إعـــــــلان

**Imhotep** · 27-02-2013, 09:51 PM

المشاركة الأصلية كتبت بواسطة eslamrace مشاهدة المشاركة

يبقى طالما ان البلد بقت عامله زى الدمينو لما تقفل فلازم نهد الدور ونبدأ من جديد وطالما الوقت مش فى صالحنا خصوصا اننا لو بدأنا نطور حنبدأ من الصفر وطالما احنا متأخرين كده فى كل المجالات حتى المصانع شغاله باقل تكنولوجى موجوده وكل ده الشعب فاهمه يبقى الموجودين فى السلطه والمعارضه مش يفوقوا بقى لان الوقت ده كله ضايع فى الهوى ؟؟؟؟؟؟؟؟؟؟؟؟؟؟؟؟؟؟؟
احنا واضح اننا عملنا اسهل حاجه فى طريق البدايه شيلنا الحاكم ومكناش نعرف ان الطريق لسه طوييييييييييييييييييل وبالتالى لازم نعرف الناس اللى حكمونا قبل كده وطوروا كان ايه سبب الانجاز كوادر اظن عندنا ؛موارد كتير والحمد لله؛ حب الوطن والناس كانت ماشيه تغنى للبلد ايام الثوره "طيب يبقى ايه اللى ناقص ليه الكوادر اللى فى البلد مبتستغلش الموارد الموجوده عندنا وتحسن معيشتنا خصوصا ان احيانا كتير بحس ان البلد سهل قوى تقوم وتتحسن بس لما ببص للنقطه اللى احنا واقفين عندها بحس ان مفيش فايده .
والله بجد الواحد مش عارف العيب فين ؟؟؟؟؟

أ. محمد كان لمس وتر مهم. . . دور كل فرد فينا. . . فى البداية بس لازم من الاساس يكون كل واحد مقتنع ان ليه دور. . . الاناملية و اللامبالاة مبقتش تنفع خلاص لان كلنا فى مركب واحد و بالتالى لازم نغير سلوكياتنا. . و يا نعيش عيشة فل يا نموت احنا الكل :-). . . و عشان بس نوضح اهمية الدور الفردى ده. . . تفتكروا هى كام فى المائة النسبة المطلوبة من الافراد انهم يؤمنوا بفكرة معينة و يسعوا ليها عشان اللى حواليهم يبدأوا يشاركوهم اقتناعهم ده و يبدأوا فى العمل معهم.،؟ النسبة دى من 20-30 % فقط لا غير. . . طيب انا كفرد اعمل ايه.،؟ اشتغل كويس فى مكانى ده لو شغال. . . مش شغال سواء لسه طالع لسوق العمل فى الظروف الصعبة الحالية او كنت شغال و سبت الشغل بسبب الظروف دى برضه يبقى احاول افكر بشكل مختلف عشان اخلق لنفسى فرصة. . . و انا سايق احاول اعصر على روحى لمونة و التزم بسرعة الطريق. . . و لا سلحفاء تخنق الناس منى و لا طيارة تعمل مصايب و قتلى و جرحى. . . ارشد استهلاكى من الاشياء اللى بقى فيها ازمة او غلى سعرها بشكل مبالغ فيه و للاسف حتى الاساسيات اللى مكناش بنفكر فيها بقت تكلفتها غالية و لسه هتغلى على الكل. . .
طب و السياسة. . . انا هنا بقى هتكلم على دور الاغلبية بطريقة غير تقليدية. . . طب ليه الاغلبية. . . هو انت مستقصدهم :-) الاجابة لان الاغلبية بما انها اغلبية فيبقى سهل تتكون منها النسبة المطلوبة لتحريك الكتلة الحرجة للنغيير اللى انا ذكرتها فوق. . . بالذات الجزء المتعلم و المثقف من الاغلبية. . . واحد زى صديقنا ا. محمد. . . يعمل ايه لانه هو نفسه بيدور على اجابة للسؤال ده. . . الناس اللى زى استاذ محمد اللى انتخبوا الاخوان و اتعشموا فيهم خير لكن احبطوا منهم لاسباب كتير. . . يعملوا ايه.،؟ انا بقى هحاول افكر بطريقة غير تقليدية عشان نقلب السحر على الساحر :-) معروف ان كل منتمى للاخوان هو الة جمع معلومات فى مكانه ايا كان و المعلومات دى يتم ارسالها عبر حلقات الاتصال المتتالية بتاعتهم حتى تصل الى قياداتهم. . . يبقى خلاص. . . هو ده دور ا. محمد و من تنتابه نفس افكاره و مراجعاته لنفسه. . . يعنى الناس اللى شايفه المشاكل اللى فى تصرفات الاخوان لا يكتفوا بكده بل يحاولوا يوصلوا عدم رضاهم لقنوات الاتصال بتاعة الاخوان ايا كانت. . . و الكلام المرة دى لما يكون من ناس كتير و من المؤيدين هيبقى ليه وزن. . . و بالتالى ممكن يساعد فعلا فى التغيير. . . طبعا فى نسبة من الناس مش هيفرق معاها الكلام ده لانها مؤيدة على طول الخط. . . و دول فى تقديرى نسبة لا تزيد عن 10% اللى ماشيين بنظام حبيبك يبلعلك الظلط. . . و بالنالى النسبة دى مش هتفرق معانا فى الموضوع ده. . . المهم ان النسبة اللى بيمثلها ا. محمد تزيد و تعبر عن عدم رضاها رغم استمرارها فى التأييد. . . حد هيقولى طب مادام هيستمروا فى التأييد ايه اللى هيجبر التانيين يسمعولهم بقى.،؟ معرفتى بالنظام الهرمى اللى مبنى على اساسه كيان زى الاخوان تخلينى ارجح انهم هيقدروا خطورة انه حتى مؤيديهم بدؤوا فى مراجعة انفسهم. . . و ده شئ هم هيعرفوا خطورته كويس. . . لانهم بيهمهم الرأى العام بين الناس. . . فلما قطاع مهم هو قطاع المؤيدين يبدأ فى ابداء اعتراضه. . . ساعتها ده ممكن يجبرهم على اعادة النظر. . . او على الاقل التروى فيما ينوون فعله و دراسته اكثر. . . بدل ما كل حاجة كده بيعملوها و يرجعوا يسحبوها للتصليح حتى مواعيد الانتخابات :-)

