عايز شوية آراء خبيرة-كورولا وللا اوكتافيا

[M.Mokhtar]

حتى بعد إعتراف التوكيل إن فيه عيب ؟
ونزول الموديل الجديد بفتيس أوتوماتيك عادي في إستجابة للشكاوى ؟؟
وتغيير السوفت وير الخاص بالفتيس القديم ؟؟!

انا ماليش فى اليله دى بس عندى كام سؤال على الماشى

امتى التوكيل اعترف ان فى مشكله فى الفتيس؟
ليه معتبر نزول فتيس اوتوماتك عادى (اللى الناس متعوده عليه) ان كده فى مشكله فى الفتيس ال mmt ؟
من امتى وتغير السوفت وير بيبقى عيب فى اى حاجة؟؟؟؟
انت تعرف عربيات تانيه غيرت السوفت وير بتاع الفتيس او بتاع الموتور حتى؟؟ ولا تحب اقولك انا؟


مش عارف الناس بتهجم على العربيه دى ليه كده مع انهم اصلا مش ركبوها ولا جربوها
واللى جربها ومش عجبه طريقه الفتيس زى اللى شاف عربيه ومش عجبه منظرها
دى اذواق وكل واحد بيرتاح فى حاجة غير التانى

بلاش الطريقه البلدى دى فى تقييم الاشياء

[tutankhamoun]

منشأ الأوكتافيا هو مصنع سكودا فى التشيك، وهى شركة مملوكة لفولكس فاجن لكن بادارة شبه مستقلة، والسيارة مصنعة بالكامل فى التشيك بتكنولوجيا من فولكس فاجن ، وبالتالى فالسياراتين مصنعتين خارج الدولة الأم لشركتين تتنافسان على زعامة السوق العالمى

بعد أذن ....... المهندس سبعاوي ......
لي تعليق على الجزئية دي
الأوكتافيا ......... من أنتاج شركة سكودا ........ و شركة سكودا شركة تشيكية أصلا
يعني الأوكتافيا تصنيع بلد المنشأ أو البلد الأصلي للمصنع ,,,,,,,, لأن التشيك هي بلد الأسكودا ....... و الأسكودا مملوكة لفولكس و لكنها ذات منشأ تشيكي .
و في الأخر الأسكودا أسم تجاري مستقل بعيد عن فولكس فاجن من ناحية الأسم التجاري .

[احمدعبدالعزيز]

انا افضل طبعا الاوكتافيا ياستاذ سبعاوى علشان اسباب عديدة
1-صاجها اقوى من الكورولا يعنى لقدر الللة لو حد ريح عليك الصاج ناشف وومكن يستحمل التريحة
2-ثباتها احسن بكتر من الكورولا والحكاية دى انا مجربها بجد مش بفشر عليك
3-المحرك محرك الكورولا افضل لانة اقوى لكن لو جينا للمحركات الكبيرة الى بتنزل مع العربية اساسا هنلاقى ان الاوكتافيا احسن
4-بالنسبة للعفشة الكورولا طرية شوية عن الاوكتافيا بس الاوكتافيا فيها كراسى بتعود النقص فى العفشة مريحة جدا جدا
5-بالنسبة للسرعة القصوى الاوكتافيا تتفوق انا جايب بيها 220 على نزل فى السخنة وجايب بيها 205 على طريق عادى
6-بالنسبة للدركسيون الدركسيونين متساويين لانهم الاتنين هيدروليك مش كهرباء بس مش فاكر اوى الكورولا اية ( مش متاكد )
7-بالنسبة للصالون القعدة فى الاتنين مريحة بس الكنبة فى الاوكتايا ضيقة شوية
8-شنطة الاوكتافيا بحر اكبر بكتير اوى من الكورولا
9-بالنسبة للمظهر الخارجى انا بتعجبنى الاوكتافيا اكتر وبالذات الفانتازيا عن الكورولا
10-اما بالنسبة للعلو عن الارض الاتنين متساويين تقريبا اذا لم تكت الكورولا اوطى من الاوكتافيا
11-بالنسبة للتجميع الكورولا احسن لحد 130 كم لكن بعد كدة الاوكتافيا تكسب ودة تجربتى اما كنت بسابق مع خالى فضل مسابقنى لحد 130 بعد كدة انا جبتة
12-عوامل الامان الاوكتافيا واخدة 5/5 والكورلا 5/5
وارجو انى افتكر حاجات كمان علشان اقولها ليكم يابطال المنتدى

راى الاوكتافيا افضل لنفس الاسباب السابقه .

[delpo]

والله يا جماعة مبيعات الكورولا في العالم كله اكبر من الأوكتافيا فا قدامنا حل من اتنين يا العالم كلو غبي واحنا الي طلعنا الفار من بق القط, يا اما احنا الي العيب فينا زي ما كل حاجة ماشية بالمقلوب عندنا ,,,, الكورولا أعلى سيارة حققت عدد مبيعات في تاريخ السيارات كلها.

