عليه - حد كان ضربه على إيده او ماسكله زلة أو اداله جزرة
مؤكد لا

كانت محاولة صادقة منه لطمأنة المعارضة
وفعلا وصلوا لتوافق ملحوظ على غالبية المواد - وفي النهاية فوجئ بانسحابات غير مبررة وهجوم شرس على الدستور واللجنةسواء من هذه الرموز او من قاضية المحكمة الدستورية ووصل لعلمة مؤامرة ما

فالراجل وكأنه لم يعد بشئ - حصن اللجنة واداهم شهرين علشان ما يكونش عندهم حجة ولما رفضوها ألغى الشهرين وراح ممرر الدستور للشعب



طيب هل فيه حد عنده مبرر آخر في إن إيه اللي استفاده مرسي لما وعد - وليه ألغى وعده ؟






فيه نقطة مهمة جدا

الكثير فاكر إن الإخوان دول ناس بجلاليب ويقعدوا في اجتماعاتهم الأمير وأمامه الأتباع ولا تجادل ولا تناقش يا أخ علي ومن اعترض انطرد ( وفيه اللي فاكر انهم بيطردوه من الإسلام كمان !!!!!!!! )

اللي مش ملاحظينه إن الإخوان فيها كم عددي ونوعي ونسبي من المتعلمين والمثقفين لا يتوفر لأي جماعة أو حزب آخر

هل تعتقدوا إن دكاترة جامعات ومهندسين وأطباء ( مع إحترامنا لكل طبقات المجتمع ) هيسلموا دماغهم وحريتهم بهذا الشكل


أنا كنت في الأول بِأشعر بالإهانة الشخصية من هذه التهم - لكن دلوقتي بقيت بأضحك عليها الصراحة !!!


فيه في الإخوان قاعدة البيعة للمرشد والمقصود بها الإرشاد كمكانة وليس شخص - وهو ما يمكن تعريفه ببيت الشاعر ( رأي الجماعة لا تشقى البلاد به - ورأي الفرد يشقيها )
أو هو لفظ من الموروث الديني ( البيعة ) يناظر ( الإلتزام الحزبي ) في الموروث السياسي

لكن كل واحد عاوز يعترض بيعترض وبكل قوة - وداخل الإخوان بكل تفريعاتها إختلاف رهيييييييب وصراعات فلسفية ونقاشية كبيرة ويمكن في السابق لم تكن الظروف الأمنية تسمح بالنقاش على مستويات مختلفة لكن حاليا النقاش وتبادل الأفكار والنقض والشكوى على كل المستويات ( ده بأشوفه بنفسي لما أنزل )

وده مش معناه إنهم وصلوا لقمة الفضيلة والرقي

لكن معناه إن الصورة مش زي ما الناس متخيلة

واللي مش عاوز يلتزم برأي الإجماع في الأمور العامة المفصلية والحاسمة فلا عليه لوم ولكن بيطلب منه أن يختر طريقا أو جماعة أخرى وهذا حقهم ولا يضر بحقه

لأنه لا يصلح أن يتفق جميع المجدفين أن يحركوا مجاديفهم في إتجاه ثم يأت البعض ويأخذوا قرارا بالتجديف في الإتجاه المعاكس

هذذ ليس عقلا



وأنا زمان قلت رأيي لي أكثر من مرة - أنني أتمنى أن يخرج نصف من في الإخوان من الإخوان
لأن الكثير من الإخوان إما يمثلون عبئا سلبيا على الجماعة - او أن الجماعة تمثل عبئا على إنطلاقهم

وكل واحد بيطلع من مدرسة الإخوان لمجرد إختلاف بنلاقيه بيستمر في العطاء الإيجابي في المجتمع



أنا عن نفسي بأعتبر أن غالبية الأحزاب التي لها مكانة حاليا تمثل فكر الإخوان






نيجي بقى لموضوع أخونة الدولة وإن الإخوان عاوزين يمسكوا مفاصل الدولة وده خطا قاتل ؟

المشكلة إن اللي على البر عوام واللي مش متحمل المسؤلية فاكرها سهلة - فاكر إن من السهل إن رئيس جديد يحكم بلد غالبية مؤسساتها تعارضه دون أن يستخدم ما لديه من أدوات لإصلاحها

فيه قاعدة عامة وهي أن أهل الخبرة يجب استخدامهم قبل أهل الثقة

ده صحيح

لكن فيه ظروف معينة بيكون الرئيس مضطر إنه يلجأ لأهل الثقة ويحاول يطورهم ويطعمهم بخبرات جانبية - ولا يلجأ لأهل الثقة

يعني مثال الدكتور ياسر علي - قد يكون لديه الخبرة الإدارية - لكن لو افترضنا أن هناك من هو أكثر منه خبرة - هل الأفضل لرئيس الجمهورية حاليا وهو في مرحلة إصلاح وإعادة هيكلة المؤسسات أن يطلب من واحد خبره غير واثق في ولاءه أن يطلعه على ما يحدث في البلد من معلومات


