الف شكر يا رجاله علي شعوركم الجميل والله انا حاسس ان اهلي وقرايبي هم اللي بيواسوني و يخففوا عني
المشكلة اللي ابتديت اعاني منها بدات ليلة امس الساعة 11.30 مساءا فوجئت بالباب بيخبط فتحت لقيت اتنين ستات قرايب الواد الحرامي وقعدوا يتمسكنوا و يتشحتفوا عاوزيني اغير اقوالي لما الموضوع يوصل للمحكمة واقول ان الحاجة اللي اتظبطت مع الواد مش حاجتي واني ما باتهمهوش بحاجة وبالتالي القضية تبوظ والواد يطلع منها
طبعا انا في الاول اتكلمت بالذوق وقلت لهم انا اصلا قولت في محضر النيابة اني ما شفتهوش وهو بيسرق ولا شفت الحاجة معاه ولا شفت عربيته التاكسى واقفة جنب عربيتي واني ما بافتريش عليه لكن الشرطة هي اللي ظبطته متلبس وهو بيسرق ولقت المضبوطات بتاعتي معاه مرمية جوه عربيته التاكسي اللي كانت واقفة جنب عربيتي ولما الشرطة طلبتني نزلت لقيت العربية ازازها مكسور والواد خدوه للقسم بعربيته يعني انا ما شفتهوش الا في القسم
طبعا فضلوا يتمحلسوا وقالولي طب ممكن تغير اقوالك امام القاضي في المحكمة وتقول ان الحاجة اللي لقوها معاه مش حاجتك (ده غلبان والله وماعملش حاجة وامناء الشرطة هما اللي لفقوهاله) ساعتها انا اتنرفزت عليهم وشخطت فيهم وقولت مش عاوز اشوف وشكم هنا تاني واللي هايقرب ناحية هنا هابلغ البوليس واعملكم محضر عدم تعدي وووووو ......
انا مش عارف اعمل ايه انا شكلي دخلت في مصيبة غصب عني ربنا يستر بقي
المفضلات