و معلش صديقى ا. محمد يسامحنى فى انى اتكلمت عليه كتير. . . بس اعمل ايه. . . انت اللى سألتنى عن دور كل واحد فينا فقلت اقلك دورك :-)

**MTAK** · 27-02-2013, 10:48 PM

استاذ ماهر
انا بصراحه لم اشارك من الامس لقراءة الكلام بتأنى مع ظروف عملى

بس طبعا فى المجمل برضه ارفع القبعه لك ( شوف بقى انا هاديهالك احسن علشان زهقت من كتر ما بارفعها لك )

و استاذ وائل متفق معه فى كلامه جدا

و تعقيبى هو :

انا مش مضايق من كثرة ذكرك لى كمثال و ارحب بهذا

و لكن هناك بعض الجمل التى اود ان اعلق عليها

اولا : انا لم انضم الى جماعه الاخوان مطلقا و لم احضر لهم اى اجتماع فى المطلق و لو حتى من باب الفضول

ثانيا : لم انتخبهم فى الرئاسه (كنت خارج مصر وقتها - و كنت ناوى انتخب دكتور سليم العوا )

يا استاذ موضوع المراجعات دى بتفكرنى بمراجعات الجماعات اول ما مسك حبيب العادلى :)

المراجعات واجبه للجميع سواء كان الاخوان هم من فى السلطه او حتى احمد شفيق او حتى واحد مثل مهاتير محمد

و افضل ان اسميها كشف الحساب مع النفس :)

و لكى اصحح شئ , ان انتخبت الاخوان فليس الجانب الدينى فقط (ممكن يكون له نسبه و لكنه ليس هو الفاصل الاكبر - وهذ لا يعيبنى فالمصريين كلهم هكذا فلو ان حضرتك نزل فى دائرتك اثنان و لهم نفس القوه السياسيه و ما الى ذلك و لكن واحد منهم على دينك فالمؤكد انك سوف تفضله و اكرر هذا ليس تعصب او قتنه طائفيه)