العجيبة شئ متعارف عليه عالميا أن الوزراء ورؤساء المؤسسات الكبرى في الحكومة والنظام لا يشترط أن يكون عملهم الأساسي أو تعليهم متطابق مع المنصب

يعني هتلاقي في فرنسا وزير للداخلية وممكن بعد شوية يمسكوه وزارة الصناعة مثلا

لأن الهدف هنا ليس أن توفر ضابط للداخلية عارف إزاي يضرب نار - الهدف إنك توفر واحد يشارك النظام فكره وأهدافه وعنده القدرة على إدارة فريق العمل - وأكيد الوزير أو المسؤل ده هيستعين بفرق من ذوي الخبرات في المجالات المختلفة

زي مثلا دكتور باسم عودة - ما هو أصلا مهندس


وهنروح بعيد ليه - رئيسي الأعلى في العمل ليس مهندس ولما اجتمع معنا أول مرة ( وهو بريطاني ) طلب منا أن يكون كل مهندس هو مدير لمشروع بغض النظر عن تخصصه - فانا تخصص كهرباء ولكني أدير مشاريع صيانة كاملة في جميع التخصصات والحمد لله أسد فيها وأنجز



آخر شئ - هو مشروع النهضة

ما أحى أن نستهزا - أنا أول واحد بيضحك لما بيقرأ السخرية لكن بعد كده بأصاب بالهم من مستوى الهيافة - وممكن من هنا للصبح نقول طائر النهضة بطل يبيض وبطل يلد والكلام ده

لكن هل فعلا الإخوان كانوا بيكذبوا لما قالوا النهضة ؟

ممكن

وممكن غحنا نكون فهمناهم خطأ أو هم فهمونا خطأ اللي هم عاوزين يقولوه

النهضة كما فهمتها من حملتهم الدعائية - هي فكرة إصلاح عامة لها اهداف عريضة
أن يكون لكل مواطن الحد الأدنى من الخدمات ومقومات الحياة الكريمة
سكن ومواصلات وتعليم وأمن وصحة وعمل وهكذا

المشروع كان له بعض الأرقام العامة
مثل إنشاء مدن جديدة ومحطات كهرباء وجامعات علمية ونهضة تكنولوجية ورفع مستوى الغذاء لحد كذا وتعليم بصورة كذا والشقق تبقى واسعة شبه كذا وهكذا

لو سألت مجموعة منهم عن النهضة كل واحد هيفسرهالك بطريقة مختلفة

واحد هيقولك النهضة دي مشروع عمره مائتين وخمسين سنة - هو مش بيكذب هو بيتكلم عن جزء من حلمه لمصر وهي أن تكون قوة عظمى وهذا لم يتحقق من قبل الإحتلال الفرنسي - وعلشان كده هو شايف إن أهم ما في النهضة حلم تطور مكانة مصر الإقليمية والعسكرية لتصبح دولة عظمى

واحد هيقولك النهضة عمرها ثمانين سنة - وهو داخله بيكلمك عن حلمه في عودة الخلافة الإسلامية ( مش لازم تكون خلافة في صورة خليفة وهات العطر يا ولد والكلام ده لكن مجرد إتحاد للدول العربية والإسلامية في جميع المجالات ووجود علاقات قوية مماثلة للإتحاد الأوروبي مثلا يمثل نوع من الخلافة - زي نجم الدين أربكان لما عمل اتحاد الدول الإسلامية الثمانية الكبرى - وعلشان كده هو بيتكلم من هذه النقطة ويقولك النهضة مشروع بنعده منذ ثمانين عاما - يعني منذ سقوط الخلافة


واللي يقولك النهضة لسه بنعد تفاصيلها - هو بيتكلم عن الخطط الواقعية على الأرض




المقاول لما بيتفق على بناء فيلا مثلا بياخد المخطط العام من الاستشاري وبعدين يبدأ يعمل المخططات التنفيذية ويبدأ يلف بيها على دوائر الماء والكهرباء والأمن والسلامة ( الدفاع المدني ) والبلدية وإتصالات وغيره وكل مرة يعمل تعديل فيها ويقدمها من جديد

وفي النهاية بعد ما يخلص ويكون عمل إختبار التربة وسوى الأرض ودكها كويس وعمل الخنزيرة - يبدأ بقى في البناء





أنا آسف إني طولت على حضراتكم

وأتمنى أخي الحبيب الكريم الأستاذ ماهر ( اللي فعلا بأتعلم منه كثيرا ) ما يكونش زعل مني

لكن أتمنى أن يقوم الشعب والمعارضه بدورهم في النهضة والإصلاح ولا يكتفون بالفرجة والنقد - لأن المسؤلية على الجميع




ودلوقتي نقدر نكمل موضوعكم الجميل ونسألكم إيه بقى آخر تفاصيل الرئيس محمد نجيب ؟



.

