الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

بسم الله الرحمن الرحيم

موضوع مهم جدا
النظر الى الامام على قدر المستطاع

فى الاسبوع الماضى حصل معايا حاجة خطيرة جدا
ولما افتكرتها قلت انى لازم اكتبها لكم ... ربنا يسترها مع الجميع

الموضوع باختصار انى ماشى فى شارع صلاح سالم
وطبعا كل العربيات بتجرى فى الشارع
ومرة واحدة الاقى عربية عايزة تدخل "اليوتيرن"
المشكلة ببساطة ان السيارة دى كانت متوقف بجوار الرصيف ... واليوتيرن كان موجود على شمال السائق مباشرة

يعنى بالبلدى كده صاحبنا قطع الطريق بعربيته بالعرض
ههههههههههه زى اللى عامل كمين بعربية شرطة
وقف بعربيته فى منتصف الشارع بالعرض
امام العربيات القادمة ...

بحمد ربنا انى كنت ماشى براحة ... وانى كنت انظر الى الامام على قدر المستطاع
عشان كده شوفت المنظر ده من بدرى .... وربنا سترها معايا

بالبحث فى الكلام اللى كتبته قبل كده
وجدت مقالة مهمة قوى بخصوص النظر الى الامام على قدر المستطاع
يا ريت كلنا نقرأها بعناية ... الله يكرمكم
خصوصا اخوتنا الجداد فى القيادة


أساسيات القيادة الدفاعية
6- فتح عينيك على الطريق




وده معناه فتح عينيك على الطريق ههههههههه موش "فتح عينيك تاكل ملبن"
ههههههههه
معظم السائقين يركزوا عينيهم على الطريق 5 او 8 ثوانى
والمفروض
انك تركز على الطريق امام سيارتك لمسافة 15 او 20 ثانية
يعنى بالبلدى كده اوعى تبص امام سيارتك فقط


لازم تكون بعيد النظر قوى
وتبص للامام بمسافة كبيرة
عشان تكتشف المخاطر والمشاكل مبكرا ... وفى نفس الوقت تستطيع معالجة الخطأ او المشكلة بسهولة


تبص على الطريق هل هو سالك
هل الحارات التى امامك كلها سالكة يعنى مافيهاش مشاكل فى السير بالعربية
هل فيه اى ازدحام فى حركة المرور فى اى حارة من الحارات
هل فيه عربيات نقل عاملة مشاكل
هل يوجد لا قدر الله حوادث على الطريق ... الخ
ربنا يحفظ الجميع


طبعا طريقة انك تنظر على الطريق للامام بمسافة كافية حوالى 15 او 20 ثانية .. الطريقة دى مفيدة للسائق المبتدأ ... وليس المحترف فقط


ركز عينيك على الطريق للأمام على قدر المستطاع
ده افضل لسلامتك
افضل من انك تركز عينيك على كبوت السيارة هههههههههههه
او تركز عينيك امام سيارتك فقط
او تركز عينيك على السيارة التى تسير امامك فقط


يعنى انا مثلا
كنت مركز على العربية اللى امامى فقط
وهو كان شايف من بدرى ان فيه مطب صناعى
هو عدى فوق المطب بطريقة صحيحة
وانا اكلته بطريقة صحيحة هههههههههههه
طبعا عديت لكن موش بالشكل اللى انا عايزه ... عشان لم يكن عندى مجال للرؤية واسع وللامام ... كان مجال رؤيتى ضيق قوى


طبعا لما تركز عينيك على الطريق لمسافة كافية 15 او 20 ثانية
ده بيجعلك مستقر نفسيا
ده بيجعلك مستقر على الطريق ... لانك اصلا هاتختار الحارة السالكة بسهولة
والموضوع ده مناسب جدا للمبتدأ ويجعله بالبلدى كده "راسى" وموش خايف
لأنه بيتصرف صح وشايف المشكلة من بدرى قوى
إذا عملية القيادة موش ممارسة فقط
لأ
عملية القيادة فهم وعلم
موش فهلوة ومش بالعافية فى الشارع
وتخبيط وانزل الشارع وهو يعلمك
لأ طبعا


كام واحد كان بيعلمك قال لك الكلام ده
انا عن نفسى ما عرفتوش إلا من صاحبى
وممكن من خلال ركوبى الكثيير مع والدى الله يرحمه
او من خلال القراءه والإطلاع


خلاص ... بالطريقة دى اصبح لك "استايل" فى القيادة
لك اسلوب فى القيادة الدفاعية ... محترف وليس هاوى
اسلوب علمى ... موش تجربة وخطأ
وآن الأوان انك تستخدم الاسلوب ده من اليوم
وانت ماشى بعربيتك ... لازم تنظر للأمام بمسافة كبيرة زى ما شرحنا قبل كده


لازم تنظر للأمام ... وكمان على يمينك وشمالك
لازم تنظر للأمام قوى ... تبص لمسافة كبيرة على العربيات سواء امامك او يمينك او شمالك
لان ممكن يكون فيه مشكلة متوقعة للسيارة اللى على يمينك ... لو انت شايف العربيات اللى على يمينك لمسافة كبيرة قوى
هاتقدر تتوقع ايه اللى هايحصل
هل اللى جانبى هايقف
هل هايهدى سرعته
هل هايحدف علي ويعرضنى للخطر
هل هايحاول يسبقنى عشان يعدى المشكلة اللى امامه
كل ده هايدور فى ذهنك فى ثوانى
وما دام انت شايف الطريق لمسافة 15 او 20 ثانية
هاتلحق تتصرف صح إن شاء الله ... وهاتقدر تتجنب اخطاء الآخرين من بدرى قوى