و لكنى عندما ساندتهم و لو حتى نفسيا فكان لضعف من حولهم او من ينافسونهم و فى تلك الحاله انا اختار المنطق

و اتفق معك فى ان الكلام عليهم انهم ممثلى الدين و غير ذلك

و يحزننى انهم يلجأون الى السياسه بكل ما فيها (فلا توجد سياسه نظيفه على مستوى العالم ) و عندما يلجأون الى احد حيل السياسه يتم الاتهام باستغلال اشياء ضد الدين او مثل ذلك

و لكن بعد تفكير برهه , احسست ان هناك من يقصد هذا
فهم عندما بدأوا لم يقولوا سنطبق الاسلام كما هو و سنقتل الزانى و نجلد شارب الخمر

اكيد لاسمهم نصيب من هذا

و لكنى نظرت للموضوع نظره اوسع على مستوى العالم
(و ارجو الا تفهم كلامى القادم على انه موجه لشخصك , او مقصود به كلام طائفى , فانا احترمك و احترم نفسى قبل ذلك و لا ادخل فى الجدالات العقيمه التى من هذا النوع)

تذكرت المانيا و الحزب الحاكم بها
ووجدت اسمه Christlich Demokratische Union Deutschlands (الاتحاد الديمقراطى المسيحى)

و عندما بحثت عن الاسم فوجدت احزاب مماثله لنفس الاسم فى ايطاليا و بوليفيا و سويسرا و كذلك تحريفات من الاسم مثل الحزب الكاثوليكى و هكذا

و سألت نفسى سؤال (بجد لا اعرف اجابته )

تلك الدول تؤمن بمبدأ فصل الدين عن السياسه (او كما يقال لنا) , لماذا يكون الاسم هكذا , خاصه ان اغلبيه سكان تلك الدول من المسيحيين

المهم برضه سألت نفسى سؤال
الا تلجأ تلك الاحزاب الى العاب السياسه القذره

(بالطبع الحال عندهم كدول افضل مننا بمراحل و لكن اكيد هناك احتياج لتلك الالعاب - كما انى لست مؤمنا بان الغرب دول ناس غايه فى الرقى و الامانه و ........ فلقد عاملت منهم كثير فى مجال عملى ووجدت عندهم برضه الحرامى و الشريف و اللى مكبر دماغه وووووووووو مثل اى مجموعه من البشر
الفرق الوحيد انهم عندهم نظام
يحترمونه للخوف من العقوبه , و لكنهم يخترقونه اذا اتيح لهم ذلك فى الخفاء )

المهم العاب السياسه القذره من الممكن ان تكون فى كذبه على ناخب او اشياء من هذا القبيل

و التى اعلم بالطبع ان ذلك مرفوض بالديانه المسيحيه ( و كل الديانات السماويه )

فهل طلب احد منهم تغيير الاسم طبقا لذلك

---------
نرجع لموضوعنا و كما ذكرت لك من قبل و حضرتك لم ترد على فى تلك النقطه :)

انا لا اعتبر المسئول عن اختيار الاخوان و بقاؤهم هم الاغلبيه التى لم تعمل لنفسها مراجعات بعد ما رأت ما فعلوه

و لكنى احمل الاخرين هذا ايضا و هم على الاكثر , لانهم لم يستطيعوا تقديم البديل القوى صاحب الحجه التى تستطيع اقناع من يراجعون انفسهم مثلى :)

و هذا له من الكلام الكثير فيما بعد

بصراحه اشكرك مره اخرى على هذا الحوار الذى قلما استمتعت به مع اخرين حتى و لو مع اصدقائى المقربين

و اتمنى الا تزهق منه او يزهق باقى الاخوه و بجد نفسى يكتمل حتى يصبح مثل صالونات اوائل هذا القرن

**eslamrace** · 27-02-2013, 11:32 PM

بص يا mahora لو حنتكلم عن دور الفرد فى المجتمع فهتلاقى ان الوضع برضه صعب جدا فى حاله بلدنا كمثال انا عن نفسي من سنه ونصف بالظبط نويت انى انزل السوق مع اخويا وافتح محل تجارى على اساس انى محملش الحكومه عبء التوظيف او اخد مكان حد فى الحكومه ممكن ميتوفرلوش راس المال المتوسط زيي ولكن الوضع حاليا كالاتى مقدرش ادخل السوق بنصيحه كل المتواجدين وبالتالى مش حتشغل فلوسك فى البلد ولا حتشغل حد معاك ولا حتدفع ايجار يكون مصدر دخل لشخص تانى