[أحمد كمال]

شكرا يا غالى و الله على الثقة الغالية :-)

انا كان غرضى من الاسئلة دى ايه. . . كام نقطة كده على الماشى. . . اولا موضوع العاطفة الدينية و تأثيره على الاختيارات. . . الهند اللى بيسموها اكبر ديقراطية فى العالم. . . فيها مليار هندوسى. . . و 300 مليون مسلم. . . سواء دول و لا دول عتدهم عواطف دينية. . . و الهندوسى بالذات عنده انه يموت و لا يقلع العمة بتاعتهم دى. . . طيب لو فى اتنين مترشحين للرئاسة واحد مسلم و واحد هندوسى. . . بحسب نسب التعداد خاصة لو دخل فيها مسلم و هندوسى و عاطقة دينية و شحن دينى . . . مين اللى هيكسب. . . غالبا الهندوسى. . . لكن لان الناس هناك من الوعى اللى يخليها تختار الاصلح بغض النظر على جنس او عرق او لون او دين او لغة. . . مع انها بلد مازالت تعتبر نامية زينا فيها جهل و فقر و مرض. . . حصل قبل كده عندهم ان واحد من الاقلية المسلمة بقى رئيس لانه ببساطة كان الاصلح. . . و لا الاغلبية الهندوسية قفشت. . . و لا قالك ازاى يحكمنا واحد مسلم من الاقلية. . . و هذا هو الرئيس المسلم لدولة الهند الهندوسية:
أبو بكر زين العابدين عبد الكلام - ويكيبيديا، الموسوعة الحرة

عقبالنا ما نبقى زى بلد زى الهند. . . مش عشان واحد مسيحى يحكم مصر. . . لأ. . . عشان واحد مسلم غير منتمى للاغلبية المسلمة ممكن يكون هو الاصلح. . . لكن بما انه مش من التيار السياسى اللى بيلعب على العاطفة الدينية. . . يبقى غالبا عمره ما هتجيله فرصة يطبق خبرته فى قيادة مؤسسة عالمية فى اى مكان فى مصر. . . و غالبا البلد بحالتها دى و بطريقة تفكيرها دى . . . هى كمان متستاهلوش

الهندوسي ما ببيلبسش عمة ...... السيخي هو اللي بيلبس عمة و السيخ اقلية (اقل من 20 مليون)


و رئيس الجمهورية في الهند منصب شرفي اساسا زي المانيا و اسرائيل و دول تانية كتير

List of countries by system of government - Wikipedia, the free encyclopedia

هتلاقي مكتوب قدام الهند ceremonial

[Imhotep]

الهندوسي ما ببيلبسش عمة ...... السيخي هو اللي بيلبس عمة و السيخ اقلية (اقل من 20 مليون)


و رئيس الجمهورية في الهند منصب شرفي اساسا زي المانيا و اسرائيل و دول تانية كتير

list of countries by system of government - wikipedia, the free encyclopedia

هتلاقي مكتوب قدام الهند ceremonial

شكرا على التصحيح...... بس برضه تبقى الرمزية المحترمة فى تولى شخص من اقلية ما حكم دولة لا ينتمى الى دين اغلبية سكانها و مش اى دولة لأ دى الهند يعنى قارة لوحدها بتنوعها السكانى المهول...... زى ما السود اخيرا اخدوا معظم حقوقهم فى امريكا و ده وصل لقمته فى تولى احدهم اعلى منصب فى البلد..... و الدور جاى على واحدة ست لان هو ده اللى فاضل انه يحصل عندهم طبعا مع مراعاة ان البقاء و الفوز بالمنصب للاصلح...... عقبالنا كده لما يبقى عندنا البقاء و الفوز بالمناصب للاصلح...... و متبقاش العاطفة الدينية عامية عنينا فى اى اختيار لان ده ثبت انه خطأ فادح..... بعد 500 سنة ان شاء الله :)

[sha2e]

