قصه نجاح ..وقصص فشل(تجربه حياه)

**A7MED_PHARMA** · 20-12-2009 12:48 AM

المشاركة الأصلية كتبت بواسطة ghada_zaky

طيب وعملت ايه فى الامتحان بعد كل السهر والمذاكرة ديه ؟؟؟؟؟؟؟؟؟؟؟؟؟؟؟؟؟؟؟

الحمد لله تمام..
بس بقولك
يومها كان يوم برد غير طبيعي
تخيلي معايا
كنت لابس بنص كم ..وماشي تحت قدام المدينه في الشارع ..والجوو برد برد
وكنت مصمم أراجع ..مع اني كنت مذاكر كويس..
بس الفكره أيامها كان الواحد جواه طاقه كبيره أوي
وفي الأخر ..أخدنا إيه ...
ياريت تعبنا ده كان جه بفايده .
انا قصدي فشل نظامنا التعليمي ..ونظامنا الاجتماعي..ونظامنا المهني
فهمتي قصدي يا غاده

**ghada_zaky** · 20-12-2009 01:01 AM

المشاركة الأصلية كتبت بواسطة a7med_pharma

الحمد لله تمام..
بس بقولك
يومها كان يوم برد غير طبيعي
تخيلي معايا
كنت لابس بنص كم ..وماشي تحت قدام المدينه في الشارع ..والجوو برد برد
وكنت مصمم أراجع ..مع اني كنت مذاكر كويس..
بس الفكره أيامها كان الواحد جواه طاقه كبيره أوي
وفي الأخر ..أخدنا إيه ...
ياريت تعبنا ده كان جه بفايده .
انا قصدي فشل نظامنا التعليمي ..ونظامنا الاجتماعي..ونظامنا المهني
فهمتي قصدي يا غاده

فهمت قصدك
بس بعد ما الزمن يعدى والواحد يفتكر الحاجات ديه بيبقى فخور بيها . مش مجرد النجاح بس كفاية التصميم اللى اتعمل علشان يحقق ده و بيبقى جزء كبير من اثبات الذات .
وانا فى اولى كلية فى الترم الاول كان عندى مادة طول عمرى كنت شاطرة فيها من اقل مجهور بعمله و كنت فاكرة انى حفضل طول عمرى كده انى مذاكرهاش وانجح فيها واجيب اعلى درجة كمان . لحد ما دخلت الامتحان الترم الاول وانا مش مذاكرة قوى و طلعت بالمادة ديه.
وفاكرة حالاتى ساعتها كانت ازاى
الموقف ده لحد دلوقتى انا فاكراه كويس قوى لانه غير كتير فى حياتى
بعد كده كانت كل تقدايراتى فى المادة ديه على الاقل جيد جداااا ده فى اسؤاء الظروف وعادة امتياز وكمان فى باقى المواد و بقيت دايما من الاوائل على دفعتى .
دلوقتى بعد ما السنين مرت لما بفتكر بفتكر انا قدرت احقق ايه .
دايما اللحظات الصعبة لما الواحد بيحقق فيها نجاح بتفضل دايما فى خياله وهى ديه الدروس اللى بيتعلمها وبتفرق من واحد لواحد .

**A7MED_PHARMA** · 20-12-2009 01:01 AM

تجربه تانيه بقا حصلت ليا
ودي سبحان الله عليها ...
حكمه ربنا فيها ..
الي بيعمل خير ..بيلاقي الخير

كنت في القاهره عند جماعه اصحابي وراجع الصيدليه بالليل ..لقيت عربيه فيات قديمه أوي ( حتى مش عارف موديلها إيه ) صاحبها واقف مستني حد يقفله ..الراجل كان الكاوتش بتاعه نايم ومش معاه استبن ولا حتى كوريك..كان معايا وليد صاحبي
الراجل والله صعب عليا ..وقفتله ..واديته الكوريك بتاعي ..واخدت الكاوتش بتاعه وروحت عند اقرب واحد بتاع كاوتش ..لقيته قافل( كنا حوالي الساعه 2 صباحا) ..روحت للي بعده ..برضوو لقيته قافل ..كملت لحد ميت غمر ..عملتله فردة الكاوتش ورجعت
حوالي ساعه ونص بالظبط وانا ماشي ع الاسفلت بدور على حد فاتح بتاع كاوتش ..لحد ماوصلت ميت غمر عملته هناك
المهم
رجعت ..لقيت الراجل ( وكان معاه مراته وعياله ) نايم في العربيه..
اديته الكاوتش ..وركبه ..وشكرني ومشيت

