الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة lela

اذيك يا استاذ حسين كنت عايزة اسال حضرتك لو انا ماشية بالعربية وقابلنى مطلع وعايزة امشى من غير ما العربية ترجع لوراء منى فى الاول اهدى واطلع على الثانى مع ضغط البنزين ولا ايه

اهلا بحضرتك

بالنسبة لطلوع المطلع لازم اراعى التالى:

مثلا لو انا طالع كوبرى
اشوف

• لوالطريق سالك والعربيات ماشية كويس على الكوبرى

يبقى خلاص فى الحالة دى هاحاول امشى بسرعة على قدر الامكان بلا توقف ... عشان اوصل لاعلى سرعة اقدر عليها قبل ما اقترب من الكوبرى

• يعنى لو قدرت اطلع على الغيار الرابع يبقى هايل ... لكن لازم تكون سرعتى على الاقل 80 كيلوا

• طيب لو انا طالع على الثالث ... يبقى لازم سرعتى على الاقل تكون 60 كيلوا

• طيب لو انا شايف ان العربيات شبه متوقفة يعنى ماشية براحة قوى فوق المطلع ... يبقى فى الحالة دى اهدى العربية واطلع على الغيار الثانى بسرعة حوالى 30 - 40 كيلوا

• لو كانت العربيات تتحرك بشكل بطىء جدا وتتوقف ... ثم تسير ... وهكذا .... يبقى اكيد هاطلع على الغيار الاول

ملاحظات: المشكلة موش انت طالع على اى غيار الاول ولا التانى

• المشكلة انك تختارى الغيار المناسب

• الافضل انى اطلع اكبر مسافة وانا بجرى بالعربية ... المهم انى اوصل الى قمة الكوبرى بسرعة بدون توقف

• لا احاول انى الزق للعربية التى امامى ... واترك فرصة للسيارة انها تستمر فى السير على سرعة معقولة ... افضل من انى اجرى بسرعة والزق للسيارة التى امامى ثم اتوقف على الكوبرى ثم اعاود الطلوع مرة تانية
  

• لو حصل وتوقفت على الكوبرى

انظر جيدا ... هل التوقف ده مؤقت يعنى موش هايستمر ثوانى ... فى الحالة دى اضغط فرامل ودبرياج .... واول العربيات ما تتحرك انقل الغيار الاول واستمر فى السير
لكن
لو وجدت ان التوقف سوف يطول قليلا ... يبقى الافضل انى ارفع فرامل اليد ... وامور الفتيس ... وانتظر حتى تتحرك السيارات .... ثم انقل الغيار الاول .... ثم اخفض فرامل اليد عند الشعور بأن السيارة سوف تتحرك


الخلاصة: ان العربية لو توقفت على الكوبرى اثناء الطلوع ....

• على طول اضغطى الفرامل مع الدبرياج

• مور الفتيس

• ارفعى فرامل اليد

• ارفعى رجلك عن كل حاجة وريحى العربية

• انظرى من خلال زجاج السيارة التى امامك على السيارات التالية

• وعند مشاهدتها تتحرك

• اضغطى بنزين ... لكن بشدة شوية

• اضغطى الدبرياج ... واختارى الغيار الاول

• ارفعى رجلك عن الدبرياج كالمعتاد ... وممكن يكون بسرعة شوية لانك اصلا ضاغطة البنزين بزيادة شوية .... لكن فى نفس الوقت على طوول نزلى فرامل اليد

هاتلاقى العربية اتحركت ولن ترجع الى الخلف

لكن

• لازم ايدك تكون جاهزه فوق فرامل اليد

عشان لو العربيات توقفت مرة تانية ... تعملى الخطوات السابقة بدون تردد

• طبعا لو فيه حد ضرب لك كلاكس من الخلف .... اعتبريه موش موجود ... لان العربية لو رجعت للوراء هاتعمل مشكلة كبيرة جدا لانك اصلا متوقفة على الكوبرى

• طبعا فيه ناس تقدر تتوقف على الكوبرى عن طريق الضغط على البنزين والدبرياج فى نفس الوقت ... يعنى يضغط بنزين خفيف ويرفع رجله عن الدبرياج خفيف ... ويترك العربية متعلقة على الكوبرى حتى تتحرك العربيات وتستمر فى السير

• الموضوع ده ممكن الواحد يعمله لو كان التوقف هايستمر ثانية او ثانيتين ثلاثة

لكن

• لو التوقف انا شايف انه هايكون كبير

يبقى الافضل رفع فرامل اليد زى المثال السابق


الافضل تدربى نفسك على شارع يكون فيه مطلع جامد
وتتوقفى عليه ومرة تانية تستمرى فى السير

• مرة تتوقفى وتستخدمى فرامل اليد

• مرة تتوقفى باستخدام الفرامل والدبرياج

• مرة تتوقفى عن طريق البنزين والدبرياج

مع اطيب التمنيات
اخوكم حسين غزالة

المشاركة الأصلية كتبت بواسطة lela

اذيك يا استاذ حسين اخبار حضرتك ايه رمضان قرب كل سنة وانت طيب النهاردة خرجت بالعربية لوحدى الصبح والحمد لله رجعت كويسة وكنت مبسوطة جدا المهم صوت البنزين عالى جدا عايزة اعرف السبب واعمل ايه ممكن ترد على بسرعة