تحية للاستاذ ماهر وصاحب الموضوع وكل المشاركين فيه وباعتذر لتأخري فى الرد
استاذ ماهر مشاركتى الاخيره انا كنت بتكلم عن اعصار دولي " ذي ما حضرتك ذكرت" مش حرب على ايران لوحدها
انا متفق معاك فى كتير من تحليلك السياسي لكن وجة نظرك فى موضوع ايران او العسكرية بشكل عام اسمحلي اختلف معاك فى النظرة للموضوع لاني شايف الموضوع من وجهة نظر مختلفه واسمحلي اطرح بعض التساؤلات الغير مرتبه
- هل العلاقة بين ايران وامريكا اساسها الكره المتبادل وليه جذور ولا المشكله كلها بتدور حول فكرة امتلاك ايران لسلاح نووي ( صراع شرطي أو عارض ) ؟
- هل امريكا غير مستغله أو ليست مستفيده من تنامي نفوذ وقوة ايران العسكرية فى المنطقه وذلك بانشاء قواعد عسكرية وببيع الاسلحه لدول المحيطه لايران بمليارات الدولارات سنويا تعتبر من اقوي الدعائم لميزانية الدفاع والاقتصاد الاميركي بشكل عام ( يعنى اميركا مش مستغله ايران "كفزاعة" لدول كتير ) ؟
- هل ايران لو امتلكت سلاح نووي هتضرب بيه امريكا او اسرائيل ولا هتستخدمة كسلاح استراتيجي لا عسكري وهل مش هتفتح صفحة جديده مع علاقتها بامريكا لتحقيق مصالح جديده ؟
- هل امريكا واقتصادها يقدر يستحمل تبعات امتلاك ايران لسلاح نووي ( واحنا قولنا ان امريكا واقتصادها أكبر مستفيد من دعم الدول المحيطة بايران عسكريا )
- هل امريكا تقدر "تكسح" ايران بشوية غارات جوية بدون تدخل بري ؟
- هل الشعب الاميركي هيسمح لاي حكومه امريكيه انها تدخل بجيشها برياً فى ايران ؟

انا مش منتظر ردود للتساؤلات دي لكن حاول تركز شوية فيها
لاني مقدرش اقول توقعاتي حاليا عشان الناس متفتكرنيش مجنون :)
لكن الايام جايا وهيبان هى مخبيه ايه

[sha2e]

بخصوص الفيديوهات انا شايف ان أغلبها مصطنع وليس حقيقي
وعلى سبيل المثال الفيديو التالي :

[youtube]http://www.youtube.com/watch?v=ZFjGbOyd2ek&feature=player_embedded[/youtube]

لو ركزنا فيه هنلاقي انه مصطنع والسلاح الموجود بالفيديو ليس هو السلاح الحقيقي للاسباب كتير :
1- شكل السلاح : مش بيفكرك باسلحة - كابتن باور رينجرز - ده كان مسلسل امريكي خايب كان بيعرض على التلفزيون ايام ما كنا لسه في مرحلة المراهقة
2- انفعال مستخدم السلاح : مصطنع جدا
3- المؤثرات : سواء الصوتيه او البصريه
4- اخراج الفيديو : واضح جدا انه منتج مش مجرد تصوير هواه
طبعا فى هفوات تانيه كتير لا مجال لذكرها كلها

انا اقصد ان السلاح او الجهاز الى فى الفيديوا مش حقيقي لكن ده مش معناه انى بنفى وجود سلاح يعمل بهذه الفكره او التكنولوجيا احتمال كبير يكون السلاح موجود فعلا
لكن مش هوا الجهاز المتصور فى الفيديو

[MTAK]

انا سعيد انى شايف الحوار بيرجع تانى

------------

اما بالنسبه لاخى يوسف ابو حجاج الاخوانى :) - فربنا ييسر و ييسر لى فكره انت نورتها فى دماغى

[sha2e]

[youtube]http://www.youtube.com/watch?feature=player_embedded&v=ZFjGbOyd2ek[/youtube]

بصراحة الفيديو ده انا مفهمتش طريقة او حتى فكرة السلاح
الفيديو كله بيتكلم عن تأثير السلاح وفاعليته
طيب ازاي الرصاصه بتطلق ( بتجيب قوة دافعه منين )
فى السلاح العادي الرصاصه عباره عن الظرف أو القاذف( المحتوي على البارود والمسؤول عن دفع المقذوف)
والمقذوف او الرصاصه
فى السلاح ده الرصاصه بتنطلق ازاي بتجيب قوة تذقها منين ؟؟


[youtube]http://www.youtube.com/watch?v=PUZZ3XflO-M&feature=player_embedded[/youtube]

الفيديو ده برضو شايف انه مجرد شو ليس أكثر
اولا : مذكور فى الفيديو ان المجال بتاعه ليس له اى تأثير على الانسان ( وجايبين اتنين معديين من تحته عادي والمجال شغال) ده طبعا يشككنا فى الفيديو ككل لان حاجه زي دي لازم يكون ليها تأثير على الانسان لان مخ الانسان اصلا عباره عن حقل كهربي ( كل الاشارات داخل خلايا المخ بتكون عن طريق شحنات كهربيه ) يبقى ازاي مجال قوي زي ده مش هيأثر على الانسان - انا مش بقول انه بالضروري يموت الانسان لكن على الاقل هيكون ليه تأثير سلبي على مخه - اذا كان اسلاك الضغط العالى الكهربي ليها تأثير على خلايا الانسان يبقى المجال ده ملوش تأثير
ثانيا : الموجود فى الفيديو مش سلاح ده مجرد مجال او قوس كهروا مغناطيسي وتأثيره محدود بما يمر داخله فقط ( يعني ليس ذو قيمة كبيرة ) وأعتقد ان دول كتير ممكن تعمله

