الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

انا ابتديت اتعلم (ومن غير ما حد يتخد)

من سنة او زيادة

مممممممممممم طبعا الكل بيقول دلؤتى ايه دا انتى كدة مش نافعة

بس اللى حاصل ان جوزى هو اللى كان بيعلمنى وطبعا على مضض وفى نفس الوقت مش راضى انى اروح اتعلم فى مدرسة وبردو فى نفس الوقت ماينفعش انه يجيبلى عربية خاصة وانا لسة بتعلم

وبالتالى بتعلم على عربيته فكان حريص جدا وخايف جدا وكان بيدينى حصة وافضل عليها شهر مثلا وطبعا علشان انا بتعلم فى فيصل وبالزبط فى منطقة خلف الشارع الرئيسى حيث لا يوجد قواعد وكل ما هو عشوائى كنت مرعوبة وكنت بغلط كتيير وجوزى كاب بيتعصب من ردود افعالى وطبعا هو من خوفه بينسى انى لسة بقول يا هادى

المهم من غير ما طول عليكم فضلت كدة فترة طووويلة جدا لما اتعلم حاجة افضل عليها فترة وارجع من تانى اعيدها لانه مافيش ممارسة طبعا فكان الخوف هو هو لا وكمان انا بطبعى حذرة جدا وخوافة جدا جدا جدا وقلبى خفيف وكمان بتعلم فى فيصل يعنى كل عوامل الفشل كانت متوفرة معاية لحد ما جوزى جه قالى يا بنتى انتى شكلك من الناس اللى مالهاش فى السواقة عادى فيه كتير كدة مش انتى بس

طبعا كنت عاملة زى الدكتور اللى جيه بيقولى يا بنتى حالتك ميئوس مننها

استنو هكملكم الحكاية

انا لما قالى كدة اخدتها تحدى بئى وانى مش عايزة افشل وخصوصا انى حاسة انى هحتاجها جدا قدام لما بنتى وابنى يكبرو شوية ويكون ليهم مشاوير خاصة وطبعا مش هطمن على بنتى انها تركب تاكسى او تمشى لوحدها ودلؤتى علشان المدارس وكدة

خلاص؟

رجعت ازن تانى انى ارجع اكمل تانى وفعلا ابتديت اخرج على فيصل الرئيسيى

بصو بئى من خلال تجربتى اللى هحكيلكم على بعض المواقف منها المجمل كدة فى مستواى

انا شاطرة طول مانا ماشية فى وسط زحمة ومش بجرى وكمان فى الرجوع للخلف مع ان دى صعبة بالنسبة لكتير من اللى لسة مبتدئين بس انا علشان اتعلمت فى وسط مجموعة من العمارات اللى اسكن فيها ودى فيها عربيات كتيييييير راكنة ولازم ارجع وادخل من خلالها فاتدربت على كدة كتير وكويس

بس تعالى بئى لو همشى فى شارع سريع شوية وفيه عربيات كتير اجدع لخمة واحسن قلق وكأن عقلى بيفصل تماماااا
وقصدى بالسريع مش فى الدائرى مثلا لا
سريع يعنى على 60 مثلا وفيه عربيات بتغرز وعايز تعديك بئى هنا تحصل المشكلة معاية وببئى عايزة اسيب الدريكسيون واقول ماليش دعوة :)

المشاركة الأصلية كتبت بواسطة husseinoo

التغلب على الخوف

كيف تقود سيارتك بدون خوف ؟

الأكيد انك تشعر بالخوف على الطرق السريعة
خصوصا عندما تجد انك محاصر بسيارات ملاكى وخصوصا سيارات النقل سواء كانت ركاب "مينى باص ـ ميكروباص ـ اوتوبيس" او سيارات النقل "نص نقل او نقل كبير او مقطورات اوحاويات عملاقة"

اذا كان الخوف بيعمل لك حالة من شلل التفكير الجامد قوى هههههههههههههه
اذا فقط حان الوقت للتغيير

انا فعلا الخوف بيخلى مخى بيفصل وبيوقع منى فى الدواسة :h_angry[1]:

التالى بعض النصائح للتغلب على الخوف:


الخطوة الأولى:
إذا كنت تقود سيارتك "نادرا" ... او بالبلدى كده ما بتخرجش بالعربية كثير خصوصا فى شوارع المحروسة المزدحمة وكمان على الطرق السريعة ... فأكيد هاتشعر بالخوف ... لازم هاتخاف
كل ما هاتقود سيارتك "كثير" وتواجه مواقف مختلفة ومتنوعة وتقدر تتغلب عليها طبعا إن شاء الله ... كل ده هايزيد الثقة فى النفس بشكل جامد جدا.
كبداية حاول تخرج بالعربية مثلا روح بيها السوق اشترى اى حاجة .. مشوار صغير وعلى السريع ههههههههههههههههه
انا عن نفسى روحت كثير قوى مشوار السوق ده ... منه استفادة من انخفاض الاسعار خصوصا فى اسواق الجملة ... او الاسواق الشعبية ومنه تدريب على السير بالعربية مدة طويلة وفى ظروف مختلفة ....
او حتى اخرج بالعربية روح المسجد ... صلى ركعتين وارجع تانى
او روح للمكتبة ... استعير كتاب وارجع البيت تانى
اى مشوار صغير هاتعمله وهاترجع البيت بالسلامة إن شاء الله .. النتيجة هاتكون ان ثقتك فى نفسك هاتزيد.

هو انا فى المرحلة دى فعلا دلؤتى كلام سليم ومية مية يا استاذ حسين

الخطوة الثانية:
حاول تنزل مرة منطقة زحمة شوية .... وممكن طريق يكون سريع شوية ... وتمشى مشوار كبير لمدة اطول ...
إذا ما زلت تشعر بقليل من القلق ... على طول اعد التدريب حتى تشعر بالراحة

أما اذا رجعت من المشوار ده ... وما زلت تشغر بالخوف الشديد جدا جدا وربكة جامدة من داخلك ... يبقى الافضل تنزل بالمستوى ... يعنى افضلك تستكمل تدريبك فى منطقة اقل ازدحام ويكون فيها عربيات اقل فى السرعة .... ولكن الاهم هو الاستمرار ... ترجع زى الشاطر هههههههه للعربية وتصمم انك تمشى بيها اطول فترة ممكنة.


الخطوة التالتة:
هل تستطيع كشف المخاطر ... يعنى عينك بالصلى على النبى بتقدر تشوف المخاطر قبل ما تحدث ... وتتوقعها وتكتشفها
ولا زى ناس كثيير لا تشعر بالمشاكل إلا اذا اصبحت المشكلة امامك مباشرة


... يعنى مثلا شايف ان فيه عربية متعطلة ولا تتوقف إلا إذا توقفت العربية التى امامك مباشرة ... يعنى اقصى حاجة بتشوفها كبوت عربتيك ههههههههههههه والعربية التى امامك فقط لا غير

حاول تاخد بالك شوية من لافتات المرور ... يعنى مثلا فيه علامة يوتيرن ... وانت مصمم تمشى فى حارة اليوتيرن .... وفى الآخر بتشتكى من العربيات اللى بتحدف عليك ههههههههههههههههه


قدرتك على اختيار الحارة المناسبة للسير ... هاتسهلك حاجات كثير قوى قوى
داخل يمين التزم الحارة اليمين
داخل شمال التزم الحارة الشمال
ماشى على طول التزم الحارة الوسطى
إن شاء الله الموضوع يكون بسيط

الموضوع دا لسة بيعملى مشكلة لحد الان لان الشارع عندى تقريبا حارتين بس الحارة اليمين تقريبا محتلة من الميكروبصات واللى راكنين صف تانى فى فيصل فا مافيش غير الحارة الشمال واللى مليانة باليوترن وانا لسة بخاف وبقعد افكر مليون مرة قبل ما روح من حارة لحارة لدرجة انى مرة عقبال مافضلت افكر واشوف هنقل ازاى فى وسط الزحمة دى لائيت نفسى كنت هلبس فى النقل قصادى ولولا ستر ربنا وقفت فبلها بشبر واحد فقط يا ريت تقولولى انسب حل ايه


الخطوة التالتة:
شغل شوية قرآن وهدى اعصابك قبل ما تمشى بالعربية ... وادعى دعاء الركوب ... وصلى ركعتين الصبح ... واتوكل على الله وكل شىء هايكون تمام التمام ... أنا آسف جدا هى المفروض تكون الخطوة الأولى هى التوكل على الله سبحانه وتعالى


الخطوة الرابعة:
حاول انك تتحكم فى موضوع انحراف السيارة ... يعنى تمشى على خط مستقيم
وما تحدفش على حد كل شوية

بردو بحدف وانا مش واخدة بالى مع انى متبتة فى الدريكسيون ودايما بكون مش عارفة المسافة اللى سايباها جمبى اللى وراية هيقدر يعدى منها ولا انا مزنقة عليه ودايما بيعتقدو انى بغلس عليهم وميعرفوش انها غشومية وجهل منى

بطل "الكاسيت" او "الراديو" او حتى خفض الصوت ولو كنت بتحب تسمع موسيقى او اغنية يا ريت تكون اغنية هادئة ... والافضل طبعا شوية قرآن
لا تتكلم مع الركاب داخل السيارة
القيادة موضوع جد وموش لعبة ومحتاج منك تركيز على الطريق بشكل جامد.