بالمناسبة بلاش فلسفة .. خلينا واقعيين

وتحياتي

[M.Mokhtar]

الكورولا أعلى سيارة حققت عدد مبيعات في تاريخ السيارات كلها.

بالمناسبة بلاش فلسفة .. خلينا واقعيين

مش من المنطلق ده هنحكم على العربية
ماتنساش ان فى اجيال من الكرولا كانت من أسواء ما يمكن

احنا هنا بتكلم على الجيل الحالى وبنقارنه بعربيه اخرى
ييعنى عايزين نطلع الفرق بين الاتين عشان مفيش عربية كامله وكمان كل عربيه وليها مميزات وعيوب
وكل واحد يختار اللى يريحه فى الاخر

[tutankhamoun]

والله يا جماعة مبيعات الكورولا في العالم كله اكبر من الأوكتافيا فا قدامنا حل من اتنين يا العالم كلو غبي واحنا الي طلعنا الفار من بق القط, يا اما احنا الي العيب فينا زي ما كل حاجة ماشية بالمقلوب عندنا ,,,, الكورولا أعلى سيارة حققت عدد مبيعات في تاريخ السيارات كلها.

بالمناسبة بلاش فلسفة .. خلينا واقعيين

وتحياتي

مش بالمنطق ده بيتم الحكم على العربيات
أولا عندك مثلا الفيرنا الهيونداي محققة مبيعات أكتر من مبيعات شركة فولفو كلها ....
هل كدا الفيرنا أصبحت أفضل من فولفو ؟؟؟؟؟؟؟؟؟؟؟

و برضه الموضوع مش موضوع أن العربية عملت أكبر مبيعات في تاريخ السيارات كلها ....
لأن ببساطة تويوتا ألتزمت بنفس الأسم لعربيات مختلفة
لأن كل جيل من الكورولا مختلف عن اللي قبله شكلا و موضوع و لا يشترك بينهم غير الأسم فقط لا غير .

خُد عندك مثال :
فيات أنتجت 131 ......... و أكتسحت السوق الأوروبي في الوقت ده ..... و لم طوروها قاموا مغيرين الإسم و سموها ريجاتا .......
مع أنها نفس الشاسيه و نفس العربية مع تغييرات طفيفة ..... بس سياسة فيات مختلفة عن سياسة تويوتا في التسمية .

علشان كدا لما نقول أن كورولا عملت أعلى مبيعات في التاريخ ...... يبقى كلام مش مظبوط عمليا لأن الكورولا لها أجيال و أجيال مختلفة عن بعضها تماما ..... و الشئ المشترك الوحيد بينهم هو الأسم فقط .

فيه مثال تاني :
لما الفيات البونتو حققت رقم 5 مليون عربية .......... ده رقم قياسي ... لأن نفس العربية هي هي باعت 5 مليون ...
و مبيعات الجراند بونتو مستثناه من الحسبة دي .......
مع أن الجراند بونتو أمتداد طبيعي للبونتو .......

فنرجع تاني و نقول أن الكورولا عملت أسم حلو و اللعب على عدد السيارات المباعة هي فن تسويقي بعيد تماما عن التقييم الفني و التاريخي لأي عربية

[محمد ابراهيم 1]

أوكتافيا باختصار بتحس إنك راكب عربية محترمه تقيلة وثابته كأنها بى إم صغيرة سنة
لكن من ناحية الوسع الكورولا تتفوق
سعر إعادة البيع متساوى

[ahmed1981]

انا ماليش فى اليله دى بس عندى كام سؤال على الماشى

امتى التوكيل اعترف ان فى مشكله فى الفتيس؟
ليه معتبر نزول فتيس اوتوماتك عادى (اللى الناس متعوده عليه) ان كده فى مشكله فى الفتيس ال mmt ؟
من امتى وتغير السوفت وير بيبقى عيب فى اى حاجة؟؟؟؟
انت تعرف عربيات تانيه غيرت السوفت وير بتاع الفتيس او بتاع الموتور حتى؟؟ ولا تحب اقولك انا؟


مش عارف الناس بتهجم على العربيه دى ليه كده مع انهم اصلا مش ركبوها ولا جربوها
واللى جربها ومش عجبه طريقه الفتيس زى اللى شاف عربيه ومش عجبه منظرها
دى اذواق وكل واحد بيرتاح فى حاجة غير التانى

بلاش الطريقه البلدى دى فى تقييم الاشياء

شيء طبيعي إختلاف وجهات النظر والتقييمات

لكن تلقيح الكلام على طريقة التقييم هو الأمر الغير مقبول
(تقييم بلدي وتقييم أرفرنجي) !!!!!!!