,
,
,
بعدها بشهر أو إتنين
ماشي بعربيتي الدايو ( قبل ما تتباع ) مروح من الصيدليه للبيت من طريق زراعي
فجأه ..النور فصل ..نزلت اشوف فيه ايه ..معرفتش
وكانت حوالي الساعه 4 الفجر..
طيب اعمل ايه
استني لحد الشمس ماتطلع ..عشان اعرف اروح
ماهو مستحيل امشي من غير نور في طريق زراعي بالليل.
الحمد لله ..دقايق
عربيه نوبيرا (ملاكي اسكندريه ) معديه ووقف من غير مااشاور له
نزل صاحبها يبص معايا ع النور الي فاصل...برضوو معرفش
المهم
الراجل –كتر خيره-مشي قدامي لحد ماوداني لحد باب بيتي..شكرته
ومشي

.الي بيعمل خير ..بيلاقي خير ..والله ياشباب
عشان كده أنا عمري – على قد مااقدر-ما إتأخرت عن مساعده حد .
عشان ربنا
وعشان يمكن كنت اكون انا مكانه

دقايق بقا وأحكيلكم أخطر مواقف حياتي

**beautiful0mind** · 20-12-2009 01:13 AM

المشاركة الأصلية كتبت بواسطة a7med_pharma

.الي بيعمل خير ..بيلاقي خير ..والله ياشباب
عشان كده أنا عمري – على قد مااقدر-ما إتأخرت عن مساعده حد .
عشان ربنا
وعشان يمكن كنت اكون انا مكانه

دقايق بقا وأحكيلكم أخطر مواقف حياتي

ربنا سبحان وتعالى يادكتور قال انا عند حسن ظن عبدى بى خير لخير وشر لشر

وانت عملت الخير مع حد متعرفوش وجه اليوم ان حد يردلك نفس الموقف و......ساعدك بغرض المساعدة بس ...........يارب كولنا نتعلم من المواقف دى

تحياتى يادكتور ومنظرين .....المخاطر ........اتمنى يكون فيها أكشن

**A7MED_PHARMA** · 20-12-2009 02:18 AM

الموضوع ده بقا يضحك موووت

انا عندي بندقيه صيد رمسيس 2 ..بمنظار ألماني
عشان انا بركب العربيه لوحدي...كنت تلاقي حاجات غريبه على الكنبه ورا ...ممكن تلاقي كبايه شاي فاضيه ..وممكن تلاقي علبه كشري فاضيه ..حاجات غريبه كده
المهم ..البندقيه كانت محطوطه ورا في الكنبه..

[IMG][/IMG]
طق في دماغي إني أروح شرم الشيخ لجماعه اصحابي شغالين هناك( مكنتش متخيل ان مشوار شرم الشيخ ده علقه سخنه لو مسافر لوحدك والتكييف بتاع العربيه مش شغال).
المهم ..غيرت زيت ..وفولت العربيه ..وشيكت ع الميه وكل حاجه
وإتكلت على الله
كان تقريبا يوم 16 في شهر يوليو الي فات
ماشي .. ماشي ..ماشي ولا بيدي
لحد ما عديت النفق ..ودخلت أول كمين بعد النفق ( انا مش حافظ الطرق أوي ..بس متهيألي كان إسمه كمين العين السخنه).
المهم ..دخلت الكمين
شافوا الرخصه ..وكل تمام ,,عدي يادكتور ( مكتوب في رخصة سواقتي طالب بطب القاهره- زي البطاقه..أنا مغيرتش بيانات بطاقتي بعد ماحولت من طب)
لسه بعدي
الظابط شاف البندقيه ع الكنبه ورا
إركن على جنب وانزل رافع ايدك

أنا أعصابي سابت
مش عارف هوا عمل كده ليه( ماأخدتش بالي أصلا إن البندقيه معايا في الكنبه)
.
نزلت رافع إيدي
وإتلموا حواليا ..المهم لما شافوا البندقيه بتاعة عصافير..هديوااا خالص
وأنا الي اعصابي كانت هتروح مني
دخلت مع الظابط مكتبه ..واخد مني بطاقتي
ومسك تليفونه المحمول( بيكلم جهه غير معلومه ) وإداهم بياناتي الي في البطاقه.الظابط بجد كان محترم..كان في حوالي 3 ظباط في الكمين
مسكوا البندقيه بتاعتي وقعدوا يهزروا مع بعض بيها

واحد فيهم كان شكله مدايق مني في حاجه
بيقولي :" عندك كام سنه..؟"
قولتله :" 25 سنه "
قالي وهوا بينفخ :" مش عيب عليك – وإنت الي زيك دلوقتي نقيب – تلعب ببندقيه عصافير .؟؟؟"
معرفتش أرد عليه أقوله إيه
المهم
(الجهه الغير معلومه ) اتصلت ع الظابط
قالي :شوف يادكتور
اسمك دخل على كمبيوتر المباحث ..لقينا عليك قضيه سرقه محكوم عليك فيها بأسبوعين سجن.