اهلا بحضرتك ... وكل سنة وحضرتك وجميع الاعضاء بخير وسلامة ... ربنا يقدرنا والشهر يعدى على خير خصوصا فى ايام الحر الشديدة جدا دى

جميل جدا جدا انك خرجتى بالعربية لوحدك النهارده
بيكون شعور جميل قوى قوى
ان الواحد يخرج لوحده ... ويرجع بخير وسلام لوحده

عارفة لو خرجتى كثير قوى ... زى ما عملتى النهاردة الصبح بدرى .... مستواكى هايتقدم بشكل كبير جدا جدا ... وكمان ثقتك هاتزيد بشكل رائع
بس المشكلة فى الصحيان البدرى هههههههههههه ... يعنى لو تقدرى تستحملى شوية كل شىء هايكون تمام

نصيحة: اوعى تنخدعى بالشوارع الخالية من السيارات ... ولا تأخذى حذرك اثناء المرور من التقاطعات .... لان لا قدر الله ممكن اللى بيعدى التقاطع هو كمان فاكر انه ماشى لوحده فى الشارع
انت اعتبرى نفسك ماشية فى عز الظهر ... واحترسى وخدى حرصك تماما ... وعدى التقاطعات بحرص ورجلك فوق الفرامل وبسرعة هادئة ... وممكن اضرب كلاكس تحذيرى ... يمكن يكون فيه عربية داخلة التقاطع وانت موش شايفاها

بالنسبة لصوت العربية العالى ... ممكن يكون له اكثر من سبب
واهم الاسباب من وجهة نظرى:
ان الشكمان يكون مخروم .... يعنى لا قدر الله كان فيه مطب عالى ... والعربية خبطت فى المطب من اسفل ... النتيجة ان الشكمال يتخرم .. وصوت العربية يعلى ... وسحب العربية اى سرعتها تقل عن الاول
بالنسبة للمبتداين ... احيانا كثير لا يثير انتباهم اى تغير فى العربية ... لان اعصابه مشدوده اساسا

النصيحة: حاولى تركزى وتسمعى كويس كل حاجة بتحصل فى العربية ... اى حاجة تسمعيها موش طبيعية ... على طول لازم تعرفى ايه السبب ؟

السبب التانى للصوت المرتفع:
ممكن يكون طريقة قيادتك للسيارة .... يعنى بالبلدى كده ... يقولوا: ان رجلك ثقيلة شوية على البنزين
بمعنى آخر
لو المفروض انى مثلا انقل الغيار الثالث على سرعة 40 كيلوا
نجد ان المبتدأ احيانا ينسى نفسه وينقل الغيار على 60 كيلوا
او احيانا
نجد المبتدأ
ينسى نفسه خالص ... والعربية صوتها عالى جدا وهو موش عايز ينقل الغيار خالص ... يعنى ماشى على 60 لمدة طويلة جدا وعلى الغيار الثانى وموش عايز ينقل الغيار الاول

وده طبعا موش كويس على "اسطوانة الدبرياج" المسئولة عن تحريك العربية ... بالطريقة دى لا قدر الله .. يبقى لازم تتغير ... خصوصا لو انت بتدوسى على البنزين ... والعربية لا تتحرك بسرعة ... او لا تستجيب بسرعة وسحبها بطىء

العيب ده بيظهر عند كل المبتدأين
بسبب خوفهم وطريقة القيادة البطيئة وعدم نقلهم الغيار فى وقت مناسب
لكن بعد ما الواحد يعدى مرحلة التعليم دى على خير
للاسف يضطر انه يغير اسطوانة الدبرياج مرة تانية وترجع العربية الى حالتها الطبيعية والممتازة

واحيانا كثيرة مثلا
منذ شهرين اشترينا عربية تويوتا جديدة
وفى نفس الاسبوع غيرنا للعربية اسطوانة الدبرياج
طبعا لم نسير بالسيارة اى مشوار
كله فى الاول والآخر نصيب

ممكن اى حد فى البيت ... يركب العربية ويخرج بها ... لكن طبعا لازم يكون مستواه متقدم فى السواقة عشان يقدر يحكم ايه هو سبب الصوت ده ؟

لو الشكمان مثلا مخروم .... بسيطة .... 20 جنيه ويتلحم الخرم ... وكل شىء يرجع تمام
لو الاسطوانة حصلها حاجة لا قدر الله ... خلاص ... يشوف فاضل لها من العمر اد ايه ؟ هههههههههه وبعد فترة تعملى حسابك على تغيرها ... لكن دى مكلفة شوية

وربنا يسهل وتكون طريقة القيادة هى اللى عايز تدريب وتعديل فقط ... والعربية مايكونش فيها اى حاجة إن شاء الله

مع اطيب التمنيات
اخوكم حسين غزالة

بعد اذن استاذ حسين عايز اضيف

لو الشكمان مخروم زى ما استاذ حسين قال
الصوت بيكون من اسفل السيارة

لو تلف فى الدبرياج
اعراضه ان السحب قل مع صوت عالى يعنى السرعة مش بتزيد بنفس زيادة ضغطك على دواسة البنزين
وكذلك زيادة استهلاك البنزين واحيانا رجرجة عند الطلوع