طيب لو جينا بصينا على EMP كسلاح اليكترو مجنتك بولس ( نبضه كهرومغناطيسيه) هنقول انى خلاص كونت نبضه كهرومغناطيسيه ( هنشبهها بالرصاصه او مقذوف الرصاصه بشكل ادق) طيب عشان احرك النبضه دي عشان يكون ليها تأثير احركها ازاي ؟
لازم يكون ليها قوه دافعه عشان تحركلي المجال ده لمسافه او نطاق كبير
معنى كده انى محتاج الى قنبله قويه تقدر تدفع النبضه دي
يبقى كده لازم استخدم قنبله ذريه او هيدروجينيه عشان تقدر تدفع الموجه الانضغاطيه او النبضه الالكتروماجنتك دي
او الحل التاني اعمل سياج حول المدينه بالكامل المراد تعطيلها اليكترونيا زي القوس الموجود فى الفيديو
ده ممكن يطبق كقوس صغير كما فى الفيديو لكن حول مدينه او حتى حى صغير فده مستحيل

رأيي ان سلاح EMP لسه فى طور الاعداد والابحاث ولم يتم الانتهاء منه حتى الان
ده توقعي الشخصي

[أحمد كمال]

شكرا على التصحيح...... بس برضه تبقى الرمزية المحترمة فى تولى شخص من اقلية ما حكم دولة لا ينتمى الى دين اغلبية سكانها و مش اى دولة لأ دى الهند يعنى قارة لوحدها بتنوعها السكانى المهول...... زى ما السود اخيرا اخدوا معظم حقوقهم فى امريكا و ده وصل لقمته فى تولى احدهم اعلى منصب فى البلد..... و الدور جاى على واحدة ست لان هو ده اللى فاضل انه يحصل عندهم طبعا مع مراعاة ان البقاء و الفوز بالمنصب للاصلح...... عقبالنا كده لما يبقى عندنا البقاء و الفوز بالمناصب للاصلح...... و متبقاش العاطفة الدينية عامية عنينا فى اى اختيار لان ده ثبت انه خطأ فادح..... بعد 500 سنة ان شاء الله :)

يا سيدي الفاضل رئيس الجمهورية في الهند لا يحكم ! منصب شرفي 100% ......

[yousef1978]

طالما حضراتكم مصممين نتكلم حوالين أي حاجة غير الرئيس محمد نجيب

فاسمحولي أضيف ملاحظات صغيرة


1- هناك عامل أهم من كل هذه العوامل قد يستصغره البعض لكنه في رأي آخرين أكبر من الجميع

ألا وهو عامل التأييد الإلهي - الله سبحانه وتعالى هو القوي المتين الذي لا يعجزه شئ في الأرض ولا في السماء

لكن لو كل شئ قسناه بمقاييس القوة المادية فإحنا كده مش هنلاقي إجابات للكثير من نتائج الأحداث

مثل أحداث أفغانستان الأولى والثانية

أو أحداث غزة


ممكن البعض يفسر النتائج بتوفر ( X Factor ) أو دخول تحالفات وأهداف لدول أخرى في اللعبة لكن في بداية كل حرب لم يكن يتخيل الجانب القوي أن هناك مدخلات مختلفة قد يفاجأ بها غير التي وضعها في الحسبان



2- إيران يتعتمد في سياستها على عوامل أخرى للقوة - مثال : قوة الردع - بالنسبة لإيران لها مفهوم آخر وهو قوة الإنتقام
فالإيرانيين هم الفرس أصحاب التاريخ الإمبراطوري الذي يحاولون استعادته - وهم مثال حقيقي لاستخدام الدين في أغراض سياسية وعسكرية دنيئة - لاحظ أن الذي نشر المذهب الشيعي في إيران هو ملك سني ( هشام الصفوي ) وبذلك تنازل عن مذهبه ( أو دين ) ودين آباءه وشعبه ونشر مذهبا معادي له كل ذلك من أجل ألا تستطيع تركيا العثمانية السيطرة على إيران الفارسية

وإيران ليس لديها أخلاق أو مبادئ في حربها نهائيا

فهم يحللون كل شئ من أجل نصرة الدولة الفارسية ( وحتى المذهب الإثني عشري - على سبيل المثال يؤمنون باستخدام الكذب من أجل نصرة المذهب وهذه قاعدة دينية عندهم لا يخجلون من تعليمها لأبناءهم ) ولذلك فإذا كانت أمريكا تقتل المدنيين على استحياء وتسبقها بحملة دعم لجرائمها فإن إيران تستحل ذلك بدون إعلام لأن ذلك عقيدة لديهم ويستحلون قتل المدنيين في أي مكان وبأبشع الطرق المرهبة