قيم براحتك وقول رأيك وأنا أقيم براحتي وأقول رأيي
لكن ليس من المقبول أن نسخر من طريقة تقييم غيرنا لمجرد خلافنا معه في الرأي

[adventurer]

السلام عليكم حاولت جاهدا عدم المشاركه الااننى لم استطع اعزائى ارجواالاننسى المبداء القائل لولا اختلاف الاراء لبارت السلع ولكسدت التجاره الاانه فى هذا المقال يجب التأكيد على ان تويوتا افضل تكييف فى العالم وقاهر ه الصحراء تحفتها النصف نقل الماردونا يشهاده ضباط الاداره العامه لمكافحه المخدرات ولاننسى دلوعه التويوتا كورولا 94 واعتماديه الميكروباص الهاى اس الاانك لاتشعر بالتميز مع السيارات اليابانى ولكن تشعر انك تسير مع السائرين وفى معيتهم لشعور الامان السائد لدى المصريين والمقترن بأنتشار السياره الاان الاوروبى له مذاق مختلف كل التميز والشعور بالفخر مع تحمل ضريبته ارتفاع سعره وقطع غياره وصعوبه تعويض النقد عند البيع وبطءالمكيف عن اليابانى بقى لدى شعور اخير الصانع اليابانى يرتكز فى التصنيع كأساس على الاقتصاديه والسهوله اما الاوربى الامان والفخامه بقى ان تويوتا الصانع الاكبر وبجدار ه على فكره انا ناوى اجيب فانتازيا 2010 ان شاء الله

[delpo]

مش بالمنطق ده بيتم الحكم على العربيات
أولا عندك مثلا الفيرنا الهيونداي محققة مبيعات أكتر من مبيعات شركة فولفو كلها ....
هل كدا الفيرنا أصبحت أفضل من فولفو ؟؟؟؟؟؟؟؟؟؟؟

و برضه الموضوع مش موضوع أن العربية عملت أكبر مبيعات في تاريخ السيارات كلها ....
لأن ببساطة تويوتا ألتزمت بنفس الأسم لعربيات مختلفة
لأن كل جيل من الكورولا مختلف عن اللي قبله شكلا و موضوع و لا يشترك بينهم غير الأسم فقط لا غير .

خُد عندك مثال :
فيات أنتجت 131 ......... و أكتسحت السوق الأوروبي في الوقت ده ..... و لم طوروها قاموا مغيرين الإسم و سموها ريجاتا .......
مع أنها نفس الشاسيه و نفس العربية مع تغييرات طفيفة ..... بس سياسة فيات مختلفة عن سياسة تويوتا في التسمية .

علشان كدا لما نقول أن كورولا عملت أعلى مبيعات في التاريخ ...... يبقى كلام مش مظبوط عمليا لأن الكورولا لها أجيال و أجيال مختلفة عن بعضها تماما ..... و الشئ المشترك الوحيد بينهم هو الأسم فقط .

فيه مثال تاني :
لما الفيات البونتو حققت رقم 5 مليون عربية .......... ده رقم قياسي ... لأن نفس العربية هي هي باعت 5 مليون ...
و مبيعات الجراند بونتو مستثناه من الحسبة دي .......
مع أن الجراند بونتو أمتداد طبيعي للبونتو .......

فنرجع تاني و نقول أن الكورولا عملت أسم حلو و اللعب على عدد السيارات المباعة هي فن تسويقي بعيد تماما عن التقييم الفني و التاريخي لأي عربية

آه كده الفيرنا احسن من الفولفو بالنسبة للظروف المشتري, لأن مافيش عامل واحد هو الي بيحدد العربية دي احسن من دي ولا لأ, في حسابات كتير جداً زي البنزين والتصليح والعمر الإفتراضي وقطع الغيار والشكل والقبول بين الناس والسمعة الطيبة والبرستيج وحاجات كتير جدا بتختلف من شخص لشخص وعشان كده صعب انك تلاقي عربية ليها القبول الكبير ده بين الناس في العالم كله وعربية زي الفكترا أو الأوكتافيا لو شفتها في دول الخليج كأنك شفت كائن فضائي, مع انهم في دول الخليج بيشترو بورش ورانج روفر واكس 6 وعربيات غالية لكنهم مبيشتروش العربيات دي لان أصحابها الأوائل الآن بيعانو منها أشد المعاناة في التصليح وقطع الغيار والعمر الافتراضي, انا كان ليا زميل في الغل عندو اوبل اوميغا 2002 يعني احسن من الفكترا والأوكتافيا ومتعذب آخر عذاب ومن كتر ما صرف عليها مش قادر يبيعها والمشكلة اصلا ان مافيش مشتري ليها وبعد ما كان شريها بثمن الكامري في وقتها دلوقتي بيبيعها ب9 آلاف درهم يعني 14 الف جنيه, اما الكورولا العكس تماما, وده برضو بيرجع للشخص.