ومستحيل تشتغل فى اعمال تصنيعيه لانها برضه واقفه والواحد مش من الناس اصحاب مئات الالاف علشان يقدر يعمل كيان كبير ويستحمل خساره كبيره فى الاول

وبالتالى انا مشاركتش فى الوضع الحالى بسبب حاله انا مليش دخل فيها وحلها عند اطراف النزاع الحالى " سلطه ومعارضه" هم اللى يقدروا يهدوا الجو ويرجعوا الامن مش انا

.
فحاليا الواحد منتظر بس الوضع يتحسن شويه علشان الواحد يبدأ يعمل حاجه اكيد حتكون مفيده وساعتها دورى ممكن يكون جزئيا مؤثر قيس على ده ناس كتير زيي مع اختلاف الاوضاع والمستوى وراس المال سواء صغير او متوسط او كبير او ضخم .
وبالنسبه للاستاذ/محمد انا بس عايز اقول ان بره عندهم ديمقراطيه ومستوى ثقافى يتيخ للناخبين انهم ميتخدعوش باسم الحزب عكس عندنا الناس بتاخد بالمنظر وممكن تلاقى انسان بسيط ميعرفش مين نازل الانتخابات بس علشان يدخل يشارك ويحس انه عمل حاجه بيدخل يرشح "الناس بتوع ربنا " على حد تعبيره وهو ميعرفش برنامجهم ولا سيرتهم ولا اى حاجه وبالتالى متقدرش تلوم الانسان الغلبان ده انما تلوم عدم تثقيفه وعدم وفائهم باحتياجاته التى يوعدون بها

وبالتالى انا عايز اقول ان استخدام الاسماء والشعارات الدينيه بره ممكن يكون لها تاثير بس مش بالحجم اللى عندنا خصوصا اننا شعب عاطفى جدا وعلشان كده بتسمع حاليا ندائات ابعاد الشعارات الدينيه عن السياسه بالرغم من انها ايام مبارك كان مرحب بيها زى " شعار الاسلام هو الحل " كان الكل فرحان بيه بس علشان مكنش منافس سياسي للحزب الوطنى ولا كانت فى ديمقراطيه فمكنش بيعمل مشكله انما دلوقتى الوضع اختلف

...............

تحياتى

**w-m-a** · 27-02-2013, 11:46 PM

أ / محمد
اولا شكرا لحضرتك انت صاحب الموضوع ومضيفنا الكريم
وانت من فتحت نفسنا للكلام بتشجيع الخلوق أ/ ماهر
كلامك الاخير فعلا مضبوط
وانا لم ارد ان اذكره حتى لايحول دفه الحديث
حيث اتفاقنا ان الدين دخل السياسه من باب خلفى
لكن فعلا اوروبا الدين فى السياسه من اوسع ابوابها
بدايه من علم الدوله والرمز الدينى
الى دستورها
الى الحاكم
دون ان يتم اقحام الدين
او فرضه
والمثل سويسرا
تمنع اى شعائر علنيه لاى دين
واخيرا بناء المساجد
والصليب على علمها
ولكنها تبيح زواج الشواذ!!!!!!
يعنى هما متعصبين لوجود دينهم
لكن دون تنفيذ
زى ما قال أ/ ماهر
البلد طول 1400 سنه بيحكمها مسلمين
وخاصه اخر 200 سنه كانو مسلمين
وعبد الناصر مسلم
لكن تطبيق الشرع لم يتم
واعتقد انه لن يتم بالصورة المتوقعه
حتى فى حاله وصول متشددين اكثر او اصوليين او سلفيين
وحتى لو طبقت بحذفيرها لن تؤذى اى كان
وخاصه الاخوة المسحيين
متنساش ان قبل كده كان فى حكام متشددين وتطبيق حدود الشرع
وكانت البلد ماشيه عادى جدا
عموما ده مش موضوعنا الان
وحتى لا يختلط الامر بالاخوة المتربصين ويفسدوا جو الموضوع
شكرا