ولذلك فإن أمريكا وحتى إسرائيل تضع في حسبها جيدا أن حربها إنتقامية من إيران ستستمر لسنوات

ولك أن تتخيل طريقة اسرائيل في تتبع من تريد الإنتقام منهم حتى بعد عشرات القرون كما فعلت مع المتهمين بالنازية أو حتى بعض رموز المقاومة العربية والإسلامية - فإيران تتبعت جميع المشهورين بمشاركتهم في الحرب ضدها من العراقيين حتى الشيعة منهم وقامت بتصفيتهم

( وحتى الموقف الغير معلن من مصر هو عداء بسبب قيام صلاح الدين بتصفية الوجود الشيعي في مصر وغلق المسجد الأزهر - أو مشاركة مصر القوية في حرب الثمان سنوات العراقية الإيرانية وإعطاء مصر للعراق الأسلحة الكيماوية التي دحرت القوات البرية الإيرانية ودفعت الخوميني للموافقة على الصلح )


وعلشان كده نلاحظ أن إيران تسلح كل من المعارضة السنية الجهادية في العراق بالإضافة للمليشيات الشيعية الطائفية

وذلك لكي تضمن أمرين - أولهما إنهاك نهائي للدولة العراقية حتى تخضع لها للأبد في كل النواحي
وثانيا لكي تضمن وجود عشرات الآلاف من الجنود الأمريكييين داخل نطاق أسلحتها التقليدية مما يجعل أمريكا أمام أمرين كلاهما مر - إما تترك العراق لقمة هنية لإيران - أو تضع جنودها في خطر نيرات جحيمية في الخليج وإنتقام شيعي في العراق ( الشيعة حاليا مرحبين بالوجود الأمريكي لكن لو دخلت في حرب مع إيران فالوزارة الموالية لإيران والمخابرات وجميع مراكز القوى الشيعية المسيطر عليها من إيران ستتحول إلى مقاومة وطنية شريفة تدافع عن إخوانهم سنة العراق الذي تنتهك حرماتهم بواسطة الإحتلال الأمريكي البغيض الكافر !!!!!


وإسرائيل حاليا تحتاج التخلص من نظام الأسد الممول الوحيد لأسلحة حزب الله وفي نفس الوقت تخاف من وصول تيار سني معادي لها في سدة الحكم وتصبح محاصرة بأنظمة كلها معادية ( حماس ومصر وسوريا وحزب الله ولا يتبقى لها سوى الأردن )






3- هناك عامل التغير الديمغرافي والإجتماعي في الدول الغربية وحتى إسرائيل

إسرائيل تعتقد أنها لو استمرت بهذه الوتيرة فإن الفلسطينيين المسلمون سيمثلون أغلبية داخل دولة إسرائيل حتى لو تم فصل الضفة وغزة عنها - وهناك قانون حاولوا إصداره يسمح بتهجير أي فلسطيني لا يؤمن بيهودية الدولة الإسرائيلية وطرده خارج فلسطين التاريخية


أما في أوروبا فزيادة تناسل المسلمين عكس الأوروبيين الآخرين يعطينا صورة واضحة عن التغير الديموغرافي





4- هناك عامل مهم وهو رفايهة الشعوب أو فقرها

فالشعب الإسرائيلي حاليا يعيش في أزهى رفاهيته

ولذلك فالشعب لن يقف مؤيدا لأي حرب إلا إذا اثبتت الحكومة أنها حرب وجود وليس حرب من أجل مصالح فقط - طالما أن هذه الحرب تعرض المواطنين لخطر الهلاك

مش عاوز أتكلم عن طبيعة اليهود ولكن دعنا نتكلم عن الطبيعة البشرية

فإذا كان المصريين مثلا الذين يلقون بأنفسهم في هلاك الهجرة الغير شرعية دون خوف - نرى الكثير منهم عندما يتخيل الحرب مع إسرائيل ترتعد فرائسه - فما بالنا بالشعوب الأوروبية والإسرائيلية المرفهة المتنعمة ضعيفة الإيمان بالدار الآخرة



5- هناك عامل مهم وهو تعمد إيران أن يكون ميدان أي معركة قريبا من المناطق الهامة بالنسبة للأعداء
فالمحطات النووية قريبة من الدول الخليجية - وحروب الشرق الأوسط قريبة من اسرائيل ( يسمونها أنها داخل غرفة النوم وليس صالة المعيشة فقط )

ومهما بلغت قوة الهجوم اللإلكتروني فإنها لن تستطيع تدمير مشروع نووي ضخم إيراني به من المنشئات المادية الضخمة أما الإلكترونيات فمن السهل استعاضتها مرة أخرى وحتى استيرادها في وقت قصير - فهل ستقوم امريكا كل شهرين بالهجوم الإلكتروني على منشئات إيران المتناثرة في أنحاء إيران طولا وعرضا

وهل لو تم تمديرها ستتحمل دول المنطقة فاتورة انتشار خطر أكبر بكثير من خطر شرنوبل بروسيا أو الإنفجار الأخير لمحطة التوليد اليابانية الذرية

وهل ستكون هناك تنمية في هذه المناطق في العشر سنوات التالية ؟؟ - لاحظ أن طبيعة سكان هذه الدول من الباحثين عن حياة أفضل وليس من المواطنين الأصليين


أم أن أمريكا ستحاول السيطرة على تلك المنشآت النووية وتستطيع الدخول في حرب برية مع إيران وداخل أراضيها ؟!




