تجربة سيئة مع توكيل بيجو و السيارة 301

**Ahmed Magdy Ma** · 14-10-2013 07:54 PM

الاعزاء ملاك بيجو
اريد اخذ رايكم في الاتي:

قمت بشراء السيارة ماركة بيجو 301 مانيوال موديل 2014 من صالة العرض الخاصة بشركة القاهرة للتنمية و صناعة السيارات "بيجو" فرع سابا باشا بالاسكندرية بموجب الفاتورة رقم 13/1751 المؤرخة 2013/08/18 "

بمجرد استخدام السيارة خلال الاسبوع الاول من الاستلام تلاحظ سماع صوت غير طبيعي عند استخدام الديبرياج و بناء علي ذلك توجهت الي مركز خدمة بيجو بمنطقة مرغم بالعامرية بالاسكندرية قبل ترخيص السيارة علما ان عداد الكيلومترات الخاص بالسيارة لم يتعدي فقط 300 كم.

قام المسئولين بمركز خدمة بيجو بالاستماع الي شكواي الخاصة بالصوت الغير طبيعي عند استخدام الديبرياج و بعد قيامهم بفحص السيارة افادوا بعدم وجود اي عيب او خلل بالسيارة و ان هذا الصوت سوف يتلاشي بعد فترة قصيرة من الاستخدام و اوصوا بالاستمتاع بقيادة السيارة دون قلق و معاودة زيارة مركز خدمة بيجو بعد قيادة السيارة لمسافة 2500 كم حيث توجد اول نقطة فحص و صيانة للسيارة.

بعد فترة قصيرة تلاحظ استمرار الصوت الغير طبيعي موضوع الشكوي و بناء علية عاودت زيارة مركز خدمة بيجو علما ان المسافة الاجمالية المقطوعة بالسيارة لم تتجاوز فقط 1550 كم و بعد تكرار الشكوي داخل مركز الخدمة و بعد قيام المسئولين بفحص السيارة و قيامهم بتجربة السيارة و الاستماع بوضوح الي الصوت الغير طبيعي المزعج افادوا بضرورة تغيير طاقم الديبرياج " الاسطوانة و الديسك و رولمان البلي" نظرا لوجود عيب صناعة.

بناء علي ما سبق طلبت استبدال السيارة باخري جديدة بدون عيوب صناعة من نفس الموديل او رد كامل قيمة السيارة حيث رفضت الشركة ذلك و افادوا بطلب اصلاح السيارة داخل الضمان.
اني في قمة الدهشة من وجود ذلك العيب القاتل بالسيارة و الذي قد يظهر في السيارات المستعملة بعد فترة تتجاوز السنوات من استهلاك السيارة و بعد قطع مسافات طويلة بالسيارة و ليس فقط 300 كم و فترة لا تتجاوز 45 يوم.

تجدر الاشارة انة لاصلاح عيب الصناعة المشار الية ينبغي احلال ناقل الحركة "الفتيس" الخاص بالسيارة و فصلة عن الموتور و احلال اجزاء من العفشة الامامية و تغييير الاسطوانة و الديسك و الرولمان بلي. !!!!

هل من المعقول ان يتم هذا في سيارة جديدة!! هذا اشبة بنصف عمرة لسيارات قديمة تجاوز فترة استخدامها العديد من السنوات و قطع مسافات كبيرة بها.

اية رايكم في الكلام دة...هل دة مقبول من شركة محترمة ؟

نظرا لرفض الشركة استبدال السيارة او رد ثمنها عملتلهم شكوي في حماية المستهلك و محضر في قسم اول الرمل و نيابة الرمل اول و جاري تصعيد الاجراءات القانونية ضد شركة بيجو.

