حكايات البشر

[muslimah_dentist]

[align=center]الحكاية السابعة و العشرون

تعالوا أحكيلكم حكاية النهاردة و معلش اتأخرت فى الحكاية لأنه كان يوم مُتعب و طويل بالنسبة لى.

طبعاً أى طالب فى كل عملية اتعرض قبل كدة للامتحانت الشفوى و عارف طبعاً انه قبل ما يدخل أى امتحان شفوى أعصابه بتبقى ضايعة أنا من كتر الامتحانات الشفوى اللى امتحنتها فى حياتى قعدت مرة أتأمل خوفى الشديد قبل دخول لجنة الامتحان و قلت لنفسى: يا سبحان الله ، ليه أنا خايفة أوى كدة ، ده أنا داخلة على بشر زيى له من الحسنات و السيئات مثل ما لى و بالرغم من كل ده انا مرعوبة و بأحاول أدارى خوفى أُمال أما أقف بين يدى الله يوم القيامة كيف سيكون حالى ، كيف سيكون حالى اذا وقفت بين يدى من يعلم ما فى نفسى و لا أعلم ما فى نفسه الذى يعلم الخبيئة قبل العلانية .

فلما تأملت الامتحان الأكبر هان على الامتحان الأصغر[/align]

[muslimah_dentist]

معذرة لا أستطيع أن أكتب لكم حكاية اليوم لأن بالى مشغول للغاية من حالة مريضة جائتنى بالأمس و أشك بقوة انها مُصابة بورم سرطانى و ستأتينى نتيجة الأشعة بعد يومين ، فسأتغيب عنكم فى هذين اليومين و لن تكون هناك حكايات منى و يمكن أن تتواصلوا أنتم بحكاياتكم حتى لا تنقطع الاستفادة الجماعية من خبرات الآخرين.

ادعوا لهذه المريضة لأنها صغيرة فى السن و اذا صدق حدسى فيما تُعانيه فانه نوع من أنواع الأورام السرطانية الفتاكة.

عافانا الله و اياكم من كل سوء.

[AHMEDCAR]

اللهم اشفى كل مريض يارب العالمين

[muslimah_dentist]

الحـمـد لله ....المريضة مطلعش عندها سرطان ، طلعت حاجة تانية و هنعملها عملية الأسبوع الجاى ان شاء الله .......حبيت بس أفرحكم زى ما فرحت و ان شاء سأواصل الحكايات من تانى بس أفضى شوية....

[muslimah_dentist]

"]

الحكاية الثامنة و العشرون

معذرة تأخرت عليكم كثيراً فى هذه الحكاية و لكننى لم أكن أستطيع كتابة الحكايات .


المهم النهاردة سنبدأ استكمال الحكايات، هأحكيلكم النهاردة عن موقف حصلى من يومين تقريباً ، كنت عمالة أعمل مشاوير مع والدتى و دخلت والدتى محل و استنيتها فى العربية و كان جنب المحل اللى دخلته قهوة و لفت انتباهى فيها شئ غريب جداً ، لقيت الولد اللى بيشتغل فى القهوة متهيألى سنه ميتعداش عشرين سنة و عنده رجل مبتورة تماماً حتى محيط عظمة الحوض ، بصراحة استغربت من المنظر العجيب ده و لقيت الولد بيسند على عكاز فى رجله المبتورة عشان يشتغل و كان عمال يخدم على الزباين ، أنا بصيت للمنظر ده فى ذهول و قلت : يا سبحان الله أد ايه الولد ده حس بقيمة العمل و الجرى على لقمة العيش و بالرغم من حالته خرج عشان يشتغل و يأكل من عرق جبينه فى حين ان فيه شباب غيره كتير فى كامل صحتهم و ممكن يكونوا وصلوا الثلاثينات و لسة بيأخدوا المصروف من بابا و ماما.


تحية اجلال و احترام الى كل شاب يعى قيمة العمل و يسعى له .

[H.ibrahim]

و انا معاك يا دكتورة واقف احتراما و اجلال لكل انسان يسعى للعمل ولكسب لقمة العيش بشرف دون ان يوقفه شئ فى هذه الحياة مهما كانت المعوقات فى طريقه:k32::k32: .