6- هناك تخالفات أيرانية كبيرة مع دول يهمها وجود إيران كقوة معادية لأمريكا أكثر من متحالفه معهم

الصين تعتبر أن إيران خطا دفاعها المتقدم لتجنب حرب أمريكية تقترب منها لو استمر الصعود الصيني والهبوط الإقتصادي الأمريكي نسبيا معها

وهناك روسيا وكوريا الشمالية ( لماذا لم تستخدم امريكا أسلحتها الإلكترونية لتحطيم البرنامج النووي الكوري ؟!! )





7- هناك عوامل إقتصادية مهمة

فكما أن من مصلحة أمريكا والغرب الحفاظ على ممر قناة السويس بدون قلق حتى يضمنوا عدم اهتزاز الإقتصاديات المصدرة والمستوردة لهم

فكذلك وجود حروب في مضيق هرمز أو حتى قريبا من قناة السويس أمرا ليس بالهين

وخصوصا أن الإقتصاد الأمريكي والأوروبي يبحث عن تعافي وليس صدمات





لكن في النهاية مؤكد أن امريكا وإسرائيل لو وجدوا أنفسهم أمام خطر الهلاك أو تدمير اسرائيل فإنهم سوف يضحوا بالكثير من الرفاهية والإقتصاد ويصربوا إيران

وربما وصل الوضع كما هو الحال مع كوريا الشمالية - حصار خانق لكل شئ ومحاولة لزرع الفتن الداخلية والحروب الأهلية - وهذا ليس مستبعدا على إيران الطائفية



.

[Imhotep]

يا سيدي الفاضل رئيس الجمهورية في الهند لا يحكم ! منصب شرفي 100% ......

ماشى يا سيدى عامل زى ملكة انجلترا كده تملك و لا تحكم...... بس خلى بالك ان ده يخلى القيمة المعنوية و الرمزية لتولى المنصب ده اكبر لان منصب رئيس الجمهورية هو الاعلى شرفيا و معنويا..... اما رؤساء الحكومات اللى بيحكموا فعلا فبيروحوا و بييجوا و بيتهروا تقطيع سياسى

فى اسرائيل مبيمسكش منصب رئيس الدولة الشرفى الا حد من اللى بيسموهم ال founding fathers يعنى الاباء المؤسسون للدولة و ده بيبقى اعظم تكريم لجهودهم فى سبيل انشاء دولتهم و بيبقى خير رمز للدولة..... عشان كده الاسرائيليين كانوا عايزين البرت اينشتين يبقى اول رئيس لدولة اسرائيل لكنه رفض......ده طبعا مع تحفظنا عليهم و على دولتهم

[Imhotep]

تحية للاستاذ ماهر وصاحب الموضوع وكل المشاركين فيه وباعتذر لتأخري فى الرد
استاذ ماهر مشاركتى الاخيره انا كنت بتكلم عن اعصار دولي " ذي ما حضرتك ذكرت" مش حرب على ايران لوحدها
انا متفق معاك فى كتير من تحليلك السياسي لكن وجة نظرك فى موضوع ايران او العسكرية بشكل عام اسمحلي اختلف معاك فى النظرة للموضوع لاني شايف الموضوع من وجهة نظر مختلفه واسمحلي اطرح بعض التساؤلات الغير مرتبه
- هل العلاقة بين ايران وامريكا اساسها الكره المتبادل وليه جذور ولا المشكله كلها بتدور حول فكرة امتلاك ايران لسلاح نووي ( صراع شرطي أو عارض ) ؟
- هل امريكا غير مستغله أو ليست مستفيده من تنامي نفوذ وقوة ايران العسكرية فى المنطقه وذلك بانشاء قواعد عسكرية وببيع الاسلحه لدول المحيطه لايران بمليارات الدولارات سنويا تعتبر من اقوي الدعائم لميزانية الدفاع والاقتصاد الاميركي بشكل عام ( يعنى اميركا مش مستغله ايران "كفزاعة" لدول كتير ) ؟
- هل ايران لو امتلكت سلاح نووي هتضرب بيه امريكا او اسرائيل ولا هتستخدمة كسلاح استراتيجي لا عسكري وهل مش هتفتح صفحة جديده مع علاقتها بامريكا لتحقيق مصالح جديده ؟
- هل امريكا واقتصادها يقدر يستحمل تبعات امتلاك ايران لسلاح نووي ( واحنا قولنا ان امريكا واقتصادها أكبر مستفيد من دعم الدول المحيطة بايران عسكريا )
- هل امريكا تقدر "تكسح" ايران بشوية غارات جوية بدون تدخل بري ؟
- هل الشعب الاميركي هيسمح لاي حكومه امريكيه انها تدخل بجيشها برياً فى ايران ؟

