يا جماعة انا هشام...معايا كورولا 2008 اول دفعة mmt و عايز اقولكم بس ان الكلام كله صحيح...انا عامل 56000 كيلو بالعربية و لسة جايبها من التوكيل و حاليا هي بايظة تحت البيت مبتتحركش و هحكيلكم ترتيب الاحداث بالظبط...
- اول ما استلمت العربية كنت فعلا مستغرب موضوع النقلات الغريبة دا...بس كنت سامع ان الرينو و الاوبل فكترا كده كمان فا قلت يمكن دا التكنولوجيا و هنتعود عليها...خصوصا اني كان معايا بولو 1998 قبلها (و الله كانت برقبتها)
- مع الصيانة العادية ابتديت احس ان النقلات خصوصا بين الاول و التاني بينهم مسافة زمنية طويلة زي ميكون سواق تاكسي بيجو 504 بينقل علي راحته...بس قلت ماشي...خصزصا ان انا شغلي بليل مش بنزل كتير الصبح فا مش بقف في الزحمة و كده فا اكيد المشكلة بالنسبالي مش زي الناس الي معكوكين فيها في الزحمة...
- 32000 كيلو...رحت اعمل صيانة ال30000 قابلني المهندس محمود يوسف في ابو رواش (مليان شوية و ب دقن) ولد جميل و محترم فعلا...قلتله علي العيب الي فيها دا قاللي طيب هنكسف عليها و نكلمك...و يبتها فعلا...تاني يوم محمود كلمني و قاللي فيها اسطوانة...هتتغير علي حساب التوكيل...قلت ماااااشي و شكرا...و قعدت ييجي اسبوع...و اخدتها...تمام كانت مش بطالة بس بردو مش زي الاوتوماتيك العادي...
- 55000 كانت الحالة خربانة خالص...بين الاول و التاني صوت زي بتاع العربية الفليشيا و هي بتعشق مرشيدير كده...و فجأة و انا ماشي علي اكتوبر يوم جمعة بعد الصلاة رايح سيتي ستارز,,,العربية فصلت و لمبة حمرا نورت...بقوة الدفع كده وقفت علي جنب بعدا اتسبلي ميت مرة علي الكوبري من الي رايح و الي جاي...مهو محدش متوقع اني بعربية جديدة واقف عطلان يعني ...بطلتها...دورتها...تمام كده اشتغلت....تاني يوم كلمت التوكيل...حجزت و روحت( و عملتها معايا و انا رايح التوكيل علي المحور كمان)..
- التوكيل 55000 (28 12 2009) قابلني محمود يوسف و كان اخر يوم ليه في ابو رواش لانه اتنقل فرع اسكندرية و قلتله علي الي حصل...قاللي كده باللفظ "اه احنا فعلا كنا فاكرينه عيب دبرياج بس كلمنا اليابان و قالولنا انه فيه 5 حاجات لازم تتغير مع بعض دبرياج(دسك و بلية و اسطوانة) و سلكت اكتواتر و كلتش اكتواتر" قلت الحمد لله...ماشي...قاللي محمود انا اخر يوم ليا..اعرفك علي مهندس محمد عبد القادر (راجل محترم بردو بس محمود صريح اكتر) قاللي العربية هتعد 4 اسابيع عشان قطع الغيار مش كلها موجودة...قلت اوكيييييه...جابولي كيس لميت حاجتي من العربية...و تمام....
بتابع معاهم كل اسبوع...مرة محمد يرد...مرة لا...كده يعني...لغاية ما قاللي تعالا استلم...28 01 2010 ركبت تاكسي الابيض دا..من المهندسين للتوكيل عمل 31 جنيه اديته 35 من فرحتي...اخدت العربية..دفعت الصيانة العادية...مشيت......هيا هيا...ززي زمان اول مجبتها....قلت ماااااااااشي هبيع و عوضي علي الله...ادخا ابص علي الاسعار...انا جايبها ب135000 المستعمل بتاعها بيعمل 95!!! و انا الي مردتش اجيب فورد فوكاس عشان مخسرش و انا ببيعها!!!!
المهم...رضيت بالامر الواقع و قلت خلاص خليها وعايا كام سنة و خلاص مهي اكيد مش هتزل عن 90 يعني...الي يوم 6 02 2010 السبت الماضي..ماشي بجوار نادي الصيد و الدنيا وقفت...الزحمة العادية يعني..مشيت الزحمة...بدوس بنزين...مفيش اصلا بنزين!!! العربية علي ال n , و هي جايبة e !!!!!!
يمين شمال مفيش...قمت زاقق لغاية ركنة و سبتها تهدا...و دورت دارت و نقلت نقلت و جريت علي بيتي (قريب من نادي الصيد جدا) بدون ان تنقل...مع اني سامعها بتحاول تنقل...الصوت الي بين الاول و التاني بيحاول بس مش عارف....ركنتها زق بردو و مشيت...
دخلت هنا لقيت الناس عندها مشكلة بردو...كلمت الاخ مروان و حكيتلو و عرفت ان احنا مش لوحدنا...احنا كتير اوي (مع الاعتذار لخالد الصاوي في يعقوبيان)...
و عرفت من جهاز حماية المستهلك ان الموضوع مش فردي و ان في مجموعة كبيرة من الشكاوي عن نفس الموديل و بنفس الاسباب....
كلمت التوكيل انهاردة و قاللي هيبعتلي حد ياخدها...بس انا رفضت...انا بس عرفت منهم هما غيروا ايه بالظبط عشان اروح بكرة الجهاز و اعمل الشكوي...و هما علي فكرة عندهم فكرة ان انا بعمل شكوي و الناس مش مخضوضة...واضح ان انا مش لوحدي...هسيبها لغاية ما الشكوي تتنظر و يشوفوا اللجنة الهندسية هتقول ايه في العربية....
ادعولنا يا جماعة و الي معندوش نفس المشكلة احب اقوله انه دي لوحدها مشكلة :)
و مع ذلك انا احترم توكيل تويوتا و اثق ان انشالله هناخد حقنا....
شكرا لاستماعكم...
هشام (شيكو)