**amrelsaqqa** · 14-10-2013 07:59 PM

لا حول ولا قوة الا بالله
ربنا معاك وما تسيبش حقك

**medori** · 14-10-2013 08:18 PM

بيتهيألى صعب موضوع تغيير العربية خالص دة او حتى رد تمنها، بدل العيب مش قاتل و ممكن يتصلح اعتقد هيرفضوا و هيصروا على موقفهم، هو اللى من حقك اكيد و مفيش فية كلام ان العربية تتصلح و يتغير طقم الدبرياج و تستلم العربية سليمة من غير ما تدفع ولا مليم.
عامة اللى فية الخير يقدموا ربنا و شوف حماية المستهلك هيقولولك اية، الناس دى فاهمة و عارفة اية اللى من حقك و اية لأ

**amrelsaqqa** · 14-10-2013 08:32 PM

وانا بصراحة رأيي من رأي استاذ احمد لان عيوب الصناعة واردة والضمان معمول عشان الحاجات دى والطقم هيتغير ومش هيأثر على العربية في حاجة ان شاء الله
خلى بالك ده مجرد ان حصل غلطة والعربية عدت بطريقة او بأخرى من الفحص النهائى ، واكيد بعض العربيات اللى بتوصل سليمة تماما للمستهلك بيكون حصل لها حاجات مشابهة بس بتكون قبل ما توصل للمستهلك وبتتعالج عادي ، يعنى اكيد في عربيات تانية حصللها نفس مشكلة الدبرياج دى بس تم اكتشافها قبل مغادرة المصنع ، في الحالة دى مش بيرموا العربية في الزبالة ، بيتصلح العيب وبيتكشف عليها تانى وتخرج من المصنع في طريقها لصاحبها ، واسأل برضه حماية المستهلك ايه حقوقك في الحالة دى وربنا يعمللك ما فيه الخير ، بسيطة ان شاء الله

**mohamed hussei** · 14-10-2013 09:06 PM

متابع

**Ahmedshalaby** · 14-10-2013 09:21 PM

بصراحة ربنا يكون في عونك على مثل هذا العطل
ولكن مافيش شركة بترجع عربية او تبدلها للعميل و مقارنة بشركات تانية شركةبيجو تشكر ان هم هيتكفلو بتصليح العطل كاملا في الضمان بدون تهرب منك
مع العلم ان تغيير طاقم الدبرياش اسطوانة و ديسك ليس بالشئ الضخم و لا عمرة و لا له علاقة بالموتور
و اذا لم يتم التصليح كاملا يحق لك ساعتها انك تقاضيهم

**M I D O** · 14-10-2013 09:25 PM

اعتقد صعب جدا يدولك فلوسك او يغيرولك العربية لان العيب ممكن يتصلح ومجاش في حاجة كبيرة زي المحرك او الفتيس وعندك مثال غبور معا الجيلي واحد الفتيس عندة راكب غلط ورفضو يغيرولة العربية وهيغيرولة الفتيس في الضمان الحالة الي ينفع بسببها تغير العربية او تاخد فلوسك هية الشكوي في حماية المستهلك وعمل لجنة من كلية الهندسة تشوف العربية ينفع تتصلح وترجع زيرو ولا لا لو منفعش بتاخد فلوسك لو ينفع بتتصلح وتستلمها

**modysasazin** · 14-10-2013 10:05 PM

السلام عليكم
كل سنه وحضرتك طيب
حضرتك ليك حق تضايق وتزعل لانك شاري عربيه زيرو والطبيعي انه مايبقاش فيها الهوى
بس قدر الله وماشاء فعل وقدرك انه يطلع فيها عيب صناعه
والحمدلله انها جت على العيب ده وصدقني الموضوع ابسط مما تتخيل
وفك الفتيس وتركيبه ده مش مشكله خالص واي فني فاهم شغله يقدر يعمله بكفاءه
وخلي بالك مادام التوكيل عرض انه يصلحها يبقى خدمة المستهلك مش هيفيدك ولا هيعملك حاجه
حاول ماتخنقش نفسك واستمتع بالعربيه وكل سنه وانت طيب

**hugan** · 14-10-2013 10:05 PM

في جميع لااحوال هايجي وقت وهاتغير ديسك واسطوانه
الديسك والاسطوانه من ضمن السرفيس الطبيعي بتاع اي عربيه مانيوال
الشيء المقلق انه يكون موجود في عربيه زيرو
ومش اي عربيه
بيجو اوروبي