لو انت معاك فلو ومش فارق معاك صرف البترول والتصليح واعادة البيع والعمر الافتراضي هات الي انت عايزو من غير ما تسأل الناس لانك ببساطة لا تزهقك بيعها باي تمن, اما لو كنت زي حلاتي مش عارف اذا كنت هتقدر تشتري فحياتك عربية زيرو تاني ولا لا فا خد المضمون.


كلامك شكلو للناس منطقي وجميل ومرتب لكن انا هقولك كلمة واحدة فقط, اي موديل للكورولا ولو كان اوحش موديل من وجهة نظرك باع أكتر من الفيكترا والأوكتافيا مجتمعين في نفس السنة وده على مستوى العالم كلو, فا برضو هرجع اقول بلاش نعمل فيها بنفهم اكتر من العالم كلو, الموضوع واضح زي الشمس لو مش فارق معاك الفلوس اشتري وارمي من غير ما تقارن ولا تسأل.

تحياتي

[tutankhamoun]

آه كده الفيرنا احسن من الفولفو بالنسبة للظروف المشتري, لأن مافيش عامل واحد هو الي بيحدد العربية دي احسن من دي ولا لأ, في حسابات كتير جداً زي البنزين والتصليح والعمر الإفتراضي وقطع الغيار والشكل والقبول بين الناس والسمعة الطيبة والبرستيج وحاجات كتير جدا بتختلف من شخص لشخص وعشان كده صعب انك تلاقي عربية ليها القبول الكبير ده بين الناس في العالم كله وعربية زي الفكترا أو الأوكتافيا لو شفتها في دول الخليج كأنك شفت كائن فضائي, مع انهم في دول الخليج بيشترو بورش ورانج روفر واكس 6 وعربيات غالية لكنهم مبيشتروش العربيات دي لان أصحابها الأوائل الآن بيعانو منها أشد المعاناة في التصليح وقطع الغيار والعمر الافتراضي, انا كان ليا زميل في الغل عندو اوبل اوميغا 2002 يعني احسن من الفكترا والأوكتافيا ومتعذب آخر عذاب ومن كتر ما صرف عليها مش قادر يبيعها والمشكلة اصلا ان مافيش مشتري ليها وبعد ما كان شريها بثمن الكامري في وقتها دلوقتي بيبيعها ب9 آلاف درهم يعني 14 الف جنيه, اما الكورولا العكس تماما, وده برضو بيرجع للشخص.

السوق المصري مختلف و الأسكودا هنا بريستجها أحسن من ماركة تويوتا كبرستيج مش عربية
مع أن أنا أصلا ما أبدتش رأيي أو واقف مع عربية ضد عربية ؟؟؟
أنا علقت على نقطتين في الكلام بس و لم اُبدي رأيي بتاتا ...
بس لو برستيج
الأسكودا أوكتافيا أحسن من التويوتا ........ ( ده من ناحية البرستيج )
أما من الناحية الفنية ........ مفيش فروق كبيرة بين العربيتين إلا أن ثمنهم الأثنين مبالغ فيه .

لو انت معاك فلو ومش فارق معاك صرف البترول والتصليح واعادة البيع والعمر الافتراضي هات الي انت عايزو من غير ما تسأل الناس لانك ببساطة لا تزهقك بيعها باي تمن, اما لو كنت زي حلاتي مش عارف اذا كنت هتقدر تشتري فحياتك عربية زيرو تاني ولا لا فا خد المضمون.

ما أحنا قلنا السوق المصري مختلف و الأسكودا في السوق المصري لها سمعة جيدة جدا و لها قطع غيار و لها سوق اعادة بيع ..... يعني العربية مش جاية من الفضاء مثلا أو موديل جديد أو نادر ....
فالنقطة دي ما تخليش الكورولا أحسن ...... ( لأن أنا شايف الأثنين زي بعض و ممتازين مع فرق الفخامة لصالح الأسكودا )


كلامك شكلو للناس منطقي وجميل ومرتب لكن انا هقولك كلمة واحدة فقط, اي موديل للكورولا ولو كان اوحش موديل من وجهة نظرك باع أكتر من الفيكترا والأوكتافيا مجتمعين في نفس السنة وده على مستوى العالم كلو, فا برضو هرجع اقول بلاش نعمل فيها بنفهم اكتر من العالم كلو, الموضوع واضح زي الشمس لو مش فارق معاك الفلوس اشتري وارمي من غير ما تقارن ولا تسأل.

يا سيدي محدش قال ان الكورولا وحشة بل على العكس عربية محترمة جدا و لو مكنتش محترمة مكنتش باعت و عملت مبيعات عالية و لكن الاحترام ده مش انفراد ليها ....... يعني فنيا العربيات دي مفيش فروق كبيرة بينها ...
و لو بنتكلم عن الفخامة و البرستيج ........ معلش مش هاروح أشتري عربية ميكروباظ ...... هي صحيح الكورولا مش ميكروباظ ...... و لكن ملهاش أي تميز في الأسم أو الشكل علشان كدا تويوتا فكرت في الموضوع و غيرت أسم العربيات الفخمة بتعتها .... و أسمه لكزس ...

