الموضوع: اللي بيحب السرعة يتفضل هنا

المشاركة الأصلية كتبت بواسطة devilishtigers

مفيش لانسراوي تاني علم على عربية تانية ولا ايه ....؟؟؟؟
دي الكليبات بتاعت الاخ dr.sherif تخلي الواحد مبسوط ومتفائل

بصراحة اللانسر ممتازة و الأحسن فراملها و ال ABS و ال EBD اللى فيها ....

لأن اقصى سرعة جبتها بعربيتى كانت هاتتسبب بكارثة بس ربنا ستر ... و مابحبش افتكر اليوم ده و علشان كده مش باجيب سيرته و لكن للأمانة ال 140 ماكانتش اقصى سرعة جبتها ، دى اقصى سرعة مشيت عليها لفترة ، اقصى سرعة جبتها انا بأقسمهم 4 مرات ..

نبدأ باللى معايا دلوقت و اللى مش باحب افتكر يومها و ده السبب الأقوى دلوقت انى ضد السرعة ...

من حوالى سنة و نصف تقريبا ، و كنت لسه فرحان بالعربية الجديدة ، اختى الصغيرة كانت معايا و كنت باخلص ورق ليها فى بنى سويف و كمان المدام و راجعين القاهرة ، و دلونى على طريق جديد (مش فاكر اسمه ، باين طريق الكريمات او حاجة زى كده) ، و فعلا كان معظمه دوغرى و زى الحرير ، و كنت متأخر و لسه هارجعهم و استعد لميعاد العيادة فقررت (و كان اكبر غلط) انى اجرى ، و خصوصا ان واحد (الله يسامحه) قال لى ان الطريق لسه مافيش عليه رادار علشان جديد ، و الجنان ابتدأ و وصلت حوالى 160-165 تقريبا و لكن مالحقتش لأن فجأة لقيت جزء هابط من الطريق و لسه مش متسفلت او فيه مشكلة و وقفت على الفرامل و طبعا علشان السرعة الجنونية اللى كنت عليها ماكانش من الممكن انى العربية تقف قبلها ، و اضطريت اخد شمال و انا لسه دايس فرامل و بعدين اعدل العربية علشان اتفاداها ، و الحمد لله ال EBD نفعتنى هنا و ال ABS بفضل ربنا منع زحلقة العجل على التراب و الرمل فى الحتة دة و لما العربية وقفت و اطمنت ان كل حاجة سليمة و اللى معايا بخير ، سجدت على الرمل شكر لله ، لأن كان ممكن لو عربية تانية تتقلب مع المناورة شمال او تلف حوالين نفسها مع الرمل و التراب ، و لكن ربنا ستر ، و كل ما افتكر المسافة اللى العجل معلم فيها على الأرض لحد ما العربية وقفت احس بمدى التهور اللى الواحد عمله.

سنة 1995 فى اولها تقريبا كان معايا البطة ، و اتمسكت رادار على 155.

سنة 1984 أول عربية سقتها كانت عربية الوالد الله يرحمه ، تويوتا كريسيدا موديل 83 ، و كنت مع اخويا الكبير و على هاى واى فى الرياض بالسعودية و وصلت حوالى 170 ، كانت عربية زى الوحش ، بس خفت اكمل لأنى اولا كنت جديد فى السواقة ، و ثانيا المرور هناك مابيرحمش لو اتمسكت ، فهديت قوام.

سنة 1985 دى اقصى سرعة بجد وصلت ليها و كمان سقت عليها لفترة ، كانت بونتياك ترانز ام موديل 1984 بتاعة واحد صاحبى و وصلت ل 126 ميل (كان عداد ديجيتال) يعنى حوالى 200 كم و شوية ، و كان وقتها حاجة فظيعة ، كانت عربية خرافية ، شكلها تحفة ، و كانت سوداء ، 5000 cc و 8 سيلندر 190 حصان و كان مكتوب على جنابها H.O يعنى موتورها High Output ، بصراحة مالهاش حل و لسه فاكرها..

آدى حكايتى مع السرعة.