ههههههههههههههههههههه
ممكن مثلا تلاقى اطفال بيلعبوا الكرة على الرصيف او حتى فى الشارع
وتتوقع ان الكرة تجرى فى الشارع امامك


ممكن تلاقى عربيات كانت راكنة وابتدأ صاحبها فى التحرك
ممكن تلاقى عربيات نقل او تاكسى او ميكروباص بتحاول تهرب من اى مكان حواليك ... لكن انت لو شايفه من بدرى قوى ... إن شاء الله هاتعمل حسابك
وتحاول تبعد عنه ههههههههههههههههه مين خاف سلم


نصيحة مهمه للجميع بما فيهم أنا
بلاش تركزعينيك على حاجة واحدة فى الطريق امامك لمدة اكثر من ثانية ...
بالطريقة دى مجال رؤيتك هايكون ضيق قوى اقل من 1.5 متر بالعرض وتقريبا حوالى 30 متر فقط للأمام


كل شىء تتوقعه حسب رؤيتك لما يدور حواليك


آه انت شايف حاجات بتتحرك
ههههههههههههه
لكن موش شايف بشكل كافى
موش شايف مساحة كافية للامام علشان تلحق تتصرف صح


الخلاصة: اوعى تركز عينيك على حاجة واحدة لمدة طويلة
لدرجة انه بيقول لك لو انت ركزت عينيك على الساعة اللى فى ايديك وانت طبعا فارد ايديك لمدة طويلة ... بعد شوية موش هاتعرف الساعة كام ههههههههههههههه
عينيك هاتزغلل


لازم عينيك تتحرك فى كل حتة وفى كل مكان ولمسافة كبيرة للامام ويمين وشمال
ودى مشكلة كبيرة عند المبتدأ فى القيادة
فى الأول بيخاف ينظر فى المراية
وكل تركيزه امامه فقط وممكن يكون نظره مركز على كبوت العربية فقط ... وممكن يكون مركز على العربية اللى امامه فقط
طبعا كل ما آداءه يتقدم نظرتك هاتكون اكبر واوسع واشمل ولمسافة كبيرة للامام


لازم تنظر للامام وتشوف ايه اللى ممكن يعوق تقدمك بالسيارة
انا عن نفسى ممكن اعمل كده ... لكن موش على طول
هاحاول بعد كده انظر للامام قوى بمسافة كبيرة إن شاء الله


هههههههههههههههههه
يعنى المفروض عينيك تعمل "إنذار مبكر" ... تعتبرها جهاز إنذار
اما إذا فضلت حضرتك مركز على حاجة واحدة لمدة طويلة ... فى الحالة دى مساحة رؤيتك هاتقل كثيير وجهاز الإنذار المبكر بتاعك موش هايشتغل كويس هههههههههههه وهاتفقد قدرتك على اكتشاف الحركة على الطريق
حركة عينيك المستمرة
فى كل مكان وعلى كل حاجة وعلى مسافات كبيرة
هى الوحيدة اللى هاتخليك مصحصح وتقدر تتصرف صح ومن بدرى تقدر تتجنب المشاكل و الحوادث لا قدر الله


أنا على سبيل المثال
ماشى على 70 كيلوا تقريبا على طريق مدينة العبور وموش عايز اجرى اكثر من كده ممكن ازيد شوية لحد 80
وشايف الاوتوبيس من مسافة كبيرة قوى بينزل ناس
واول ما هاقرب منه هايبدأ يمشى ويشد يعنى هايجرى بسرعة طبعا وانتم عارفين سائقى الاوتوبيس ... خصوصا انه عايز يوفر وقت والطريق فاضى وبيشجع
خلاص ببساطة
رفعت رجلى عن البنزين ثوانى
كان الاوتوبيس مشى وجرى كمان
وعلى ما حصلته كان هو اسرع منى ومافيش داعى انى اتحداه واحاول اعدى منه




وممكن مثلا
السيارة اللى امامك متوقفة
والسيارة اللى على يسارك متوقفة ايضا
وفيه مسافة خالية بينهم
وفيه سيارة قادمة
انت بتحسب مين فيكم هايوصل اسرع
لو انت خايف زى حالاتى
يبقى من بدرى اهدى قوى ... واعطى فرصة للقادم انه يدخل ويعدى
لكن لو انت موش شايف اللى جاى فى المقابل لك
يبقى معلهش ربنا يسترها معاك
لازم تنظر الى الامام بمسافة كبيرة قوى




رؤيتك الشاملة للطريق
تعتبر من اهم ادواتك فى القيادة الدفاعية
استخدم هذه الآداة بقدر المستطاع
انظر للامام وحواليك لاكبر مسافة تستطيع رؤيتها
واعمل عملية مسح شامل لكل شىء يتحرك حواليك عشان تقدر تحلل المواقف صح وبدرى وتتجنب المخاطر






وربنا يحفظ الجميع


مع اطيب التمنيات
اخوكم حسين غزالة