الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

بسم الله الرحمن الرحيم

السلام عليكم ورحمة الله وبركاته

كل سنة وحضراتكم طيبين وبخير

الحمد لله انى لقيت الموضوع ده وربنا يعلم ان الواحد إستفاد منه أزاى وخصوصاً انى لسه جديد خالص فى السواقة

يعنى يادوب روحت مدرسة السواقة تبع المرور واخدت 6 حصص هما طبعا مش كافيين بس الى حد ما عرفت جزء من الاساسيات وبفضل الله ثم فضل الاخوة الاعضاء اللى شاركوا وخصوصاً الاستاذ المحترم/ حسين عرفت حاجات كتير مش فاضل انى اطبقها عملى إن شاء الله

ربنا يكون فى عون الناس اللى لسه بتتعلم ومن القاهرة ولا نى من بنها فالحمد لله مش زحمة اوى يعنى

وكل سنة وحضراتكم طيبين وفى إنتظار مشاركتوا القيمة

المشاركة الأصلية كتبت بواسطة husseinoo

اخوك جديد لنج فى موضوع السواقة
برغم انى معايا رخصة هههههههههههههههههه

المهم ... طبعا خايف من السواقة
يمكن دلوقتى عملية الخوف دى قلت كثيير

وانا من راى اهم حاجة تقلل الخوف ان اللى بعلمك يكون بيفهم
موش سواق وخلاص

يعنى انا مثلا
خرج معايا واحد صاحبى وكان فاهم كويس قوى اكثر من السواقيين اللى خرجوا معايا

واول نصيحة لى منه هى ...
رجلك على الفرامل واضغط دبرياش وانت بتعدى على اى تقاطع او اى يو تيرن او زحمة عربية
لو ظهر لك اى حاجة هاتضغط على الفرامل على طول

طبع فضلنا كثيير نتدرب على الموضوع ده
وزعق معايا كثيير ازاى تدخل على اى تقاطع ورجلك موش على الفرامل والدبرياج يكون جاهز وفاصل الحركة
عشان فى اى وقت وقفت انقل الغيار ببساطة والعربية ماتبطلش
ولو حصل وظهر لك اى شىء مفاجىء رجلك اساسا على الفرامل مافيش اى مشكلة هاتضغط عليها

لكن لو رجلك على البنزين مع الخوف هاتضغط على البنزين وتحصل مشكلة لا قدر الله

طبعا التدريب ازاى تتحكم فى سرعة العربية عن طريق الفرامل
تفضل تضغط عليها براحة لحد ما تاخد العربية السرعة المناسبة
مثلا اليو تيرن لازم اكون داخل براحة قوى
الملفات لازم اكون داخل عليها براحة قوى
التقاطعات لازم اكون مهدى العربية كويس
واى مكان فيه زحام متوقع

طبعا فى المنحنيات والتقاطعات لازم تدخل عليها اصلا بسرعة بسيطة
عشان لو ظهر لك اى حد بشكل مفاجىء او خطأ تلحق تقف ببساطة

دى اول نصيحة

النصيحة التالية
اى ملف لازم تكون هادىء جدا فى سرعتك وتكون داخل الملف فى حارتك "طبعا فى الغالب بجوار الرصيف"
واوعى تخرج من حارتك اللا بعد ما العربية ما تعدل نفسها
وقبل ما تدخل الملف لازم تبص على الناحيتين يمين وشمال

يعنى لو داخل يمين بص شمال بسرعة على العربيات اللى جاية
وارجع بص امام عربيتك
اوعى تنسى وتفضل باصص على العربيات اللى جاية من الشمال
لحد ما عربيتك تنزل نص الشارع

نفس الكلام لو داخل شمال

وطبعا والعربية بتلف تكون محضر الغيار المناسب عشان تمشى على طول وطبعا ما دام رجلك اصلا ضاغطة على الدبرياج هاتقدر تختار الغيار المناسب بسرعة وكده العربيات اللى خلفك موش هاتعمل لك "كلاكس" لانك ماشى كويس ومافيش اى عطلة

