الموضوع: قصه نجاح ..وقصص فشل(تجربه حياه)

عشان ابعد عن البلد دي والناس الي مش سايباني في حالي
.
فكرت افتح صيدليه وانا لسه ف الجامعه..دكتور معرفه ومراته صيدلانيه..اتفقت معاهم اني اخد اسمها افتح بيه لحد ما اخلص
وبالفعل
مشيت في اجراءات ترخيص الصيدليه
ودي كانت اول معركه ليا مع وحش الروتين والاجراءات والموظفين الي المفروض يكونوا انقرضوا دلوقتي
مشاوير هنا ..ومشاوير هناك
ورقه هنا ..وورقه هناك
وتروح مصر ...وتروح الزقازيق..ومن الزقازيق لمصر ..والعكس
اسابيع من القرف المتواصل
بين امتحانات الجامعه ..وبين اجراءات الترخيص ..وبين متابعه الصنايعيه الي شغالين في التجهيزات
كتر خيرها عربيتي الدايوو ...كانت شايلاني
وطبعا عشان انا مليش صفه رسميه..لازم الدكتوره الي انا واخد اسمه هيا وبنتها وجوزها ..معايا في كل المشاوير دي
والمتاهات الحكوميه والروتينيه والموظفين ..طلعت روحي
وأخيرا
بعد كام شهر
أخدت الترخيص
وفتحت الصيدليه ..
نسيت اقول إن الصيدليه –ع الورق وبشكل رسمي- بإسم الدكتوره الي انا واخد اسمها..وانا عشان أهبل ..معملتش زي الناس كلها ..وأخدت عليها ورق عشان اضمن حقي...كنت فاكر ان كلمه الراجل أحسن من 1000 ورقه.
أتاريني كنت عبيط وأنا مش واخد بالي
طبعا
أول شهور فتحت الصيدليه..مكنتش بروح البيت تقريبا-انا كنت فاتح في بلد تانيه غير بلدنا –كنت جايب مرتبه اسفنج حاططها في معمل الصيدليه..عشان انام ساعتين الظهر..عشان اكون فاتح بالليل وبالنهار.
طبعا كانت الصيدليه لسه جديده ..ومحتاجه مجهود عشان الناس يكون عندها ثقه فيا .. وفي الصيدليه
والله ياشباب تعبت أوي لحد الصيدليه ماوصلت لمستوى دخل يومي ممتاز .
وكنت بعمل حاجات ..مش المفروض عليا اني اعملها
يعني مثلا ..لو حد جالي بالليل عشان ياخد حقنه أو يعلق محلول لأي حد تعبان...طبعا مكنش بيلاقي حد يعلق المحلول في وقت متأخر زي كده..كنت بقفل الصيدليه ..وأروح معاه بيته عشان أعلقله المحلول.
وحاجات زي كده كتير
لوجه الله والله.
انا مش بعرف اكسف حد ..وبالذات في صحه الناس
نيجي بقا بعد كده..الصيدليه بقت سمعتها كويسه أوي
الدكتور الي واقف فيها شاطر..وعندهم دوا كتير
وشغلي زاااااد
.وعشان انا اهبل ..وماأخدتش ورق على الدكتوره
اخو جوزها جه يزعق للبنات الي شغالين عندي ويقولهم شوفوا شغلكم كويس( هوا طبعا ملوووووش فيها نهائي انه يتكلم في صيدليتي)
المهم
البنات ماسكتوش..وراحوا مهزأينه .
انا جيت..البنات حكولي ..إتصلت بالدكتور جوزها أشتكيله من أخوه..
يقوم داخل فيا شمال..ويقولي كفايا اني اديتك اسم مراتي ( دي بتاخد مني 900 جنيه في الشهر .مش ببلاش يعني ) .وانا هعمل واسوي ..وازاي اخويا ييجي والبنات الي عندك يكلموه بالشكل ده..انت نسيت انها صيدليتي.

شفتم الناس
المشروع مشروعي ..فكرتي ..ومكاني ..وفلوسي ..وتعبي ..ومجهودي ..وانا كنت عاوز اسم ارخص بيه ..ولقيت الدكتوره دي ..وبس
يعني هيا ملهاش فيها نهائي
كان عاوز ياخد صيدليتي
عاوز يسرق تعبي
.
.
المهم
بابا دخل في الموضوع ..وعمي مفتش مالي واداري في الصحه ..وبيفتش على الدكتور ده في المستشفى بتاعته.المهم
عرفوه ان الله حق.
............................................
وعشان طبعا البنات الي شغالين عندي ..بجد كويسين
انا كنت مدلعهم اوي..جايبلهم تليفزيون ووصله دش في الصيدليه ..ولما بروح اجيب دوا ..بجيبلهم ايس كريم وشيكولاتات وحاجات حلوه..عشان بجد بفرح اوي ..لما اعمل حاجه تفرح حد.
كانوا بينبسطوا أوي لما بجيبلهم شيكولاته ..وبالذات دانيت
.
.
.

خلاصه المرحله دي


.حرص وما تخونش
ومفيش حاجه الايام اسمها " كلمه الراجل بـ1000 ورقه "
وبجد .. إلي بيتعب بيلاقي ...بجد