و ربنا يحفظنا من الجرى و بلاويه

المشاركة الأصلية كتبت بواسطة devilishtigers

1- دكتور شريف الحاجة الوحيدة اللي انا معترض مع حضرتك فيها هيا الفرامل الكويسة بتاعتها. انا لسا كنت جايب العربية جديدة وكنت ماشي في صلاح سالم على 80 وعملت غرزة ولقيت عربية قدامي دوست فرامل بس العربية ما وقفتش ودخلت فيها حتى انا ما سمعتش صوت الفرامل وهي بتصفر او العجل بيحك في الارض بصراحة من ساعتها وانا مش حابب الفرامل بتاعتها خالص. ونويت اني لما المرحومة تتصلح هخدها واروح التوكيل اكشف على الفرامل يمكن فيها حاجة بس المشكلة انها ماشية 2500 كيلو بس فأنا مش عارف في ايه وقلت دا نصيبها كدا.

الحمد لله على سلامتك ، بصراحة مش عارف ايه الحكاية معاك ، بس خد بالك فيه عوامل كتير بتتحكم فى الموضوع ده ، المسافة بينك و بين اللى قدامك ، وقف مرة واحدة و لا هدى و بعدين وقف ، انت سرعة استجابتك ايه ؟؟ ضغطتك على الفرامل مقدارها ايه ؟ و بعدين خد بالك ان الفرامل ال abs لو اشتغلت بتحتاج مسافة اطول شوية ، ده غير ان ممكن فعلا يكون الفرامل كان فيها حاجة ، الحمد لله معايا عملت بأصلها.

المشاركة الأصلية كتبت بواسطة devilishtigers

2- الحمد لله على سلامتك وسلامت اللي كانوا معاك وانا فعلا وبقر ان السرعة مش حلوة.

شكرا لك ، و مليون % السرعة مالهاش لازمة و خطر بلا داعى.

المشاركة الأصلية كتبت بواسطة devilishtigers

3- في نفس الوقت انا من عشاق الغرز قبل السرعة حتى بعد الحادثة بردو الواحد مش هيتعلم.

ربنا ستر و الحمد لله على سلامتك ، بس راجع نفسك و اتحكم فى نفسك شوية. إسأل مجرب ، التحكم فى النفس احسن بكتييييييييييير.

المشاركة الأصلية كتبت بواسطة devilishtigers

4- حضرتك كاتب وقلت على السرعات اللي مشيت عليها واضح انك من محبين السرعة من زمااااااااااان يا ترى مش نفسك دلوقتي تجري او تشد مع حد. اصل اللي بيحب حاجة ويبقى غاويها صعب يبعد عنها.

شوف يا عزيزى ، انا دلوقت عمرى 40 سنة ، و الحاجات دى (ما عدا السنة اللى فاتت و كانت غلطة باندم عليها و زى ماقلت ما بحبش افتكرها) كلها كنت صغير ايامها ، 14 و 15 و 25 سنة. و دلوقت لما بافتكر اللى كنت باعمله مش عارف هاتصدقنى ولا لأ لو قلت لك انى باندم على المخاطرات اللى كنت باعملها ، و دلوقت حتى لما حد يستفزنى باكبر دماغى ، ايه اللى هاستفيده او اخسره لو سبقت حد او سبقنى ؟؟؟ ولا حاجة .. لكن لو حصل لا قدر الله حادثة اكيد هايبقى فيه خسارة و ممكن تبقى غالية جدا ... انا عندى بنتين توأم عندهم 9.5 سنين ، كل ما بآجى اجرى بافكر فيهم و انسى الجرى على طول... و ممكن تبطل الجرى لو عايز ، الأنسان هو اللى بيعمل العادة و يسيبها تتحكم فيه ، لكن الأرادة تغلب اى شئ ... فقط لو انت عايز بجد ...

المشاركة الأصلية كتبت بواسطة devilishtigers

5- انا كان معايا 127 (حبيبت فلبي) واقصى سرعة جبتها بيها كانت 130 في صلاح سالم والحمد لله الحمد لله جريت مع بيجو 504 و accent ولانسر (بتاعت قريبي) وعلمت عليهم كلهم. وبعد الحادثة بردو انا من عشاق الغرز + السرعة

معاك انه بيبقى شعور ممتع و لكن لحظيا ، و السؤال المهم ... و بعدين ؟؟؟ هل استفدت حاجة من كده ؟؟ عموما هى المهم فيها انك تعرف تتحكم فى نفسك اولا و فى العربية ثانيا ... و ربنا يحفظك و يحفظنا جميعا..

و تحياتى

ال 1600 ممكن تقفل العداد ولكن عيش مع صوت الموتور أو أشترى سدادات ودان ...