وطبعا لو بتلف فى حارتك بجوار الرصيف
حتى لو فيه حد جاى بعربيته وبيجرى هاتكون انت فى الامان قوى
ولو لا قدر الله كان فيه حد بيجرى فى نفس الحارة اللى هى بجوار الرصيف وده طبعا نادر هايلحق يلم نفسه ويبعد عنك
وفى الاول والآخر انت داخل صح بجوار الرصيف وملتزم بحارتك تماما ولا يوجد عليك اى خطأ
واوعى تنقل نفسك من الحارة اللى بجوار الرصيف فجأة دون النظر فى المرايات

اما لو كنت بتعمل يوتيرن
وكنت فى الحارة الخارجية وليست الحارة التى بجوار الرصيف
نفس الكلام لازم تفضل ملتزم بها
واوعى تخرج منها حتى بعد ما تلف بالعربية اليو تيرن
عشان ماترميش نفسك على اى عربية تانية



النصيحة التالية
الالتزام بالحارة التى تسير فيها
يعنى الحكومة عاملة خط بين كل حارة
اوعى تمشى على الخط
لان كده معناه انك شاغل حارتين
والعربيات عشان تعدى منك لازم تعملك "كالكس" وتسبب لك ازعاج
عشان كده لازم تمشى داخل حارتك تماما وليس على الخط الموجود بين الحارتين

كده اللى عايز يعدى هايعدى بدون مشاكل وعمره ما هايضايق منك حتى ولو كنت ماشى بطىء

النصيحة التالية
لو كنت فى شارع سريع مثلا "شارع المطار"
وانت فى طريقك الى المطار
طبعا صعب انك تمشى فى وسط الشارع وانت بطىء
خصوصا انه معروف ان الشارع ده بتاع جرى
يبقى الافضل انك تمشى فى اليمين

النصيحة التالية
لو حصل وظهر لك مطب
اوعى تغير مسار عربيتك الى حارة تانية
الافضل تاخد المطب وامرك لله
احسن ما تغير مسار العربية فجأة الى حارة تانية وتسبب خطر لك وللآخرين
كل العربيات بتاخد مطبات مافيش مشاكل
لكن الخطر انك تخبط عربية تانية
طبعا ممكن تغير مسار عربيتك من حارة الى حارة بعد النظر فى المرايات والتأكد من خلو الطريق والانتقال يكون تدريبجى "سنة سنة" وبراحة قوى ولو فيه اشارة يبقى هايل
عشان اللى جاى وراك ياخد باله

ولو ظهر لك حد ماشى على رجليه امامك
انا من وجهة نظرى الافضل تهدى سرعتك حتى لو لزم الامر انك تقف تماما بالسيارة
افضل من انك تغير حارتك وتسبب مشاكل للآخرين
خصوصا لو عديت امام المشاة ممكن يجرى امامك بدل ما يتوقف وساعتها تحصل مشكلة كبيرة لا قدر الله



النصيحة التالية
لو حصل وكنت عايزة تقف مرة واحدة او هاتنقل نفسك من حارة الى حارة او هاتلف فى يو تيرن
لازم تنظرفى المراية كويس وتشوف مين اللى جاي وراك او بجوارك ... ودى اصعب حاجة "موضوع استعمال المرايات"
خصوصا ان المرايات فيها نقاط عمياء لا تظهر فيها السيارة الموجودة بجوار الباب الخلفى
ولما تنقل نفسك من حارة الى حارة تفاجئى بأن فيه عربية بجوار الباب الخلفى وانت موش شايفاها
معلهش دى بالممارسة والتدريب الجيد جدا جدا لازم تراعى الموضوع ده لانه بيحصل منه مشاكل كثيير

النصيحة التالية
لو مشيت لوحدك بالعربية طبعا يفضل يكون يوم الجمعة مثلا قبل الصلاة الساعة 8 صباحا
امشى ساعة ولا ساعتين مافيش مشاكل عشان تاخدى الثقة

النصيحة التالية
لو حبيتى تركن عربيتك
اركن فى مكان واسع فى الاول
لحد ما تتعلم الركنة كويس
ما تحاولش تركن فى مكان ضيق وانت لسه بتتعلم عشان ماتخبطيش عربيتك وعربيات الناس التانية