**Imhotep** · 28-02-2013, 12:19 AM

خلى بالك يا ا. وائل ان كتير من اللي انت قلته عن الرموز الدينية فى السياسة فى اوروبا معظمها موروث يعنى الاعلام و الدساتير و الحاجات دى كلها حاجات عمرها عشرات ان لم يكن مئات السنين.... المهم هو النظام الموجود على الارض..... و انت نفسك قلت ان سويسرا رغم الصليب اللى على العلم بتاعها الا انها تمنع الممارسة العلنية لشعائر اى دين بلا استثناء..... النظام نظام

و حلوة حتة المتربصين بالموضوع دى..... حد يشوفلنا خرزة زرقا......ههههههههههههههه

**MTAK** · 28-02-2013, 12:55 AM

, وانا كمان اشكركم لانه لولا اثرائكم للموضوع فلن يكون بالشكل الذى نراه

و متفق معاك يا استاذ وائل فى تغيير دفه الموضوع حتى لا نصطدم بالمتربصين :)

و هى ده الخرزه الزرقا يا استاذ ماهر :) هههههه

**MTAK** · 28-02-2013, 01:02 AM

طيب بما ان كان هناك طلب من اخى استاذ وائل للكلام عن مصر من الدوله العلويه

و بما ان هناك دعوات للرئيس مرسى فى انه يرحل و كفايه لحد كده

و حتى لا نعيد الكلام

فأظن ان كلنا متفق ان ارحل بهذا الشكل لا تنفع الان لعدة اسباب اهمها ما يقال ان لو كده اتنفذ مش هايعشلنا رئيس جمهوريه لمده سنه على بعض

طيب ايه رأيكم نخلط هذا بذاك و نتحدث عن من قيل لهم ارحل او من تم اقصائهم بالعافه سواء من الشعب او من سلطه اخرى كانت موجوده وقتها , من ايام الدوله العلويه الى الان و ماذا كانت الاسباب

و ما تم فى هذا الموضوع

يعنى انا اللى فدماغى حاليا

محمد نجيب

فاروق الاول

الخديوى عباس الثانى ( على ما اذكر )

ايه رأيكم و لو هناك شخص له اقتراح اخر يا ريت يشاركنا للمنفعه العامه

**MTAK** · 28-02-2013, 11:46 PM

المشاركة الأصلية كتبت بواسطة mahora مشاهدة المشاركة

ليه كدا بقى حاطط مرسى فى مشاركة واحدة مع اللى اتقالهم ارحل :) اصل اللى فاتوا استجابوا..... اما مرسى هتقوله ارحل هيقولك اتفضل انت الاول :)

انا قصدى نشوف من رحل ,رحل ليه و هل كان عنده حق , و هل من طلب , طلب بحق و لا اى كلام , و ما هى نتائج الرحيل

بس فى سؤال كده جه فى بالى قبل ما ندخل فى جزء تانى..... انت قلت (فلو ان حضرتك نزل فى دائرتك اثنان و لهم نفس القوه السياسيه و ما الى ذلك و لكن واحد منهم على دينك فالمؤكد انك سوف تفضله و اكرر هذا ليس تعصب او قتنه طائفيه)..... طيب لو ان الانتخابات الجاية نزل العوا و البرادعى..... هتدى مين صوتك؟

شخصيا افضل العوا , السى فى بتاعته و مقومات شخصيته بالنسبه لى افضل

و هصعبها عليك اكتر..... لو واحد زى حالاتى...... مرشح امام واحد زى ياسر على طبيب الامراض الجلدية انه يمسك مركز المعلومات و دعم اتخاذ القرار (مش عارف مسكوا دكتور امراض جلدية ليه؟ عشان هيدعم قرارهم فى ايه؟.... هم عنهم حد فى المجلس عنده جرب :)...... مين تفتكره الاصلح؟

مش صعبه و لا حاجه

ياسر على انا لا اعرف عنه سوى انه طبيب جلديه , و لم ارى له حوارات شخصيه لافهم ادراكه او نظرته للأمور
ممكن يكون لديه خلفيه علميه اخرى و ممكن تكون خلفيه و مقدره محترمه و لكنى اجهلها الان