الخطوة الخامسة:
خد لك كورس فى القيادة مع اى حد بيفهم كويس قوى
وحاول تقرأ بتأنى موضوع القيادة الدفاعية
ممكن يركب معاك حد قريبك او صديقك يكون هادى ... واعصابه قوية وفاهم كويس .... عشان يزود ثقتك فى نفسك موش يخوفك وآسف من الكلام ده يرعبك ويروشك اكثر ... مهم قوى اختيار الشخص اللى بيعلمك سواء كان قريبك او من مدرسة قيادة


الخطوة السادسة:
اذا كان فيه بعض الحالات بتشعر فيها بالقلق والخوف الشديد


مثلا لو كنت بتخاف من طلوع الكبارى أو دخول الانفاق
حاول تدرب نفسك على طلوع الكبارى فى اوقات مافيهاش زحمة خالص او استبدال الكوبرى بـ مثلا بشارع مرتفع مثل الكوبرى
يفضل التدريب يكون فى اوقات العربيات تكون فيها قليلة وكمان الناس تكون قليلة عشان تتدرب براحتك


الخطوة السابعة:
اعمل لنفسك جدول للتدريب على قدر الإمكان.
اكتب فى الجدول الاماكن الغير مزدحمة ... والاوقات المناسبة للخروج الى هذه الاماكن.
اخرج الى عملك بدرى شوية مثلا نص ساعة عشان تلحق تروح شغلك بعيدا عن الزحمة وبعيد عن التسرع وتلحق تركن عربيتك وتفطر كمان قبل الشغل ههههههه
قبل السفر على الطرق السريعة ... اعمل لنفسك جدول ... حاول تسافر فى اوقات تكون المواصلات فيها هادئة .... اختر افضل الطرق واسهلها التى تحتوى على عربيات نقل اقل ...

إذا كانت عربيات النقل بتخوفك وبتضايقك خلاص اختار طريق تانى ... يعنى مثلا لو بتحب تسافر على الطريق الزراعى او الاحسن لك الطريق الصحراوى ... وتحب تسافر فى الصباح الباكر جدا ... ولا تسافر مساء ...

الخطوة الثامنة:
خلاصة الكلام .. كل ما هاتتعرض لمواقف كثير كل ما ثقتك فى نفسك هاتزيد كثير ... وهاتقدر تتعامل مع اى موقف هاتقابله على الطريق مهما كان ... اذا كنت مازلت بتخاف من العربيات النقل العملاقة والانفاق والكبارى على سبيل المثال ... ماتخافش المهم انك تتدرب مع حد فاهم ... وتفهم كويس المواقف المختلفة ... وتعمل لنفسك جدول متدرج فى الصعوبة ... اختيارك للوقت المناسب للتدريب مهم .... سواء كان فى الصباح الباكر او مساء ....

الخلاصة: ودى اجمل جملة عرفتها بتقول ايه...
لو انتظرت انك تكون جاهز نفسيا عشان تركب عربيتك .... وتواصل التدريب ... عمرك ما هاتركب العربية ابدا ... وهاتفضل تخاف ...

الطريقة الوحيدة للتغلب على الخوف هى انك تكون خلف "الدركسيون" وتمشى بعربيتك باستمرار حتى ولو كانت الشوارع خالية فى الصباح الباكر


ملحوظة:
لا قدر الله لو تعرضت لاى حادث موش تمام مثلا طلعت بالعربية على الرصيف
ربنا يحفظ الجميع
ببساطة ارجع تانى واعتبر نفسك "راكب"
يعنى ارجع تانى واركب المواصلات عادى خالص ... بطل تركب العربية شوية لحد ما اعصابك تهدى وتنسى موضوع الحادث اللى اتعرضت له
ومرة تانية ارجع واصل التدريب من جديد وبإصرار.

وفى الاول والآخر خليك مع الله وربنا هو الحافظ الستار .

ارجو ان اكون وفقت

فى انتظار التواصل
مع اطيب التمنيات
اخوكم حسين غزالة

ماشاء الله مشاركة قيمة وفعلا بتعبر عن الخوف للمبتدئ وانا كتبت فيها بعض اللى بقابله من انواع الخوف دا