و بعدين بقى معلش
اللي بيشتري اسكودا مش بيرمي فلوسه في الأرض زي ما أنت متخيل بل على العكس
عربية محترمة جدا و فخمة و لها هيبة بعكس الكورولا ......
و الكورولا عملية أكثر و اقتصادية و ناعمة .......
و أنا شخصيا مش شايف فروق فنية بينهم كبيرة ........
بس برضه مش عدد العربيات المباعة يخلي عربية أحسن من التانية خصوصا أننا بنتكلم على عربية موجودة في السوق المصري و لها قطع غيار و لها وكيل محترم .
و بالتالي رأيي النهائي :


تحياتي

لو عايز برستيج زي ما أنت بتقول ........
أكيد و مليون % هاجيب الأسكودا مش الكورولا مع أحترامي لكل ملاك الكورولا ..... و لكن ده رأيي الشخصي .

و لو بقارن مقارنة فنية
مفيش فروق كبيرة بين الأثنين لأن العربيتين ممتازين مع تحفظي على سعرهم .

و لو بقارن علشان خاطر الأقتصادية الأعلى ...
هاشتري كورولا .....

إنما أنا شخصيا ........... لا مع الكورولا أو ضدها ....... أو مع الأسكودا أو ضدها و أنا ردت على نقط معينة
و أرجوا أن حضرتك ما تعتبرنيش ضد عربية معينة لأني أصلا ما وضحتش رأيي لعربية معينة .


مع تحياتي لحضرتك و ربنا يباركلك في الكورولا بتاعتك و يحفظك منها و يحفظها لك .

[M.Mokhtar]

شيء طبيعي إختلاف وجهات النظر والتقييمات

لكن تلقيح الكلام على طريقة التقييم هو الأمر الغير مقبول
(تقييم بلدي وتقييم أرفرنجي) !!!!!!!

قيم براحتك وقول رأيك وأنا أقيم براحتي وأقول رأيي
لكن ليس من المقبول أن نسخر من طريقة تقييم غيرنا لمجرد خلافنا معه في الرأي

اولا يا باشا انا مش مختلف معاك فى الرأى ولا مع رأيك برده
ثانيا انا مالقحتش كلام على تقييم عشان ده ماكنش تقييم ده كان شوية أسئلة انت بتطرحها بشكل ان كده العربيه معيوبه وده طبعا غلط خالص

وعلى العموم انا مش قصدى اسخر منك
بس تقدر تقولى انت معنى اسئلتك دى ايه؟
وليه ماجوبتش على سؤال واحد من اسئلتى؟

وياعم لو كلمة بلدى مضايقاك انا هسحبها
بس معنى ان التقييم البلدى انك بتقيم على اساس اللى بتسمعه فقط دون تجربه ومعتمد على الثوابت الراسخه فى عقل المواطن المصرى
زى مثلا
- الفرنساوى مش تركبه عشان تكنولوجى عالى
- الالمانى المانى مهما كان (وتلاقيه بيقارن عربيه موديل التمنينات بعربيه يابانى موديل السنه)
- الفتيس ده فيه عيب ده انت بتحس بالنقله يبقى ازاى اوتوماتك

يارب قصدى يكون واضح

المهم مش تزعل يا كبير

[ashouhdy]

انا مازلت مصمم ان الكورولا الجديدة الجنوب افريقى اجدع من ال a5 و محدش يقنعنى بغير كدة لانى معايا الكورولا و ركبت الاية 5 كتيير
وسع و ثبات و موتور و تكييف الكورولا
جودة الخامات مقدرش اقول انها اقل من الاوكتافيا
و فى الاخر يبقى ذوق المشترى هو الفيصل الاساسى للشراء
لكن ميين احسن من ميين
صعب اقوى تتقال لان العربيتيين حلويين جدا الا ان الكورولا تتفوق فى اللى قلتة
وشكرا

[delpo]

لو عايز برستيج زي ما أنت بتقول ........
أكيد و مليون % هاجيب الأسكودا مش الكورولا مع أحترامي لكل ملاك الكورولا ..... و لكن ده رأيي الشخصي .

و لو بقارن مقارنة فنية
مفيش فروق كبيرة بين الأثنين لأن العربيتين ممتازين مع تحفظي على سعرهم .

و لو بقارن علشان خاطر الأقتصادية الأعلى ...
هاشتري كورولا .....

إنما أنا شخصيا ........... لا مع الكورولا أو ضدها ....... أو مع الأسكودا أو ضدها و أنا ردت على نقط معينة
و أرجوا أن حضرتك ما تعتبرنيش ضد عربية معينة لأني أصلا ما وضحتش رأيي لعربية معينة .