فبالتالى هو مبهم عندى

عكسك , تحاورت معك و وجدت عندك المعلومات و الرؤيه التى اظنها كافيه لادارة مثل هذا الموقع

و بالتالى سيكون اختيارى لك

الف مبروك
تقدر تستلم الشغل من بكره :)

**Imhotep** · 01-03-2013, 12:02 PM

فى قصة ذات مغزى بيتم تداولها فى عالم الجاسوسية..... هى قصة بسيطة لكن ذات مغزى سواء كانت صحيحة ام لا..... القصة دى بتقول ان المخابرات المركزية الامريكية فى عز الحرب الباردة نجحت فى تجنيد شخص فى اعلى المناصب فى الاتحاد السوفيتى السابق..... طبعا حد ممكن يفكر انها ممكن تكون خدت منه معلومات السنين اللى خلت امريكا فى النهاية تقضى على الاتحاد السوفيتى..... لكن القصة مبتقولش كده...... القصة بتقول انه لما وافق على انه يشتغل معاهم...... التقوا به مرة واحدة فقط لا غير...... و لم يطلبوا منه غير طلب واحد فقط لا غير...... هو ان يقوم بوضع الشخص الغير مناسب فى المكان المناسب فى كل المناصب اللى يكون ليه القرار فى تحديد من يصبح مسئولا عنها او يملك التأثير فى هذا القرار..... يعنى يعمل طبيب امراض جلدية مدير لمركز المعلومات و دعم اتخاذ القرار..... او يجيب اى شخص لا تتناسب امكانياته مع المكان اللى يشغله و يحطه فيه فقط لمجرد انتماءه الى هذا الشخص او هذا التيار السياسى..... بس فقط لا غير

و النتيجة اللى حصلت مع مرور السنين هى زى ما كلنا شوفنا...... انهيار دولة بيتم فيها اختيار الناس فى المناصب العليا على الاساس ده...... انهيارها من الداخل...... بدون ما يتم اطلاق رصاصة واحدة عليها......

**MTAK** · 01-03-2013, 10:26 PM

المشاركة الأصلية كتبت بواسطة mahora مشاهدة المشاركة

فى قصة ذات مغزى بيتم تداولها فى عالم الجاسوسية..... هى قصة بسيطة لكن ذات مغزى سواء كانت صحيحة ام لا..... القصة دى بتقول ان المخابرات المركزية الامريكية فى عز الحرب الباردة نجحت فى تجنيد شخص فى اعلى المناصب فى الاتحاد السوفيتى السابق..... طبعا حد ممكن يفكر انها ممكن تكون خدت منه معلومات السنين اللى خلت امريكا فى النهاية تقضى على الاتحاد السوفيتى..... لكن القصة مبتقولش كده...... القصة بتقول انه لما وافق على انه يشتغل معاهم...... التقوا به مرة واحدة فقط لا غير...... و لم يطلبوا منه غير طلب واحد فقط لا غير...... هو ان يقوم بوضع الشخص الغير مناسب فى المكان المناسب فى كل المناصب اللى يكون ليه القرار فى تحديد من يصبح مسئولا عنها او يملك التأثير فى هذا القرار..... يعنى يعمل طبيب امراض جلدية مدير لمركز المعلومات و دعم اتخاذ القرار..... او يجيب اى شخص لا تتناسب امكانياته مع المكان اللى يشغله و يحطه فيه فقط لمجرد انتماءه الى هذا الشخص او هذا التيار السياسى..... بس فقط لا غير

و النتيجة اللى حصلت مع مرور السنين هى زى ما كلنا شوفنا...... انهيار دولة بيتم فيها اختيار الناس فى المناصب العليا على الاساس ده...... انهيارها من الداخل...... بدون ما يتم اطلاق رصاصة واحدة عليها......

و هل عندك شك ان هذا الكلام يحدث فى مصر منذ عقود

الى ان اصبح السمه العامه

Comment

Comment

Comment

Comment

Comment

إعـــــــلان

.

الرئيس محمد نجيب - دعوه للحوار الجاد المثمر

Comment

Comment

Comment

Comment

Comment

Comment

Comment

Comment

Comment

Comment