[AHMEDCAR]

فعلا يجب على الجميع السعى خلف الرزق مش ضرورى فى الاول نوع المهنه ايه اهم حاجه تاكل من تعبك بيكون ليه اثر كبير جدا جدا فى نفس الانسان

[hamedo0]

[align=center]السلام عليكم و رحمه الله و بركاته [/align]
انا اسف معلش عن تغيبى عنكم فى المنتدى و ده طبعا علشان العيد كل سنه و انتم طيبين و مدام الحكايه دخلت فى ان كل واحد يقول حكايه من عنده احب اقولكم حكايه حصلت معايا رابع يوم العيد

الحمد لله اختى ربنا رزقها ببنوته و كنا عاملين ليها عقيقه يوم الخميس اللى هو كان رابع يوم العيد المهم عزمنا الاهل و الاقارب و ده طبعا بعد ما الحمد لله كنا عملنا العقيه الاساسيه و كنا موزعين

لكن احنا قولنا نعمل تجمع كده للعيله المهم بعد ما الليله ماخلصت و بنقول يلا نمشى بقى لقينا 3 شباب بيخبطوا على باب الشقه و معاهم طبل و مزمار و حاجات من دى يجاعه متشكرين لا احنا لازم نبارك بطريقتنا طيب مين اللى قلوكوا ان فى حاجه هنا قالولى احنا بنمشى فى الشوارع كل يوم و لما نلاقى بيت فيه تجمع او اغانى شغاله نطلع على طول المهم ابويا قالى خليهم يدخلوا المهم بصراحه عملوا جوا جامد جدا فى البيت و هما و اخدوا من كل واحد اللى فيه النصيب تلاقى الواحد منهم يجيى يقف على دماخك و الباشا حبيبا و وهايحيينا دلوقتى و الكلام ده فتلاقى نفسك يتديهم فلوس غصب عنك انا بصراحه اتخنقت من الموضوع ده

المهم و هما ماشيين لقيت والدتى بتقولى اديهم الاكل ده قولتلها لا دول قشطونا ماسبوش حد الا واخدوا منه فلوس قالتلى خد الاكل وانت ساكت

و انا بديهم الاكل بصراحه لقيت الراجل و هو بايخده منى فى قمه الفرح و الانبساط اكتر من لما كان بيلم الفلوس استغربت اوى قولت لنفسى اشوفهم و هما ماشيت هايعملوا ايه

فوجئت انهم اول ما خرجوا من باب العماره قعدوا على الرصيف و كلوا بصراحه انا استحقرت نفسى اوى اوى ساعتها قولت لنفسى انا كنت عاوز امنع عنهم الرزق ده و الحمد لله الشيطان معرفش يغلبنى

يا جماعه قد ايه الانسان فى نعمه و هو مش حاسس بيها لازم لازم نخلى بالنا منها اوى و مش هانحس بقيمتها غير لما تزول يا جماعه انظروا لحال من هم اقل منكم فى الدنيا علشان تحسوا بالنعمه اللى انتوا فيها

معلش طولت عليكوا

اللف مبرووك ياخالو يا ابو حميد ده انت ابو الكرم تيجي في دى وتوقف فيها بس ربنا يبارك في الحاجه

[muslimah_dentist]

شكراً ليكم جميعاً على تواصلكم و مشاركتكم.

[muslimah_dentist]

الحكاية التاسعة و العشرون

هأحكيلكم النهاردة الحكاية اللى كانت شاغلة بالى اليومين اللى فاتوا.

كان يوم بالنسبة لى الشغل فيه للركب زى ما بنقول ، و جاتلى طبيبة امتياز و قالتلى: يا دكتوة فيه حالة عايزكى تشوفيها . رحت معاها لعيادة التشخيص و أول ما شفت الحالة انتبهت و أخدت من المريضة التاريخ المرضى بتاعها و كانت شابة صغيرة فى أوائل الثلاثينات من عمرها أم لأربعة أطفال و طفلتها الخامسة توفاها الله عندما كان عمرها خمسة أشهر ، هى شابة غلبانة أوى من الطبقة الفقيرة فى هذا الشعب الغلبان كان معاها اخوها و كانت نظرات الخوف و القلق مليانة عينيها ، و قالتلى : أنا بدأ يظهرلى اللى قى بقى ده من ساعة ما ولدت بنتى الأخيرة اللى ماتت و عمال يكبر من ساعتها .