مع تحياتي لحضرتك و ربنا يباركلك في الكورولا بتاعتك و يحفظك منها و يحفظها لك .

على فكرة انا لما قولت ممكن حد يشتري عشان البرستيج فقط انا كنت بتكلم عن الاوكتافيا او الفيكترا لان الشعب المصري معتقد ان الالماني يبقى برستيجو اعلى في كل الحالات !!!! يعني انا هروح اشتري عربية عشان اقتصادية كمان 6 سنين مثلا واحد تاني بيجيب ويجدد على طول حسب قدراته المالية فاهمني ؟

انا آسف جدا اني اقولك ان العربيتين مش قريبين من بعض ولا حاجة سعر اعادة البيع بيفرق كتير والنعومة بتفرق كتير والكورولا حسب سواقتي انا ثباتها اكتر من ممتاز على 180 وللأمانة معرفش فوق ال180 هتبقى ايه لكن خلينا واقعيين كل فين وفين هتسوق فوق ال180 ؟؟؟!!!!!

انا مش بقول انك ضد عربية بعينها انا بقول ان ثقافة العربية الالماني افضل ده مش موجودة في العالم غير عندنا حتى الخليج الي لسه بقاله 15 سنة بس يشترو عربيات غالية اكتر حاجة بيجيبوها الياباني وامريكا نفسها اكتر عربيات بتتباع فيها الياباني والتويوتا تحديدا.

الي عايز اقولو ان الأوكتافيا عربية ممتازة لكن انا بتكلم بعد 6 سنين مثلا مش هتكون مريحة زي الكورولا من الناجية الاقتصادية وعمر موتورها الإفتراضي اقل من الكورولا.

مدير مبيعات بيجو في ولا ية فيرجينيا وكان يعمل قبلها مبيعات في احدى توكيلات تويوتا (عندهم اكتر من وكيل) في أمريكا تونسي الأصل واسمو مسعد تقي ويعمل الآن مدير مبيعات نيسان المسعود في أبوظبي, قالي بالحرف ان الأمريكان بيشترو الياباني رغم ان عليه ضرايب وجمارك تجعلو اغلى من ما لو اشترو امريكي او اوروبي بسبب العمر الإفتراضي للموتور وان هو نفسو لما كان في امريكا رغم انو يعمل في توكيل بيجو الا انو كان شاري لنفسو عربية تويوتا كامري وزوجتو جابلها نيسان التيما, وقالي ان العمر الافتراضي مثلا عندهم في بيجو لاي سيارة 1600 سي سي هو 150 الف كيلو متر فقط بينما في تويوتا او هوندا من 250000 الى 300000 كيلومتر.

الي عايز اقولو واكررو تاني لو مش مهم العربية بعد 6 سنين هتعمل فيك ايه اشتري الي انت عايزو.

[tutankhamoun]

على فكرة انا لما قولت ممكن حد يشتري عشان البرستيج فقط انا كنت بتكلم عن الاوكتافيا او الفيكترا لان الشعب المصري معتقد ان الالماني يبقى برستيجو اعلى في كل الحالات !!!!

توضيح بسيط جدا ( أنا من أكتر الناس اللي ضد بلد المنشأ بالأساس ) يعني مش بحكم على العربيات ببلد المنشأ خصوصا اليابان و ألمانيا .
ثانيا الأوكتافيا مش ألماني ........... الأوكتافيا تشيكي .
ثالثا ........ أيوة الألماني برستيجه أعلى علشان غالي و مش أي حد بيقدر يشتريه
بس مش كل الألماني ...... أحنا بنتكلم عن مرسيدس و بي أم دبليو و أودي .
رابعا ..... ألأوكتافيا مش ألماني ...... و برضه برستيجها أعلى من الكورولا لسبب بسيط
التصميم المختلف ....... و الفخم و الشكل الذي له هيبه .
و أنا من الأول لا مع دي أو ضد دي .

يعني انا هروح اشتري عربية عشان اقتصادية كمان 6 سنين مثلا واحد تاني بيجيب ويجدد على طول حسب قدراته المالية فاهمني ؟
طيب أيه دخل الأوكتافيا و الكورولا في النقطة دي ؟؟؟؟؟؟؟؟

انا آسف جدا اني اقولك ان العربيتين مش قريبين من بعض ولا حاجة سعر اعادة البيع بيفرق كتير والنعومة بتفرق كتير والكورولا حسب سواقتي انا ثباتها اكتر من ممتاز على 180 وللأمانة معرفش فوق ال180 هتبقى ايه لكن خلينا واقعيين كل فين وفين هتسوق فوق ال180 ؟؟؟!!!!!

هو حد شكك في نعومة الكورولا ؟؟؟؟؟؟؟؟؟؟؟؟؟؟؟؟؟ و نعومة ماركة تويوتا عموما ؟؟؟؟؟؟؟؟؟؟؟؟؟؟؟
و بعدين 180 أيه ؟؟؟ حرام ... ربنا يهدينا و يهدي سرعتنا شوية علشان اللي بنعمله في نفسنا ده .