فى البداية موش مطلوب انك تجرى بالعربية
كفاية انك تمشى بها حوالى 60 كيلوا
لحد ما تتعود على المشى كويس
وتنقل الغيارات بسهولة
وتقدر تقف لو ظهر اى حاجة مفاجأة
السرعة مطلوبة فى نقل الغيار المناسب وليس الجرى بسرعة
السرعة مطلوبة فى اختيار المكان المناسب للسير عشان مااعطلش باقى السيارات

والنصيحة التالية
لازم يكون بينك وبين السيارة التى امامك مسافة
لازم تحافظ على المسافة دى


والنصيحة التالية
لو ماشى فى طريق طوالى
ممكن ترفع رجلك عن البنزين
عشان السرعة تخف
دون الحاجة الى الضغط على الفرامل

الفرامل فقط فى التقاطعات
والزحام
واليو تيرن
رجلك لازم تكون عليها ومستعدة
والتوقف لا يكون مفاجىء بل تدريجى
بعد التدريب هاقدر تعرف قوة فرامل عربيتك وتحس بها

واخيرا اوعى تمشى فى اماكن زحمة عشان ثقتك فى نفسك ما تتهزش
امشى مع اى حد راكب معاك فى اماكن خالية وخليه يعلمك
وتدريجى اختر اماكن زحمة تدريجيا
وفى اوقات مختلفة

النصيحة التالية
لو هاتعدى مطب صناعى
لازم تكون ضاغط على الدبرياش والفرامل
وعن طريق الفرامل تتحكم فى سرعة العربية
واول ما عجل العربية الامامى يكون فوق المطب وهايبدأ ينزل
تكون اخترت الغيار المناسب "الغيار الاول او الغيار الثانى" حسب سرعة العربية
وطبعا ما دمت انت دايس على الدبرياج اساسا
خلاص هاتختار الغيار المناسب وهاتمشى على طول
لدرجة ان العربيات اللى خلف موش هاتحس انك مبتدأ
لازم تتدرب على الموضوع ده كثيير وتختار شارع يكون فيه مطب صناعى

النصيحة التالية
احترس من اى سيارة بتركن
او خارجة من جراج
او بتفتح الباب
احترس من الاطفال وتحركهم المفاجىء
احترس من سيارات الاجرة والميكروباس لان تقفهم مفاجىء ومتكرر وفى اى مكان بدون تحذير

فى البداية فى ناس تفضل انك تمشى فى جهة اليسار بجوار الرصيف
واللى عايز يجرى يجرى
خصوصا ان كل تركيزك هايكون فى اللى جنبك من الجهة اليمنى فقط
طبعا الكلام ده ينفع فى الطريق الداخلى
لكن لو كان الطريق سريع يبقى خطأ انك تمشى شمال وانت سرعتك بطيئة جدا "خطر جدا"

ولو عرفت اى حاجة جديدة هاقولك ان شاء الله

مع اطيب التمنيات
اخوكم حسين غزالة

هى كلها على بعضها كام شهر كده و هتلاقى نفسك بتحرق الغيار و بتشد غرز و كله هيبقى تمام بس الحاجات دى كلها بتيجى مع ان التعليم يكون صح مرايات بقى و بتاع لان اللى بيسوق من غير مرايات مبيسوقش

السلام عليكم ورحمة الله

انا متشكره جدا يااستاذ ماجد على ذوقك ويمكن فعلا تكون مشكلتى انى مش بركب العربية كتير ومن وقت للتانى بسخنها واحيانا بتأخر شوية فى تسخينها فبضطر انى ادوس جامد على الكونتاكت علشان العربية تدور فالغلبان مااستحملش التعذيب اللى بعذبهوله.

أما بالنسبة للمعلم الرائع استاذ حسين فأنا شاكره اهتمام حضرتك بالموضوع وانك بتحاول تنزل لمستوايا - اللى على قده - وبتفهمنى واحدة واحدة ( ربنا يجعله ان شاء الله فى ميزان حسناتك) .... انا فهمت موضوع الكتاوت ده وهشوف الكهربائى يركبهولى .... بس هو موضوع الجلب ده اللى حضرتك غيرته يعنى انا مش المفروض اروح للكهربائى وهو اللى يتصرف ولا انا ادور على خراط ويبقى تعاملى معاه؟؟

ومرة تانية بشكر كل اللى بيساعدونى لأن فعلا بجد حسستونى انى مع اخواتى اللى ما بيبخلوش بأى معلومة ... جزاكم الله خير