السلام عليكم
العربية عملت 10600 فرحت امبارح كنت بعمل صيانة ال10000 لعربيتي الm11 ...
الصيانة خدت 80 مصنعيات + 330 زيوت"5 لتر" و فلتر + ضرائب باجمالي 430 جنيه ......
المفروض كنت اصرف وصلة امامية للشكمان علشان الزنة اللي بتطلع و انا كدة كدة اتوافقلي علي الوصلة الامامية بس لسة مجتش من ابو رواش ... بس انا اساسا الزنة مبتطلعش دائما و كدة كدة مش مؤثرة علي اداء العربية .. و بصراحة مكسل جدا اروح ابو رواش ....
غير ان برضه امبارح اشتكيت ان العربية احيانا بترعش مع الفرامل الخفيفة علي السرعات العالية ... كشفوا علي التيل و الطنابير و التقرير طلع ان التيل سليم بس الطنابير فيها ريجة " عالي و واطي" و طلبوا برضه طنابير علي الضمان .....
مع ان الاسهل و الاوفر ليهم انها تتخرط في 5 دقائق بس شغل توكيلات بقي .... هما كده كدة ليه يصلحوا طالما هيغيروا علي حساب شيري؟؟؟؟
برضه علشان انا احاول احافظ علي الطنابير الجديدة سألتهم هل انا ممكن ابقي اشتري تيل خارجي و اركبه و هل ده يأثر علي الضمان ؟؟ قالولي عادي و مفيش مشكلة ....
انا اصلي لما لقيت ان التيل سليم و الطنابير هيه اللي اتأثرت قولت يبقي اكيد غير ان الطنابير خفيفة اكيد التيل زبالة و ناشف علشان كده بياكل في الطنابير .... فيبقي ان شاء الله هشتري تيل محترم و لما يجو يغيروا الطنابير اركبه معاها و نشوف ايه اللي هايحصل ان شاء الله " طالما كده كده التيل من المستهلكات و بنشتريه علي حسابنا يبقي نستنضف بقي "
بس برضه ابو غالي في رأي احسن من توحة .... مبيتنحوش و مبيقولكش لا العربية سليمة و مبيقولوش لا ده سوء استهلاك ..... طالما اشتكيت و الحاجة بايظة فعلا بيعمل تقرير و يطلب الحاجة علي الضمان ....
و لما سألت استاذ علي طب انا اجي اسأل علي الوصلة و الطنابير ولا ايه النظام قالي لا حضرتك خدمة العملا عندنا لما الحاجة تيجي هتكلم حضرتك علشان تيجي تركبها ....
برضه في ملاحظة ان العربية منورتش لمبة الصيانة ..... بس انا كان معادي "3 شهور من صيانة ال5 " 27-5 بس انا اللي روحت بدري ... فلما قولتلوا قالي لو نورت تعالي و نطفيهالك وانت واقف .....
برضه سألته علي موضوع لو جيت بعد ال 3 شهور هل الصيانة تروح عليا ولا ايه؟؟؟ قالي ابو الفتوح بيعمل كدة بس همه لا .... الكلام منه بالظبط كان" اكيد لا طبعا لان لو انت مسافر و لا في عمرة مثلا هل هجبرك انك تيجي ؟؟؟ اكيد لا و لما تيجي بالسلامة يبقي تعمل صيانتك عادي ان شاء الله"
وانا بتفرج عبيعملوا ايه في الصيانة .. لقيت الولد فتح الكبوت ... فتح كل القرب ... زود ميه المساحات و كل الباقي كان علي المكسمم ..... كشف علي زيت الفتيس من تحت .... كشف علي التيل و الطنابير قدام و ورا ...
و طبعا ربط كل العفشة و المسامير من تحت .....
كالعادة العربية كانت بدأت تنهنة من ورا بس لما اتربطت بقت زي الفل الحمد لله
اول معرف جديد عن الطنابير و الشكمان هقولوكوا و ربنا يكرم الجميع ان شاء الله ....
صباح الخير و يوم سعيد في اسبوع جديد ان شاء الله
المفضلات