انا مش منتظر ردود للتساؤلات دي لكن حاول تركز شوية فيها
لاني مقدرش اقول توقعاتي حاليا عشان الناس متفتكرنيش مجنون :)
لكن الايام جايا وهيبان هى مخبيه ايه

باشا...... كل اللى انت ذكرته ده يمثل جزء من اشياء كتير جدا مخلية الامريكان مش عايزين حل لقصة ايران غير الحل الدبلوماسى احنا وضحنا بعضها...... لكن معلش سامحنى فى التشببيه فى حالة قصة ايران..... هتلاقى انك بتساؤلاتك دى سبت الحمار و مسكت فى البردعة : )..... الحمار الاسرائيلى مصمم ان ايران بنظامها الحالى بمساعيها نحو انتاج قنبلة نووية تمثل بالنسبة لهم تهديد وجود لا يمكن يسمح بيه..... اما البردعة الامريكانى مش عايزة...... التاريخ هنا يبقول ايه..... بيقول انه فيه سابقة ردعت فيها امريكا اسرائيل بل وايضا قوى عظمى اخرى حتى وقتها هى بريطانيا و فرنسا من الاستمرار فى الهجوم على مصر ممثلا فى العدوان الثلاثى سنة 1956..... و ده تمثل فى الانذار الشهيراللى ايزنهاور اصدره و قضى بيه على عضوية انجلترا و فرنسا فى نادى القوى العظمى و اسس بيه لواقع جديد هو العالم ثنائى القطبين و هو ده كان الغرض الحقيقى منه مش عشان خاطر سواد عيوننا احنا...... الواقعة التانية اللى مقدرتش فيها امريكا تردع اسرائيل عن هجوم احادى الجانب ضد 4 دول عربية مرة واحدة هو حرب 1967و ده برضه كان سببه من وجهة نظر الاسرائيليين هو نظام يمثل تهديد وجود ليهم برضه و على حدودهم كمان هو النظام المصرى..... طيب لغاية امتى الامريكان هيقدروا يلجموا الاسرائيليين؟ الاحداث بتقول مش لفترة طويلة قادمة

بالنسبة لتعليقاتك على موضوع الاسلحة الجديدة و الفديوهات و الكلام ده...... طبعا الاسلحة الاحدث فى الترسانات لا يتم الاعلان عنها كده بسهولة لان تصنيفها بيبقى فائق السرية...... لكن بيبقى فيه تسريبات و افكار لحاجات جديدة...... الافكار دى طبعا بتبقى مبنية على مفاهيم علمية...... خد عندك الاى ام بى بلس...... معروف ان النبضة الكهرومغناطيسية هى من توابع اى انفجار نووى..... طيب هل ممكن نعمل نبضة كهرومغناطيسية بدون انفجار نووى للاستفادة من قدرتها على تعطيل كافى الاجهزة الالكترونية بدون دمار شامل؟ ده كان محور الابحاث لعشرات السنين والحاجة لسلاح من النوع ده بتخلى التطوير بتاعه يسير بوتيرة اكبر بكتير من العادى......

و ده يقودنا للنقطة التانية..... هى ان دورات تطوير الاسلحة مبقتش بالسنين الطويلة زى زمان و ده بفضل التطور التكنولوجى الرهيب.....
و على فكرة..... الافكار الجنونية اللى انت بتقول انك متقدرش تقولها..... مش هتبعد كتير عن اللى ممكن يحصل لو رد الفعل المتسلسل بتاع القصة دى ابتدا..... و زى ما انت قلت..... احنا بنحاول نستقرئ الاحداث لكن فى النهاية الامور بتنتهى لايه هو ده اللى ربنا يستر منه.....

[w-m-a]

م/ يوسف
تحيه عظيمه لشخصكم الكريم
وشرحكم الوافى عن فكر الجماعه
المقنع المهذب وهو ليس بجديد عن الاخوان
شكرا للاسلوب الراقى والمناقشه الحضاريه
والتحليل المنطقى الجرئ
وانا متفق معك تماماً فى موقف ايران
فعلا كان نفسى نكمل الموضوع عن الرائع محمد نجيب
وخاصه بعد ذكرك لاحداث 54 واعدام عبد القادر عوده والشيخ محمد فرغلى ويوسف طلعت (وشرحهم يطول)
وطبعا محمود عبد اللطيف (وده لوحده موضوع كبير)
شكرا