انا مش بقول انك ضد عربية بعينها انا بقول ان ثقافة العربية الالماني افضل ده مش موجودة في العالم غير عندنا حتى الخليج الي لسه بقاله 15 سنة بس يشترو عربيات غالية اكتر حاجة بيجيبوها الياباني وامريكا نفسها اكتر عربيات بتتباع فيها الياباني والتويوتا تحديدا.
حضرتك أفترضت أني ضد الكورولا و مع الأوكتافيا ........
و بعدين أفترضت تاني أن عندي ثقافة الألماني و الياباني ......
حضرتك أنا راكب جين 2 ......... ماليزي و فخور بها ماليزي كأول سيارة يتم تصنيعها في دولة من دول المؤتمر الإسلامي . و يمكن ده سبب رئيسي من أسباب شرائها بالاضافة لمميزاتها كعربية كويسة .
ثانيا ....... ثقافة الألماني ...... حضرتك بتستبدلها بثقافة الياباني بغض النظر عن العربية نفسها و جيت قلت أن الكورولا باعت أكبر مبيعات في تاريخ العربيات كلها ..... مع أنا شرحت وجهة نظري في الموضوع ووضحت و قلت أن دي طريقة تسويقية .
تويوتا عمرها ما باعت من نفس العربية الأرقام دي ....
تويوتا صنعت عربيات مختلفة بأسم واحد ....... و في الآخر قالوا أن هما باعوا أكبر رقم لموديل في تاريخ السيارات ....و ده كلام خالي من الصحة .
يعني فيه ناس ماشية بثقافة الألماني لا يُعلى عليه .
و طريقة حضرتك فيها أنحايز عالي جدا للياباني لمجرد أنه أقتصادي ..... مش عيب أني أختار عربية أقتصادية من وجهة نظري .... و توفرلي في مصاريفها ....... و برضه كل واحد حسب وجهة نظره و حسب استخدامه .
و أنا أصلا لو هاشتري عربية في السعر ده ...... لا هاجيب كورولا و لا هاجيب أوكتافيا ...... لأني شايف الأثنين مايستهلوش ثمنهم ........ و البدائل عندي
النيو سيراتو ........... أو الإلنترا ......... و بالتأكيد لو قررد أركب عربية فوق 100 ألف ممكن أروح ماليزيا أشحن جين 2 cps اللي هي 127 حصان ........ و أبقى ركبت عربية محترمة ووفرت فلوس كتير .
و في النهاية دي آراء .... كل واحد عنده احتياجات مختلفة ........ و عنده رأي مختلف .
فحضرتك بتقول أن الناس بتروح تدفع فلوس كتير في عربيات ألماني علشان خاطر هي اللماني ......
طيب و اللي بيشتري تويوتا بالذات ......... مش بيدفع فلوس كتيرة برضه لسلعة التوكيل مغالي في سعرها و حضرتك روحت أشتريت بكل رضى السلعة ...... علشان خاطر أسم تويوتا ؟؟؟؟؟؟؟؟؟؟؟؟



الي عايز اقولو ان الأوكتافيا عربية ممتازة لكن انا بتكلم بعد 6 سنين مثلا مش هتكون مريحة زي الكورولا من الناجية الاقتصادية وعمر موتورها الإفتراضي اقل من الكورولا.

العمر الأفتراضي للعربيات الأوروبي عالي و عن تجرية ......... و الأوكتافيا مش عربية جاية من تحت بئر السلم أو عربية صيني علشان نقول بعد ستة سنين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
و لو أتكلمنا عن العمر الأفتراضي للمواتير ........ بالأساس الإستهلاك الشخصي بيفرق .....
ثانيا الأوكتافيا و الكورولا الفروق بينهم لصالح قوة موتور الكورولا و نعومتة فقط لا غير ....
إنما عمر افتراضي و كلام من ده ............ حضرتك جانبك الصواب هذه المرة .


مدير مبيعات بيجو في ولا ية فيرجينيا
أولا بيجو مش موجودة في السوق الأمريكي !!!!!!!!
وكان يعمل قبلها مبيعات في احدى توكيلات تويوتا (عندهم اكتر من وكيل) في أمريكا تونسي الأصل واسمو مسعد تقي ويعمل الآن مدير مبيعات نيسان المسعود في أبوظبي, قالي بالحرف ان الأمريكان بيشترو الياباني رغم ان عليه ضرايب وجمارك تجعلو اغلى من ما لو اشترو امريكي
الكلام ده ...... كلام مُرسل .......... لأن الأمريكي بيشتري الياباني بسعر رخيص لأن اليابان عندها مصانع تجميع في أمريكا لأغلب ماركتها ( تويوتا ..... هوندا ...... مازدا ....... الخ ) و بعدين العربيات الياباني أنعم من الامريكاني أصلا .و أكثر أقتصادية و مع كل ازدياد في أسعار البنزين الكل بيتجه للمواتير الأصغر اللي بتوفر في البنزين .