وشي إحمر وإزرق وإبيض وإخضر
يانهار إسود
لما قالي كده ..قلت بس
هيقبضوا عليا ..يسلموني لمباحث تنفيذ الأحكام.
وقضيه سرقه ايه دي الي عليا في دمياط ..ده أنا عمري مارحتها
المهم ..الحوار كان بيني وبين الظابط كالأتي.
أنا :" انا عمري مارحت دمياط حضرتك"
الظابط :"طيب انت تعرف بنات او حاجه زي كده "
أنا :"مش فاهم حضرتك"
الظابط :" يمكن مثلا تكون كنت تعرف بنت .وسيبتها ..فقامت عمله فيك محضر سرقه .والمحضر اخد مجراه لحد ماوصل قضيه واتحكم فيها"
قولتله :" لا والله أبدا ..حضرتك"
الظابط :" عموما ..الحكم اسبوعين حبس دوول .يعني قضيه سرقه محمول .بس انا شايف انك راجل محترم ومؤدب..بص..انا ولا كأني عرفت حاجه ..وهسيبك تمشي ..بس تروح قسم أول دمياط ومعاك محامي ..وتسأل على الموضوع ده "
أوك
وطبعا ما كملتش ..ورجعت تاني ..مارحتش شرم الشيخ
ورجعت وأنا جماغي وارمه ..انا سوابق ؟؟؟؟؟
يالهووووووووووي

.
.
المهم
ساعتها إكتشفت إن فعلا في ظباط محترمين جدا ..وزوق جدا
الظابط لما عرف إني دكتور ..جابلي شاي وقعد يرغي معايا ويهزر

بس انا حسيت انه اشتغلني في موضوع دمياط ده
.
المهم
ليا واحد يعرف واحد في المباحث..سألي على الموضوع ده
طلع فشنك

.
ماتتخيلوش بقا
ظابط ماسكك ..بيقولم إنت محكوم عليك بـ اسبوعين سجن.

والله ده كان أكتر موقف إترعب فيه في حياتي لدرجه إني مكنتش عارف أجمع كلمتين على بعض

.
.
.
وطبعا حرمت أخد البندقيه معايا تاني في حته

**bmya** · 20-12-2009 02:55 AM

هههههههههههههههههههههه حلو موقف البندقيه ده بس حرام ليك يا احمد تروح شرم لوحدك ده مشوار رخم اوي

**A7MED_PHARMA** · 20-12-2009 03:01 AM

المشاركة الأصلية كتبت بواسطة bmya

هههههههههههههههههههههه حلو موقف البندقيه ده بس حرام ليك يا احمد تروح شرم لوحدك ده مشوار رخم اوي

واللح ياحبيبي اعصابي باظت - وبالذات مع خلفيه ظباط الشرطه في التعامل مع الناس- أنا قلت أنا هتنفخ

بس ربنا ستر
..
وأنا مكنتش أعرف إن مشوار شرم رخم كده
طقت في دماغي
روحت
وياريتني ماروحت

**Youssef.Awad** · 20-12-2009 03:07 AM

المشاركة الأصلية كتبت بواسطة A7MED_PHARMA

عيب عليك لو معرفتش..
انا كنت في ميت غمر النهارده اجيب شويه دوا للصيدليه
.

ميت غمر .. يعنى دقهلية .. يعنى المنصورة .. يعنى بلد الألف مخزن
بتجيب محروق يا دكتور

-

الموضوع: قصه نجاح ..وقصص فشل(تجربه حياه)

LinkBack

أدوات الموضوع

عرض

-

-

-

-

-

-

-

المواضيع المتشابهه

تجربه قياده الضفدعه احم قصدي الفوليستر و يا لها من تجربه

قصه نجاح ..وقصص فشل(تجربه حياه) الجزء الثانى

تهنئة للعضو وائل صاحب موضوع قصه نجاح ..وقصص فشل(تجربه حياه) بمناسبة افتتاح المحل

حد يعرف نيسان ماكسيما الجديده خش وشوف سيارة نيسان ماكسيما .. من نجاح إلى نجاح

الكلمات الدلالية لهذا الموضوع

المفضلات

المفضلات

ضوابط المشاركة