المهم طلبنا منها أشعة و اديناها ميعاد بعد يومين تكون عملت الأشعة و أكون اتصلت بدكتور أكبر منى فى القسم عشان يشوف الحالة ، المهم جت فى الوقت المحدد و اما شفنا الأشعة الحمد لله كلنا ارتحنا و مطلعش ورم سرطانى و لله الحمد و طلع حاجة تانية و هنعملها عملية و نشيلهولها الأسبوع الجاى ان شاء الله.

أنا عمالة أحكيلكم الحكاية ديه ليه عشان كذا حاجة استوقفتنى فى حكاية ( صباح) و ده اسمها أولاً أما جت المرة التانية كانت قلقانة و الخوف و الرعب مالى عينيها و أول ما شفت الأشعة طمنتها: و قلتلها ديه حاجة بسيطة و ماتقلقيش.
و قلتلها: هو اللى معاكى ده أخوكى ( للشبه الكبير اللى بينهم)
قالتلى: أيوة يا دكتورة ده أخويا ده كان عايش فى الزقازيق و اما اجوزت و جيت هنا جه و عاش معايا أصل احنا مالناش غير بعض يا دكتورة.


ياه على أد ما جملتها ديه بسيطة على أد ما احتوت كلمات و معانى جميلة بينها و بين أخوها و هم ناس بسطاء جداً ،أخوها جه للبلد اللى عايشة فيها عشان يبقى جنبها (جنب أخته) أد ايه كتير مننا مُفتقدين الاحساس الجميل ده بين الأخوات و أخوان زى ما يكون أخويا أو أختى غريب عنى.

مش بس الموقف ده اللى أثر فيا ، لكن فيه موقف تانى علمنى كتير أوى الدكتور اللى فى القسم اللى اتصلت بيه عشان يشوف حالة (صباح) هو عالم أكن له الاحترام و له الفضل بعد الله سبحانه و تعالى أنه يعلمنى الكثير فى مهنتى و كيف أحترم المرضى و أحترم آلآلامهم ، لقيت الدكتور بيكتب لصباح على دواء عشان تأخده قبل العمليه قام أخدها على جنب و قالها : تقدر تدفعى تمنه
قالتله:لأ
راح كتبلها الدوا و أخدها على جنب و اداها تمن الدوا عشان تشتريه.

من أمثال هذا الطبيب(الذى أحسبه على خير و لا أزكى على الله أحدا) تعلمت قداسة هذه المهنة و احترام المريض و آلالامه و أتمنى انى أكون زيه فى يوم من الأيام.

معلش طولت عليكم النهاردة بس أتمنى انكم تكونوا اتعلمتم حاجة من الحكاية ديه زى ما اتعلمت أنا.

[muslimah_dentist]

رجعلتلكم بعد الانقطاع الجميل للنت لجمهورية مصر المحروسة

ان شاء الله أرجعلكم بالحكاية الجاية بعد ما أفضى شوية

[muslimah_dentist]

الحكاية الثلاثون

بما انى ملاحظة الأيام ديه فى المنتدى الكلام كثير بالشكل ده(بحبك يا مصر) ، (بأكرهك يا مصر) حبيت أحكيلكم موقف حصلى اما رحت عمرة فى رمضان قبل اللى فات.

أولاً عايزين نتفق على حاجة على أد ما البلد ديه فيها مشاكل و مش حاسين فيها ان احنا مُحترمين و خلافه بس بالرغم من كل ده ( بحبك يا مصر) ديه بلدنا يا جماعة ، فيها ذكرياتنا و أهالينا ، فيها كل حياتنا بحلوها و مُرها .

نيجى لحكاية النهاردة عشان أقولكم ان احنا بجد أطيب شعوب الأرض و بالرغم ان احنا ساعات أخلاقنا بتحتاج تهذيب بس و الله فطرة الشعب ده و طيبته بتميزه عن باقى شعوب العالم.