او اوروبي
الأوروبي في السوق الأمريكي أصلا قليل ...... لأن أغلب العربيات الأوروبي بتعمل عربيات هاتش باك صغيرة و ده مش متوافق مع السوق الأمريكي
و بالتالي مش هانلاقي ماركات كتيرة من أوروبا موجودة في السوق الأمريكي
هانلاقي الالماني ..... و هانلاقي الفولفو ......
بسبب العمر الإفتراضي للموتور وان هو نفسو لما كان في امريكا رغم انو يعمل في توكيل بيجو الا انو كان شاري لنفسو عربية تويوتا كامري وزوجتو جابلها نيسان التيما, وقالي ان العمر الافتراضي مثلا عندهم في بيجو لاي سيارة 1600 سي سي هو 150 الف كيلو متر فقط بينما في تويوتا او هوندا من 250000 الى 300000 كيلومتر.

طبعا كلام برضه مُرسل
لأن البيجو بالذات ........... له تجربة في مصر ........ محدش يقدر ينكر التجربة دي و اللي العربيات بتاعتهم مازالت بتجري في شوارع المحروسة المكسرة المدشدشة و لسة شغالة تاكسي ..... يبقى الراجل التونسي ده بيألف رسمي .
ثانيا في أوروبا و أمريكا لأن العربيات رخيصة مش بيهتموا أصلا بكلمة عمر أفتراضي للموتور !!!!!!!!!!!!!!!!!!!!!!
و محدش فيهم بيشتري عربية علشان تقعد معاه العمر زي مصر أو الدول الفقيرة....
ثالثا و الأهم .......
يا نهار أبيض حضرتك عايز تقنعني أن العربيات الأوروبي عمرها الأفتراضي و عمر مواتيرها ........ أقل من الياباني .
بصراحة مش لاقي تعليق أقوله أصلا .
الجين 2 في الكتالوج مكتوب أن العمر الأفتراضي بدون أي مشاكل في الموتور هو ربع مليون كم .
فشوف بقى شركة زي بروتون تديك عمر أفتراضي ربع مليون كم ......... يبقى بيجو تكون أقل ؟؟؟؟؟

بالمناسبة ...... أنا أعرف عمي معاه هيونداي كوري ...( تخيل مش ياباني ) و العربية عاملة دلوقتي 220 ألف كم و الموتور زي ما هوه بدون عمرات و لا الكلام ده .
عربية تاني فيات بونتو .......................... 190 ألف كم بدون عمرات .....
عربية دايو لانوس .......... 185 ألف كم بدون عمرات ..............
عربية هيونداي أكسنت القديمة 210 ألف كم ..... بدون عمرات .
عربية لانسر ياباني ..... و صاحبها سواقته وحشة و تقريبا عمل عمرة للموتور على 150 ألف ؟؟؟؟؟؟؟
طيب فهمنا من كدا أيه ؟؟
هل اللانسر الياباني عمرها الأفتراضي قليل ؟؟؟ طبعا لاءة ....... السواق هو اللي مش كويس و كان مهمل و قضى على الموتور بدري .و العكس مع العربيات التانية .



الي عايز اقولو واكررو تاني لو مش مهم العربية بعد 6 سنين هتعمل فيك ايه اشتري الي انت عايزو.

برضه كلام عائم يا أستاذي ....
لأن أحنا هنا مش بنتكلم عن عربية صيني .......
ده أحنا بنتكلم عن عربية محترمة تصميما و أنتجها ناس فاتحين في العربيات من قبل سنة 1900 ما تبدأ أصلا .يعني سنة 1895 . ( التاريخ القديم لوحده مش كفاية علشان نحكم على عربية )
يعني مش بنتكلم عن عربية لسة طالعة أول أمبارح
كلام حضرتك محسسني
أن احنا بنقارن
عربية صيني ........... بالقديسة الكورولا ............

في النهاية أنا لا مع دي و لا ضد دي و بوضح للمرة التانية أنا كنت برد عى نقطة عدد مبيعات كورولا في التاريخ بس .
و العربيتين لا يعنوني في شئ لأنهم غاليين جدا و أستحرم أحط 155 ألف جنيه في أي منهم !!!!!! ( ده رأي شخصي ) .
يعني تفوق الكورولا أو تفوق الأوكتافيا ليس من شأني لأن لا عضو منتدب في تويوتا أو سكودا .
أنا مجرد مستهلك بأشتري العربية منهم علشان تقضي مشاويري و الموضوع مش مستاهل كل الكلام ده .
و ربنا يباركلك في التويوتا بتاعتك و يحفظك منها و يحفظها لك .
مع تحياتي