نبدأ الحكاية،،،،،،كنت فى المدينة المنورة (أعادنا الله اليها) و كان يوم الجمعة و ذهبت لصلاة الجمعة و طبعاً مسجد الرسول فى يوم الجمعة مش بيبقى فيه موضع قدم و الدنيا كانت زحمة موت ،دخلت مُصلى النسا عشان ألاقى مكان أصلى فيه قعدت ادور و أدور و لقيت مكان فاضى ممكن أزنق نفسى فيه رحت للمكان فلقيت واحدة قاعدة من جنسية آسيوية و شاورتلى انها مش عايزانى أقعد ، طبعاً اتضايقت من الموقف و قلت فى نفسى: يا سبحان الله هكذا يعامل المسلم أخيه المسلم ، بصيت كدة بعينى و حاولت أشوف أى حتة أحط بس فيها رجليا لقيت مكان و رحتله لقيت برضه الست قاعدة و فاردة رجليها و برضه مش عايزانى أقعد و طبعاً كنت متضايقة جداً مع ان صلاة الجمعة لسة مبدأتش و مش لاقية مكان أصلى فيه ، راحت ندهت عليا ست مصرية كبيرة فى السن أما شافتنى محتارة و مش لاقية مكان أصلى فيه: قالتلى: تعالى يا بنتى و قعدتنى جنبها ، و ضيقت على نفسها المكن عشان أقدر أقعد.

على أد ما الموقف ده كان بسيط و ممكن تقولولى ( يعنى ايه معناه) بس و الله احنا شعب طيب و من أطيب شعوب الأرض و بنحب نساعد الناس ، أنا مارضيتش تقعدنى جنبها الا ست مصرية مع انى قعدت ألف على كل الجنسيات اللى فى المسجد و فيه اللى بصيتلى باحتقار و فيه فاردة رجليها و مش عايزة تقعدنى و فيه و فيه و فى الآخر المصرية هى اللى قعدتنى جنبها.

كنت كتير فى العمرة بألاقى تصرفات من مصريات تخلينى أتكسف من أفعالهم ، بس بعد الموقف ده قلت : و الله احنا من أطيب شعوب العالم و حتى لو فينا عيوب احنا بنتصرف على الفطرة و بطيبتنا الجميلة المعهودة.

و ممكن نسمى حكاية النهاردة( لمحة فى حب مصر) على اد ما بلدنا فيها عيوب بس هى برضه بلدنا و هتفضل بلدنا ، بلدنا اللى بنحبها ، بلدنا اللى بنسشتاقلها ،بلدنا اللى ذُكرت فى القرآن ، اللى قال عنها رسول الله صلى الله عليه و سلم "استوصوا بأهل مصر خيرا"و قال أيضا"اتخذوا من مصر جندا فانهم من خير أجناد الأرض"

[gade2]

انا تعليقا على كلامك يا دكتور احب اقول ان احنا لسه والله فينا الخير الناس زى ما هيه من جوه لو دورت فى كل واحد من جواه هتلاقيه طيب بس الناس محتاجه اوى اللى يطبطب عليها ويقولها كلمه حلوه
حاجات بسيطه اوى بس مفعولها كبير

[AHMEDCAR]

فعلا الشعب المصرى شعب طيب جدا جدا لكن ظروف الحياه هيه اللى مخليه الواحد مش عارف حتى يكلم نفسه

[muslimah_dentist]

لو دورت فى كل واحد من جواه هتلاقيه طيب بس الناس محتاجه اوى اللى يطبطب عليها ويقولها كلمه حلوه

صدقت أخى بل أنا من المؤمنين أن أى انسان فيه الخير لأن الله سبحانه و تعالى لم يخلق انسان عبارة عن شر مُطلق

فعلا الشعب المصرى شعب طيب جدا جدا لكن ظروف الحياه هيه اللى مخليه الواحد مش عارف حتى يكلم نفسه

و أكبر دليل على ان الشعب ده طيب جداً أما بتحصلنا أزمة بنتكاتف مع بعض ، ممكن تكون الدنيا و همومها و مشاكلها أخدانه بس وقت الأزمات كلنا بنبقى ايد واحدة و ده مش كلام انشا و لا كلام مقالات يعنى مثلاً مين اللى بنى مستشفى الأورام للأطفال مش بتبرعات الشعب الجميل ده.